LISON 16

Kisa Jézi Té Fè Padan I Té Asou Latè-a?

JWÉ

An chay moun ni diféwan lopinyon konsèné Jézi. Pou ègzanp, la ni moun ki ka gadé’y kon on tibébé toujou, la ni moun ki ka kwè i sété annèk on bon nonm, èk la ni moun ki ka sèlman katjilé asou mannyè-a i mò. Mé lè nou ègzanminé lavi Jézi lè i té asou latè-a, ès ou kwè nou sa apwann pli konsèné’y? An lison sala, nou kay diskité déotwa bagay Jézi té fè lè’y té asou latè-a. Èk osi, nou kay diskité mannyè sé bagay sala sa édé’w.

1. Ki twavay Jézi fè ki té pli enpòtan?

Pli enpòtan twavay-la Jézi té fè lè’y té asou latè-a, sété pou “pwéché Bon Nouvèl konsèné ki mannyè Bondyé kay établi kondwit li”. (Li Louk 4:43.) I té vlé tout moun konnèt Bondyé kay établi an wéyòm ében an gouvèdman, ki kay tiwé tout pwòblenm lézòm. a Pou twa lanné é dimi Jézi té twavay wèd pou di moun bon nouvèl sala.—Mafyou 9:35.

2. Pou ki wézon Jézi té fè miwak?

Bib-la mansyonnen an chay ‘miwak épi gwan twavay Bondyé té bay Jézi pouvwa-a pou’y fè’. (Twavay 2:22) Pou ègzanp, Bondyé té bay Jézi pouvwa-a pou kontwolé mové tan, pou swen konmen mil moun ki té fen, pou djéwi lé malad èvèk pou wésisité lé mò. (Mafyou 8:23-27; 14:15-21; Mak 6:56; Louk 7:11-17) Sé miwak-la Jézi té fè-a té moutwé a klè sété Bondyé ki té voyé’y. Mé osi yo té moutwé Jéhova ni pouvwa-a pou tiwé tout pwòblenm nou.

3. Kisa nou sa apwann an mannyè-a Jézi té viv lavi’y?

Jézi obéyi Jéhova an tout sitiwasyon. (Li Jan 8:29.) Menm si Jézi té ni an chay òpozisyon lè’y té asou latè-a, i fè tout sa Papa’y té mandé’y pou fè. Jézi té moutwé i posib pou lézòm sèvi Bondyé menm si yo anba sitiwasyon ki difisil. Alò, Jézi “kité an ègzanp kon sa [nou] kay swiv menm chimen épi’y”.—1 Pita 2:21.

ANNOU APWANN PLI

Apwézan, annou konsidiwé mannyè Jézi té fè miwak èk mannyè i té di moun konsèné bon nouvèl-la.

4. Jézi té di moun konsèné bon nouvèl-la

Jézi té maché konmen san lyé asou chimen lapousyè, pou di tout moun i jwenn konsèné bon nouvèl-la. Annou li Louk 8:1, èk apwé nou kay kozé asou sé kwèsyon sala:

Ès Jézi té pwéché sèlman bay moun ki té vini pou tann li palé?
Ki éfò Jézi té fè pou jwenn moun?

Bondyé di Mèsaya-a té kay di moun konsèné bon nouvèl-la. Annou li Izaya 61:1, 2, èk apwé nou kay kozé asou sé kwèsyon sala:

Ki mannyè Jézi té akonpli pwofèsi sala?
Ès ou kwè jòdi jou moun bizwen tann bon nouvèl sala?

5. Jézi té enstwi lavéwité ki ni an chay valè

Jézi té pwéché bon nouvèl-la konsèné Wéyòm-lan, mé osi i ban nou lison ki sa édé nou an lavi nou toulé jou. Annou konsidiwé déotwa ègzanp asou sa Jézi té pwéché alè Mòn-an. Annou li Mafyou 6:14, 34 èk chapit 7:12, èk apwé nou kay kozé asou sé kwèsyon sala:

Ki konsèy Jézi té bay an sé vèwsé sala nou sa sèvi an lavi nou touléjou?
Ès ou kwè sé konsèy sala sa wédé nou jòdi jou?

6. Jézi té fè an chay miwak

Jéhova té bay Jézi pouvwa pou fè an chay miwak. Pou wè yon ègzanp, annou li Mak 5:25-34 ében annou gadé VIDIYO-A, Èk apwé nou kay kozé asou sé kwèsyon sala:

VIDIYO: Jézi Djéwi An Madanm Ki Té Malad (5:10)

Ki asiwans madanm-lan an vidiyo-a té ni?
Kisa ou té kontan konsèné miwak sala?

Annou li Jan 5:36, èk apwé nou kay kozé asou kwèsyon sala:

Kisa sé miwak-la Jézi té fè-a ka di’w konsèné’y?

Ès ou té sav?

An chay an sé bagay-la nou konnèt konsèné Jézi, sòti an pwèmyé kat (4) liv Tèstanman Nèf-la—Mafyou, Mak, Louk, èk Jan. Chak liv ka ban nou diféwan enfòmasyon konsèné Jézi. Lè’w mété tout sé détay sala ansanm yo ka ba’w an bèl pòtwé konsèné lavi Jézi.

LIV MAFYOU

Mafyou té ékwi liv li pwèmyé. Liv sala ka di nou an chay konsèné sa Jézi té enstwi, sitou sa’y té di konsèné Wéyòm Bondyé.
LIV MAK

Mak té ékwi liv-la ki pli kout-la. I ka palé konsèné an chay bagay ki byen antéwésan ki ka fè nou vlé li’y.
LIV LOUK

Louk di nou mannyè lapwiyè té enpòtan pou Jézi èk mannyè Jézi té twété fanm épi jantiyès.
LIV JAN

Jan ka di nou an chay konsèné kalité moun-lan Jézi té yé, èk sé konmézasyon-an i té ni èvèk sé bon jan’y-lan èvèk lézòt.