1. Kisa ki kay édé nou enmen étidyé pwofèsi Bib?

 BEN sé an jenn fwè ki di: “Mwen enmen étidyé pwofèsi Bib.” Ès ou ka santi menm kon Ben, ében ès ou ka twapé pwofèsi Bib twò difisil pou kopwann? Pitèt ou ka jis santi lè’w ka étidyé pwofèsi ou pa ka twapé pyès plézi. Kanmenm, si ou kopwann poutji Jéhova mété pwofèsi an Pawòl li, ou pé koumansé enmen étidyé pwofèsi menm kon Ben.

2. Kisa nou kay diskité an atik sala?

² An atik sala nou kay diskité poutji nou ni pou apwann konsèné pwofèsi Bib, èk sa ki kay édé nou pou étidyé sé pwofèsi sala. Nou kay osi diskité dé (2) pwofèsi an liv Dannyèl, èk sé bennéfis-la nou kay twapé lè nou byen kopwann sé pwofèsi sala.

3. Si nou vlé kopwann sé pwofèsi-a ki an Bib-la kisa nou ni pou fè?

³ Pou nou sa kopwann pwofèsi Bib nou bouzwen èd. Pou ègzanp, ann’ di ou èk an jan ka vizité an plas. Ou pa konnèt plas-la mé jan’w konnèt plas-la byen. Èk i konnèt ègzaktiman koté ou yé, èk osi koté chak an sé chimen-an kay mennen’w. Ès ou pa té kay kontan pou ni jan sala épi’w? Absoliman, paski jan sala sa vwéman édé’w. Ében Jéhova menm kon jan sala. I konnèt ègzaktiman tan-an nou ka viv adan èk ki koté chimen-an nou pwan an lavi kay mennen nou. Anfen, i konnèt chimen-an tèlman byen, i jis konnèt sa ki kay fèt an tan pou vini. Alò, si nou vlé kopwann sé pwofèsi-a ki an Bib-la, nou ni pou abésé kò nou, èk mandé Jéhova pou édé nou.​—Dann. 2:28; 2 Pita 1:19, 20.

4. Pouki Jéhova mété pwofèsi an Bib-la? (Jérémaya 29:11) (Gadé pòtwé-a osi.)

⁴ Tout bon pawan vlé bon pou ich yo. Mé Jéhova sé pli mèyè pawan-an nou sa janmen ni. Konsa i vlé ich li enjwi an bon lavi. (Li Jérémaya 29:11.) Wi, Jéhova sa édé ich li adan an mannyè pyès lòt pawan sa fè, paski i ni an abilité ki èstòdinè! Papa nou Jéhova ni abilité-a pou di sa ki kay fèt andavans, èk sa i di ka toujou fèt. Èvèk i sav enfòmasyon sala sa édé èk pwotéjé ich li. Èk sé pou wézon sala Jéhova sèvi nonm pou ékwi sé pwofèsi-a ki an Bib-la, pou édé nou konnèt sé bagay-la ki kay fèt andavans. (Izay. 46:10) Anfen, chak an sé pwofèsi-a sé an bèl kado hòd Jéhova. Mé ki mannyè ou sa ni asiwans-lan ki, sé pwofèsi-a ki an Bib-la kay fèt vwé?

5. Kisa an jenn moun sa apwann an èspéyans Max?

⁵ Lè sé jenn moun nou-an an lékòl, souvan yo anpami moun ki pa ni an chay ében pyès wèspé pou Bib-la. Délè sa sé moun sala ka di èben fè, pé mété dout an lidé sé jenn moun nou-an konsèné Bib-la. Annou konsidiwé ègzanp Max. Max di: “Lè mwen té an lékòl mwen koumansé ni dout. Mwen pa té asiwé pawan mwen té ka lévé mwen an wilizyon vwé-a. Èk mwen jis koumansé kwèsyonnen si Bib-la té vwéman Pawòl Bondyé. Mwen sav sa té twakasé lidé pawan mwen, mé yo wèsté kam èk yo aji épi sitiwasyon-an adan an bon mannyè.” Wi, pawan Max sèvi Bib-la pou wéponn tout sé kèstyon’y-lan. Max fè an bagay pou édé kò’y tou. I di: “Mwen étidyé pwofèsi Bib pou kò mwen menm.” Èk kisa ki té wézilta-a? Max di: “Apwé sa mwen pa té ni pyès dout Bib-la sé Pawòl Bondyé!”

6. Kisa ou ni pou fè si ou pa asiwé Bib-la sé vwéman Pawòl Bondyé? Èk pouki i enpòtan pou’w fè asiwé Bib-la sé Pawòl Bondyé?

⁶ Menm kon Max, si ou ni dout Bib-la sé Pawòl Bondyé, ou pa ni pou santi hont. Kanmenm ou ni pou fè kéchòy vitman pou fòtifyé lafwa’w an Bib-la. Èk pouki i enpòtan pou’w fè sa? Wézon-an sa tèlman enpòtan sé paski dout menm kon lawouj. Wi, menm kon lawouj ka donmajé bagay ki valowab an mizi an mizi, sé menm mannyè-a dout sa détwi lafwa nou an mizi an mizi. Si ou ni dout konsèné Bib-la èk ou vlé tiwé’y an lidé’w, ou ni pou mandé kò’w kèstyon sala: ‘Ès mwen asiwé sa Bib-la di konsèné sa ki kay fèt an tan pou vini sé lavéwité?’ Si ou pa asiwé, ou ni pou étidyé sé pwofèsi-a ki an Bib-la ki ja fèt. Mé, kisa ki kay édé’w pou étidyé sé pwofèsi sala?

7. Kisa ki té wédé pwòfèt Dannyèl pou étidyé pwofèsi Bib? (Dannyèl 12:10) (Gadé pòtwé-a osi.)

⁷ Ègzanp pwòfèt Dannyèl sa édé nou pou étidyé pwofèsi Bib. Pwòfèt Dannyèl té ni bon motiv ében bon wézon lè’y té ka étidyé sé pwofèsi-a an Bib-la. I té vlé konnèt lavéwité-a. Pwòfèt Dannyèl té ni imilité. I té sav Jéhova té kay édé’y kopwann sé pwofèsi-a si i té wèsté pwé’y, si i té obéyi’y, èk si i té mandé’y pou èd. (Dann. 2:18, 27, 28; li Dannyèl 12:10.) Osi, pwòfèt Dannyèl té ka pwan tan’y pou étidyé pwofèsi Bib. I té ka fè wichach an pòsyon Bib-la ki té avélab. (Jér. 25:11, 12; Dann. 9:2) Alò, ki mannyè ou sa swiv ègzanp Dannyèl?

8. Pouki adan moun pa ka kwè pwofèsi Bib ka fèt vwé? Mé kisa nou sipozé fè lè nou ka étidyé pwofèsi Bib?

⁸ Ègzanminé sé wézon-an ou ka étidyé pwofèsi Bib. Pou ki wézon ou ka étidyé pwofèsi Bib? Si ou ka fè sa paski ou vwéman vlé konnèt lavéwité-a, Jéhova kay édé’w. (Jan 4:23, 24; 14:16, 17) Adan moun ka étidyé pwofèsi Bib paski yo ka chaché pou pwèv pou moutwé Bib-la sé pa Pawòl Bondyé. Èk yo ka fè sa paski yo pa vlé swiv wèg Bondyé, yo vlé viv lavi yo kon yo vlé. Kanmenm nou sipozé ni bon wézon lè nou ka étidyé pwofèsi Bib. An plis di sa, lè nou ka étidyé pwofèsi Bib, nou bouzwen an kawaktè ki byen enpòtan. Anfen, si nou pa ni kawaktè sala, nou pa kay sa kopwann sé pwofèsi-a.

9. Ki kawaktè nou bouzwen pou konpwann sé pwofèsi-a ki an Bib-la? Èk poutji i enpòtan pou nou ni kawaktè sala?

⁹ Abésé kò’w. Jéhova pwonmèt pou édé moun ki abésé kò yo. (Jémz 4:6) Konsa nou ni pou pwédyé bay Jéhova pou édé nou konpwann sé pwofèsi-a ki an Bib-la. Osi, Jéhova ka sèvi èslav fidèl-la pou ban nou manjé a lè, alò si nou abésé kò nou, nou kay aksèpté èd-la èslav fidèl-la ka ban nou pou konpwann Pawòl Bondyé. (Louk 12:42) Chonjé, Jéhova sé pa on Dyé ki ka mété konfizyon, konsa i ka fè an chay sans ki, Jéhova kay sèvi yon sous pou édé nou konpwann sé lavéwité-a ki an Bib-la.​—1 Kòr. 14:33; Èfés. 4:​4-6.

10. Kisa ou apwann an èspéyans Esther?

¹⁰ Fè wichach. Chwazi on pwofèsi ki ka entéwésé’w, èvèk fè wichach asou’y. Sé sa yon sésé fè. Non’y sé Esther. I té vlé konnèt pli konsèné sé pwofèsi-a ki té ka palé konsèné lè Mèsaya-a té kay vini. Konsa Esther di: “Lè mwen té ni kenz (15) lanné mwen koumansé fè wichach ki ka bay pwèv ki, sé pwofèsi-a konsèné Mèsaya-a té vwéman ékwi avan Jézi té vini asou latè-a.” Wi, sa Esther apwann lè’y té li konsèné sé ‘Dead Sea Scroll’-la ba’y pwèv-la i té ka gadé pou-a. Esther osi di: “Adan sé pwofèsi-a té ékwi avan Jézi té vini asou latè-a, konsa mwen asiwé sé Jéhova ki mété sé pwofèsi sala an Pawòl li.” I osi di: “Mwen té ni pou li sé enfòmasyon-an plizyè fwa pou konpwann yo.” Mé Esther byen kontan i té fè éfò-a. Apwé i té byen ègzanminé plizyè pwofèsi, i di: “Mwen sa wè a klè pou kò mwen menm, sa ki an Bib-la sé vwéman lavéwité!”

11. Pouki i bon pou fè asiwé sa ki ékwi an Bib-la sé lavéwité?

¹¹ I bon pou fè asiwé sa ki ékwi an Bib-la sé lavéwité. Èk sa sé paski, lè nou wè mannyè adan sé pwofèsi-a ki an Bib-la ja ka fèt vwé, sa ka édé nou pou konfyé Jéhova pli, èk pou swiv népòt diwèksyon i ban nou. Osi, sé pwofèsi-a ki an Bib-la ka di nou konsèné èspwa nou pou tan ki ka vini. Konsa, lè nou étidyé yo, nou ka wèsté pòzitif menm si nou ni pwòblenm. Apwézan annou konsidiwé dé (2) pwofèsi an liv Dannyèl, èk si nou konpwann sé dé pwofèsi sala nou kay sa fè bon disizyon.

12. Kisa pyé-a ki ‘mélé épi tè gwa épi fè’ ka wépwézanté? (Dannyèl 2:41-43)

¹² Li Dannyèl 2:41-43. Wa Babilonn, Nèbyoukadnéza, té ni on wèv koté i té wè an imaj. Pyé imaj-la té ‘mélé épi tè gwa épi fè.’ Èk pwòfèt Dannyèl té bay wa-a èsplikasyon-an. Lè nou konpawé pwofèsi sala épi lòt pwofèsi an liv Dannyèl èk an liv Wévélasyon, yo ka édé nou konpwann ki, pyé sala ka wépwézanté gouvèdman Lanméwik èk Langlitè ében sa nou ka kwiyé ‘Anglo-American World Power’-a. b Wi, Lanméwik èk Langlitè ka twavay ansanm èk yo sé gouvèdman-an ki ni pli pouvwa an latè-a jòdi jou. Konsèné Lanméwik èk Langlitè, pwofèt Dannyèl té di ‘wéyòm-lan kay an ti miyèt fò èk an ti miyèt fèb’. Mé nou pé mandé kò nou, pouki gouvèdman sala kay an ti miyèt fèb? Sa sé paski sé moun-lan tè gwa-a ka wépwézanté-a, kay anpéché gouvèdman sala pou kondwi épi fòs-la yo vlé-a. c

13. Ki diféwan bagay nou ka apwann lè nou byen konpwann pwofèsi-a an liv Dannyèl konsèné imaj-la?

¹³ Nou sa apwann plizyè bagay ki enpòtan hòd imaj-la Wa Nèbyoukadnéza té wè an wèv li. Wi, nou sa apwann an chay bagay, èspwèsman lè nou ègzanminé pyé imaj-la. Pwèmyé bagay-la nou ka apwann sé sa, gouvèdman Lanméwik èk gouvèdman Langlitè ansanm ja moutwé yo ni an pil pouvwa. Pou ègzanp, Lanméwik èk Langlitè té anpami sé nasyon-an ki ganyen Pwèmyé Gwo Ladjè-a èk Dézyenm Gwo Ladjè-a. Kanmenm, gouvèdman Lanméwik èk gouvèdman Langlitè pa ni menm pouvwa-a yo té ni avan, èk yo kay kontiné pèd pouvwa, paski sé sitwayen yo-a ka goumen épi yonn a lòt. Osi sé sitwayen yo-a ka goumen kont gouvèdman-an. Dézyenm bagay-la nou ka apwann sé sa, ‘Anglo-American World Power’-a kay dènyé gouvèdman-an ki kay kondwi latè-a lè Wéyòm Bondyé kay détwi tout gouvèdman lézòm. Alò, menm si délè lòt nasyon ka opozé ‘Anglo-American World Power’-a, yo pyès pa kay wiplasé’y. Ki mannyè nou sav sa? Nou sav sa paski ‘wòch-la’ ki ka wépwézanté Wéyòm Bondyé kay kwazé pyé imaj-la. Èk kon nou ja apwann pyé imaj-la ka wépwézanté gouvèdman Lanméwik èk gouvèdman Langlitè.​—Dann. 2:34, 35, 44, 45.

14. Lè nou konpwann pwofèsi-a konsèné pyé-a ki mélé épi tè gwa épi fè, ki mannyè sa sa édé nou fè bon disizyon?

¹⁴ Ès ou vwéman kwè pwofèsi-a konsèné pyé-a ki mélé épi tè gwa épi fè, sé lavéwité? Si ou ka kwè pwofèsi sala sé lavéwité, ou kay fè bon disizyon an mannyè-a ou ka viv lavi’w. Pou ègzanp, ou pa kay éséyé pou anmasé byen latè-a ében anmasé an chay lajan paski ou sav toutalè Wéyòm Bondyé kay détwi mové latè sala. (Louk 12:16-21; 1 Jan 2:15-17) An plis di sa, lè’w konpwann pwofèsi sala, i kay édé’w wéyalizé i enpòtan pou’w kontiné pwéché èk enstwi moun konsèné bon nouvèl-la. (Maf. 6:33; 28:18-20) Konsa, kon nou ja pasé an ti tan ka étidyé pwofèsi sala, i kay bon pou mandé kò’w kwèsyon sala: ‘Ès sé disizyon-an mwen ka fè ka moutwé mwen vwéman kwè Wéyòm Bondyé kay détwi tout gouvèdman lézòm touswit?’

15. Ki gouvèdman ‘wa nòd-la’ èk ‘wa soud-la’ ka wépwézanté jòdi? (Dannyèl 11:40)

¹⁵ Li Dannyèl 11:40. Dannyèl chapit wonz (11) ka palé konsèné dé (2) wa ki ka goumen kont yonn a lòt pou pouvwa. Lè nou konpawé pwofèsi-a ki an liv Dannyèl épi lòt pwofèsi an Bib-la, nou ka wè a klè ki, ‘wa nòd-la’ ka wépwézanté Wisi èk sé nasyon-an ki ka sipòté’y-la, èk ‘wa soud-la’ ka wépwézanté ‘Anglo-American World Power’-a. d

16. An ki mannyè ‘wa nòd-la’ ka twété pèp Bondyé?

¹⁶ Pèp Bondyé ki ka viv anba kondwit ‘wa nòd-la’ ka èspéyansé an chay pèsikasyon. Pou ègzanp, yo ja bat adan sé fwè-a èk yo ja mété adan di yo an pwizon. Kanmenm, pèsikasyon sala pa ka afébli lafwa pèp Bondyé. Èk wézon-an pou sa, sé paski sé fwè nou-an sav ki, pèsikasyon-an yo ka èspéyansé ka moutwé pwofèsi-a an liv Dannyèl ka fèt vwé. e (Dann. 11:41) Wi, lè nou wè pwofèsi ka fèt vwé, sa ka fòtifyé lafwa nou èk sa ka édé nou wèsté fidèl pou Jéhova.

17. Ki pwòblenm pèp Jéhova té ni pou aji épi anba kondwit ‘wa soud-la’?

¹⁷ ‘Wa soud-la’ ja osi pèsikité pèp Jéhova an tan pasé. Pou ègzanp, diwan Pwèmyé Gwo Ladjè-a èk Dézyenm Gwo Ladjè-a, yo té mété plizyè an sé fwè nou-an an pwizon paski yo pa té vlé alé goumen ladjè. Èk yo tiwé adan manmay Témwen Jéhova hòd lékòl paski yo pa té vlé salwé ‘flag’-la. Jòdi jou, Témwen Jéhova ki ka wèsté an péyi koté wa soud-la ka kondwi ka twapé tès an lòt diféwan mannyè ki ka fè’y difisil pou yo wèsté fidèl pou Jéhova èk Wéyòm li. Pou ègzanp, lè moun ka kanmpéyn pou ilèksyon, yon Kwityen pé santi i vonmyé yon patizan politik pasé on lòt. Alò, magwé i pa kay vot, mé i ka vot an tjè’y. Sa vlé di, i pé ni èspwa-a ki, yon sèten patizan politik ganyen ilèksyon-an. Wi, i byen enpòtan pou pa mélé kò nou an zafè pòlitiks. Konsa nou ni pou pwan bon pwokosyon pa sèlman an aksyon nou, mé osi an katjil nou, èk santiman nou!​—Jan 15:18, 19; 18:36.

18. Lè nou wè batay-la ant ‘wa nòd-la’ èk ‘wa soud-la’, ki mannyè sa sipozé afèkté nou? (Gadé pòtwé-a osi.)

¹⁸ Moun ki pa ni lafwa an sé pwofèsi-a ki an Bib-la kay vini pè lè yo wè ‘wa soud-la ka batayé épi wa nòd-la’. (Dann. 11:40) Wi toulédé sé wa sala ni fèman ki ni asé pouvwa pou détwi tout bagay ki asou latè-a. Mé, nou ni asiwans-lan ki, Jéhova pa kay janmen kité sa fèt. (Izay. 45:18) Konsa, nou pa vlé bay kò nou tèt cho épi batay-la ant ‘wa nòd-la’ épi ‘wa soud-la’. Pito sa, nou vlé fòtifyé lafwa nou an sé pwofèsi-a ki an Bib-la, paski batay-la ant ‘wa nòd-la’ èk ‘wa soud-la’ ka moutwé a klè bout sistèm sala opwé.

19. Kisa nou ni pou tjenn an lidé lè’y vini pou pwofèsi Bib?

¹⁹ Nou pa konnèt tout sé détay-la konsèné mannyè sèten pwofèsi kay vwéman fèt. Jis pwòfèt Dannyèl ki pa té konpwann kisa tout sa i té ékwi-a té vlé di. (Dann. 12:8, 9) Mé nou ni pou chonjé, menm si nou pa konnèt tout sé détay-la konsèné mannyè an pwofèsi kay vwéman fèt, sa pa vlé di sa pwofèsi-a di pa kay fèt. Alò, nou sa ni konfyans-lan ki, a lè-a ki bon Jéhova kay édé nou pou konpwann sa nou bizwen konnèt, menm kon i ja fè an tan pasé.​—Amòs 3:7.

20. Ki pwofèsi Bib nou ka èspéyé pou fèt touswit? (b) Kisa nou sipozé kontiné fè?

²⁰ Pwofèsi-a an 1 Tèsalonnika 5:3 di sé nasyon-an kay di: “Tout bagay ka alé byen.” Lè sa fèt, sé gouvèdman latè-a kay tounen kont fo wilizyon èk détwi yo. (Wév. 17:16, 17) Sé gouvèdman latè-a kay osi ataké pèp Bondyé. (Izik. 38:18, 19) Èk lè tout sé bagay sala fèt, sé lè sala dènyé ladjè-a Anmagèdonn kay koumansé. (Wév. 16:14, 16) Alò, nou sa ni asiwans-lan ki, sé bagay sala kay fèt touswit. Mé padan nou ka èspéyé pou sé bagay sala fèt, annou kontiné pou moutwé Jéhova nou ka apwésyé pwofèsi Bib. Wi, nou sa moutwé apwésiyasyon nou lè nou kontiné ègzanminé pwofèsi Bib, èk lè nou édé lézòt moun pou konpwann yo tou.