Lè’w pèdi on moun ou enmen an lanmò, sa sé on bagay ki byen wèd, èk i ka ba’w an chay lapenn. Osi, pitèt i ka fè’w katjilé: ‘Kisa ki ka wivé nou lè nou mò? Ès i posib pou wè moun nou enmen ki ja mò?’ An lison sala épi an lòt-la, nou kay gadé sé bèl wépons-lan Bib-la ka bay pou sé kwèsyon sala. Sé wépons sala sa vwéman konsolé nou.

1. Kisa ki ka wivé nou lè nou mò?

Silon sa Jézi di, lè on moun mò sé konmsi moun-lan an fon sonmèy. Mé, pouki nou sa konpawé lanmò épi sonmèy? Ében, lè on moun an fon sonmèy, i pa konnèt sa ki ka fèt oliwon’y. An menm mannyè-a, lè on moun mò, i pa konnèt anyen. Konsa i pa ka santi penn, èk menm si i té enmen fanmi’y épi jan’y an chay, i pa ka mantjé yo. Bib-la di nou a klè: ‘Moun ki mò pa konnèt anyen.’—Li Ékléziyastis 9:5.

2. Lè nou konnèt lavéwité-a konsèné lanmò, ki mannyè sa ka édé nou?

An chay moun pè lanmò, èk osi yo pè moun ki mò! Mé, lè’w konnèt sa Bib-la ka di konsèné lanmò, sa sa vwéman soulajé’w. Jézi di: Lavéwité-a “kay fè’w lib.” (Jan 8:32) An chay wilizyon ka enstwi, menm si on moun mò, i ni an lam ki pa ka mò. Mé silon Bib-la, moun ki mò pa konnèt anyen. Konsa, lè nou konnèt sa Bib-la ka di konsèné lanmò, nou sav moun ki mò pa ka soufè èk yo pa sa fè nou anyen. Èvèk nou sav nou pa bizwen pwédyé ba yo, adowé yo, ében fè bagay pou twapé favè yo.

Adan moun ka di, yo sa palé épi moun ki ja mò. Mé sa pa posib, paski kon nou ja apwann an Ékléziyastis 9:5, ‘moun ki mò pa konnèt anyen’. Konsa, lè on moun kwè yo ka palé épi moun yo enmen ki ja mò, sé vwéman épi vyé lèspwi yo ka palé. Sé vyé lèspwi-a ka fè akwèdi yo sé moun-lan ki ja mò-a. Alò, lè nou konnèt lavéwité-a konsèné lanmò, i ka pwotéjé nou hòd sé vyé lèspwi-a. Jéhova vèti nou pou pa éséyé palé épi moun ki ja mò, paski i sav sé vyé lèspwi-a vlé fè nou ditò.—Li Ditonronnonmi 18:10-12.

3. Apwann lavéwité-a konsèné ki koté lé mò yé

Oliwon latè-a, moun ka kwè diféwan bagay lè’y vini pou sa ki ka wivé nou apwé nou mò. Mé, tout sé diféwan bagay-la moun ka kwè adan-an pa sa vwé.

• Ki diféwan bagay moun an konmin ou ka kwè konsèné lé mò?

 4. Lavéwité-a konsèné lanmò sa édé nou

Lè nou konnèt lavéwité-a konsèné lanmò, nou pa kay pè moun ki mò. Annou li Ékléziyastis 9:10, èk apwé nou kay kozé asou kwèsyon sala:

• Ès ou kwè moun ki mò sa fè nou ditò?

Lè nou ka kwè lavéwité-a ki an Bib-la, nou pa ka kwè nou ni pou adowé lé mò, ében fè bagay pou twapé favè yo. Annou li Izaya 8:19 èk Wévélasyon 4:11, èk apwé nou kay kozé asou kwèsyon sala:

• Ki mannyè ou kwè Jéhova ka santi, lè’y wè an moun ka adowé lé mò, ében i ka mandé lé mò pou èd?

5. Lavéwité-a konsèné lanmò ka soulajé nou

An chay wilizyon ka enstwi, apwé on moun mò, yo ka soufè pou sé mové bagay-la yo té fè-a. Mé i ka soulajé nou pou konnèt, pyèsonn pa ka soufè apwé yo mò. Menm si on moun té fè an chay mové bagay, yo pa ka soufè apwé yo mò. Annou li Ronm 6:7, èk apwé nou kay kozé asou kwèsyon sala:

• Ronm 6:7 di nou, “péché pa sa kondwi an moun ki ja mò.” Sa vlé di, lè on moun mò, i péyé pou tout péché’y. Alò, ès ou kwè on moun ki mò ka soufè pou sé mové bagay-la i té fè-a?

Pli nou apwann konsèné Jéhova, sé pli nou wéyalizé i pa kay janmen fè moun ki ja mò soufè. Annou li Ditonronnonmi 32:4 èk 1 Jan 4:8, èk apwé nou kay kozé asou sé kwèsyon sala:

• Kisa ou apwann konsèné Jéhova an sé vèwsé sala? Alò, ès ou kwè on Dyé ki ni sé bèl kawaktè sala, sa janmen fè moun ki ja mò soufè?

• Ès lavéwité-a konsèné lanmò ka soulajé’w? Pouki?

 CHONJÉ SÉ PWEN SALA

Lè on moun mò, lavi’y fini. Moun ki mò pa ka soufè, èk yo pa sa fè nou ditò.

Annou Wivizé Sa Nou Ja Apwann

• Kisa ki ka wivé nou lè nou mò?

• Ki mannyè lavéwité-a konsèné lanmò sa édé nou?

• Ki mannyè lavéwité-a konsèné lanmò ka soulajé nou?