LISON 22

Mannyè Ou Sa Pwéché Bon Nouvèl-la

JWÉ

Kon’w ka apwann lavéwité-a ki an Bib-la, pitèt ou ka di an lidé’w, ‘Tout moun sipozé konnèt sé bèl bagay sala!’ Sa vwé, tout moun bizwen konnèt yo! Mé pitèt ou ka santi pè pou di lézòt moun sa ou ja apwann. Annou diskité mannyè ou sa ganyen a bout pèwèz sala, épi koumansé èspéyansé djèwté kon’w ka patajé bon nouvèl-la ki an Bib-la.

1. Ki mannyè ou sa patajé sa ou ja apwann épi moun ou konnèt?

Sé disip Jézi-a té di: “Nou pa sa doubout palé [konsèné] sé bagay sala nou wè èk tann-an.” (Twavay 4:20) Sé disip-la té ni tèlman apwésiyasyon pou lavéwité-a, yo té vlé patajé’y épi tout moun. Ès sé konsa ou ka santi? Si sé konsa ou ka santi, gadé pou lokazyon pou di fanmi’w épi jan’w sa ou ja apwann. Mé toujou fè sa adan an mannyè ki wèspèktab.—Li Kòlòsé 4:6.

Déotwa ti pwen pou édé’w koumansé pwéché

Lè’w ka palé épi fanmi’w asou an sijé ki an Bib-la, ou sa di: “Simenn sala mwen apwann an bagay ki entéwésan.”
Patajé an lévanjil épi an jan ki malad ében ki antjèt pou ankouwajé’y.
Lè jan twavay ou mandé’w kouman ou pasé simenn ou, di yo sa ou apwann an létid Bib ou ében an mitin-lan.
Moutwé jan’w wèbsayt-la jw.org.
Envité lòt moun pou atandé létid Bib ou, ében moutwé yo mannyè yo sa mandé pou an létid Bib asou jw.org.

2. Pouki i bon pou pwéché épi kongwigasyon-an?

Sé disip Jézi-a pa té sèlman pwéché bay moun yo té konnèt. Jézi té voyé yo pwéché “pa dé an tout sé vil-la èk vilaj-la i menm té ni pou alé-a.” (Louk 10:1) Paski yo té byen ògannizé pou pwéché, yo té sa patajé bon nouvèl-la épi pli moun. Osi, sé disip-la té ni an chay djèwté lè yo té ka pwéché ansanm. (Louk 10:17) Ès ou vlé pwéché épi kongwigasyon-an?

ANNOU APWANN PLI

Apwézan, annou apwann mannyè ou sa ganyen a bout pèwèz, èk mannyè ou sa èspéyansé djèwté kon’w ka patajé bon nouvèl-la épi lézòt moun.

3. Jéhova kay édé’w

An chay moun vlé pwéché mé yo pè, paski yo pa konnèt kisa moun kay di yo ében fè yo.

Ès ou ka santi pè pou patajé sa’w ja apwann? Pouki ou pè, ében pouki ou pa pè?

Annou gadé VIDIYO-A, èk apwé nou kay kozé asou kwèsyon sala:

VIDIYO: Mwen Mandé Jéhova Pou Ban Mwen Kouwaj (4:05)

Ki mannyè jenn fwè-a èk sé dé sésé-a té ganyen a bout pèwèz yo?

Annou li Izaya 41:10, èk apwé nou kay kozé asou kwèsyon sala:

Lè’w ka santi pè pou pwéché, ki mannyè lapwiyè sa édé’w?

Ès ou té sav?

Plizyè Témwen Jéhova té kwè yo pa té kay sa janmen pwéché bon nouvèl-la. Pou ègzanp, on nonm non’y sé Sergey pa té ni pyès konfyans an kò’y, èk i pa té alèz pou’y palé épi moun. Mé, i koumansé étidyé Bib-la épi Témwen Jéhova. I di: “Magwé mwen té ni pèwèz, mwen koumansé di lézòt moun sa mwen té ka apwann. Èk kon mwen té ka palé konsèné sa mwen té ka apwann, sa bati konfyans mwen. Mwen té byen sipwi. Osi, sa fòtifyé lafwa mwen an sé bagay-la mwen té ka apwann-lan.”

4. Moutwé wèspé

Lè’w ka patajé bon nouvèl-la, katjilé asou kisa ou kay di, mé osi katjilé asou mannyè-a ou kay di’y. Annou li 2 Timòfi 2:24 èvèk 1 Pita 3:15, èk apwé nou kay kozé asou sé kwèsyon sala:

Ki mannyè sé vèwsé sala sa édé’w lè ou ka diskité Bib-la épi lézòt moun?
Lè’w pwéché bay fanmi’w èk jan’w, pitèt adan di yo pa kay dakò épi’w. Kisa ou sa fè? Kisa ou pa sipozé fè?
Pito ou di an moun sa pou fè, pouki i pli mèyè pou mandé’y kwèsyon ki pa kay ofwansé’y?

5. Nou ka èspéyansé djèwté lè nou ka pwéché

Jéhova bay Jézi twavay-la pou patajé bon nouvèl-la. Ki mannyè Jézi té gadé twavay sala? Annou li Jan 4:34, èk apwé nou kay kozé asou sé kwèsyon sala:

Lè nou manjé bon manjé sa ka tjenn nou vivan èk sa ka ban nou djèwté. Pouki Jézi té di, lè nou fè twavay Bondyé tèl kon pwéché, sé menm kon manjé?
Ki lajwa ou kay ni lè’w di moun konsèné bon nouvèl-la?

Yonn dé ti pwen pou édé’w koumansé pwéché

An mitin-lan diwan simenn-lan, gadé pou déotwa ti pwen ou sa sèvi pou koumansé an konmézasyon épi an moun.
Mandé moun-lan ki ka étidyé épi’w, kisa ou ni pou fè pou kwalifyé pou ni yon pa asou mitin-lan diwan simenn-lan. Sé pa-a asou mitin-lan diwan simenn-lan, sa édé’w pwépawé pli mèyè pou di lézòt moun sa ou ka apwann.
Pou édé’w pwépawé wépons pou kwèsyon ében òbdjèksyon ou pé twapé lè ou ka pwéché, ou sa sèvi ti sèksyon-an “Adan Moun Ka Di” ében “Adan Moun Pé Mandé” an liv sala.

ADAN MOUN PÉ MANDÉ: “Ban mwen nouvèl ou?”