1. Silon Hibrou 12:1, kisa nou ni pou fè?

 BIB-LA ka konpawé lavi nou kon Kwityen épi on kous. Sé Kwityen-an ki fini kous-la kay ganyen on pwi! Èk pwi sala sé lavi étonnèl. (2 Tim. 4:7, 8) Konsa, nou ni pou fè tout sa nou pé kontiné kouwi an kous sala, sitou kon nou ka wè bout kous sala tou pwé. On moun ki té fini kous-la sété zapòt Pòl. Èk i té di nou sa nou ni pou fè pou nou kouwi kous-la byen. I di nou pou “fè fòs kò nou pou nou kouwi kous-la . . . [èk] jété tout bagay ki ka tjenbé nou dèyè.”​—Li Hibrou 12:1.

2. Kisa i vlé di pou “jété tout bagay”?

² Kisa Pòl vlé di, lè i di “jété tout bagay”? Ès sa vlé di, nou pa kay ni anyen pou pòté? Mé non. Sé pa sa Pòl ka di, paski la ni sèten bagay nou dwé pòté. Pwen-an Pòl té ka fè sé sa, nou ni pou jété tout bagay ki pa nésésè. Èk wézon-an pou sa sé sa, sé bagay sala sa tjébé nou dèyè, èben anpéché nou fini kous-la. Konsa, nou ni pou idantifyé sé bagay sala èk ladjé yo vitman. Mé kon nou té di, la ni sèten bagay nou ni pou pòté. Èk si nou pa pòté yo, nou pa kay sa kouwi an kous-la ankò. (2 Tim. 2:5) Kisa yo yé?

3. (a) Silon Galécha 6:5, kisa chak moun nou ni pou pòté? (b) Kisa nou kay diskité an atik sala èk pouki?

³ Li Galécha 6:5. Wi Pòl di, “chak moun ni pou pòté chay li menm.” Konsa, nou chak ni on wèskonsabilité douvan Bondyé. La ni bagay nou ni pou fè ki pyèsonn pa sa fè ban nou. Konsa, an atik sala, nou kay konsidiwé kisa i vlé di pou pòté chay nou menm, èk kouman nou sa pòté’y. Osi, nou kay palé asou bagay ki pa nésésè pou nou pòté èk mannyè nou sa jété yo. Wi, pou nou sa kouwi kous-la byen, nou ni pou pòté sé chay-la nou dwé pòté-a, èk jété tout sa ki ka tjébé nou dèyè.

4. Pouki i pa twò difisil pou nou tjenn pwonmèt-la nou té fè bay Jéhova an lapwiyè? (Gadé pòtwé-a osi.)

⁴ Pwonmèt-la nou té fè bay Jéhova pou sèvi’y pou tout tan. Lè nou dèdiké lavi nou bay Jéhova an lapwiyè, nou té pwonmèt nou té kay adowé’y èk sèvi’y pou tout tan. Sa sé on pwonmèt nou dwé tjenn. Mé magwé pwonmèt byen sèwiyé, i pa on bagay ki twò difisil pou nou tjenn. Nou sav sa, paski Jéhova fè nou épi abilité-a pou fè divwa’y. (Wév. 4:11) Anfen, i fè nou an imaj li épi dézi-a pou adowé’y. Sé pou wézon sala nou sa sèvi’y épi djèwté èk ni on bon wilasyon épi’y. (Sam 40:8) An plis di sa, lè nou fè divwa Jéhova èk imité ègzanp Jézi, nou “kay jwenn lapé an tjè [nou]”.​—Maf. 11:28-30.

5. Ki dé (2) bagay ki sa édé’w pou tjenn pwonmèt-la ou té fè bay Jéhova? (1 Jan 5:3)

⁵ Koumannyè ou sa pòté chay sala? Mi dé (2) bagay kisa édé’w. Pwèmyé-a, lè’w kontiné pou fòtifyé wilasyon’w èk lanmityé pou Jéhova. Èk ou sa fè sa, lè’w katjilé asou tout sé bon bagay-la Jéhova ja fè ba ou, èk sa i kay fè an tan pwochen. I kay vini pli èk pli ézé pou ou obéyi Bondyé kon lanmityé’w pou li ka pwofité. (Li 1 Jan 5:3.) Dézyenm-lan, imité Jézi. Jézi té sa fè divwa Jéhova èk obéyi’y, paski i té pwédyé bay Bondyé pou èd. Èk i té fiksé lidé’y asou sa Bondyé té pwonmèt li. (Hib. 5:7; 12:2) Konsa, menm kon Jézi, nou ni pou pwédyé bay Bondyé pou fòs èk kouway. Èk nou ni pou tjenn lidé nou fiksé asou sé bèl pwonmèt-la pou tan ki ka vini. Wi, kon lanmityé’w pou Bondyé ka pwofité, èk kon ou ka imité Jézi, ou kay sa tjenn pwonmèt-la ou té fè ba Jéhova pou sèvi’y pou tout tan.

6. Si nou vlé plè Jéhova èk Jézi, kisa nou ni pou fè? (Gadé pòtwé-a osi.)

⁶ Sé wèskonsabilité-a nou ni an fanmi nou. Wi i vwé, nou enmen fanmi nou an pil. Mé nou pa sipozé enmen yo plis pasé nou enmen Jéhova èk Jézi. (Maf. 10:37) Kanmenm, sa pa ka ban nou pyès wézon pou néglijé wèskonsabilité-a nou ni an fanmi nou. Sé wèskonsabilité-a nou ni an fanmi nou pa ka anpéché nou sèvi Jéhova èk Jézi. Anfen, pou nou sa plè Jéhova èk Jézi nou ni pou pwan sé wèskonsabilité-a nou ni an fanmi-a byen sèwiyé, èk fè sa nou sipozé pou fè. (1 Tim. 5:4, 8) Èk lè nou fè sa, nou kay ni an chay djèwté. Jéhova byen sav, on fanmi kay ni pli djèwté lè mawi èk madanm twété yonn a lòt épi lanmityé èk wèspé; lè pawan enmen èk entwennen ich yo; èk lè zanfan obéyi pawan yo.​—Èfés. 5:33; 6:1, 4.

7. Kisa ki sa édé’w pòté wèskonsabilité’w an fanmi-a?

⁷ Koumannyè ou sa pòté chay sala? Adan fanmi-a, chak moun ni wèskonsabilité’y. Èk nou ni sé pwensip-la ki an Bib-la pou édé nou pòté sé wèskonsabilité-a nou ni-a. Alò, sé pou nou swiv bon konsèy-la Bib-la ka bay, pito nou swiv santiman nou, sa moun an konmin-lan ka di èben fè, èben sa moun ki ni gwo endikasyon ka di. (Pwov. 24:3, 4) Bon. Ògannizasyon Jéhova ka potjiwé an chay piblikasyon èk vidiyo ki bazé asou Bib-la. Konsa, sé pou nou sèvi sé piblikasyon-an èk sé vidiyo-a, paski yo sa édé nou touléjou. Pou ègzanp, la ni plizyè vidiyo anba sèksyon-an “Fanmi”, “Jennès” èk “Ti Manmay” asou jw.org. b La ni an chay enfòmasyon ki sa édé moun ki mayé, pawan èk jenn moun aji épi sé difikilté-a yo ka èspéyansé jòdi jou. Wi, enfòmasyon-an sé piblikasyon sala, èk sé vidiyo-a, sa édé nou èk fanmi nou ni tjè kontan èvèk ni on bon wilasyon épi Jéhova. Konsa, annou fè détèminasyon nou pou toujou swiv konsèy-la Bib-la ka bay menm si lòt moun an fanmi-a pa ka swiv yo. Paski lè nou fè sa, Jéhova kay benni nou.​—1 Pita 3:1, 2.

8. Kisa nou pé èspéyansé a kòz di mové disizyon nou?

⁸ Wèskonsabilité-a nou ni pou sé disizyon nou-a. Jéhova ja ban nou on bèl kado. Kado sala sé léchanlib-la pou fè disizyon nou. Èk Jéhova vlé nou fè bon disizyon èk enjwi sé bennéfis-la bon disizyon nou ka mennen. Mé délè, nou pé fè mové disizyon. Lè sa fèt, Jéhova pa kay pwotéjé nou hòd sé konsékans-lan. (Gal. 6:7, 8) Konsa, nou ni pou pwan wèskonsabilité pou népòt difikilté nou pé èspéyansé a kòz di mové disizyon nou. Mi on bagay ki ka fèt délè. Nou pé fè on disizyon ki ka fè konsyans nou bat nou. Mé si nou ka pwan wèskonsabilité pou sé disizyon nou-a, sa ka pousé nou pou konfésé péché nou, wépanti èk doubout fè péché sala ankò. Lè nou pwan sé démach sala, sa kay édé nou kontiné kouwi kous-la ki ka mennen nou pou lavi étonnèl.

9. Kisa ou sa fè si ou fè on mové disizyon? (Gadé pòtwé-a osi.)

⁹ Koumannyè ou sa pòté chay sala? Si ou ja fè on mové disizyon, kisa ou sa fè? Ou ni pou aksèpté sitiwasyon-an paski ou pa sa chanjé sa ou ja fè. Èk pito ou gaspiyé tan’w èk kouway ou ka blanmé kò’w èben ka blanmé lòt moun èben ka di moun pouki disizyon’w té bon, aksèpté lèwè’w èk fè tout sa ou pé pou aji épi sitiwasyon-an. Èvèk si konsyans ou ka bat ou, vidé tjè’w ba Jéhova an lapwiyè, konfésé péché’w, di’y tout sa ki ka twakasé’w, èk mandé’y pou pawdonnen’w. (Sam 25:11; 51:3, 4) Osi, mandé sé moun-lan ou ja fè pasdwa pou padon. Èk si i nésésè, mandé sé ansyen-an pou èd. (Jémz 5:14, 15) An plis di sa, ou sa apwann hòd lèwè’w. Èk fè lidé’w pou pa janmen fè lèwè sala ankò. Lè ou fè sé bagay sala, Jéhova kay moutwé’w mizèwikòd, èk i kay sipòté’w èk édé’w.​—Sam 103:8-13.

10. Kisa ki pé fèt lè nou ka toujou miziwé kò nou épi lòt moun? (Galécha 6:4)

¹⁰ Santiman-an ki nou toujou ni pou fè pli. Nou sa mété pli chay asou kò nou, lè nou ka konpawé kò nou épi lézòt. (Li Galécha 6:4.) Si nou ka toujou miziwé kò nou épi lézòt, sa sa fè nou vini moun ki ni an chay jalouzi èk enmen konpitisyon. (Gal. 5:26) Osi, si nou ka éséyé pou fè sa lézòt moun ka fè, lè nou pa sa fè’y, sa sa annékòz nou pou donmajé kò nou. Pouki nou ka di sa? Sa sé paski sé lévanjil-la ka di nou, ‘Lè on moun ka atann pou jwenn on bagay èk i pa jwenn li, sa sa fè tjè’y malad’. I ka annékòz nou pou pèd kouway nou! (Pwov. 13:12) Konsa, si nou ka toujou miziwé kò nou épi lòt moun, nou sa tjenn kò nou dèyè an kous-la ki ka mennen nou pou lavi étonnèl.​—Pwov. 24:10.

11. Kisa nou sa fè si nou ka débat épi santiman-an ki nou toujou ni pou fè pli?

¹¹ Koumannyè ou sa jété chay sala? Toujou chonjé Jéhova byen konnèt limit ou. Èk i pa vlé’w fè pli pasé sa ou sa fè. (2 Kòr. 8:12) An plis di sa, Jéhova pa kay janmen konpawé’y épi lézòt. (Maf. 25:20-23) I ka chéwi sa ou ka fè bay, fidèlité’w, èk mannyè ou ka tjébé fò anba difikilté. Alò, sé pou ou gadé kò’w menm mannyè-a Jéhova ka gadé’w. Èk abésé kò’w èk pa fè sa santé’w èben sitiwasyon’w pa ka pèwmité’w pou fè. Bon. Ès ou chonjé ègzanp Bazilay èk Moziz? Menm kon Bazilay nou ni pou pawé pou di, ‘Non, m’a sa aksèpté asaynman sala’, si santé nou ka fè’y difisil pou nou fè on asaynman. (2 Sm 19:35, 36) Èk menm kon Moziz, nou ni pou aksèpté èd èk bay lézòt wèskonsabilité lè’y posib. (Ègz. 18:21, 22) Wi, lè nou konnèt limit nou, nou pa kay éséyé pou fè bagay nou pa sa fè. Konsa, nou kay sa kontiné kouwi an kous-la ki ka mennen nou pou lavi étonnèl.

12. Ès nou sipozé blanmé kò nou pou mové disizyon lézòt fè? Èk pouki.

¹² Ou ka blanmé kò’w pou mové disizyon lòt moun fè. Nou pa sa fè disizyon pou lézòt moun. Osi, nou pa sa toujou pwotéjé yo hòd sé mové wézilta-a sé disizyon yo-a ka mennen. Pou ègzanp, on ich pé désidé pou doubout sèvi Jéhova. On disizyon konsa, pé twakasé pawan’y. Mé pawan-an pa sipozé blanmé kò’y pou mové disizyon-an ich li fè. Si i fè sa, sé konmsi i ka mété an chay ki byen lou asou do’y. Kanmenm, pawan-an ni pou chonjé, sé pa chay sala Jéhova vlé’y pòté. Osi, i ni pou konpwann nou tout “kay ni pou wéponn tèt nou douvan Bondyé.”​—Ronm 14:12.

13. Kisa pawan ni pou chonjé si ich yo fè on mové disizyon?

¹³ Koumannyè ou sa jété chay sala? Sé pou nou chonjé Jéhova ja ban nou chak léchanlib-la pou fè disizyon nou. Alò, nou sa chwazi si nou vlé sèvi Jéhova opa. Èk Jéhova byen sav, pawan sé pa moun ki pawfé. Konsa, i vlé yo fè tout sa yo pé pou enstwi ich yo lavéwité-a. Kanmenm, si ich ou désidé pou doubout sèvi Jéhova, pa blanmé kò’w paski Jéhova bay chak moun léchanlib-la pou désidé pou kò’y si i vlé sèvi’y opa. (Pwov. 20:11) Mé, si délè ou ka blanmé kò’w pou sé lèwè-a ou ja fè kon an pawan, di Jéhova tout sa ki ka twakasé’w èk mandé’y pou padonnen’w. Jéhova sav ou pa sa chanjé sa ki ja fèt. Èk i pa ka mandé’w pou pwotéjé ich ou hòd sé konsékans-lan mové disizyon’y ka mennen. Bon. Chonjé, Jéhova sé Dyé lanmityé-a èk i plen mizèwikòd. Konsa, si ich ou vlé sèvi’y ankò, i kay aksèpté’y èpi tjè kontan.​—Louk 15:18-20.

14. Lè konsyans nou ka toujou bat nou sa sé on chay. Pouki nou ni pou jété chay sala?

¹⁴ Lè konsyans nou ka toujou bat nou. Lè nou péché, i bon pou konsyans nou bat nou. Kanmenm, Jéhova pa vlé konsyans nou bat nou tout lè. Si konsyans nou ka toujou bat nou, sa sé an chay Jéhova vlé nou jété. Si nou ja konfésé péché nou, wépanti èk nou pwan démach pou pa fè péché sala ankò, nou sa asiwé Jéhova ja padonnen nou. (Twav. 3:19) Konsa, si konsyans nou ka bat nou toujou, sa sé an chay nou dwé jété. Pouki wézon? Sa sé paski, lè konsyans nou ka toujou bat nou, sa ka blésé nou, i ka dékouwajé nou, i ka ban nou an chay lapenn èk ka annékòz nou pou doubout kouwi kous-la ki ka mennen nou pou lavi étonnèl. (Sam 31:10, 2 Kòr. 2:7.)

15. Si konsyans ou ka toujou bat ou, kisa ou sa fè? Èk kisa ou pa vlé fè? (1 Jan 3:19, 20) (Gadé pòtwé-a osi.)

¹⁵ Koumannyè ou sa jété chay sala? Si konsyans ou ka toujou bat ou, fiksé lidé’w asou mannyè Jéhova ka vwéman pawdonnen. (Sam 130:4) Jérémaya 31:34 ka di nou sa Jéhova ka pwonmèt moun ki wépanti. I di, ‘Mwen pa kay chonjé péché yo ankò.’ Sa vlé di, lè Jéhova padonnen’w, i pa kay janmen katjilé asou péché sala ankò. Konsa, toujou chonjé, sé pa Bondyé ki ka pini’w lè’w ka èspéyansé sé difikilté-a péché’w ka mennen. Osi, sé pa pou ou pini kò’w paski ou té pèd an wèskonsabilité èben yon ansayman an kongwigasyon-an. Bon. Si Jéhova pa ka kontiné katjilé asou péché’w, pouki ou ka kontiné katjilé asou’y?​—Li 1 Jan 3:19, 20.

16. Kon nou ka kouwi kous-la, kisa nou dwé konnèt?

¹⁶ Nou ka kouwi kous-la ki ka mennen nou pou lavi étonnèl, konsa, nou ni pou “kouwi adan an mannyè pou [nou] sa ganyen kous-la”. (1 Kòr. 9:24) Nou sa fè sa, si nou byen konnèt ki chay nou dwé pòté èk ki chay nou dwé jété. An atik sala, nou ja diskité twa chay nou dwé pòté èk twa chay nou dwé jété. Mé la ni lòt chay paski Jézi di: “Pa kité twaka lavi sala plen tèt ou épi twòp fèt épi twòp bwason èvèk katjil lavi-a.” (Louk 21:34) Lè nou li èk mèdité asou lévanjil sala èk lòt lévanjil, sa ka édé nou fè chanjman-an nou pé bizwen kon nou ka kouwi kous-la ki ka mennen nou pou lavi étonnèl.

17. Pouki nou asiwé nou sa ganyen kous-la ki ka mennen nou pou lavi étonnèl?

¹⁷ Nou asiwé nou sa ganyen kous-la ki ka mennen nou pou lavi étonnèl paski Jéhova kay ban nou kouway-la nou bizwen-an. (Izay. 40:29-31) Konsa, kontiné kouwi èk pa janmen doubout. Sé pou nou imité zapòt Pòl ki té fè tout sa i té pé pou ganyen pwi-a. (Filip. 3:13, 14) Èk chonjé, pyèsonn pa sa kouwi kous-la pou’w. Mé épi èd Jéhova ou kay ganyen pwi-a. I kay édé’w pòté sé chay-la ou dwé pòté-a èk jété tout sa ki ka tjenbé’w dèyè. (Sam 68:19) Wi, ou sa ganyen kous-la paski Jéhova toujou la pou sipòté’w!