Lanmò sé an bagay ki ka ban nou an chay lapenn èk an chay twistès. Sé pou wézon sala Bib-la ka kwiyé lanmò an lèlmi. (1 Kòrint 15:26) An Lison 27, ou té apwann Jéhova pwonmèt pou détwi lèlmi sala. Mé ès la ni èspwa pou tout sé moun-lan ki ja mò? An lison sala, ou kay apwann konsèné a lòt bèl pwonmèt. Jéhova kay wésisité bilyon di moun ki ja mò èk yo kay enjwi lavi pou tout tan. Wi, i kay wésisité yo! Kanmenm, lè Bondyé wésisité yo, ès yo kay viv asou latè-a ében an syèl?

1. Kisa Jéhova vlé fè bay moun nou enmen ki ja mò?

Sé pa dé anvi Jéhova anvi pou wésisité moun ki ja mò! Jòb té konnèt sa byen paski i sété an nonm ki té ni an chay lafwa. I té ni konfyans-lan ki, Bondyé pa té kay obliyé’y lè’y mò. Sa sé wézon-an Jòb té di Bondyé: ‘Ou kay kwiyé mwen èk mwen kay wéponn ou [hòd Tonbo-a].’—Li Jòb 14:13-15.

2. Ki mannyè nou sav lé mò sa viv ankò?

Lè Jézi té asou latè-a, Bondyé té ba’y pouvwa-a pou wésisité moun ki té ja mò. Pou ègzanp, Jézi té wésisité an tifi ki té ni douz (12) lanné èk i té wésisité gason yon vèv. (Mak 5:41, 42; Louk 7:12-15) Osi, Jézi té wésisité jan’y Lazaròs. Mi sa ki fèt lè’y wésisité Lazaròs. Lazaròs té ja mò pou kat (4) jou èk yo té ja téwé’y. Lè Jézi wivé plas-la yo té téwé Lazaròs, i pwédyé bay Bondyé èk apwé i di: “Lazaròs, sòti dèwò!” Èk “Lazaròs sòti” vivan! (Jan 11:43, 44) Imajiné mizi kontan jan Lazaròs épi fanmi’y té kontan pou wè’y ankò!

3. Ki èspwa la ni an Bib-la pou moun nou enmen ki ja mò?

Bib-la pwonmèt: “Tout moun, . . . kay wésisité.” (Twavay 24:15) Sé moun-lan Jézi té wésisité-a pa té alé an syèl. (Jan 3:13) I té wésisité yo pou yo viv asou latè-a épi yo té byen kontan. An menm mannyè-a, touswit Jézi kay wésisité bilyon di moun pou enjwi lavi pou tout tan an pawadi asou latè-a. Jézi di, “tout moun ki mò kay tann vwa’y èk yo kay sòti an twou yo.” Konsa, menm si la ni moun ki ja mò pou plizyè lanné, dépi yo an menmwa Bondyé, yo kay wésisité.—Jan 5:28, 29.

 ANNOU APWANN PLI

4. Jézi moutwé i sa wésisité lé mò

Apwann pli konsèné sa Jézi té fè ba jan’y Lazaròs. Annou li Jan 11:14, 38-44, èk apwé nou kay kozé asou sé kwèsyon sala:

• Silon vèwsé 39, ki mannyè nou sav Lazaròs té vwéman mò?

• Si Lazaròs té alé an syèl apwé i mò, ès ou kwè Jézi té kay mennen’y viwé asou latè-a?

Annou gadé VIDIYO-A.

5. Plizyè bilyon di moun kay wésisité!

Annou li Sam 37:29, èk apwé nou kay kozé asou kwèsyon sala:

• Silon lévanjil-la, ki koté sé bilyon di moun-lan ki kay wésisité-a kay viv?

Jézi pa kay sèlman wésisité moun ki ka adowé Jéhova. I kay osi wésisité plizyè lòt moun. Annou li Twavay 24:15, èk apwé nou kay kozé asou kwèsyon sala:

• An wézèwèksyon-an, ki moun ou té kay kontan wè ankò?

• Ki mannyè wézèwèksyon-an té soulajé èk ankouwajé pawan Phelicity?

 CHONJÉ SÉ PWEN SALA

Bib-la pwonmèt bilyon di moun ki ja mò kay wésisité. Jéhova vlé yo viv ankò èk i ja ba Jézi pouvwa-a pou wésisité yo.

Annou Wivizé Sa Nou Ja Apwann

• Kisa Jéhova épi Jézi vlé fè bay moun ki ja mò?

• Ki koté sé bilyon di moun-lan ki kay wésisité-a kay viv, an syèl ében asou latè-a? Pouki ou di sa?

• Pouki ou asiwé moun ou enmen ki mò sa viv ankò?