“Zòt té sipozé ja vini titja.” (Hibrou 5:12) Imajiné! Jéhova, pli bon titja-a an inivès-la ka envité nou pou enstwi lézòt konsèné’y! Népòt asaynman nou ni pou enstwi lavéwité-a konsèné Jéhova, ni an fanmi-an, ni an kongwigasyon-an, ni an minis-la, sé an bèl pwivilaj èk an gwo wèskonsabilité. Ki mannyè nou sa ni siksé?

Nou sa twapé wépons-lan an sa zapòt Pòl té ékwi Timòfi: “Sé pou ou . . . li lévanjil-la, pwéché, épi enstwi.” Osi, Pòl té di, “Kontiné fè sé bagay sala, paski si ou kontiné ou kay sové ni kò’w ni sé moun-an ki kay tann ou-an.” (1 Timòfi 4:13, 16) Nou ni an konmisyon pou patajé ki sa sové lavi moun. Alò, nou ni pou fè éfò-a pou nou li èk enstwi pli byen. Nou pwépawé ti liv sala pou édé’w fè sa. Konsidiwé déotwa bagay ki ka pawèt souvan an chak lison.

Jéhova sé “Pli Gwo Titja-a.” (Izaya 30:20, New World Translation) Magwé ti liv sala kay édé’w pou li èk enstwi pli byen, pa janmen obliyé Jéhova sé sous konmisyon nou èk sé li ki ka anmennen moun. (Jan 6:44) Alò, pwédyé pou lisentèspwi’y èk toujou sèvi Bib-la. Toujou bay Jéhova laglwa èk pa janmen pwan’y pou kò’w. Éséyé pou édé moun dévlopé an tjè ki plen lanmityé pou Bondyé.

Jéhova ja envité’w pou enstwi moun pli enpòtan konmisyon-an asou latè-a. Nou ni konfyans ki, kon ou ka dépan asou “kouway-la Bondyé ba,” ou kay ni siksé.​—1 Pita 4:11.

Titja menm kon zòt,

Pwensipal Konmité Témwen Jéhova