LISON 09

Lapwiyè Sa Édé’w Vini Pli Pwé Bondyé

JWÉ

Lapwiyè sa édé’w an diféwan mannyè. Pa ègzanp, i sa édé’w lè ou bizwen diwèksyon an lavi’w, èvèk lè ou vlé wépons pou kwèsyon ki enpòtan. Lapwiyè sa édé’w lè ou bizwen soulajman. Osi, lapwiyè sa édé’w vini pli pwé Bondyé. Mé pitèt ou ka katjilé: Ki mannyè mwen sipozé pwédyé? Ès Bondyé ka kouté tout lapwiyè? Kisa mwen sa fè pou Bondyé tann lapwiyè mwen? Annou twapé wépons-lan pou sé kwèsyon sala.

1. Bay ki moun nou sipozé pwédyé? Konsèné kisa nou sa pwédyé?

Jézi té pwédyé bay Jéhova èk i té enstwi sé disip li-a pou pwédyé sèlman bay Jéhova. Lè Jézi té enstwi sé disip li-a mannyè-a pou pwédyé, i di yo: “Mi kalité lapwiyè-a pouʼw pwédyé: ‘Papa nou ki an syèl, . . .’” (Mafyou 6:9) Lè nou ka toujou palé épi Jéhova an lapwiyè, sa ka fòtifyé wilasyon nou épi’y.

Nou sa pwédyé konsèné népòt bagay. Mé, pou Bondyé wéponn lapwiyè nou, nou ni pou pwédyé silon volonté’y èk obéyi’y. 1 Jan 5:14 di: “Népòt bagay nou mandé [Bondyé], dépi nou ka fè sa i di nou pou fè, i kay tann nou.” Jézi té mansyonnen déotwa bagay nou sa pwédyé pou. (Li Mafyou 6:9-13.) Mé osi, nou sa pwédyé konsèné bagay ki ka afèkté nou. Èk i enpòtan pou nou wimèsyé Bondyé èk mandé’y pou édé lézòt lè nou ka pwédyé.

2. Ki mannyè nou sipozé pwédyé?

Bib-la di nou pou ‘ouvè tjè nou ba [Bondyé]’. (Sam 62:8) Alò, lapwiyè nou sipozé sòti ofon tjè nou. Nou sa pwédyé fò ében nou sa pwédyé an silans. Osi, nou sa pwédyé népòt lè épi népòt koté. Mé, nou toujou ni pou pwédyé adan an mannyè ki wèspèktab.

3. Ki mannyè Bondyé ka wéponn lapwiyè nou?

Jéhova ka wéponn lapwiyè nou an plizyè diféwan mannyè. Yonn an sé bagay-la i ka sèvi pou wéponn lapwiyè nou, sé Bib-la. Nou sa twapé wépons pou sé kwèsyon-an nou ni an Bib-la. Sam 19:7 di: ‘[Pawòl Bondyé] . . . ka bay lakonpwann pou tout moun ki pa ni.’ (Li Jémz 1:5.) Konsa, i enpòtan pou nou li Bib-la. An lòt mannyè Jéhova ka wéponn lapwiyè nou sé sa, i ka ban nou lapé an tjè nou èk an lidé nou lè nou ni pwòblenm. Èk osi, Jéhova sa pousé sèvant li pou édé nou lè nou bizwen èd.

ANNOU APWANN PLI

Apwézan, annou apwann mannyè nou sa ofè lapwiyè ki kay plè Bondyé èk osi, nou kay apwann mannyè lapwiyè sa édé nou.

4. Bagay nou sipozé fè pou Bondyé kouté lapwiyè nou

Kisa nou ni pou fè pou Bondyé kouté lapwiyè nou? Annou gadé VIDIYO-A, Ès Bondyé Ka Kouté Tout Lapwiyè?—An Ti Pòsyon.

VIDIYO: Ès Bondyé Ka Kouté Tout Lapwiyè?—An Ti Pòsyon (2:42)

Jéhova vlé nou palé épi’y an lapwiyè. Annou li Sam 65:2, èk apwé nou kay kozé asou sé kwèsyon sala:

Lévanjil-la ka kwiyé Bondyé ‘[Moun-lan] ki ka tann lapwiyè’. Ès ou kwè Bondyé vlé’w pwédyé ba’y? Pouki?

Si nou vlé Bondyé kouté lapwiyè nou, nou ni pou viv lavi nou an mannyè-a i vlé nou viv. Annou li Mayka 3:4 èk 1 Pita 3:12, èk apwé nou kay kozé asou kwèsyon sala:

Pou ki wézon Jéhova pa ka kouté lapwiyè tout moun?

Avan an ladjè toulé dé lawmé-a ka pwédyé pou Bondyé édé yo ganyen. Ès ou kwè Bondyé kay wéponn sé lapwiyè sala?

5. Nou ni pou pwédyé ofon tjè nou

Adan moun ka wépété menm lapwiyè-a chak fwa yo ka pwédyé. Pitèt sé konsa yo apwann pou pwédyé. Mé, ès sé konsa Bondyé vlé nou pwédyé? Annou li Mafyou 6:7, èk apwé nou kay kozé asou kwèsyon sala:

Lévanjil-la di “pa bat bouch ou ennitil”. Yon lòt mannyè pou di sa sé, ‘pa wépété menm bagay-la’. Kisa ou sa fè pou’w pa wépété menm bagay-la chak fwa ou ka pwédyé?

Toulé jou ou sa katjilé asou kéchòy ou sa wimèsyé Jéhova pou. Si ou fè sa chak jou pou yon simenn, ou kay wimèsyé Bondyé pou sèt diféwan bagay san ou wépété kò’w.

On bon papa vlé ich li pou di’y sa ki vwéman an tjè’y. An menm mannyè-a lè nou ka pwédyé Jéhova vlé nou di’y sa ki ofon tjè nou

6. Lapwiyè sé on bèl kado Bondyé ban nou

Ki mannyè lapwiyè sa édé nou lè nou ni pwòblenm? Annou gadé VIDIYO-A, Lapwiyè Sa Édé Nou Lè Bagay Mové.

VIDIYO: Lapwiyè Sa Édé Nou Lè Bagay Mové (1:32)

Bib-la ka ban nou asiwans-lan ki, lè nou pwédyé nou sa twapé lapé an lidé nou èk an tjè nou. Annou li Filipay 4:6, 7, èk apwé nou kay kozé asou sé kwèsyon sala:

Menm si lapwiyè pa ka tiwé tout pwòblenm nou, ki mannyè lapwiyè sa édé nou?
Ki diféwan bagay ou vlé mansyonnen an lapwiyè’w?

Ès ou té sav?

Lè nou di “amèn” ében “ensiswatil” an bout lapwiyè nou, sé konmsi nou ka di “kité’y fèt” ében “mwen dakò.” Dépi tan lontan moun ka di “amèn” ében “ensiswatil” an bout lapwiyè yo.—1 Kwonnikèl 16:36.

7. Toujou fè tan pou pwédyé

Délè nou ka ni tèlman bagay pou fè, nou ka obliyé pou pwédyé. Ès Jézi té ka fè tan pou pwédyé? Annou li Mafyou 14:23 èk Mak 1:35, èk apwé nou kay kozé asou sé kwèsyon sala:

Kisa Jézi té fè pou’y twapé tan pou pwédyé?
Kisa ou sa fè pou’w twapé tan pou pwédyé?

ADAN MOUN KA DI: “Bondyé ka kouté tout lapwiyè.”

Mé ou menm, kisa ou kwè?

CHONJÉ SÉ PWEN SALA

Lapwiyè ki sòti ofon tjè nou sa édé nou vini pli pwé Bondyé. Lè nou pwédyé, Bondyé ka ban nou lapé an lidé nou èk an tjè nou. Osi, Bondyé ka ban nou fòs-la pou nou fè sé bagay-la ki ka plè’y-la.