1. Kisa ki pawadi spiwitwèl-la, èk kisa nou ja fè lidé nou pou fè?

 JÒDI, asou latè-a ni on pawadi ki plen moun ki ka fè on chay bon bagay. Èk pawadi sala plen milyon di moun ki ka enjwi lapé ki wéyal. Wi, moun ki ja an pawadi sala ja fè lidé yo pou pa janmen kité’y. Èk yo osi vlé tout moun vini jwenn yo an kondisyon spésyal sala. Mé, kisa kondisyon spésyal sala yé? Ében sa sé pawadi spiwitwèl-la! a

2. Kisa ki èstòdinè épi pawadi spiwitwèl-la?

² Latè Satan méchan, i danjéwé, èvèk moun hayi yonn a lòt. Mé magwé latè sala danjéwé, la ni on pawadi spiwitwèl ki èstòdinè. (1 Jan 5:19; Wév. 12:12) Alò, kisa ki ka fè pawadi sala èstòdinè? Ében sa sé paski, Jéhova pwépawé on bèl kondisyon, koté pèp li sa enjwi lapé èk lilyon. Wi, Dyé nou ki plen lanmityé ka wè mannyè vyé sistèm sala ka afèkté pèp li. Mé i ka fè sèvant li santi sòv, pou yo sa kontiné sèvi’y épi djèwté. Pawòl li ka dékwi pawadi spiwitwèl-la kon on ‘pwotèksyon’ èk kon ‘on jaden ki byen wouzé’. (Izay. 4:6; 58:11) Alò, magwé nou ka viv diwan tan ki difisil, moun ki ka wèsté an pawadi sala ka ni tjè kontan èk yo ka santi sòv, paski yo ni bennédiksyon Jéhova.​—Izay. 54:14; 2 Tim. 3:1.

3. Koumannyè pwofèsi-a an Izaya swasant senk (65) té fèt an lanné senk san twant sèt (537) avan épòk nou? 

³ Jéhova sèvi pwofèt Izaya pou dékwi mannyè lavi té kay yé bay moun ki ka viv an pawadi spiwitwèl-la. Wi, an liv Izaya chapit swasant senk (65), pwofèt Izaya dékwi mannyè lavi té kay yé an pawadi sala. Anfen, pwèmyé fwa-a pwofèsi sala té fèt sété an lanné senk san twant sèt (537) avan épòk nou. A lè sala, yo ladjé Jwif ki té an pwizon an Babilonn, èk yo viwé an péyi yo. Èvèk Jéhova benni yo èk i édé yo wibati vil Jérouzalèm. Èk osi, i édé yo wanjé tanp-lan an Izwayèl pou moun adowé’y.—Izay. 51:11; Zèk. 8:3.

4. Koumannyè pwofèsi-a an Izaya swasant senk (65) ka fèt jòdi jou? 

⁴ Pwofèsi-a an Izaya swasant senk (65) ka fèt vwé adan on lòt mannyè jòdi jou. Wi, sa pwofèt Izaya té di, té koumansé fèt vwé an lanné yon mil nèf san diznèf (1919) an épòk nou. Sa sé lanné-a pèp Jéhova té sòti anba Gwan vil Babilonn-an. Èk apwé sa, pawadi spiwitwèl-la koumansé simen oliwon latè-a. Anfen, kon sé fwè èk sè-a kontiné pwéché bon nouvèl-la, yo établi an chay kongwigasyon, èvèk sé moun-lan an sé kongwigasyon sala dévlopé bèl kawaktè. Pou ègzanp, moun ki té vyolan ében ki té ka viv vyé lavi, “mété an kawaktè ki nèf” kon yo koumansé apwann konsèné Jéhova. (Èfés. 4:24) Kanmenm, an chay an sé bagay-la Izaya dékwi kay fèt sèlman an latè nèf-la. Mé atjwèlman, nou ka twapé bennéfis an plizyè diféwan mannyè paski nou an pawadi spiwitwèl-la. Apwézan, annou diskité sé bennéfis-la nou kay twapé paski nou an pawadi spiwitwèl-la, èk pouki nou pa sipozé kité’y.

KOUMANNYÈ MOUN AN PAWADI SPIWITWÈL-LA KA SANTI

5. Silon Izaya 65:13, kisa nou ka enjwi an pawadi spiwitwèl-la?

⁵ Nou ka byen manjé èk nou byen wéfwéchi. Pwofèsi Izaya ka moutwé gwo diféwans-lan ant mannyè lavi moun ki andidan pawadi spiwitwèl-la yé, èk mannyè lavi moun ki dèwò pawadi-a yé. (Li Izaya 65:13.) Wi, Jéhova ka bay pèp li tout sa yo bouzwen alabondans, pou wèsté pwé’y. Pou ègzanp, Jéhova ban nou lisentèspwi-a, Bib-la, èk an chay piblikasyon ki bazé asou Bib-la pou nou sa ‘manjé, . . . bwè, . . . èk ni tjè kontan.’ (Gadé Wévélasyon 22:17.) Mé sitiwasyon moun ki pa an pawadi spiwitwèl-la byen diféwan. Yo ‘fen . . . yo swèf . . . èk yo hont,’ paski yo pa konnèt Bondyé.​—Amòs 8:11.

6. Koumannyè Jowèl 2:21-24 ka dékwi manjé spiwitwèl-la Jéhova ka ban nou, èk ki bennéfis nou ka twapé hòd manjé sala?

⁶ Pwofèt Jowèl mansyonnen bagay tèl kon, gwenn, diven, èk lwil doliv pou moutwé mannyè Jéhova ka toujou ba pèp li sa yo bouzwen alabondans. Èk anpami sé bagay-la Jéhova ka ban nou sé manjé spiwitwèl ki ka tjenn lafwa nou fò. (Jow. 2:21-24) Pou ègzanp, i ban nou Bib-la, piblikasyon ki bazé asou Bib-la, wèbsayt nou, mitin nou, sé asanblé nou-an, èk sé konvansyon nou-an. Èk lè nou manjé hòd sé bèl pwovizyon sala touléjou, nou ka twapé bennéfis. Wi, nou ka santi fò èk byen wéfwéchi.

7. Kisa ki ka ban nou ‘tjè kontan’? (Izaya 65:14)

⁷ Nou ni djèwté èk nou satisfè. Pèp Jéhova ka ‘andjélé épi lajwa’ paski yo ka vwéman apwésyé sa Jéhova ka fè ba yo. (Li Izaya 65:14.) Pou ègzanp, sé lavéwité-a èk sé pwonmèt-la ki an Pawòl Bondyé, èk osi, èspwa-a nou ni pou tan ki ka vini gwan mèsi sakwifis Jézi, ka ban nou ‘tjè kontan’. An plis di sa, lè nou palé épi sé fwè èk sè nou-an konsèné sé bagay sala, sa ka osi ban nou tjè kontan!​—Sam 34:8; 133:1-3.

8. La ni dé (2) bagay ki byen enpòtan an pawadi spiwitwèl-la, kisa yo yé?

⁸ Sé dé (2) bagay-la ki byen enpòtan an pawadi spiwitwèl-la sé, lanmityé-a èk lilyon-an anpami pèp Jéhova. Èk sa ka ban nou on ti lidé konsèné mannyè lavi kay yé an latè nèf-la. Koté tout sèvant Jéhova kay moutwé pli lanmityé, èk kay ni pli lilyon anpami yo. (Kòl. 3:14) Pou ègzanp, lè yon sésé jwenn Témwen Jéhova pou pwèmyé fwa-a i òbzòvé sa konsèné yo; i di: “M’a té konnèt mannyè pou ni djèwté, pa menm an fanmi mwen. Pwèmyé fwa-a mwen wè moun moutwé yonn a lòt lanmityé ki wéyal, sété lè mwen jwenn Témwen Jéhova.” Wi, népòt moun ki vlé ni djèwté ki wéyal èk satisfaksyon an lavi yo, ni pou antwé pawadi spiwitwèl-la. Èk menm si latè-a hayi nou, nou sav nou ni on bon non épi Jéhova èk pèp li.​—Izay. 65:15.

9. Kisa Izaya 65:16, 17 ka di konsèné sé bagay-la ki ka ban nou penn èk soufwans?

⁹ Nou ni lapé èk nou ka santi kam. Izaya 65:14 di, moun ki dèwò pawadi spiwitwèl-la ‘kay pléwé si tèlman paski tjè [yo] twis, èk [yo] kay plenn paski [yo] dékouwajé.’ Mé kisa ki kay wivé sé bagay-la ki té ka bay pèp Bondyé an chay penn èk soufwans? Ében tou talè, pèp Bondyé ‘kay obliyé sé bagay sala èk Bondyé pa kay wè sé bagay sala ankò.’ (Li Izaya 65:16, 17.) Wi, Jéhova kay tiwé tout sé pwòblenm nou-an, èk apwé an lè nou pa kay menm chonjé mannyè sé pwòblenm-la té ka fè nou santi.

10. Pouki ou ka santi i sé an bennédiksyon pou asosiyé épi sé fwè èk sè-a? (Gadé pòtwé-a osi.)

¹⁰ Lè nou atandé mitin ansanm épi sé fwè èk sè nou-an sa ka fè nou santi kam. Nou ka èspéyansé lapé paski a lè sala, nou pa ka fiksé asou sé bagay-la an latè-a ki ka ban nou tèt cho. Èk nou osi sa édé sé fwè èk sè-a èspéyansé lapé sala tou. An ki mannyè? Ében nou sa fè sa lè nou moutwé sé kawaktè di lisentèspwi Bondyé tèl kon lanmityé, tjè kontan, lapé, jantiyès èk dousè. (Gal. 5:22, 23) Wi, lè nou katjilé asou lapé-a nou ka èspéyansé-a, nou ka wè i sé vwéman an bennédiksyon pou asosiyé épi ògannizasyon Bondyé! Èk si nou wèsté an pawadi spiwitwèl-la, nou kay la lè Bondyé fè ‘latè nèf-la èk syèl nèf-la.’

11. Silon Izaya 65:18, 19, ki mannyè nou sipozé santi konsèné pawadi spiwitwèl-la Jéhova ja ban nou-an?

¹¹ Nou ni apwésiyasyon èk nou byen èksité. Bon, pwofèt Izaya kontiné èspliké poutji nou ni an chay wézon pou ‘wéjwi èk ni tjè kontan’ an pawadi spiwitwèl-la. Èk sa sé paski sé Bondyé menm ki fè pawadi spiwitwèl sala. (Li Izaya 65:18, 19.) Alò nou ka konpwann poutji Jéhova ka sèvi nou pou édé moun kité sé ògannizasyon latè-a ki pa ni pyès lavéwité èk édé yo antwé bèl pawadi spiwitwèl nou-an! Wi, lè nou wè sé bennédiksyon-an nou ka twapé paski nou an lavéwité-a, sa ka fè nou byen èksité, èk sa ka osi pousé nou pou di lézòt konsèné sé bennédiksyon sala.​—Jér. 31:12.

12. Lè’w katjilé asou sé pwonmèt-la an Izaya 65:20-24, ki mannyè sa ka fè’w santi èk pouki?

¹² Paski nou ni an bon wilasyon épi Jéhova, nou ni an bèl èspwa ki ka fè nou apwésyé’y, èk ki ka lévé an difé an tjè nou. Pou ègzanp, katjilé asou sé diféwan bagay-la nou kay wè èk fè an latè nèf-la! Jéhova pwonmèt ki: ‘La pa kay ni an zanfan ki kay sèlman viv pou an ti tan, ében an gwan moun ki pa kay viv pou tout tan’y.’ Nou kay ‘bati kay èk [nou] kay wèsté adan yo [èk nou] kay planté jaden wézen èk [nou] kay manjé sé fwi-a yo pòté-a.’ Nou ‘pa kay twavay wèd pou anyen’ paski ‘Jéhova [kay] benni [nou].’ Wi, Jéhova ka pwonmèt nou an lavi ki kay plen lajwa èk satisfaksyon, èk an lavi koté nou kay toujou santi sòv. Anfen Bib-la di: ‘Avan ‘[nou] kwiyé’, Jéhova kay sav sa nou bouzwen èk i kay ‘ouvè lanmen’y èk [i kay] satisfè dézi tout sa ki vivan.’​—Izay. 65:20-24; Sam 145:16.

13. Ki mannyè Izaya 65:25 ka dékwi sé chanjman-an moun ka fè lè yo koumansé sèvi Jéhova?

¹³ Nou ni lapé èk nou ka santi sòv. Jéhova ka sèvi lisentèspwi’y pou édé an chay moun ki té fawouch menm kon bèt sovay pou fè gwo chanjman an lavi yo. (Li Izaya 65:25.) Wi, silon lévanjil-la, pèp Bondyé ja twavay wèd pou déwasiné sé mové kawaktè-a yo té ni-an. (Ronm 12:2; Èfés. 4:22-24) Kanmenm sa pa vlé di pèp Bondyé pawfé. Non, nou tout sé péchè toujou. Mé magwé nou tout diféwan, Jéhova mennen nou ansanm. Èk paski nou tout enmen Jéhova, èk nou enmen yonn a lòt, nou ka èspéyansé lapé èk lilyon ki èstòdinè. (Titòs 2:11) Sa vwéman sé an miwak èk sé Jéhova tousèl ki sa fè sa!

14. Ki mannyè Izaya 65:25 té fèt vwé an lavi yon fwè?

¹⁴ Ès moun sa vwéman chanjé kawaktè yo kon pwofèsi-a an Izaya ka di? Absoliman! Konsidiwé èspéyans sala. Lè an jenn nonm té ni ven (20) lanné i té ja alé pwizon plizyè fwa pou lapéti diféwan kalté kwim tèl kon, vòlè motoka èk kasé kay. Osi, i té toujou pawé pou goumen. Kanmenm lè’y koumansé étidyé Bib-la èk atandé mitin, i vin konpwann poutji i té ka viv. Èk sa sété pou adowé Jéhova an pawadi spiwitwèl-la. Apwé i batizé, i té ka toujou palé konsèné mannyè Izaya 65:25 té fèt vwé an lavi’y. Wi, i té vyolan menm kon an lyon, mé i chanjé èk i vini dous menm kon an ti mouton.

15. Poutji nou vlé envité moun pou vin jwenn nou an pawadi spiwitwèl-la, èk ki mannyè nou sa fè sa?

¹⁵ Pwèmyé èspwèsyon-an an Izaya 65:13 ka di: ‘Alò, mi sé sa Jéhova, Senyè-a Ki Pli Ho-a, di.’ Èk dènyé èspwèsyon-an an vèwsé 25 ka di: ‘Sé sa Jéhova di.’ Konsa, paski sa sé pawòl Jéhova nou sa ni asiwans-lan ki, népòt sa Jéhova di kay toujou fèt vwé. (Izay. 55:10, 11) Èk nou ka wè sa épi pawadi spiwitwèl-la. I ja ka ègzisté. Wi, i la apwézan, menm kon Jéhova té pwonmèt. Jéhova ja fè yon fanmi di moun ki ka adowé’y. Èk sa sé an bagay ki èstòdinè. Èk magwé nou ka viv adan an latè ki plen movèsté èk vyolans, nou ka santi sòv èk nou ni lapé paski nou anpami fanmi sala. Sa bèl toubonnman! (Sam 72:7) Èk sa sé wézon-an nou vlé plizyè moun vin jwenn nou an fanmi sala, pou yo sa èspéyansé bèlté pawadi spiwitwèl-la. Èk pli bon mannyè-a nou sa édé yo, sé lè nou fè tout sa nou pé pou fè disip.​—Maf. 28:19, 20.

MANNYÈ NOU SA ÉDÉ MOUN VINI AN PAWADI SPIWITWÈL-LA

16. Kisa ki sa édé moun vini an pawadi spiwitwèl-la?

¹⁶ Kon sèvant Jéhova nou chak sa édé moun vini an pawadi spiwitwèl-la. Mé pou nou sa fè sa, i enpòtan pou nou imité Jéhova. Chonjé, Jéhova pa ka fòsé moun pou vini an ògannizasyon’y. Pito sa, i ka moutwé moun lanmityé pou “mennen [yo]” pwé’y. (Jan 6:44; Jér. 31:3) Alò, lè moun ki ni tjè sensè apwann konsèné lanmityé Jéhova èk sé bèl kawaktè’y-la, yo ka vini pwé’y. Mé, koumannyè bon kawaktè nou èk bon kondwit nou, sa édé moun vini an pawadi spiwitwèl-la?

17. Ki mannyè nou sa édé moun vini an pawadi spiwitwèl-la?

¹⁷ Yon mannyè nou sa édé moun vini an pawadi spiwitwèl-la, sé lè nou twété sé fwè èk sè nou-an épi lanmityé èk jantiyès. Anfen, lè moun atandé sé mitin nou-an, nou vlé yo santi menm mannyè-a moun ki pa té Kwityen an pwèmyé syèk-la té ka santi lè yo atandé sé mitin-lan an Kòrint. Wi, yo té di: “Bondyé isi-a anpami zòt pou vwé.” (1 Kòr. 14:24, 25; Zèk. 8:23) Konsa, nou vlé swiv bèl konsèy-la an 1 Tèsalonnika 5:13 koté i di: “Sé pou [zòt] viv byen èvèk yonn a lòt.”

18. Ki lòt bagay nou sa fè pou édé moun vini an pawadi spiwitwèl-la?

¹⁸ An lòt mannyè nou sa édé moun vini an pawadi spiwitwèl-la sé lè nou éséyé gadé sé fwè èk sè nou-an menm mannyè-a Jéhova ka gadé yo. Wi, nou ka imité Jéhova lè nou fiksé asou sé bon kawaktè-a sé fwè èk sè nou-an ni èk pa asou défo yo. Èk sa sé paski an tan pou vini, yo pa kay ni défo. Osi, si la ni pyès mal konpwann anpami nou, nou sa wanjé’y adan an mannyè ki ka moutwé lanmityé. Èvèk nou vlé toujou “fè bon épi ni an tjè fèb pou yonn a lòt [èk] pawdonnen yonn a lòt.” (Èfés. 4:32) Konsa, lè moun ki vlé lézòt twété yo épi lanmityé wè mannyè nou ka aji byen épi yonn a lòt, sa sa pousé yo pou vini an pawadi spiwitwèl-la. b

PA JANMEN KITÉ PAWADI SPIWITWÈL-LA

19. (a) Silon bwèt-la “ Yo Kité Èk Viwé,” kisa adan moun di lè yo viwé an pawadi spiwitwèl-la? (b) Kisa nou détèminé pou fè? (Gadé pòtwé-a osi.)

¹⁹ Nou ka vwéman apwésyé pawadi spiwitwèl-la! I pli bèl pasé avan. Èk la ni pli moun ki ka adowé Jéhova an pawadi spiwitwèl-la pasé pyès lòt tan. Alò, nou vlé kontiné moutwé nou ka apwésyé pawadi sala Jéhova fè ban nou. Wi népòt moun ki vlé santi wéfwéchi, kam, sòv, èk satisfè, dwé vini an pawadi spiwitwèl-la èk pa janmen kité’y! Sa enpòtan paski Satan ka fè tout sa i pé pou kwennen nou pou nou kité pawadi spiwitwèl-la. (1 Pita 5:8; Wév. 12:9) Nou pa vlé kité Satan ganyen. Konsa, annou twavay wèd pou pwotéjé bèlté-a, djèwté-a, èk lapé-a nou ni an pawadi spiwitwèl-la.