LISON 05

Bib-la Sé Konmisyon Bondyé Pou Nou

JWÉ

Bib-la sé on bèl kado Jéhova ban nou. Bèl kado sala ni swasant sis (66) ti liv adan’y. Mé, pitèt ou ka katjilé: ‘Si sé nonm ki ékwi Bib-la, pou ki wézon nou ka di Bib-la sé Pawòl Bondyé? Èk kisa Jéhova té fè pou pwotéjé Bib-la?’ Annou wè koumannyè Bondyé fè asiwé tout moun sa twapé konmisyon’y ki an Bib-la.

1. Si sé nonm ki ékwi Bib-la, pou ki wézon nou ka di Bib-la sé Pawòl Bondyé?

I pwan apipwé kawant (40) diféwan nonm pwèskè yon mil sis san (1,600) lanné pou ékwi Bib-la. Yo ékwi Jennésis, pwèmyé liv-la ki an Bib-la, apipwé twa mil senk san (3,500) lanné ki pasé. Èk yo ékwi dènyé liv-la, Wévélasyon, apipwé yon mil nèf san (1,900) lanné ki pasé. Sé nonm-lan ki ékwi Bib-la, pa té viv an menm tan-an. Anfen, plizyè di yo pa té menm konnèt yonn a lòt. Osi, yo té ka fè diféwan twavay. Pou ègzanp, adan di yo té fama. Adan té bèwjé. La té ni sa ki té wa, èk la té jis ni yonn ki té on dòktè. Magwé sa, tout sa ki ékwi an Bib-la, an lilyon. Ki mannyè sa posib? Sa posib paski Bib-la sé Pawòl Bondyé. (Li 1 Tèsalonnika 2:13.) Lévanjil-la di nou: “Sé Lèspwi Bondyé ki bwennen tjè sé moun sala, pou fè yo palé konmisyon-an Bondyé ba yo pou palé-a.” a (2 Pita 1:21) Wi, Bondyé sèvi lisentèspwi’y pou konminiké épi sé nonm-lan ki ékwi Bib-la. Alò yo ékwi katjil Bondyé, pa katjil yo menm.—2 Timòfi 3:16.

2. Ki moun ki sa twapé bennéfis hòd Bib-la?

Bondyé di: “Tout nasyon, tout lafanmi, moun ki ka palé tout diféwan langaj, épi moun ki an tout péyi,” sa twapé bennéfis hòd bon nouvèl-la ki an Bib-la. (Li Wévélasyon 14:6.) Jòdi, ou sa twapé Bib-la an pli langaj pasé tout lòt liv. Alò, oliwon latè-a, pwèskè tout moun sa li ében kouté Pawòl Bondyé an langaj yo.

3. Kisa Jéhova té fè pou pwotéjé Bib-la?

Sé bagay-la yo té ékwi Bib-la asou-a, pa té sa diwé pou an chay tan. Konsa, si moun pa té kontiné kòpi Bib-la, nou pa té kay ni’y jòdi. Kanmenm, nonm ki té enmen Bib-la, fè asiwé yo té fè plizyè kòpi ki té aplon. Magwé moun an lotowité té éséyé pou détwi Bib-la, la té ni moun ki té enmen Bib-la tèlman, yo mété lavi yo anwis pou pwotéjé’y. Konsa i byen klè, Jéhova pa té kité pyèsonn ében pyès bagay anpéché nou twouvé Pawòl li. Bib-la menm ka di: ‘Pawòl Bondyé . . . ka diwé pou tout tan.’—Izaya 40:8.

ANNOU APWANN PLI

Apwézan, annou apwann pli konsèné mannyè Bondyé té sèvi nonm pou ékwi Bib-la, mannyè Bondyé té pwotéjé’y, èk mannyè Bondyé té fè’y posib pou tout moun twouvé’y.

4. Bib-la menm ka di nou pawòl ki moun ki adan’y

Annou gadé VIDIYO-A, Pawòl Ki Moun Ki An Bib-la?—An Ti Pòsyon. Apwé nou kay li 2 Timòfi 3:16, èk nou kay kozé asou sé kwèsyon sala:

VIDIYO: Pawòl Ki Moun Ki An Bib-la?—An Ti Pòsyon (2:48)

Si sé nonm ki ékwi Bib-la, pouki nou ka di Bib-la sé Pawòl Bondyé?
Ès ou kwè Bondyé té sa mété katjil li an sèvèl lézòm pou yo té sa ékwi Bib-la? Pouki ou kwè sa?

Si yon moun mandé an lòt moun pou ékwi yon lèt ba’y, konmisyon-an ki an lèt-la sé pa konmisyon moun-lan ki ka ékwi lèt-la. Alò, menm si sé nonm ki ékwi Bib-la, konmisyon-an ki an Bib-la sé pa konmisyon yo, mé sé konmisyon Bondyé

5. Moun pa té sa détwi Bib-la

Si Bib-la sé Pawòl Bondyé, asiwéman Bondyé té kay pwotéjé’y. An tan pasé, nonm ki té ni an chay pouvwa té éséyé pou détwi Pawòl Bondyé. Osi, diféwan mèt wilizyon té éséyé pou anpéché moun ni on Bib. Magwé tout òpozisyon sala, la osi té ni an chay moun ki té fè tout sa yo té pé, pou pwotéjé Bib-la. Mé i té byen danjéwé pou fè sa. Anfen, sé moun sala té sa jis pèd lavi yo. Pou apwann konsèné yon nonm ki té mété lavi’y anwis pou pwotéjé Bib-la, annou gadé VIDIYO-A, Yo Té Kontan Bib-la (William Tyndale)—An Ti Pòsyon. Èk apwé nou kay kozé asou sé kwèsyon sala:

VIDIYO: Yo Té Kontan Bib-la (William Tyndale)—An Ti Pòsyon (6:17)

Kon’w apwann mannyè moun té mété lavi yo anwis pou pwotéjé Bib-la, ès sa pa ka motivé’w pou apwésyé Bib-la pli? Pouki?

Annou li Sam 119:97, èk apwé nou kay kozé asou kwèsyon sala:

Kisa ki pousé an chay moun pou mété lavi yo anwis pou twadwi Bib-la, èk pou fè asiwé moun té sa twapé Bib-la?

6. Bib-la sé pou tout moun

Bib-la sé liv-la ki avélab an pli langaj asou latè-a. Èk osi, Bib-la sé sèl liv-la pwèskè tout moun asou latè-a ni. Annou li Twavay 10:34, 35, èk apwé nou kay kozé asou sé kwèsyon sala:

Pouki Bondyé ka fè asiwé tout moun sa twapé Bib-la an langaj yo menm?
Kisa ou ka apwésyé konsèné Bib-la?

Pwèskè

100%

an tout moun ki asou latè-a

sa twapé Bib-la adan an langaj yo sa konpwann

Ou sa twapé Bib-la an pli pasé

3,000

langaj

menm si sé an ti pòsyon

Moun ja pwodwi apipwé

5,000,000,000 Bib.

Pyès lòt liv p’òkò vini pwé limowo sala

ADAN MOUN KA DI: “Bib-la sé yon liv nonm ékwi dépi tan lontan.”

Mé pou ou menm, kisa ou kwè? Pouki?
Ki pwèv nou ni ki, Bib-la sé Pawòl Bondyé?

CHONJÉ SÉ PWEN SALA

Bib-la sé vwéman Pawòl Bondyé. Bondyé fè asiwé tout moun oliwon latè-a sa twapé on Bib.

Annou Wivizé Sa Nou Ja Apwann

Sé nonm ki ékwi Bib-la. Alò, koumannyè nou sa di, Bib-la sé Pawòl Bondyé?
Kisa ou ka apwésyé lè’w katjilé asou mannyè moun twadwi Bib-la, mannyè yo pwotéjé’y, èk mannyè yo fè’y posib pou tout moun twapé on kòpi?
Paski Jéhova fè on gwo éfò pou palé épi’w; koumannyè sa ka fè’w santi?

Nou fini lison sala asou dat sala:

Mi Yonndé Bagay Ou Sa Fè

Fè yon éfò pou li on ti pòsyon an Bib-la touléjou. Sèvi enfòmasyon-an ki an bwèt-la “Koumansé Li Bib-la,” kon yon djid.

Lòt bagay ou sa fè:

Lòt Bagay Mwen Vlé Fè