Sa pou’w fè avan ou alé étidyé épi moun-lan

1. 1. Avan ou alé étidyé épi on moun, pwépawé byen. Padan ou ka pwépawé, katjilé asou sitiwasyon moun-lan, sa’y ka kwè adan, èk mannyè enfòmasyon-an sa édé’y. Osi, éséyé katjilé si la ni anyen ki kay twò difisil pou’y konpwann, ében pou’y mété an pwatik. An plis di sa, konsidiwé mannyè enfòmasyon-an anba ti sèksyon-an “Lòt Enfòmasyon Ou Sa Gadé” sa édé moun-lan ou ka étidyé épi-a. Èk sèvi enfòmasyon sala si’y nésésè.

Sa pou fè padan’w ka étidyé épi moun-lan

1. 2. Si moun-lan dakò, pwédyé avan’w koumansé létid-la èk lè’w fini létid-la.

2. 3. Fè asiwé ou pa palé twòp. Fiksé asou enfòmasyon-an ki an liv-la, èk kité moun-lan palé libman.

3. 4. Lè’w ka koumansé an sèksyon nèf an liv-la, li pòsyon-an “Sa Ou Kay Apwann” an koumansman sèksyon-an ki kay fè moun-lan sav sa i kay apwann an sèksyon sala. Apa di sa, ou sa mansyonnen déotwa an sé lison-an zòt kay diskité an sèksyon-an.

4. 5. Apwé zòt étidyé tout sé chapit-la adan yon sèksyon, diskité pòsyon-an “Annou Wivizé Sèksyon-an” épi moun-lan. Lè ou fè sa, sa kay édé moun-lan chonjé tout sé bon enfòmasyon-an i ja apwann an sé chapit-la ki an sèksyon-an.

5. 6. Lè’w ka étidyé an lison épi an moun:

   1. Li chak paragraf ki an lison-an.

   2. Li tout sé lévanjil-la ki ni “Li” ében “Annou li” ékwi douvan yo.

   3. Li lòt lévanjil ki an lison-an si sa nésésè.

   4. Jwé tout sé vidiyo-a ki ni “Annou gadé” ékwi douvan yo si yo avélab.

   5. Mandé moun-lan chak kèstyon ki an lison-an.

   6. Mandé moun-lan ou ka étidyé épi-a pou gadé sé pòtwé-a anba ti sèksyon-an “Annou Apwann Pli” èk apwé, mandé’y pou fè an ti wimak asou sa’y wè.

   7. Sèvi ti sèksyon-an “Mi Yonndé Bagay Ou Sa Fè” pou édé moun-lan wè pwogwé-a i ka fè-a. Ében, ou sa ankouwajé’y pou ékwi an lòt bagay i sa fè.

   8. Mandé moun-lan, lè’y té ka pwépawé lison-an, ès la té ni yon atik ében yon vidiyo an ti sèksyon-an “Lòt Enfòmasyon Ou Sa Gadé” i enmen.

   9. Éséyé fè yon lison chak fwa ou étidyé épi moun-lan.

Sa pou’w fè lè’w kité moun-lan

1. 7. Tjenn moun-lan an lidé apwé ou kité’y. Osi, mandé Jéhova pou édé moun-lan kontiné fè pwogwé, èk pou ba’w lasajès-la ou bizwen pou kontiné édé’y.