LISON 55
Sipòté Kongwigasyonʼw
Plizyè milyon moun ka sèvi Jéhova épi tjè kontan an diféwan kongwigasyon owon latè-a. Yo ka apwésyé sé lésisyon-an èk sé konsèy-la yo ka wisivwè, èk yo byen kontan pou sipòté kongwigasyon yo an plizyè diféwan mannyè. Ès ou kontan pou sipòté kongwigasyonʼw?
1. An ki diféwan mannyè ou sa sèvi tanʼw èk kouway ou pou sipòté kongwigasyon-an?
Nou tout sa édé an plizyè diféwan mannyè an kongwigasyon-an. Pou ègzanp, ès la ni moun ki an laj ében moun ki malad an kongwigasyonʼw? Ès ou sa édé yo lè yo ni pou atandé mitin? Ében ès ou sa édé yo an lòt mannyè? Pa ègzanp, ès ou sa édé yo nétwayé kay yo, achté manjé ében fè lòt bagay ba yo? (Li Jémz 1:27.) Osi, nou sa édé nétwayé Lasal Wéyòm-lan èvèk tjenn li an bon kondisyon. Mé pyèsonn pa ka fòsé nou pou fè sé bagay sala. Wézon-an nou vlé ‘édéʼ sé paski nou enmen Bondyé èk nou enmen fwè èk sè nou.—Sam 110:3.
Témwen Jéhova ki batizé sa sipòté kongwigasyon-an an lòt mannyè osi. Pou ègzanp, fwè ki kwalifyé silon sa ki ékwi an Bib-la, sa wann sèvis kon sèvant ministiriyal ében kon ansyen. Osi, ni fwè ni sè sa wann sèvis kon piyonnè pou sipòté twavay pwèchman-an. An plis di sa, adan Témwen Jéhova sa édé pou bati plas koté nou ka adowé Bondyé, ében yo sa alé wann sèvis an lòt kongwigasyon ki bizwen èd.
2. Ki mannyè nou sa sèvi lajan nou èk lòt bagay nou ni pou sipòté kongwigasyon-an?
Bib-la di nou, nou sa ‘onnowé Jéhova épi bagay valowab [nou]ʼ. (Pwovèb 3:9) Nou byen kontan pou sèvi lajan nou èk lòt bagay nou ni pou sipòté kongwigasyon-an èk twavay pwèchman-an ki ka fèt oliwon latè-a. (Li 2 Kòrint 9:7.) Lè on dézas fèt, sé fwè-a ka sèvi kontwibyousyon nou pou édé sé fwè èk sè nou-an. Osi, la ni an chay fwè èk sè ki ka “mété an lavi asou koté” andavans pou yo sa fè an donnasyon. (Li 1 Kòrint 16:2.) Nou sa mété kontwibyousyon nou an sé bwèt-la pou kontwibyousyon an Lasal Wéyòm nou, ében nou sa fè sa asou wèbsayt-la donate.pr418.com. Alò, nou ka moutwé nou enmen Jéhova lè nou sèvi lajan nou, èk sa nou ni pou sipòté kongwigasyon-an.
ANNOU APWANN PLI
Apwézan, annou konsidiwé diféwan mannyè ou sa sipòté kongwigasyon-an.
3. Nou sa sèvi byen nou pou édé kongwigasyon-an
Jéhova épi Jézi enmen moun ki kontan bay. Pou ègzanp, Jézi té aplodi yon vèv ki té bay on kontwibyousyon magwé i pa té ni djè lajan. Annou li Louk 21:1-4, èk apwé nou kay kozé asou sé kwèsyon sala:
-
Ès nou oblijé ba yon gwo kontwibyousyon pou nou plè Jéhova?
-
Ki mannyè Jéhova èk Jézi ka santi lè nou bay épi tout tjè nou?
Pou apwann mannyè yo ka sèvi kontwibyousyon nou, annou gadé VIDIYO-A, ‘An Kado Bay Jéhovaʼ èk apwé nou kay kozé asou kwèsyon sala:
-
Ki mannyè sé fwè-a ka sèvi lajan nou bay pou édé sé kongwigasyon-an oliwon latè-a?
4. Nou sa bay tan nou pou édé kongwigasyon-an
An tan lontan, moun ki té ka adowé Jéhova, té ka fè fòs kò yo pou tjenn plas-la koté yo té ka adowéʼy an bon kondisyon. Mé sé pa lajan tousèl yo té ka bay. Annou li 2 Kwonnikèl 34:9-11, èk apwé nou kay kozé asou kwèsyon sala:
-
Ki mannyè chak moun an nasyon Izwayèl té ka tjenn plas-la koté yo té ka adowé Jéhova an bon kondisyon?
Pou nou sa wè mannyè Témwen Jéhova ka swiv ègzanp sèvant Jéhova an tan lontan, annou gadé VIDIYO-A, Annou Gadé Apwé Plas Koté Nou Ka Adowé Jéhova. Apwé nou kay kozé asou sé kwèsyon sala:
-
Pouki i enpòtan pou tjenn Lasal Wéyòm nou nèt èk an bon kondisyon?
-
Ki mannyè ou sa édé?
5. Sé fwè-a sa kwalifyé pou fè pli an kongwigasyon-an
Bib-la ka enkouwajé sé fwè-a pou kwalifyé pou yo sa sipòté kongwigasyon-an. Pou wè mannyè sé fwè-a sa édé an kongwigasyon-an, annou gadé VIDIYO-A, Sé Pou Fwè Kwalifyé Pou Fè An Bon Twavay. Apwé nou kay kozé asou kwèsyon sala:
-
An vidiyo-a nou gadé-a, kisa Ryan té fè pouʼy té sa fè pli pou édé kongwigasyon-an?
Bib-la ka di nou mannyè sé fwè-a sa kwalifyé pou yo sa wann sèvis kon sèvant ministiriyal èk ansyen. Annou li 1 Timòfi 3:1-13, èk apwé nou kay kozé asou sé kwèsyon sala:
-
Si yon fwè vlé wann sèvis kon on sèvant ministiriyal ében kon yon ansyen, kisa i sipozé fè?
-
Silon 1 Timòfi 3:4, 11, kisa moun an fanmiʼy sipozé fè?
-
Lè sé fwè-a kwalifyé pou wann sèvis kon on sèvant ministiriyal ében kon yon ansyen, ki mannyè tout moun an kongwigasyon-an ka twapé bennéfis?
ADAN MOUN PÉ MANDÉ: “Ki koté Témwen Jéhova ka twapé lajan pou fè twavay-la yo ka fè-a?”
-
Ki mannyè ou té kay wéponn?
CHONJÉ SÉ PWEN SALA
Jéhova ka vwéman apwésyéʼy lè nou sèvi tan nou, kouway nou, èk lòt bagay nou ni pou sipòté kongwigasyon-an.
Annou Wivizé Sa Nou Ja Apwann
-
Ki mannyè nou sa sèvi tan nou èk kouway nou pou sipòté kongwigasyon-an?
-
Ki mannyè nou sa sèvi byen nou pou sipòté kongwigasyon-an?
-
An ki lòt mannyè ou té kay vlé sipòté kongwigasyon-an?
LÒT ENFÒMASYON OU SA GADÉ
Apwann pouki Jéhova pa vlé moun ki ka sèviʼy jòdi jou bay dis pousan (10%).
“Kisa Bib-la Ka Di Konsèné Dis Pousan?” (yon atik asou jw.org)
An Bib-la Jéhova ka ba nonm ki batizé sèten twavay an kongwigasyon-an. Mé si an sè ni pou fè sé twavay sala, kisa i sipozé fè?
“Annou Éséyé Konpwann Lotowité Sé Anyen-an An Kongwigasyon-an” (Gad-la, Févwiyé 2021)
Gadé vidiyo-a pou wè gwo sakwifis adan Témwen Jéhova ka fè pou pòté piblikasyon bay fwè yo.
Apwann pouki mannyè nou ka twouvé lajan diféwan épi mannyè lòt wilizyon ka twouvé lajan yo.
“Ki Koté Témwen Jéhova Ka Twouvé Lajan Pou Fè Twavay-la Yo Ka Fè-a?” (yon atik asou jw.org)
