Jézi té di pou yon moun vini on Kwityen, i sipozé batizé. (Li Mafyou 28:19, 20.) Mé ki mannyè batenm ka fèt? Èk kisa yon moun ni pou fè avan i sa batizé?

1. Ki mannyè batenm ka fèt?

An langaj Grik, mo pawòl-la “batizé” vlé di, “pou fouyé” anba dlo. Èk vwéman, lè Jézi té batizé, yo té fouyé’y anba dlo-a an Lawivyè Jouden-an, èvèk apwé sa i “sòti an dlo-a”. (Mak 1:9, 10) Konsa menm kon Jézi, jòdi, lè Kwityen ki vwé ka batizé, yo ka fouyé yo anba dlo-a.

2. Lè yon moun batizé, kisa sa vlé di?

Lè yon moun batizé, sa vlé di, i ja dèdiké lavi’y bay Dyé Jéhova. Mé, ki mannyè yon moun ka dèdiké lavi’y bay Jéhova? Ében avan moun-lan batizé, i ka palé bay Jéhova an lapwiyè, èvèk i ka di Jéhova i vlé sèvi’y pou tout tan. Moun-lan ka pwonmèt Jéhova i kay adowé’y sèlman, épi i kay fè volonté Jéhova pli enpòtan bagay-la an lavi’y. Moun sala ka chwazi pou “inyowé kòʼy” èk i ka kontiné swiv lésisyon èk ègzanp Jézi. (Mafyou 16:24) Lè yon moun dèdiké lavi’y bay Jéhova èk i batizé, i kay twapé an chay bennéfis. I kay ni yon bon wilasyon épi Jéhova, èvèk i kay ni bon wilasyon épi sé fwè èk sè-a.

3. Kisa yon moun ni pou fè avan i sa batizé?

Avan ou sa batizé i enpòtan pou apwann konsèné Jéhova épi pou bati lafwa ki fò an li. (Li Hibrou 11:6.) Kon’w ka vini konnèt Jéhova pli mèyè èvèk lafwa’w ka vini pli fò, ou kay ni pli lanmityé bay Jéhova. San dout, ou kay vlé pwéché konsèné Jéhova, èk obéyi wèg li an lavi’w. (2 Timòfi 4:2; 1 Jan 5:3) Lè yon moun ka ‘viv kon Senyè-a vlé, épi i ka fè sa ki ka toujou plè Bondyé’, i kay ni dézi-a pou dèdiké lavi’y bay Jéhova èk batizé.—Kòlòsé 1:9, 10. a

 ANNOU APWANN PLI

4. Sa nou sa apwann hòd batenm Jézi

Annou li Mafyou 3:13-17 pou apwann pli détay konsèné batenm Jézi. Èk apwé nou kay kozé asou sé kèstyon sala:

• Ès Jézi té on tibébé, lè i té batizé?

• Ki mannyè Jézi té batizé? Ès yo té wouzé tizing glo asou tèt li, èben ès yo té fouyé’y anba glo-a?

Apwé Jézi té batizé, i koumansé fè twavay spésyal-la Bondyé té ba’y pou fè asou latè-a. Annou li Louk 3:21-23 èk Jan 6:38, èk apwé nou kay kozé asou kèstyon sala:

• Apwé Jézi batizé, ki twavay ki té pli enpòtan pou’y fè?

5. Ou sa fè pwogwé pou’w sa batizé

Adan moun ka santi pè pou dèdiké lavi yo bay Jéhova épi batizé. Kanmenm, ou sa fè pwogwé èk fè disizyon-an pou dèdiké lavi’w bay Jéhova. Pou wè ègzanp dé (2) moun ki té fè sa, annou gadé VIDIYO-A.

Annou li Jan 17:3 èk Jémz 1:5, èk apwé nou kay kozé asou kèstyon sala:

• Kisa ki sa édé on moun pwépawé pou batenm?

1. Nou ka fè on dèdikasyon, lè nou di Jéhova an lapwiyè, nou vlé sèvi’y pou tout tan

2. Lè nou batizé, nou ka moutwé tout moun nou ja dèdiké lavi nou bay Jéhova

 6. Lè nou batizé, nou ka vini on manm an fanmi Jéhova

Lè nou batizé, nou ka vini on manm adan on gwo fanmi ki oliwon latè-a ki ni lilyon. Magwé nou sòti diféwan plas, èk nou ni diféwan sitiwasyon, nou tout ka swiv menm wèg-la épi nou tout ka kwè menm bagay-la. Annou li Sam 25:14 èk 1 Pita 2:17, èk apwé nou kay kozé asou sé kèstyon sala:

• Silon Sam 25:14, ki kalité wilasyon on moun sa ni épi Jéhova lè’y batizé? Silon 1 Pita 2:17, ki kalité wilasyon on moun sa ni épi sé fwè èk sè-a lè’y batizé?

 CHONJÉ SÉ PWEN SALA

Jézi di, Kwityen ni pou batizé. Mé, avan on moun batizé, i ni pou bati lafwa ki fò an Jéhova, i ni pou swiv wèg Jéhova èvèk i ni pou dèdiké lavi’y bay Jéhova.

Annou Wivizé Sa Nou Ja Apwann

• Ki mannyè batenm ka fèt? Pouki i enpòtan pou on moun batizé?

• Lè on moun batizé, kisa sa ka moutwé?

• Kisa on moun ni pou fè avan i sa dèdiké lavi’y bay Jéhova èk batizé?