LISON 21
Ki Mannyè Témwen Jéhova Ka Pwéché Bon Nouvèl-la Owon Latè-a?
Toutalè, Jéhova kay sèvi Wéyòm li pou tiwé tout pwòblenm nou. Sa vwéman sé bon nouvèl, ès pa? Nouvèl sala twò bon pou nou tjenn li pou kò nou! Sa sé on konmisyon Jézi té vlé tout moun konnèt. I té koumandé sé disip li-a pou pòté konmisyon sala bay tout moun. (Mafyou 28:19, 20) Ki mannyè Témwen Jéhova ka obéyi koumandman sala?
1. Mafyou 24:14 ka di “Moun kay pwéché Bon Nouvèl-la . . . toupatou an latè-a”. Ki mannyè twavay sala ka fèt jòdi jou?
Jézi té di: “Moun kay pwéché Bon Nouvèl-la . . . toupatou an latè-a.” (Mafyou 24:14) Alò i enpòtan an chay pou pwéché bon nouvèl-la, èk Témwen Jéhova byen kontan pou fè twavay sala. I ka pwan an chay éfò èvèk koòdinasyon pou pwéché, paski nou ka pwéché toupatou an latè-a an plis pasé yon mil (1,000) langaj! San èd Jéhova, i té kay enposib pou fè twavay sala.
2. Kisa nou ka fè pou pwéché bay moun?
Nou ka pwéché bay moun népòt koté nou sa jwenn yo. Alò, menm kon sé Kwityen-an an pwèmyé syèk-la, nou ka alé “lakay moun” pou pwéché ba yo. (Twavay 5:42) Lè nou pwéché an mannyè sala, nou ka palé ba konmen milyon moun chak lanné. Mé, nou pa ka toujou jwenn moun lakay yo. Konsa, nou ka pwéché lòt koté tèl kon plas piblik. Osi, nou ka toujou gadé pou lokazyon pou palé épi moun konsèné Jéhova èk divwa’y.
3. Ki moun ki sipozé pwéché bon nouvèl-la?
Tout Kwityen sipozé pwéché bon nouvèl-la. Sa sé on twavay nou ka pwan byen sèwyé. Konsa, nou ka fè tout sa nou pé pou pwéché paski nou sav i sa sové lavi moun. (Li 1 Timòfi 4:16.) Pyèsonn pa ka péyé nou pou fè twavay sala. Kon Bib-la di: “Ou ja wisivwè pouvwa sala pou anyen, kon sa alé fè sé bagay sala bay moun san péyiman.” (Mafyou 10:7, 8) Magwé sé pa tout moun ki vlé tann konmisyon nou, nou ka kontiné pwéché, paski nou vlé obéyi Jéhova èvèk fè tjè’y kontan.
ANNOU APWANN PLI
Apwézan, annou apwann pli konsèné sé bagay-la Témwen Jéhova ka fè pou pwéché toupatou èk nou kay wè mannyè Jéhova ka édé yo.
Témwen Jéhova ka pwéché owon latè-a: (A) Costa Rica, (B) Lanméwik, (C) Bennin, (D) Thailand, (E) Yap, (F) Sweden
4. Nou ka fè tout sa nou pé pou pwéché bay tout moun
Témwen Jéhova ka fè on gwo éfò pou pwéché bon nouvèl-la bay tout moun toupatou. Annou gadé VIDIYO-A, èk apwé nou kay kozé asou kwèsyon sala:
-
Kisa ou kontan konsèné éfò-a Témwen Jéhova ka fè pou pwéché?
Annou li Mafyou 22:39 èvèk Ronm 10:13-15, èk apwé nou kay kozé asou sé kwèsyon sala:
-
Lè nou ka pwéché, ki mannyè sa ka moutwé nou enmen pwochen nou?
-
Silon Ronm 10:15, kisa Jéhova di konsèné sé moun-lan ki ka pwéché bon nouvèl-la? Konsa, ki mannyè ou kwè i ka santi konsèné yo?
5. Nou ka twavay ansanm épi Bondyé
La ni plizyè èspéyans ki ka moutwé ki, Jéhova ka vwéman diwèkté twavay nou. Pou ègzanp, on fwè non’y sé Paul, hòd péyi Nyou Zilann, té jwenn on madanm lè i té ka pwéché kay an kay yon jou. Menm jou sala, madanm-lan té pwédyé èk i sèvi non Bondyé, Jéhova. I mandé Jéhova pou voyé on moun pou édé’y konnèt li pli mèyè. Twa nèditan apwé madanm-lan fini pwédyé, Paul wivé lakay madanm-lan.
Annou li 1 Kòrint 3:9, èk apwé nou kay kozé asou kwèsyon sala:
-
Ki mannyè èspéyans tèl kon sa ki té fèt an péyi Nyou Zilann ka moutwé, sé Jéhova ki ka vwéman diwèkté nou lè nou ka pwéché?
Annou li Twavay 1:8, èk apwé nou kay kozé asou kwèsyon sala:
-
Pouki nou bizwen lèspwi Jéhova lè nou ka pwéché?
Ès ou té sav?
Toulé simenn, an mitin nou diwan simenn-lan, nou ka wésouvwé étwennman pou édé nou pwéché pli mèyè. Si ou ja atandé yonn an sé mitin-lan diwan simenn-lan, kisa ou kwè konsèné étwennman-an Témwen Jéhova ka wésouvwé?
6. Nou ka obéyi konmandman Bondyé pou pwéché
An pwèmyé syèk-la, moun té ka opozé disip Jézi paski yo té vlé yo doubout pwéché. Mé sé disip-la pa té doubout pwéché. Anfen, yo “té sa wéponn sé moun-an ki ka palé kont Bon Nouvèl-la konsèné Jézi Kwi, pou . . . moutwé sé lavéwité i yé.” (Filipay 1:7) Témwen Jéhova ka fè menm bagay-la jòdi jou. a
Annou gadé VIDIYO-A
Annou li Twavay 5:27-42, èk apwé nou kay kozé asou kwèsyon sala:
-
Silon Twavay 5:29, 38-39, pouki nou pa kay janmen doubout pwéché?
ADAN MOUN PÉ MANDÉ: “Pouki Témwen Jéhova ka alé pwéché kay an kay?”
-
Kisa ou té kay di’y?
CHONJÉ SÉ PWEN SALA
Jézi té di sé disip li-a pou pwéché bon nouvèl-la toupatou owon latè-a. Jéhova ka édé pèp li pou fè twavay sala.
Annou Wivizé Sa Nou Ja Apwann
-
Ki mannyè nou ka pwéché bon nouvèl-la toupatou owon latè-a?
-
Lè nou ka pwéché, ki mannyè sa ka moutwé nou enmen pwochen nou?
-
Ès ou kwè nou sa ni djèwté lè nou ka pwéché? Pouki?
LÒT ENFÒMASYON OU SA GADÉ
Gadé mannyè Témwen Jéhova ka pwéché bay moun an gwo vil.
Kisa Témwen Jéhova ka fè pou édé moun ki té ni pou kouwi hòd péyi yo a kòz di ladjè?
Kouté sè Margarita kon i ka èspliké pouki i té byen kontan pou sèvi lavi’y pou pwéché.
Apwann konsèné disizyon sé lodyans-lan ja fè, ki ka fè’y pli ézé pou Témwen Jéhova pwéché.
“Pwoklanmatè Wéyòm-lan Ka Fè Défans An Lodyans” (God’s Kingdom Rules!, chapit 13)
a Sé Bondyé ki koumandé nou pou pwéché. Sa sé wézon-an Témwen Jéhova pa bizwen pèwmisyon hòd pyès gouvèdman pou pwéché bon nouvèl-la.
