LISON 28
Moutwé Apwésiyasyon Pou Sa Jéhova Èk Jézi Té Fè Ba’w
Ki mannyè ou ka santi lè jan’w ba’w yon bèl kado? San dout, i ka ba’w an chay djèwté èk ou vlé moutwé jan’w ou ka apwésyé bèl kado sala. Jéhova èk Jézi ban nou yon kado ki pli mèyè pasé tout lòt kado. Kisa kado sala yé? Èk ki mannyè nou sa moutwé nou ka apwésyé kado sala?
1. Ki mannyè nou sa moutwé nou ka apwésyé sa Jéhova èk Jézi fè ban nou?
Bib-la di nou a klè an Jan 3:16: “Tout moun ki kwè an [Jézi] pa kay pèd lavi yo, mé yo kay ni lavi étonnèl.” Mé ki mannyè nou ka moutwé nou ka kwè an Jézi? I pa asé pou annèk di nou ka kwè an Jézi. Nou ni pou moutwé nou ka kwè an Jézi an sa nou ka fè èk an sa nou ka di. (Jémz 2:17) Lè nou moutwé nou ka kwè an Jézi, nou kay vansé pli pwé’y èk pli pwé Jéhova.—Li Jan 14:21.
2. Ki lokazyon spésyal ki sa édé nou pou moutwé apwésiyasyon pou sa Jéhova èk Jézi té fè ban nou?
Swè-a avan Jézi mò, i té di sé disip li-a konsèné yon lòt mannyè pou moutwé apwésiyasyon pou sakwifis li. I di yo pou vini ansanm pou yon lokazyon spésyal. Nou ka kwiyé lokazyon spésyal sala ‘Wipa Senyè-a’ ében Mémoriyal lanmò Jézi. (1 Kòrint 11:20) Jézi té vlé sé zapòt li-a èk tout moun ki té kay vini disip li pou chonjé i bay lavi’y pou lapéti yo. Konsa, i di yo an Louk 22:19: “Manjé sa pou zòt sa chonjé mwen.” Lè ou atandé Mémoriyal-la, ou ka moutwé apwésiyasyon pou lanmityé-a Jéhova èk Jézi ni pou nou.
ANNOU APWANN PLI
Apwézan, annou apwann konsèné lòt mannyè nou sa moutwé nou ka apwésyé lanmityé-a Jéhova èk Jézi ja moutwé nou. Èk osi, nou kay apwann pouki Mémoriyal lanmò Jézi si tèlman enpòtan.
3. Kisa nou sa fè pou moutwé apwésiyasyon nou?
Imajiné ou té ka néyé, èk yon moun vini èvèk i sové lavi’w. Ès ou té kay obliyé sa moun-lan té fè ba’w? Ében ès ou té kay gadé pou diféwan mannyè pou moutwé apwésiyasyon’w pou sa moun-lan té fè ba ou?
Nou dwé Jéhova lavi nou. Annou li 1 Jan 4:8-10, èk apwé nou kay kozé asou sé kwèsyon sala:
-
Pouki sakwifis lanmò Jézi sé on kado spésyal?
-
Ki mannyè ou ka santi konsèné sa Jéhova èk Jézi té fè ba’w?
Ki mannyè nou sa moutwé apwésiyasyon pou sa Jéhova èk Jézi té fè ban nou? Annou li 2 Kòrint 5:15 èk 1 Jan 4:11; 5:3. Apwé nou li chak lévanjil, nou kay kozé asou kwèsyon sala:
-
Silon lévanjil sala, kisa nou sa fè pou moutwé apwésiyasyon nou?
4. Swiv ègzanp Jézi
An lòt mannyè nou sa moutwé nou ka apwésyé lanmityé Jéhova èk Jézi, sé lè nou swiv ègzanp Jézi. Annou li 1 Pita 2:21, èk apwé nou kay kozé asou kwèsyon sala:
-
An ki diféwan mannyè ou sa swiv ègzanp Jézi an lavi’w?
Jézi té enmen Pawòl Bondyé. I té pwéché bon nouvèl-la èk i té édé moun
5. Atandé Mémoriyal lanmò Jézi
Pou apwann sa ki té fèt diwan pwèmyé Wipa Senyè-a, annou li Louk 22:14, 19, 20. Èk apwé nou kay kozé asou sé kwèsyon sala:
-
Kisa ki té fèt diwan Wipa Senyè-a?
-
Silon vèwsé 19 èk 20, kisa pen-an èk diven-an ka wépwézanté?
Jézi té vlé sé disip li-a òbzòvé Mémoriyal-la, yon fwa chak lanné asou dat-la i té mò-a. Konsa, Témwen Jéhova ka vini ansanm toulé lanné pou chonjé lanmò Jézi. Èvèk nou ka fè’y menm mannyè-a i té di nou pou fè’y. Pou apwann pli konsèné Mémoriyal-la, annou gadé VIDIYO-A. Èk apwé nou kay kozé asou kwèsyon sala:
-
Kisa ki ka fèt diwan Mémoriyal-la?
Pen-an èk diven-an ka wépwézanté diféwan bagay. Pen-an ka wépwézanté kò pawfé-a Jézi té sakwifyé pou nou, èk diven-an ka wépwézanté san’y
CHONJÉ SÉ PWEN SALA
Nou ka moutwé apwésiyasyon pou sa Jézi fè ban nou, lè nou mété lafwa an li, èk osi lè nou atandé Mémoriyal lanmò’y.
Annou Wivizé Sa Nou Ja Apwann
-
Ki mannyè nou sa moutwé nou ka kwè an Jézi?
-
Ki mannyè ou té kay vlé moutwé apwésiyasyon pou sa Jéhova èk Jézi fè ba’w?
-
Pouki i enpòtan pou atandé Mémoriyal lanmò Jézi?
LÒT ENFÒMASYON OU SA GADÉ
Kisa lanmò Jézi ka motivé nou pou fè?
Apwann pli konsèné lafwa, èk mannyè nou sa moutwé nou ni lafwa.
Li listwa-a ki ni tit-la “Mwen Santi Nèt, Vivan Èk Konplèt”, èk wè mannyè lavi yon madanm té vini pli mèyè lè’y vini konpwann sé bennéfis-la i té sa twapé hòd lanmò Jézi.
Apwann pouki tout Kwityen pa ka manjé pen-an èk bwè diven-an diwan Mémoriyal-la.
“Pouki Témwen Jéhova Pa Ka Tjenn Dènyé Wipa Senyè-a Menm Kon Lòt Wilizyon?“ (yon atik asou jw.org)
