LISON 01

Koumannyè Bib-la Sa Édé’w Ni An Pli Mèyè Lavi?

JWÉ

Nou asiwé ou kay dakò nou tout vlé an pli mèyè lavi. Mé la ni bagay ki ka twakasé lidé nou. Bagay tèl kon maladi, soufwans èk lanmò. Osi, nou vlé sav sa ki kay fèt an tan pou vini. An plis di sa, nou ni pou débat pou otjipé fanmi nou paski nou vlé yo ni an bon lavi. Èk osi, la ni lòt bagay nou ni pou aji épi touléjou. Bib-la ja édé plizyè moun pou ni an pli mèyè lavi, èk i ja wéponn an chay kwèsyon ki enpòtan. San dout, Bib-la sa édé’w. Wi, Bib-la sa édé tout moun.

1. Ki diféwan kwèsyon Bib-la ka wéponn?

Bib-la ka bay wépons-lan pou kwèsyon tèl kon: Ki mannyè lavi koumansé asou latè-a? Pou ki wézon nou asou latè-a? Pouki la ni tèlman soufwans konsa? Kisa ki ka wivé nou lè nou mò? Pouki la ni tèlman ladjè si tout moun vlé viv an lapé? Ès lézòm kay détwi latè-a? Ès ou sav i bon pou mandé kwèsyon konsa? Ès ou pa té kay kontan pou twapé sé wépons-lan pou sé kwèsyon sala pou kò’w menm?

2. Ki mannyè Bib-la sa édé nou?

La ni an chay diféwan mannyè Bib-la sa édé nou touléjou. Pou ègzanp, Bib-la ni bon konsèy ki ka moutwé fanmi mannyè yo sa vwéman ni lakontantman. Osi, lè nou ni tèt cho, i ka moutwé nou sa pou fè èk sa pou pa fè. Bib-la sa moutwé nou mannyè pou twavay wèd, èk mannyè pou kontan twavay nou. Ou kay apwann pli kon ou ka konsidiwé sa Pawòl Bondyé ka di. Nou asiwé ou kay dakò épi sa 2 Timòfi 3:16 ka di, “tout lévanjil-la . . . enpòtan.” Konsa, tout sa ki an Bib-la sa vwéman édé nou.

Piblikasyon sala pa ka wiplasé Bib-la. Pito, i ka édé’w ègzanminé Bib-la pou kò’w menm. Sé pou sa nou ka enkouwajé’w pou li sé lévanjil-la ki an sé lison-an. Èk gadé pou wè si yo ka dakò épi sa ou ka apwann.

ANNOU APWANN PLI

Apwézan, annou apwann mannyè Bib-la ja édé moun, mannyè ou sa enjwi Pawòl Bondyé, èk pouki i bon pou twapé èd pou konpwann Bib-la.

3. Bib-la sa djidé nou

Menm kon an lanp, Bib-la ka kléwé chimen nou. I sa moutwé nou mannyè pou fè bon disizyon, èk i sa fè nou konnèt sa ki kay fèt an tan pou vini.

Annou li Sam 119:105, èk apwé nou kay kozé asou sé kwèsyon sala:

Ès ou kwè moun-lan ki té ékwi lévanjil sala té ka apwésyé Pawòl Bondyé? Poutji ou ka di sa?
Ès ou kwè Bib-la sa djidé’w? Poutji ou ka di sa?

4. Bib-la ka ban nou wépons pou sé kwèsyon-an ki ka twakasé lidé nou

Pou plizyè lanné yon madanm té ni kwèsyon ki té ka twakasé lidé’y, èk i twapé sé wépons-lan an Bib-la. Annou gadé VIDIYO-A, Pa Janmen Pèd Èspwa! èk apwé nou kay kozé asou sé kwèsyon sala:

VIDIYO: Pa Janmen Pèd Èspwa! (1:48)

Kisa ki té ka twakasé lidé madanm-lan an vidiyo-a?
Ki koté i twapé sé wépons-lan pou sé kwèsyon-an i té ni-an?

Sé pa pou nou pè pou mandé kwèsyon, paski Bib-la ka enkouwajé nou pou mandé kwèsyon. Annou li Mafyou 7:7, èk apwé nou kay kozé asou sé kwèsyon sala:

Ki kwèsyon ou ni ki ka twakasé lidé’w? Ès ou kwè ou sa twapé wépons-lan an Bib-la?

5. Ou sa enjwi li ében kouté Pawòl Bondyé

An chay moun kontan li ében kouté Pawòl Bondyé, èk sa ka mennen yo an chay bennéfis. Annou gadé VIDIYO-A, Li Bib-la èk apwé nou kay kozé asou sé kwèsyon sala:

VIDIYO: Li Bib-la (2:05)

Ès sé jenn moun-lan an vidiyo-a té kontan li?
Menm si sé jenn moun-lan pa té kontan li, pouki yo ka enjwi li sa ki an Bib-la?

Bondyé ban nou Bib-la pou enstwi nou, pou ankouwajé nou, èk pou ban nou fòs épi èspwa. Annou li Ronm 15:4, èk apwé nou kay kozé asou sé kwèsyon sala:

Ès ou vlé konnèt ki mannyè Bib-la sa konfòté’w? Bib-la ka di nou kisa ki kay fèt an tan pou vini. Ès ou vlé sav sa i ka di?

6. Lézòt moun sa édé nou konpwann Bib-la

An chay moun ka li Bib-la pa kò yo, mé lè yo diskité’y épi lòt moun yo ka konpwann li pli mèyè. Annou li Twavay 8:26-31, èk apwé nou kay kozé asou kwèsyon sala:

Ki mannyè nou sa konpwann Bib-la pli mèyè?—Gadé Twavay 8:30, 31 ankò.

Nonm-lan ki té sòti péyi Ifiyopiya té bizwen asistans pou konpwann lévanjil-la. Jòdi, an chay moun ka konpwann Bib-la pli mèyè lè yo diskité’y épi lòt moun

ADAN MOUN KA DI: “Lè’w ka étidyé Bib-la ou ka gaspiyé tan’w.”

Mé pou ou menm, kisa ou kwè? Pouki?

CHONJÉ SÉ PWEN SALA

Bib-la ka ban nou konsèy nou sa sèvi an lavi nou touléjou. I ka ban nou wépons asou kwèsyon ki ka twakasé lidé nou, épi i ka enkouwajé nou èk ban nou fòs épi èspwa.