LISON 07

Kisa Bib-la Ka Di Nou Konsèné Jéhova?

JWÉ

Lè’w katjilé konsèné Dyé Jéhova, kisa ki ka vini an lidé’w? Ès ou ka katjilé, Jéhova si tèlman gwan nou pa anyen douvan’y? Ében pitèt ou ka katjilé Bondyé ni an chay pouvwa, mé I pa ni kawaktè. Konsa, kisa Bib-la ka di nou konsèné Jéhova? Bib-la ka di nou konsèné sé bèl kawaktè-a Jéhova ni. Osi Bib-la ka moutwé Jéhova mélé épi nou.

1. Pouki nou pa sa wè Bondyé?

Bib-la di nou Bondyé sé yon lèspwi. Jan 4:24 di: “Bondyé sé lèspwi i yé.” Sa vlé di, Jéhova pa ni yon kò ki fèt épi lachè èk zo kon nou. Osi Bib-la di nou, Bondyé ka viv an syèl, sa sé an plas nou pa sa wè. Konsa nou pa sa wè Bondyé.

2. Ki diféwan bèl kawaktè Jéhova ni?

Magwé nou pa sa wè Jéhova, lè nou vini konnèt li nou kay enmen’y paski i ni an chay bèl kawaktè. Pou ègzanp, Bib-la ka di nou, “Bondyé Senyè-a enmen sa ki dwèt èk i pa ka tounen do’y asou sé moun li-an”. (Sam 37:28) Osi Bib-la ka di nou, Jéhova “bon èk i ni konpasyon”. (Jémz 5:11) Èk, mi an lòt bagay Bib-la ka di nou ankò, Jéhova vwéman mélé épi moun ki ka soufè. Sam 34:18 ka di nou, Jéhova “toujou pwé sé moun-an ki dékouwajé-a, èk i ka sové sé moun-an ki pèd èspwa-a.” Bon, ès ou sav aksyon nou sa afèkté Bondyé? Lè an moun chwazi pou fè sa ki pa bon, i ka fè Jéhova twis. (Sam 78:40, 41) Mé lè an moun chwazi pou fè sa ki bon, i ka fè tjè Jéhova kontan.—Li Pwovèb 27:11.

3. Ki mannyè Jéhova ka moutwé i enmen nou?

Pli bèl kawaktè-a Jéhova ni sé lanmityé. Anfen Bib-la di: “Lanmityé sé kawaktè Bondyé”. (1 Jan 4:8) Jéhova ka sèvi Bib-la pou moutwé i enmen nou. Mé osi, lè nou gadé kwiyasyon, nou ka wè sé pa dé enmen Jéhova enmen nou. (Li Twavay 14:17.) Pou ègzanp, gadé mannyè-a i fè nou. Jéhova ban nou zyé pou nou wè bèl koulè. I ban nou zòwèy pou nou tann bèl mizik. Èk i ban nou an chay bon manjé pou nou enjwi. Konsa i byen klè, Jéhova enmen nou èk i vlé nou enjwi lavi.

ANNOU APWANN PLI

Apwézan, nou kay apwann kisa Jéhova ka sèvi pou fè bagay ki èstòdinè. Èk apwé nou kay apwann mannyè Jéhova ka moutwé nou sé bèl kawaktè’y-la.

4. Lisentèspwi sé fòs Bondyé

Nou ka sèvi lanmen nou pou fè twavay nou. An menm mannyè-a, Jéhova ka sèvi lisentèspwi’y pou akonpli sa i vlé fè. Bib-la di nou lisentèspwi sé pa an moun. Mé lisentèspwi sé fòs-la Bondyé ka sèvi pou fè diféwan bagay. Annou li Louk 11:13 èk Twavay 2:17, èk apwé nou kay kozé asou sé kwèsyon sala:

Silon sé vèwsé sala, ès ou kwè lisentèspwi sé an moun ében fòs Bondyé? Poutji ou di sa?

Jéhova ka sèvi lisentèspwi’y pou fè bagay ki èstòdinè. Annou li Sam 33:6 èk 2 Pita 1:20, 21, èk apwé nou kay kozé asou kwèsyon sala:

Kisa Jéhova ja sèvi lisentèspwi’y pou fè?

5. Jéhova ni an chay bèl kawaktè

Magwé Moziz sété an sèvant Bondyé, i té vlé konnèt Jéhova pli mèyè. Alò Moziz té di Bondyé: ‘Édé mwen konnèt mannyè’w, konsa mwen sa konnèt ou.’ (Ègzodòs 33:13) An wépons-lan Bondyé té bay Moziz, nou ka wè sé diféwan bèl kawaktè-a Jéhova ni. Annou li Ègzodòs 34:4-6, èk apwé nou kay kozé asou sé kwèsyon sala:

Silon Ègzodòs 34:6, ki diféwan bèl kawaktè Jéhova ni?
Kilès an sé kawaktè sala ou enmen pli?

6. Jéhova enmen pèp li

Lè pèp Bondyé té èslav an péyi Éjip, yo té ka soufè an chay. Ki mannyè Jéhova té santi lè i wè pèp li ka soufè konsa? Annou li wakont-la an Ègzodòs 3:1-10 èben annou kouté ODIYO-A, Jéhova Té Mélé Épi Yo Lè Yo Té Ka Soufè. Èk apwé nou kay kozé asou sé kwèsyon sala:

ODIYO: Jéhova Té Mélé Épi Yo Lè Yo Té Ka Soufè (2:45)

Silon Ègzodòs 3:7, 8, ki mannyè Jéhova ka santi lè’y wè lézòm ka soufè?
Ès ou kwè Jéhova vwéman vlé édé lézòm? Ès ou kwè Jéhova ni pouvwa-a pou édé lézòm? Pouki ou ka kwè sa?

7. Lè nou gadé kwiyasyon nou sa apwann konsèné kawaktè Jéhova

Jéhova ka sèvi kwiyasyon pou moutwé nou sé bèl kawaktè’y-la. Annou gadé VIDIYO-A, Kwéyasyon Ka Édé Nou Wè Jéhova Enmen Nou—Kò Nou. Apwé annou li Ronm 1:20, èk nou kay kozé asou kwèsyon sala: