1. An pwèmyé syèk-la, ki mannyè pèp Jéhova té ògannizé?

 JÉHOVA sé an Dyé ki ògannizé. Konsa lè i bay pèp li an twavay pou fè, i vlé yo fè’y adan an mannyè ki ògannizé. (1 Kòr. 14:33) Pou ègzanp, i sé divwa Bondyé pou bon nouvèl-la pwéché toupatou an latè-a. (Maf. 24:14) Mé ki mannyè sa sa fèt andan an mannyè ki ògannizé? Ében, Jéhova ja bay Gason’y Jézi, wèskonsabilité-a pou diwèkté twavay sala. Èk Jézi ka fè asiwé twavay sala fèt adan an mannyè ki byen ògannizé. An pwèmyé syèk-la, lè sé kongwigasyon-an té établi an diféwan plas, yo apwenté ansyen pou bay diwèksyon, èk pou pwan douvan an sé kongwigasyon-an. (Twav. 14:23) Pou ègzanp, an Jérouzalèm, sé zapòt-la èk ansyen ki té ni èspéyans té ka bay diwèksyon, èk fè sèten disizyon bay tout sé kongwigasyon-an. Èk tout sé kongwigasyon-an té ni pou swiv sé diwèksyon sala. (Twav. 15:2; 16:4) Lè sé fwè èk sè-a obéyi sé diwèksyon-an yo twapé, “sé moun-an ki kwè an Jézi-a té ka vini pli fò an lafwa-a, épi pli an plis moun té ka kwè toulé jou.”​—Twav. 16:5.

2. Dépi lanné mil nèf san diznèf (1919), ki mannyè Jézi ka sèvi ti gwoup annonté-a?

² Jéhova ka kontiné ògannizé pèp li jòdi jou. Dépi lanné mil nèf san diznèf (1919), anba diwèksyon Jéhova, Jézi ka sèvi an ti gwoup nonm ki annonté pou ògannizé twavay pwèchman-an èk pou potjiwé manjé spiwityouèl a lè. a (Louk 12:42) I a klè, Jéhova ka benni twavay gwoup sala.​—Izay. 60:22; 65:13, 14.

3-4. (a) Ki bennéfis nou ka twapé lè nou ògannizé? (b) Kisa nou kay konsidiwé an atik sala?

³ Katjilé sa pou an ti mouman. Si nou pa té byen ògannizé, nou pa té kay sa akonpli tout twavay-la Jézi té ban nou pou fè-a. (Maf. 28:19, 20) Pou ègzanp, si la pa té ni an awanjman an sé kongwigasyon-an pou koté sé fwè èk sè-a sa pwéché, népòt moun té kay pwéché koté yo vlé. Kisa ki té kay fèt? Ében, la té kay ni déotwa tèwitwa ki té kay twavay souvan, èk lòt tèwitwa té kay twapé néglijé. Bon, ès ou sa katjilé lòt bennéfis nou ka twapé lè nou byen ògannizé?

⁴ Lè Jézi té asou latè-a, i té byen ògannizé sé disip li-a. An menm mannyè-a, i ka kontiné ògannizé pèp Bondyé jòdi. An atik sala nou kay konsidiwé ègzanp-lan Jézi kité ban nou-an, èk ki mannyè ògannizasyon-an ka kontiné swiv ègzanp sala. Nou kay osi diskité mannyè nou sa moutwé apwésiasyon pou ògannizasyon Jéhova.

ÒRGANNIZASYON NOU KA SWIV ÈGZANP JÉZI

5. Mansyonnen mannyè ògannizasyon-an ka swiv ègzanp Jézi. (Jan 8:28)

⁵ Jézi apwann hòd Papa’y kisa pou fè èk kisa pou di. Ògannizasyon Jéhova ka swiv ègzanp Jézi. I ka sèvi Pawòl Bondyé pou ban nou lésisyon asou mannyè pou nou sa viv dwèt. (Li Jan 12:49; 2 Tim. 3:16, 17) Konsa, ògannizasyon nou ka toujou fè nou chonjé, i enpòtan pou nou li Pawòl Bondyé touléjou, èk pou apliké sa nou li-a. Lè nou fè sa, ki bennéfis nou ka twapé?

6. Ki bennéfis nou ka twapé lè nou étidyé Bib-la?

⁶ Lè nou étidyé Bib-la èk sé piblikasyon nou-an, nou ka twapé gwo bennéfis. Nou sa konpawé sa ògannizasyon-an ka diwèkté épi sa Bib-la ka enstwi. Konsa, lè nou wè sa ògannizasyon-an ka diwèkté bazé asou Bib-la, nou ka ni pli konfyans an ògannizasyon-an.​—Ronm 12:2.

7. Ki konmisyon Jézi pwéché lè’y té asou latè-a, èk ki mannyè ògannizasyon-an ka swiv ègzanp Jézi?

⁷ Lè Jézi té asou latè-a i pwéché “Bon Nouvèl konsèné ki mannyè Bondyé kay établi kondwit li.” (Louk 4:43, 44) I osi koumandé sé disip li-a pou pwéché menm konmisyon sala. (Louk 9:1, 2; 10:8, 9) Jòdi, tout moun ki ka asosiyé épi ògannizasyon Jéhova ka pwéché bon nouvèl-la konsèné mannyè kondwit Bondyé ja établi. Yo ka pwéché népòt koté yo ka wèsté, ében menm si yo ni an chay wèskonsabilité an ògannizasyon-an.

8. Ki bèl pwivilaj Jéhova ja ban nou?

⁸ I sé an bèl pwivilaj pou nou sépawé épi lézòt moun bon nouvèl-la konsèné Wéyòm Bondyé, ében kondwit li. Mé, sé pa népòt moun ki sa twapé bèl pwivilaj sala. Pou ègzanp, lè Jézi té asou latè-a, i pa kité sé vyé lèspwi-a bay on témwéyaj konsèné’y. (Louk 4:41) Jòdi, avan yon moun alé an minis-la épi kongwigasyon-an, i ni pou fè asiwé i ka viv lavi’y adan an mannyè ki ka plè Jéhova. Konsa, lè nou sèvi tout òpòtyounité nou jwenn pou pwéché bon nouvèl-la, nou ka moutwé apwésiasyon pou lonnè-a Jéhova ban nou-an pou pwéché. Menm kon Jézi, nou vlé fè tout sa nou pé pou pwéché èk enstwi moun lavéwité-a.​—Maf. 13:3, 23; 1 Kòr. 3:6.

9. Kisa ògannizasyon-an ja fè pou édé moun konnèt non Bondyé?

⁹ Jézi fè moun konnèt non Papa’y. An lapwiyè pou Papa’y i di: “Mwen fè yo konnèt ou.” (Jan 17:26) Ògannizasyon Jéhova ka swiv ègzanp Jézi an yo ka fè tout sa yo pé pou fè moun konnèt non Bondyé. Yon mannyè ògannizasyon-an ja fè sa, sé lè i sèvi Bib-la, New World Translation of the Holy Scriptures. Ògannizasyon-an ja viwé mété non Bondyé tout koté i té sipozé yé-a. Ou sa twapé an pa, ében tout Bib sala an plis pasé dé san swasant dis (270) langaj. An Appendix A4 èk Appendix A5 an Bib-la, New World Translation of the Holy Scriptures, ou sa apwann pli pouki èk ki mannyè yo té viwé mété non Bondyé koté i té sipozé yé an Bib-la. Osi, Appendix C, an Study Bible-la, ka bay an chay pwèv non Bondyé té sipozé pawèt dé san twant sèt (237) fwa an pòsyon Bib-la ki té ékwi an langaj Gwik.

10. Kisa’w apwann an sa an madanm ki ka wèsté an péyi Myanmar di?

¹⁰ Menm kon Jézi té fè moun konnèt non Papa’y, nou osi vlé édé moun vini konnèt non Bondyé. Annou konsidiwé èspéyans yon madanm ki ka wèsté an péyi Myanmar. Madanm sala swasant sèt (67) lanné an laj. Lè’y vini konnèt Bondyé ni an non, i koumansé pléwé èk i di: “Sa sé pwèmyé fwa an lavi mwen, mwen tann non Bondyé sé Jéhova. . . . I osi di: “Ou ja moutwé mwen bagay-la ki pli enpòtan-an mwen té sa janmen apwann.” Kon nou wè an èspéyans sala, lè moun apwann non Bondyé, sa ka ni an bon éfé an lavi yo.

KONTINÉ MOUTWÉ APWÉSIASYON POU ÒGANNIZASYON NOU

11. Ki mannyè sé ansyen-an sa moutwé apwésiasyon pou ògannizasyon Jéhova? (Gadé pòtwé-a osi.)

¹¹ Ki mannyè sé ansyen-an sa moutwé apwésiasyon pou ògannizasyon Jéhova? Yonn an sé mannyè-a sé ansyen-an sa moutwé apwésiasyon pou ògannizasyon Jéhova, sé lè ògannizasyon-an ba yo diwèksyon. Yo bizwen pwan tan èk li sé diwèksyon sala byen, èk fè sa yo pé pou swiv yo. Pou ègzanp, lè yo twapé diwèksyon asou mannyè-a pou pwézanté sé diféwan pa-a an sé mitin-lan, ében diwèksyon asou mannyè-a pou ofè lapwiyè an kongwigasyon-an. Yo ka pwan tan pou swiv sé diwèksyon sala, èk yo ka fè sa épi tout tjè yo. Kanmenm, sé pa sa sèlman yo ka fè. Yo ka twapé diwèksyon asou mannyè-a pou pwan bon ka sé fwè èk sè-a. Konsa, lè sé ansyen-an swiv tout sé diwèksyon-an ògannizasyon-an ka bay, sa ka fè sé fwè èk sè-a santi, Jéhova vwéman enmen yo, èk i kay pwan bon ka yo.

12. (a) Pouki i enpòtan pou nou swiv sé diwèksyon-an sé ansyen-an ka ban nou-an? (Hibrou 13:7, 17) (b) Pouki nou pa sipozé fiksé asou sé fòt sé ansyen-an?

¹² Lè nou swiv épi tout tjè nou sé diwèksyon-an sé ansyen-an ka ban ou-an, nou ka fè’y pli ézé pou yo fè twavay yo épi tjè kontan. Bib-la ka ankouwajé nou pou obéyi sé moun-lan ki ka kondwi zòt-la, èk swiv sa yo ka di. (Li Hibrou 13:7, 17.) Pouki i pa toujou ézé pou fè sa? Ében sé paski yo pa pawfé. Kon sé ansyen-an pa pawfé, si nou fiksé asou fòt yo èk pa asou sé bèl kawaktè-a yo ni-an, nou kay édé sé lèlmi nou-an. An ki mannyè nou ka fè sa? Sé lèlmi nou-an vlé nou kwè Jéhova pa ka sèvi ògannizasyon-an pou djidé nou. Konsa si nou fiksé asou sé fòt sé ansyen-an, nou kay koumansé ni dout an ògannizasyon-an, èk nou kay pèd konfyans an li. Konsa, kisa nou sa fè pou konnèt sé mansonj sé lèlmi nou-an èk widjèkté yo?

PA KITÉ LÉZÒT MOUN FÈ’W PÈD KONFYANS OU AN ÒGANNIZASYON-AN

13. Kisa lèlmi nou ka éséyé fè pou fè moun kwè ògannizasyon-an mové?

¹³ Ògannizasyon-an ka fè an chay bon bagay, mé lèlmi nou ka fè nou kwè yo mové. Pou ègzanp, nou ja apwann an lévanjil-la, Jéhova vlé nou tjenn kò nou nèt, pou nou ni bon kondwit, èk pou nou adowé’y adan an mannyè ki ka plè’y. I osi di, népòt moun ki kontiné fè sa ki mové èk ki pa wépanti, pa sa wèsté an manm an kongwigasyon-an. (1 Kòr. 5:11-13; 6:9, 10) Nou ka obéyi koumand sala. Mé paski nou ka obéyi koumand sala, lèlmi nou ka di, nou pa enmen moun, nou ka kondanné yo, èk nou pa ka twété moun adan an mannyè ki dwèt.

14. Ki moun ki sous sé mansonj-lan ki ka fèt asou ògannizasyon-an?

¹⁴ Idantifyé moun-lan ki dèyè sé mansonj-lan. Satan Denmou-an, sé li ki sous tout mansonj. Sé li ki “papa tout mantè.” (Jan 8:44; Jen. 3:1-5) Konsa, i pa ka sipwi nou, Satan ka sèvi lèlmi nou pou simen mansonj asou ògannizasyon-an, èk sa té ka fèt an pwèmyé syèk-la.

15. Ki mansonj sé chèf pwèt-la di asou Jézi, èk sé disip li-a?

¹⁵ Jézi té pawfé èk i fè an chay miwak ki té èstòdinè. Magwé i fè tout sé bon bagay sala, Satan sèvi adan moun pou simen mansonj asou’y. Pou ègzanp, adan sé titja lwa sé Jwif-la di, “sé chèf denmou-an ki ba li pouvwa sala pou i sa tiwé vyé lèspwi an moun.” (Mak 3:22) Lè Jézi té lodyans i di, i sé Gason Bondyé. Sé chèf pwèt-la akizé’y ka di, i ka ensilté Bondyé lè i di sa. Konsa, yo ankouwajé sé moun-lan pou mandé pou tjwé Jézi. (Maf. 27:20) Apwé sa, sé disip li-a té ka pwéché Bon Nouvèl-la, èk sa ki té ka òpozé yo “malpalé sé fwè-a, èk fè sé moun-lan ki pa Jwif-la lévé kont yo.” (Twav. 14:2, 19) Konsèné Twavay 14:2, Gad-la pou li 1 Désanm, lanné mil nèf san katwiven dizwit (1998) èspliké: “Sa ki té ka sipòté Satan widjèkté konmisyon-an sé Kwityen-an té ka pwéché, èk yo osi té ka di an chay mové bagay asou yo. Konsa moun pa té kay vlé kouté yo, èk té kay hayi yo.”

16. Kisa nou ni pou chonjé si nou tann mansonj?

¹⁶ Satan pa ka doubout manti, èk i ka kontiné jòdi pou éséyé “kwennen sé moun latè-a.” (Wév. 12:9) Si’w ka tann mansonj asou ògannizasyon-an, ében asou sé fwè-a ki ka pwan douvan, sé pou nou toujou chonjé mannyè lèlmi Bondyé té twété Jézi èk sé disip li-a. Jézi té di, moun té kay pèsikité sèvant Jéhova, èk yo té kay di mansonj asou yo. Èk sé sa ki ka fèt jòdi. (Maf. 5:11, 12) Si nou chonjé ki moun ki dèyè sé mansonj sala nou pa kay kwè yo, èk nou kay fè tout sa nou pé pou pwotèkté kò nou la menm. Konsa, kisa nou sa fè?

17. Pouki nou sipozé widjèkté mansonj? (2 Timòfi 1:13) (Osi, gadé enfòmasyon-an ki anba sijé-a “ Mannyè Pou Widjèkté Mansonj.”)

¹⁷ Widjèkté mansonj. Zapòt Pòl di nou a klè, sa nou sipozé fè si nou tann mansonj. I di Timòfi, “adan sé moun-an ki la-a ka enstwi an chay pawòl ki pa vwé, épi mwen vlé ou konmandé yo pou doubout sé bagay sala.” Èk i di’y ankò, “Sé pa pou ou ni anyen pou fè épi sé listwa sala ki pa menm vwé-a.” (1 Tim. 1:3, 4; 4:7) Katjilé sa, an ti bébé kay anmasé an bagay atè-a èk i kay mété’y an bouch li. Mé an gwan moun pa kay fè sa paski i konnèt danjé-a. An menm mannyè-a, nou vlé widjèkté mansonj paski nou konnèt sous sé mansonj sala. Kon sèvant Jéhova, nou ka kontiné tjébé “sé bon pawòl [lavéwité-a].”​—Li 2 Timòfi 1:13.

18. Ki lòt mannyè nou sa moutwé apwésiasyon pou ògannizasyon Jéhova?

¹⁸ An atik sala, nou ja konsidiwé twa (3) mannyè ògannizasyon Jéhova ka imité Jézi. Kon’w kontiné étidyé Bib-la, éséyé pou gadé pou lòt mannyè ògannizasyon-an ka kontiné swiv ègzanp Jézi. Édé sé fwè èk sé-a an kongwigasyon’w pou konfyé ògannizasyon-an, èvèk pou kontiné sèvi Jéhova épi fidèlité, èk pou wèsté pwé ògannizasyon-an Jéhova ka sèvi pou akonpli divwa’y. (Sam 37:28) Konsa, annou toujou kontiné apwésyé bèl pwivilaj-la nou ni-an, an ògannizasyon Jéhova.