LISON 34

Kisa Nou Sa Fè Pou Moutwé Jéhova Nou Enmenʼy?

JWÉ

Ès ou enmen Jéhova pli apwézan pasé lè ou té koumansé étidyé Bib-la? Ès ou vlé lanmityéʼw pou Jéhova vini pli fò toujou? Si wépons ou sé wi, chonjé, pli Jéhova wè lanmityéʼw pou li ka agwandi, sé pli i kay enmenʼw èk i kay gadé apwéʼw. Ki mannyè ou sa moutwé Jéhova ou enmenʼy?

1. Ki mannyè nou sa moutwé Jéhova nou enmenʼy?

Nou ka moutwé Jéhova nou enmenʼy lè nou obéyiʼy. (Li 1 Jan 5:3.) I pa ka fòsé pyèsonn pou obéyiʼy. Pito, i ka ban nou chak òpòtyounité-a pou chwazi si nou vlé obéyiʼy opa. Pouki? Silon Ronm 6:17 Jéhova vlé nou ‘obéyiʼy épi tout tjè nou.ʼ Kisa sa vlé di? Bondyé vléʼw obéyiʼy paski ou enmenʼy. Ou sa moutwé Jéhova ou enmenʼy lèʼw fè bagay ki ka fè tjèʼy kontan èk lèʼw pa fè bagay i hayi. Sèksyon 3 èk 4 an liv sala kay édéʼw fè sa.

2. Pouki i difisil délè pou moutwé Jéhova nou enmenʼy?

Sam 34:19 di: “Nonm-lan ki dwèt-la ka pasé an pil soufwans.” Pou ki wézon? Paski nou pyès pa pawfé. Apa di sa, délè nou pa ni asé lajan, ében nou ka soufè enjistis ében pasdwa, ében nou ni lòt difikilté. Konsa lè bagay difisil, i pa toujou ézé pou fè sa Jéhova vlé nou fè. Pouki? Paski i pli ézé pou dézobéyi Jéhova pasé pou obéyiʼy. Mé, menm si bagay difisil, siʼw kontiné obéyi Jéhova ou ka moutwéʼy ou enmenʼy pli pasé tout lòt bagay. Osi, ou ka moutwé ou vlé wèsté fidèl pou li. Èk lèʼw fè sa, i kay wèsté fidèl pou ou. I pa kay janmen tounen doʼy asouʼw.—Li Sam 4:3.

ANNOU APWANN PLI

Apwézan, annou apwann pouki i enpòtan pou obéyi Jéhova, èk kisa ki sa édéʼw wèsté fidèl pou li.

3. Yon akizasyon ki ni pou fè épiʼw

Bib-la di nou Satan té akizé Jòb, mé sé pa Jòb sèlman i té akizé, i té akizé tout moun ki vlé sèvi Jéhova. Annou li Jòb 1:1, èvèk Jòb 1:6–2:10, èk apwé nou kay kozé asou sé kwèsyon sala:

Silon Jòb 1:9-11, pou ki wézon Satan té di Jòb té ka obéyi Jéhova?
Silon Jòb 2:4, kisa Satan di asou tout lézòm?

Annou li Jòb 27:5 dézyenm pa-a, èk apwé nou kay kozé asou kwèsyon sala:

Ki mannyè Jòb moutwé i té vwéman enmen Jéhova?

Jòb moutwé i té enmen Jéhova lè i wèsté fidèl pou li

Nou ka moutwé nou enmen Jéhova lè nou wèsté fidèl pou li

4. Fè tjè Jéhova kontan

Annou li Pwovèb 27:11, èk apwé nou kay kozé asou sé kwèsyon sala:

Ki mannyè Jéhova ka santi lèʼw moutwé ou savan èk ou ka obéyiʼy? Pouki ou di sa?

5. Ou sa wèsté fidèl pou Jéhova

Paski nou enmen Jéhova sa ka pousé nou pou pwéché. Osi, paski nou fidèl pou Jéhova, nou ka kontiné pwéché menm si i pa toujou ézé. Annou gadé VIDIYO-A, Défann Lafwaʼw Magwé Moun Ka Òpozéʼw èk apwé nou kay kozé asou sé kwèsyon sala:

VIDIYO: Défann Lafwaʼw Magwé Moun Ka Òpozéʼw (5:09)

Ès i toujou ézé pouʼw palé épi moun konsèné Jéhova?
An vidiyo-a nou gadé-a, kisa ki édé Grayson ganyen a bout lapèʼy?

Lè nou enmen sa Jéhova enmen èk nou hayi sa i hayi, sa ka fèʼy pli ézé pou nou wèsté fidèl pou li. Annou li Sam 97:10, èk apwé nou kay kozé asou sé kwèsyon sala:

Silon sa ou ja apwann, kisa Jéhova enmen? Kisa Jéhova hayi?
Ki mannyè ou sa apwann pou enmen sa ki bon èk hayi sa ki mové?

6. Lè nou obéyi Jéhova nou ka twapé bennéfis

I toujou pli bon pou obéyi Jéhova. Annou li Izaya 48:17, 18, èk apwé nou kay kozé asou sé kwèsyon sala:

Ès ou vwéman kwè Jéhova toujou konnèt sa ki pli bon pou nou? Pouki ou di sa?
Ki bennéfis ou ja twapé an sa ou ka apwann an Bib-la èk sa ou ka apwann konsèné Jéhova?

ADAN MOUN KA DI: “Sa mwen fè pa ka afèkté Bondyé.”