1. Kisa Matthew di Pawanʼy? Èk kisa sa ka moutwé?

 NOU ni èspéyans yon tibway, nonʼy sé Matthew. I té ni on mové maladi èk i té bizwen fè plizyé lopowasyon. Yon jou, i té ka véyé on pwogwanm asou JW Broadcasting^® épi fanmiʼy. An finisman pwogwanm-lan, yo wè on vidiyo mizik asou wézèwèksyon-an, koté ki, moun té ka byenvini fanmi yo ki té mò.  b Apwé pwogwanm-lan, Matthew tjébé lanmen pawanʼy èk i di yo: “Ou wè manm èk pap? Menm si mwen mò, mwen kay viwé lévé an wézèwèksyon-an. Konsa, zòt sa èspéwé mwen. Pa bay kò zò mal tèt!” Lè Matthew di pawanʼy pawòl sala, i té sèlman sèt (7) lanné. Ou sa imajiné, sé pa dé kontan pawan sala té kontan, lè yo wè lafwa gason yo té si tèlman fò an wézèwèksyon-an.

2-3. Pouki i bon pou nou katjilé asou pwonmèt wézèwèksyon-an?

² Tanzantan, i bon pou nou katjilé asou pwonmèt-la ki an Bib-la konsèné wézèwèksyon-an. (Jan 5:28, 29) Pouki i bon pou fè sa? Sé paski nou pa janmen sav ki lè nou pé twapé on mové maladi èben ki lè nou pé pèd on moun nou enmen an lanmò. (Éklé. 9:11; Jémz 4:13, 14) Alò, èspwa wézèwèksyon-an nou ni-a, kay édé nou tjébé fò anba pwòblenm kon sa. (1 Tèsa. 4:13) Sé lévanjil-la ka ban nou asiwans-lan ki, Papa nou ki an syèl enmen nou an chay èk i konnèt nou tèlman byen. I jis “sav konmen bwanch chivé ki anlè tèt” nou. (Louk 12:7) Wi, Jéhova konnèt nou si tèlman byen, i kay sa ban nou menm kawaktè-a nou té ni avan, épi tout menmwa nou viwé lè i wésisité nou. Èk paski i enmen nou an chay, i ka fèʼy posib pou nou enjwi lavi pou tout tan. Èk menm si nou mò, i kay wésisité nou!

³ An atik sala, nou kay diskité, pwèmyé, pouki nou sa kwè an pwonmèt wézèwèksyon-an. Èk apwé, nou kay diskité on wakont ki kay fòtifyé lafwa nou; wakont wézèwèksyon Lazaròs, koté Jézi té di Mafa: “Fwèʼw kay viwé vivan ankò.” (Jan 11:23) Èk finalman, nou kay apwann mannyè nou sa fòtifyé lafwa nou an èspwa wézèwèksyon-an.

4. Pou kwè on pwonmèt, ki asiwans ou té kay vlé? Ba yon ègzanp.

⁴ Si on moun fè nou on pwonmèt, pou nou sa kwè pwonmèt sala nou tout kay dakò ki, nou kay vlé ni asiwans-lan ki moun-lan ki ka fè pwonmèt-la ni dézi-a èk pouvwa-a, èben abilité-a, pou akonpli pwonmèt sala. Pou ègzanp, imajiné on mové tan donmajé kay ou. Èk on jan pwonmèt i kay édéʼw wanjé kay ou. Ou sav i pa manti, épi ou asiwé moun sala ni dézi-a pou édéʼw. Si jan sala sé on chapantyé, ou osi sav i ni sé zouti-a, èk abilité-a pou wanjé kay-la. Konsa, ou pa ni pyès wézon pou pa kwèʼy. Bon. Kisa nou sa di pou pwonmèt-la Jéhova fè, lè i vini pou wézèwèksyon-an? Ès i vwéman ni dézi-a èk pouvwa-a pou akonpli pwonmèt li?

5-6. Ès Jéhova ni dézi-a pou wésisité lé mò? Pouki ou ka di sa?

⁵ Èben, nou kay koumansé épi kèstyon sala: Ès Jéhova ni dézi-a pou wésisité lé mò? Absoliman! Paski Jéhova té fè asiwé plizyè an sé nonm-lan ki té ékwi Bib-la, té ékwi pwonmèt li pou wésisité moun an tan pou vini. (Izay. 26:19; Hoz. 13:14; Wév. 20:11-13) Épi nou sav, lè Jéhova fè on pwonmèt, i ka toujou tjenn pwonmèt li. (Jòch. 23:14) Anfen, Jéhova anvi wésisité sa ki ja mò. Pouki nou sa di sa? Sé paski Bib-la di nou sa.

⁶ An Jòb 14:15, Jòb di sé “pa dé anvi [Jéhova] anvi pou wè twavay [lanmenʼy]”. Konsa, Jòb té asiwé, menm si i mò, Jéhova té kay anvi pou wèʼy viv ankò. (Jòb 14:14, 15, ftn.) Konsa, Jéhova pʼòkò chanjé. I ni dézi-a, i anvi, i vlé wésisité tout sé sèvant li-a ki ja mò, épi pou ba yo bon santé èk lajwa. Sa sé on bèl bagay, ès pa? Mé ki mannyè Jéhova ka santi konsèné tout sé moun-lan ki ja mò èk ki pa té janmen ni on chans pou apwann lavéwité-a konsènéʼy? Èben ou sav, Jéhova sé on Dyé ki plen lanmityé, èk i vlé wésisité yo osi. (Twav. 24:15) Épi i vlé yo vini janʼy èk pou viv asou latè-a pou tout tan. (Jan 3:16) Alò, sa ka moutwé a klè ki, Jéhova ni dézi-a pou wésisité lé mò.

7-8. Pouki nou asiwé Jéhova ni pouvwa-a pou wésisité lé mò?

⁷ Bon. Wévélasyon 1:8 di nou, “Sé Bondyé Senyè-a ki ni tout pouvwa.” Konsa, ès Jéhova ni pouvwa-a pou wésisité moun ki ja mò? Yon fwa ankò, wépons-lan sé, absoliman! I sé Dyé Toupisan. I ni pouvwa-a pou détwi népòt lèlmi, jis lanmò! (1 Kòr. 15:26) Èk lè nou katjilé asou kantité pouvwa-a i vwéman ni, sa ka fòtifyé nou, èk soulajé nou. Bon. Annou konsidiwé èspéyans sésé Emma Arnold. Diwan Dézyenm Gwo Ladjè-a, Emma èk fanmiʼy té èspéyansé an chay difikilté ki té sa afébli lafwa yo. Emma té ni pou konfòté tifiʼy paski moun i enmen mò an pwizon Nazi. Emma diʼy: “Si moun ki mò pa sa viv ankò, sa vlé di, lèlmi-a lanmò pli fò pasé Bondyé. Ès pa?” Mé nou sav, anyen pa pli fò pasé Jéhova! Wi, Jéhova, Bondyé Toupisan-an, sé li ki Kwéyatè-a, sous lavi, èk i ni pouvwa-a pou viwé bay moun ki ja mò, lavi ankò.

⁸ Yon lòt wézon nou sav Jéhova ni pouvwa-a pou wésisité lé mò, sé paski mèmwaʼy pa ni limit. Lè nou gadé syèl-la, la ni an pil étwal. Lézòm pa sa janmen fin konté yo. Wannman, Izaya 40:26 ka di, ‘Jéhova ka kwiyé yo chak pa non yo.ʼ Osi, mi on lòt bagay Bib-la di nou: I ka chonjé sé moun-lan ki mò-a. (Jòb 14:13; Louk 20:37, 38) Konsa, i byen ézé pou Bondyé chonjé tout ti détay konsèné sé moun-lan i kay wésisité-a; tèl kon lapawans yo, kawaktè yo, èspéwéyans yo èk mèmwa yo.

9. Pouki ou kwè Bondyé kay wésisité lé mò?

⁹ Nou ka wè a klè, nou sa kwè pwonmèt Jéhova pou wésisité moun ki ja mò an tan pou vini. Èk nou sa apiyé asou pwonmèt sala paski nou sav Jéhova ni dézi-a èk pouvwa-a pou fèʼy. An plis di sa, mi on lòt wézon nou sa kwè pwonmèt Bondyé: Jéhova té ja wésisité moun an tan pasé. Épi i té bay déotwa nonm fidèl, èvèk Jézi Kwi, pouvwa-a pou wésisité lé mò. Apwézan, annou gadé yonn an sé wézèwèksyon-an Jézi té fè ki té wakonté an Jan chapit 11.

10. (a) Ki nouvèl Jézi té twapé konsèné janʼy, Lazaròs? (b) Kisa i té fè apwé i twapé nouvèl sala? (Jan 11:1-3)

¹⁰ Li Jan 11:1-3. Wi, Lazaròs té byen malad, èk i té pwé lanmò. Épi anba tout tèt cho Mari èk Mafa té ni, yo té santi konfòtab pou voyé konmisyon sala bay Jézi, paski yo tout té bon jan Jézi. (Louk 10:38-42) A lè sala, Jézi té ka pwéché adan on vil ki té asou lòt fasad Lawivyè Jouden-an. (Jan 10:40) Èk si on moun té ni pou maché pou wivé la, i té kay pwanʼy dé jou. Konsa, bò lè-a Jézi té tann konmisyon-an, malèwèzman bon janʼy-lan, Lazaròs, té mò. Magwé i té sav bon janʼy-lan, Lazaròs, té ja mò, i wèsté koté i té yé-a pou dé (2) jou ankò; èk apwé sa, i alé Bèfanni. Lè Jézi wivé Bèfanni, Lazaròs té ja ni kat (4) jou dépi i mò èk yo téwéʼy. Mé pyèsonn, pa té ka éspéwé sa Jézi té kay fè. Wi, Jézi té kay fè on bagay ki té byen wimakab, ki té kay glowifyé Bondyé, èk ki té kay bay sé janʼy-lan tjè kontan.—Jan 11:4, 6, 11, 17.

11. Ki lison nou apwann konsèné sa bon jan ka fè pou yonn a lòt an wakont sala?

¹¹ An wakont sala, nou ka apwann on bon lison konsèné sa bon jan ka fè pou yonn a lòt. Pou ègzanp, lè Mari èk Mafa voyé konmisyon-an bay Jézi, yo anni diʼy, ‘bon janʼy-lan malad.ʼ Yo pa té mandéʼy pou vini Bèfanni. (Jan 11:3) Èk lè Lazaròs mò, Jézi té sa wèsté koté i té yé-a èk wésisitéʼy, mé i pa té fè sa. Anfen, Jézi chwazi pou alé Bèfanni pou sipòté sé janʼy-lan, Mari èk Mafa. Sé sa moun ki bon jan ka fè kouman! Ès ou ni on bon jan kon sa? Ki kay kouwi pou vini édéʼw, sanʼw mandéʼy? Wi, on bon jan kon sa, ou ‘sa konté asouʼy lèʼw an lapennʼ. (Pwov. 17:17) Konsa, menm kon Jézi, sé pou nou vini on bon jan pou lézòt. Bon. Apwézan, annou witounen pou wakont-la pou wè sa ki fèt apwé sa.

12. Kisa Jézi té pwonmèt Mafa? Èk pouki Mafa té sa kwè an pwonmèt sala? (Jan 11:23-26)

¹² Lè Mafa tann Jézi té ka vini, i pati kouwi alé jwenn Jézi. “Mafa di Jézi, “Senyè, si ou té la, fwè mwen pa té kay mò.”” (Jan 11:21) Wi, sa vwé i té sa djéwi Lazaròs. Mé sa Jézi té vlé fè té pli wimakab! I pwonmèt Mafa: “Fwèʼw kay viwé vivan ankò.” I osi bay Mafa pli wézon pou i sa kwè an pwonmèt sala, lè i kontiné ka di “Sé mwen ki ka fè moun wésisité èk sé mwen ki ka ba yo lavi.” Annou kontiné wakont-lan an Jan 11:23-26. (Liʼy) Wi, Bondyé ja bay Jézi pouvwa-a pou wésisité moun ki mò. Avan lanmò Lazaròs, Jézi té wésisité on jenn fi touswit apwé i mò. Èk apwé, i té wésisité on jenn nonm, pitèt menm jou-a i té mò-a. (Louk 7:11-15; 8:49-55) Mé kèstyon-an sé sa, ès Jézi sa wésisité on moun ki té ja mò pou kat (4) jou, èk kadav li té ja koumansé ka pouwi?

13. Silon Jan 11:32-35, lè Jézi wè Mari épi sé Jwif-la ki té épiʼy-la ka pléwé, ki mannyè sa té afèktéʼy? (Gadé pòtwé-a osi.)

¹³ Li Jan 11:32-35. Si ou ja pèd on moun ou enmen an lanmò, ou sav kouman sa té afèktéʼw. Konsa, ou sa imajiné mannyè Mari épi sé lézòt-la ki té épiʼy-la té an lapenn. Mari hélé: “Senyè, si ou té la, fwè mwen pa té kay mò!” Sé pou sa, lè Jézi wè yo, èk mannyè yo té ka pléwé, “sa touché tjèʼy èk sa distwéʼy an chay.” Épi paski i té ni an chay konpasyon pou yo, épi i té enmen sé bon janʼy-lan, i koumansé pléwé. Konsa, sa ka ban nou pwèv ki Jézi ka santi penn nou lè nou pèd on moun nou enmen an lanmò. Èk sé pa dé anvi i anvi pou tiwé sa ki ka annékòz penn sala, lanmò!

14. Ki mannyè nou sav Jéhova ka santi lapenn nou?

¹⁴ Ès Bondyé ka santi lapenn nou, menm kon Jézi ka santi lapenn nou? Absoliman. Pouki nou sa di sa? Paskè, kon nou té ja di an atik-la avan sala, Jézi ka imité katjil èk santiman Papaʼy an tout sa i ka di èk an tout sa i ka fè. (Jan 12:45) Èk kon nou wè, Jézi té santi konpasyon bay sé janʼy-lan, èk i té pléwé lè i wè lapenn yo. Konsa nou sav Jéhova osi ka santi penn nou. I sé on Bondyé ki ni an pil konpasyon. Èk lè nou an lapenn èk nou ka pléwé, Jéhova ka wè glo zyé nou, épi sa ka afèktéʼy èk touché tjèʼy. (Sam 56:8) Ès sa pa ka fèʼw vlé vansé pli pwé Bondyé nou, ki plen konpasyon?

15. Silon wakont-lan an Jan 11:41-44, kisa ki fèt bò twou-a Lazaròs té téwé-a? (Gadé pòtwé-a osi.)

¹⁵ Konsa, annou kontiné wakont-lan. Lè Jézi wivé bò koté yo té téwé Lazaròs-la, i di yo: “Débouché twou-a!” Mé Mafa pa té vlé fè sa, i diʼy, “Senyè, i ni kat jou dépi yo téwéʼy. Pou atjwèlman i ja ka santi!” Mé “Jézi diʼy, “Ès mwen pa té ja diʼw ou kay wè pouvwa Bondyé si ou kwè?” (Jan 11:39, 40) Annou kontiné wakont-lan an Jan 11:41-44. (Liʼy) Wi, Jézi pwédyé ba Papaʼy pou tout moun sa wè sé li ki baʼy pouvwa-a pou wésisité Lazaròs. I té vlé bay Jéhova tout lonnè-a pou sa ki té kay fèt apwé. Bon. Apwé sa Jézi di, “Lazaròs, sòti dèwò!” Kon ki di, kon ki fèt. Lazaròs maché sòti an twou-a! Sé moun-lan wèsté épi bouch yo gwan ouvè, paski Jézi fè on bagay an pil moun kwè té enposib: I wésisité on moun ki té mò pou kat (4) jou.​—Gadé nòt-la pou Jan 11:17.

16. Ki mannyè wakont-lan an Jan chapit 11 ka fòtifyé lafwa nou an èspwa wézèwèksyon-an?

¹⁶ Wakont-lan an Jan chapit 11 ka fòtifyé lafwa nou an èspwa wézèwèksyon-an. Pouki nou di sa? Sé paski wakont-lan ka moutwé nou a klè, menm kon Papaʼy, Jézi ni dézi-a èk pouvwa-a pou wésisité moun ki ja mò. Pou ègzanp, chonjé sa Jézi té pwonmèt Mafa: “Fwèʼw kay viwé vivan ankò.” (Jan 11:23) Osi, lapenn-lan i té santi-a èk pléwé i té pléwé-a, ka moutwé i ni on gwo dézi pou wésisité moun ki ja mò èk pou tiwé lapenn-lan lanmò ka annékòz. An plis di sa, lè Lazaròs maché sòti an twou-a, ankò Jézi bay pwèv ki, i ni pouvwa-a pou wésisité moun ki ja mò. Osi, katjilé ankò asou on lòt bagay Jézi té di Mafa: “Ès mwen pa té ja diʼw ou kay wè pouvwa Bondyé si ou kwè?” (Jan 11:40) Nou sav nou ni bon wézon pou kwè Bondyé kay akonpli pwonmèt li pou wésisité moun ki ja mò. Mé kèstyon-an sé sa: Kisa nou sa fè pou kontiné fòtifyé lafwa nou an èspwa wézèwèksyon-an?

17. Kisa nou vlé fè lè nou ka byen gadé sé listwa wézèwèksyon-an?

¹⁷ Pwan tan pou li èk kouté listwa sé wézèwèksyon-an ki an Bib-la, èk mèdité asou yo. Adan Bib-la, la ni listwa wit (8) moun ki té wésisité asou latè-a. c I kay bon pou nou byen gadé chak sé listwa sala. Èk kon nou ka fè sa, sé pou nou chonjé sé moun sala té moun ki té wéyal. Konsa, gadé pou sé lison-an nou sa apwann. Épi katjilé asou mannyè Jéhova té moutwé déziʼy èk pouvwaʼy pou wésisité moun ki ja mò an chak an sé listwa-a. Plis toujou, fè asiwé ou wéfléchi asou wézèwèksyon Jézi, paski sa sé pli enpòtan wézèwèksyon-an ki janmen fèt. Èk wézèwèksyon sala pa té fèt an sigwé an! La té ni konmen san moun ki té wè Jézi apwé i té wésisité. Konsa, sa ka ban nou on bon fondasyon pou lafwa nou.​—1 Kòr. 15:3-6, 20-22.

18. Kisa nou kay vlé fè épi sé chanson-an ki ka mansyonnen èspwa wézèwèksyon-an? (Gadé nòt-la an bout paj-la osi.)

¹⁸ Pwan tan pou kouté sé chanson-an ki ka mansyonnen èspwa wézèwèksyon-an, chanté yo èk wéfléchi asou mo pawòl yo. d (Èfés. 5:19) Sé chanson sala ka fè wézèwèksyon-an pli vivan pou nou, èk yo ka fòtifyé lafwa nou an èspwa wézèwèksyon-an. Konsa, nou vlé kouté yo, pwatiké yo, èk diskité sa sé mo pawòl-la vlé di diwan létid fanmi nou. Osi, éséyé pou konnèt sé mo pawòl-la pa tjè. A lè sa-a, si nou ni pou aji épi tèt cho, èben si nou pèd on moun nou enmen an lanmò, lèspwi Jéhova kay édé nou pou chonjé sé chanson sala, épi sa kay soulajé nou èk fòtifyé nou.

19. Kisa nou pé imajiné konsèné wézèwèksyon-an? (Osi, gadé enfòmasyon-an anba sijé-a: “ Kisa Ou Té Ké Vlé Mandé Yo?”)

¹⁹ Sèvi imajinasyonʼw èk wè kòʼw an pawadi-a. Wi, Jéhova ja ban nou abilité-a pou fè sa. Yon sésé di: “Mwen ja pasé an chay tan ka imajiné kò mwen an Pawadi-a, sé konmsi mwen ka pwan lòdè sé flè wòz-la.” Ès ou ka sèvi imajinasyonʼw menm kon sésé sala? Pou ègzanp, imajiné ou ka jwenn épi nonm èk fanm fidèl ki mansyonnen an Bib-la. Ki moun ou té kay avoudwé jwenn épi? Èk ki kèstyon ou té kay vlé mandéʼy? Bon. Mi on lòt bagay ou sa imajiné: Lè ou kay jwenn épi sé moun-lan ou enmen ki té mò èk ki wésisité. Imajiné kisa ou kay di yo lè ou wè yo. Èk mannyè ou kay anbwasé yo èk bo yo, èk di yo ki kantité kontan ou kontan pou wè yo ankò. Épi kou sala, nou kay ni glo an zyé nou, pa paski nou an lapenn, mé paski nou plenn djèwté.

20. Sé pou nou ditèminé pou fè kisa?

²⁰ Nou ka wimèsyé Jéhova pou pwonmèt wézèwèksyon-an. Nou asiwé pwonmèt sala kay fèt vwé paski Jéhova ni dézi-a èk pouvwa-a pou akonpli pwonmèt li. Konsa, sé pou nou détèminé pou fòtifyé lafwa nou an bèl èspwa sala. Èk lè nou fè sa, sa ka mennen nou pli pwé Kwéyatè nou, moun-lan ki ban nou bèl pwonmèt sala, ‘Sé moun-lan nou enmen-an kay viwé vivan ankò!ʼ