LISON 44

Ès Tout Sélébwasyon Ka Plè Bondyé?

JWÉ

Jéhova vlé nou enjwi lavi èk pou ni an ti sélébwasyon délè. Mé ès tout sélébwasyon ka plè Bondyé? Ki mannyè nou sa moutwé lanmityé pou Jéhova lè nou ka chwazi sa nou kay sélébwé?

1. Pouki an chay sélébwasyon pa ka plè Jéhova?

Pitèt ou kay sipwi pou apwann, an chay sélébwasyon ni pou fè épi fo wilizyon. Délè yo bazé asou fo enstwiksyon ében yo koumansé épi moun ki pa té ka adowé Jéhova. Osi, adan di yo ni pou fè épi tjenbwa, ében yo bazé asou mansonj-la ki, lézòm ni yon lam ki pa ka mò. Apa di sa, la ni sélébwasyon moun ka tjenn paski yo ka kwè an mal ében chans. (Izaya 65:11) An 2 Kòrint 6:17 Jéhova ka vèti pèp li. I di: “Sépawé kò zòt hòd yo. Pa touché sé bagay yo-a péché ja sali-a.” a

2. Ki mannyè Jéhova ka santi konsèné sélébwasyon ki ka bay lézòm twòp lonnè?

Jéhova ka vèti nou pou pa ‘mété konfyans [nou] an lézòm.ʼ (Li Jérémaya 17:5.) Mé la ni sélébwasyon ki ka bay lézòm tèl kon kondwitè péyi èk sòlda an chay lonnè. Osi, lòt moun ka sélébwé jou-a péyi yo twapé andépandans, ében bagay ki ka wépwézanté péyi yo, tèl kon flag-la. (1 Jan 5:21) Èk la ni lòt sélébwasyon pou onnowé ògannizasyon politik ében lòt ògannizasyon. Ki mannyè ou kwè Jéhova kay santi si nou bay yon moun ében yon ògannizasyon twòp lonnè, sitou si moun-lan ében ògannizasyon-an pa ka twavay an ling épi divwaʼy?

3. Ki kalité kondwit ki sa fè an sélébwasyon mové?

1 Pita 4:3 di, nou pa sipozé ‘bwè [twòp] wonm, toujou sou, [èvèk] anmizé [kò nou] an tout kalité bon tan èk fèt.ʼ Mé kisa nou ka wè moun ka fè an sélébwasyon jòdi jou? An sèten sélébwasyon, moun pa ka kontwolé kò yo, èk yo ka fè an chay bagay ki pa pwòp. Konsa, pou nou wèsté jan épi Jéhova, nou ni pou wèsté lwen sé sélébwasyon sala. Nou pa sipozé ni anyen pou fè épi yo.

ANNOU APWANN PLI

Apwézan, annou apwann mannyè ou sa fè bon disizyon ki kay plè Jéhova, lèʼy vini pou sélébwasyon.

4. Widjèkté sélébwasyon ki pa ka onnowé Jéhova

Annou li Èfésòs 5:10, èk apwé nou kay kozé asou sé kwèsyon sala:

Silon vèwsé-a, kisa nou toujou vlé tjenn an lidé nou lè nou ka désidé si nou kay pwan pa adan an sélébwasyon?
Ki diféwan bagay moun ka sélébwé an péyiʼw?
Ès ou kwè sé sélébwasyon sala ka plè Jéhova?

Pou ègzanp, ès ou janmen katjilé ki mannyè Jéhova ka santi konsèné sélébwasyon jou nésans? La pa ni pyès sèvant Jéhova an Bib-la ki té sélébwé jou nésans yo. Anfen, Bib-la ka sèlman mansyonnen dé (2) moun ki té sélébwé jou nésans yo, èk sé moun sala pa té ka adowé Jéhova. Annou li Jennésis 40:20-22 èk Mafyou 14:6-10, èk apwé nou kay kozé asou sé kwèsyon sala:

An toulédé sélébwasyon jou nésans sala, ki mové bagay ki té fèt?
Lèʼw konsidiwé sé dé (2) wakont sala, poutji ou kwè Bondyé mété yo an Bib-la? Ki mannyè ou kwè Bondyé ka santi lè moun sélébwé jou nésans yo?

Mé pitèt ou ka katjilé: ‘Ès Jéhova vwéman mélé si mwen sélébwé jou nésans mwen, ében si mwen pwan pa adan an lòt sélébwasyon?ʼ Annou li Ègzodòs 32:1-8. Apwézan, annou gadé VIDIYO-A, Sélébwasyon Ki Pa Ka Plè Bondyé èk apwé nou kay kozé asou sé kwèsyon sala:

VIDIYO: Sélébwasyon Ki Pa Ka Plè Bondyé (5:07)

Pouki nou sipozé apwann sa ki ka plè Bondyé?
Ki mannyè nou sa fè sa?

Mannyè nou sa konnèt si an sélébwasyon pa ka plè Bondyé

Ès sélébwasyon-an bazé asou fo enstwiksyon? Pou konnèt wépons-lan, fè wichach pou apwann mannyè sélébwasyon-an té koumansé.
Ès sélébwasyon-an ka bay lézòm, yon ògannizasyon, ében bagay ki ka wépwézanté on péyi twòp lonnè? Sé Jéhova nou ka bay tout lonnè, èvèk sé Li nou ka konfyé pou wanjé tout pwòblenm ki asou latè-a.
Ès sa yo ka fè an sélébwasyon-an kont pwensip ki an Bib-la? Nou ni pou wèsté nèt an tout sa nou ka fè.

5. Édé lézòt moun pou wèspèkté saʼw ka kwè

I pa toujou ézé pou di non lè lézòt moun ka baʼw chalè pou pwan pa an sélébwasyon ki pa ka plè Jéhova. Kanmenm, lèʼw ka èspliké sa ou ka kwè adan, ou ni pou fè sa épi wèspé épi ou ni pou ni pasyans. Pou wè yon ègzanp an mannyè ou sa fè sa, annou gadé VIDIYO-A, Èspliké Sa Ou Ka Kwè Adan Épi Wèspé.

VIDIYO: Èspliké Sa Ou Ka Kwè Adan Épi Wèspé (2:01)

Annou li Mafyou 7:12, èk apwé nou kay kozé asou sé kwèsyon sala:

Silon vèwsé sala, ès ou kwè ou sipozé di fanmiʼw ki pa Témwen Jéhova, yo pa sa pwan pa adan sèten sélébwasyon?
Kisa ou sa fè pou fè fanmiʼw sav ou enmen yo èk ou ka apwésyé yo, menm si ou pa ka sélébwé épi yo?

6. Jéhova vlé nou ni lakontantman

Jéhova vlé nou enjwi bon tan épi fanmi nou èk jan nou. Annou li Ékléziyastis 8:15, èk apwé nou kay kozé asou kwèsyon sala:

Ki mannyè vèwsé sala ka moutwé Jéhova vlé nou ni lakontantman?

Jéhova vlé pèp li ni anmizman épi pou yo enjwi bon tan ansanm. Annou gadé VIDIYO-A, Témwen Jéhova Ka Moutwé Lanmityé Èk Lonnèkté Diwan Konvansyon Entònasyonnal pou wè sa a klè.

VIDIYO: Témwen Jéhova Ka Moutwé Lanmityé Èk Lonnèkté Diwan Konvansyon Entònasyonnal (5:40)

Annou li Galécha 6:10, èk apwé nou kay kozé asou sé kwèsyon sala:

Ès ou kwè sé sèlman lè nou pwan pa adan an sélébwasyon nou sa fè sa ki “bon” bay lézòt?
Kisa ki ka baʼw pli plézi, lèʼw bay paski ou oblijé bay, ében lèʼw bay paski ou vlé bay?
An chay Témwen Jéhova ka fè bagay spésyal ba manmay yo, épi yo ka jis ba yo kado san yo ka èspéyé. Siʼw ni manmay, ki diféwan bagay spésyal ou sa fè ba yo?

ADAN MOUN KA DI: “Nou ka annèk ni an bon tan épi fanmi nou èk jan nou. Alò i pa enpòtan mannyè an sélébwasyon té koumansé.”

Si an moun diʼw sa, kisa ou té kay di yo?

CHONJÉ SÉ PWEN SALA

Jéhova vlé nou ni bon tan épi fanmi nou èk jan nou. Mé i pa vlé nou pwan pa an sélébwasyon ki pa ka plèʼy.

Annou Wivizé Sa Nou Ja Apwann

Ki kwèsyon nou sa mandé pou nou sav si an sélébwasyon ka plè Jéhova opa?
Ki mannyè nou sa édé fanmi nou èk jan nou pou konpwann pouki nou pa ka pwan pa an sèten sélébwasyon?
Ki mannyè nou sav Jéhova vlé nou ni lakontantman èk i vlé nou anmizé kò nou?

Nou fini lison sala asou dat sala:

Mi Yonndé Bagay Ou Sa Fè

Sèvi sa ou apwann an lison sala pou édéʼw désidé si sé sélébwasyon-an an péyiʼw ka plè Jéhova opa.

Lòt bagay ou sa fè:

Lòt Bagay Mwen Vlé Fè