Magwé nou ka èspéyansé pwòblenm délè, la ni plizyè bèl bagay nou sa fè èk enjwi paski nou ni lavi. Ki mannyè nou sa moutwé Jéhova nou ka apwésyé lavi-a i ban nou-an? Èk kisa ki pli enpòtan wézon-an pou nou apwésyé lavi?

1. Pouki nou ni pou apwésyé lavi?

Nou ni pou apwésyé lavi paski lavi sé an kado Bondyé ban nou. Jéhova sé ‘sous laviʼ. (Sam 36:9) Sa vlé di i kwéyé tout lavi. Bib-la di nou: “Sé [Bondyé] menm ki ka bay tout moun lavi épi lèspiwasyon épi tout bagay yo bizwen.” (Twavay 17:25, 28) Alò, Jéhova ka ban nou tout sa nou bizwen pou nou kontiné viv. An plis di sa, i ka potjiwé lòt bagay pou nou sa vwéman enjwi lavi nou!—Li Twavay 14:17.

2. Ki mannyè nou sa moutwé Jéhova nou ka apwésyé lavi-a i ban nou?

Dépi ou té an bouden manmanʼw, Jéhova ka otjipéʼw. An lapwiyè David pou Jéhova ki ékwi an Bib-la, i di: “Ou té ja wè mwen avan mwen té fèt.” (Sam 139:16) Alò, laviʼw ni an chay valè pou Jéhova. (Li Mafyou 10:29-31.) Konsa, si an moun tjwé an moun èben tjwé kòʼy, sa ka vwéman fè Jéhova lapenn. a (Ègzodòs 20:13) Osi, i ka fè Jéhova lapenn si nou mété lavi nou an danjé, èben si nou pa pwan pokosyon pou pwotéjé lavi lézòt. Èk lè nou otjipé kò nou èben wèspèkté lavi lézòt moun, nou ka moutwé nou ka apwésyé bèl lavi-a Jéhova ban nou.

 ANNOU APWANN PLI

3. Otjipé kòʼw byen

Lè an Kwityen dèdiké laviʼy bay Jéhova, sa vlé di i pwonmèt pou toujou fè sa Jéhova vlé. Konsa, i ka sèvi tout laviʼy pou fè divwa Jéhova. Sé konmsi yo ka ofè kò yo “kon an sakwifis ki vivan.” Annou li Ronm 12:1, 2, èk apwé nou kay kozé asou sé kwèsyon sala:

• Kisa ki sipozé pouséʼw pou otjipé kòʼw?

• An ki diféwan mannyè ou sa fè sa?

 5. Pa fè anyen pou blésé an ti bébé ki pʼòkò fèt

David té di, Jéhova antéwésé an tout bagay ki ka fèt padan an ti bébé ka pofité an matwis manmanʼy. Annou li Sam 139:13-17, èk apwé nou kay kozé asou kwèsyon sala:

• An zyé Jéhova ki lè lavi an moun ka koumansé, lè manman-an vini ansèt èben lè ti bébé-a fèt?

Sé lwa-a Jéhova té bay jan Izwayèl té pwotéjé sé manman-an èk sé ti bébé-a ki té an matwis manman yo. Annou li Ègzodòs 21:22, 23, èk apwé nou kay kozé asou sé kwèsyon sala:

• Si an moun tjwé an ti bébé ki an matwis manmanʼy pa aksidan, kisa Jéhova di yo té ni pou fè moun sala?

• Ki mannyè Jéhova kay santi si an moun tjwé an ti bébé èspwé? b

• Ki mannyè ou ka santi konsèné sa Jéhova di?

Annou gadé VIDIYO-A, Apwésyé Lavi Menm Kon Bondyé.

Délè, an madanm pé santi sèl chwa-a i ni sé pou jété ti bébéʼy. Annou li Izaya 41:10, èk apwé nou kay kozé asou sé kwèsyon sala:

• Si moun ka bay an madanm ki ansèt chalè pou jété ti bébéʼy, ki moun i sipozé mandé pou èd? Èk pouki?

 CHONJÉ SÉ PWEN SALA

Bib-la ka enstwi nou pou enmen, wèspèkté èk pwotéjé lavi nou èk lavi lézòt moun, paski lavi sé an kado Jéhova ban nou.

Annou Wivizé Sa Nou Ja Apwann

• Pouki lavi moun ni an chay valè pou Jéhova?

• Ki mannyè Jéhova ka santi lè yon moun tjwé an lòt moun èspwé?

• Poutji ou ka apwésyé lavi?