1-2. (a) Ki mannyè Jéhova ka santi konsèné moun ki fè péché ki gwav èk ki pa vlé wépanti? (b) Kisa Jéhova ni èspwa sé moun-lan ki pa vlé wépanti kay fè?

 JÉHOVA hayi péché, konsa sé pa tout kalté kondwit i ka aksèpté. (Sam 5:4-6) Jéhova vlé nou obéyi sé konmand li-an ki an Bib-la. Kanmenm Jéhova sav nou pa pawfé, alò délè nou kay dézobéyi’y. (Sam 130:3, 4) Mé i pa vlé nou ‘sèvi lagwas li kon an lisans pou viv vyé lavi.’ Alò, Jéhova pa ka aksèpté moun ki pa ka obéyi Pawòl li. (Joud 4) Anfen, Bib-la ka di nou a klè Jéhova kay détwi moun kon sa an ladjè Anmagèdonn.​—2 Pita 3:7; Wév. 16:16.

² Kanmenm, Jéhova pa vlé pyèsonn péwi. Kon nou ha wè an sé atik-la an Gad sala, Jéhova “vlé tout moun wépanti péché yo.” (2 Pita 3:9) Konsa menm kon Jéhova, sé ansyen-an ka moutwé pasyans kon yo ka éséyé édé moun ki fè péché ki gwav pou wépanti, èk vansé pwé Jéhova ankò. Kanmenm, magwé sé ansyen-an ka fè tout sa yo pé pou édé moun-lan, délè moun-lan pa vlé wépanti. (Izay. 6:9) Malèwèzman, délè i vlé kontiné fè sa ki pa bon. Konsa, kisa sé ansyen-an sipozé fè?

‘TIWÉ MOVÉ MOUN-LAN’

3. (a) Kisa Bib-la di sé ansyen-an ni pou fè épi moun ki pa vlé wépanti? (b) Lè an moun pa vlé wépanti, pouki nou sa di sé moun-lan menm ki fè chwa-a pou yo tiwé’y an kongwigasyon-an?

³ Lè an moun pa vlé wépanti, sé ansyen-an ni pou swiv diwèksyon-an an 1 Kòrint 5:13; koté i di: “Tiwé mové [moun-lan] ki anpami zòt-la.” Bon. Magwé sé ansyen-an ni pou swiv diwèksyon sala, nou sa di sé moun-lan menm ki chwazi pou sé ansyen-an tiwé’y an kongwigasyon-an. Wi, i ka wékòlté sa i menm planté. (Gal. 6:7) Pouki nou ka di sa? Ében la ni dé (2) wézon: (1) moun-lan té ha sav andavans sa ki té kay fèt si’y pa té wépanti; èk (2) sé ansyen-an éséyé pou édé’y plizyè fwa, mé i widjèkté èd-la yo té ka bay-la. (2 Wa 17:12-15) Wi, moun-lan moutwé a klè pa aksyon’y i pa vlé obéyi koumand Jéhova.​—Dito. 30:19, 20.

4. Lè sé ansyen-an tiwé an moun ki pa wépanti an kongwigasyon-an, pouki yo ka fè yon anonsman?

⁴ Lè sé ansyen-an tiwé an moun ki pa wépanti an kongwigasyon-an, yo ka di kongwigasyon-an moun sala pa an Témwen Jéhova ankò. a Pouki yo ka fè sa? Yo pa ka fè sa pou fè moun-lan santi hont. Yo ka fè sa pou fè sé fwè èk sè-a an kongwigasyon-an konnèt, yo ni pou swiv diwèksyon Bib-la ‘pou pa ni anyen pou fè épi moun sala’ èk ‘pou pa menm manjé épi’y.’ (1 Kòr. 5:9-11) Anfen, Jéhova ni bon wézon poutji i bay koumand sala. 1 Kòrint 5:6 di: “An tizing lèlven ka fè tout lapat-la lévé.” Wi, si an moun pa wépanti péché’y èk sé ansyen-an pa tiwé’y an kongwigasyon-an, lézòt fwè èk sè an kongwigasyon-an pé kwè yo pa ni pou obéyi koumand Bondyé.​—Pwov. 13:20; 1 Kòr. 15:33.

5. Ki mannyè nou sipozé gadé an moun sé ansyen-an tiwé an kongwigasyon-an, èk pouki?

⁵ Lè sé ansyen-an tiwé yon fwè ében sè an kongwigasyon-an, ki mannyè nou sipozé gadé moun-lan? Ében magwé nou pa ka pasé tan épi moun-lan, nou ni pou chonjé la ni èspwa pou li. Alò nou vlé gadé’y kon on mouton ki annèk pèd. Bon, lè an mouton pèd, i sa viwé jwenn twipo-a. Èk chonjé, moun-lan yo tiwé an kongwigasyon-an ha dèdiké lavi’y bay Jéhova. Mé malèwèzman, apwézan i pa ka viv lavi’y adan an mannyè pou plè Jéhova, èk sa sé an bagay ki byen danjéwé. (Izik. 18:31) Kanmenm, tout tan Jéhova ka moutwé pasyans èk mizèwikòd, nou ni èspwa moun-lan kay chanjé. Konsa, ki mannyè sé ansyen-an sa édé an moun yo tiwé an kongwigasyon-an?

SA SÉ ANSYEN-AN SA FÈ POU ÉDÉ MOUN YO TIWÉ AN KONGWIGASYON-AN

6. Kisa sé ansyen-an kay fè pou édé on moun yo tiwé an kongwigasyon-an?

⁶ Lè sé ansyen-an tiwé on moun an kongwigasyon-an, ès yo ka doubout éséyé édé moun-lan pou witounen pou Jéhova? Awa. Janmen. Anfen lè sé ansyen-an di moun-lan yo kay tiwé’y an kongwigasyon-an, yo kay osi di’y sa i ni pou fè pou viwé an kongwigasyon-an. Mé sé pa sa tousèl sé ansyen-an kay fè. Wi, yo kay osi di moun-lan yo vlé jwenn épi’y ankò an déotwa mwa, pou wè si’y chanjé katjil li èk atitid li. Èk si moun-lan dakò pou jwenn épi sé ansyen-an apwé déotwa mwa, a lè sala yo kay ankouwajé’y pou wépanti. Èvèk tann sa, menm si moun-lan p’òkò wépanti, sé ansyen-an kay éséyé jwenn épi’y ankò pou ankouwajé’y pou wépanti.

7. Lè sé ansyen-an tiwé on moun an kongwigasyon-an, ki mannyè yo sa imité ègzanp Jéhova èk moutwé moun-lan konpasyon? (Jérémaya 3:12)

⁷ Lè sé ansyen-an tiwé on moun an kongwigasyon-an, yo ka éséyé pou moutwé moun-lan konpasyon menm kon Jéhova. Pou ègzanp an tan pasé Jéhova pa té èspéyé pèp li, jan Izwayèl, pou wépanti avan i éséyé wédé yo. Non. I voyé sé pwòfèt li-a oti yo pou wédé yo wépanti. Osi Jéhova té moutwé mannyè i ni an chay konpasyon. Pou ègzanp, ès ou ka chonjé an dézyenm atik-la an Gad sala, Jéhova di pwòfèt Hozéya magwé madanm li té ka fè adiltè toujou, padonnen’y èk pwan’y déviwé? (Hoz. 3:1; Mala. 3:7) Wi, sa té ka moutwé ki otan konpasyon Jéhova ni. Èk sé ansyen-an ka éséyé wèd pou swiv ègzanp Jéhova. Wi, ofon tjè yo, yo vlé moun-lan ki fè péché ki gwav-la pou wépanti èk viwé an kongwigasyon-an. Èk yo pa ka fè’y difisil pou moun-lan fè sa.​—Li Jérémaya 3:12.

8. An pawabòl-la konsèné gason-an ki té pèd-la, kisa papa-a té fè? Èk kisa sa ka di nou konsèné mannyè-a Jéhova ka santi konsèné moun ki ha kité’y? (Louk 15:7)

⁸ Bon. Ès ou chonjé sa papa-a té fè lè’y wè gason’y an distans-lan? Lévanjil-la di, papa-a “kouwi jwenn [gason’y] èk i anbwasé’y èk i bo’y”. (Louk 15:20) Bon. Ès ou òbzòvé papa-a pa té èspéwé pou gason’y plédé épi’y pou pawdonnasyon? Non pito sa, i kouwi jwenn li pou moutwé ki otan enmen i enmen’y. Èk sé konsa Jéhova ka santi konsèné moun ki ha kité’y. Èk sé ansyen-an ka twavay wèd pou fè menm kon Jéhova. Wi, yo vlé sé moun-lan ki ha kité Jéhova pou witounen. (Louk 15:22-24, 32) Anfen, lè on péchè witounen, sa ka bay Jéhova, Jézi, sé nanj-lan, èk tout kongwigasyon-an an chay tjè kontan!​—Li Louk 15:7.

9. Kisa Jéhova ka ankouwajé péchè pou fè?

⁹ An sa nou ha diskité-a nou ka wè a klè, Jéhova pa ka kité moun ki pa vlé wépanti an kongwigasyon-an. Mé an menm di tan, i pa ka tounen do’y asou yo non plis. I ka éséyé pou wédé yo pas i vlé yo witounen. Èk lè yo wépanti Jéhova ka di nou ègzaktiman mannyè-a i ka santi konsèné yo. Pou ègzanp, an Hozéya 14:4 Jéhova di: ‘Mwen kay djéwi yo, magwé yo pa té fidèl pou mwen. Mwen menm kay désidé pou enmen yo. Paski mwen pa faché épi yo ankò.’ Bon, paski sé ansyen-an konnèt mannyè Jéhova ka santi, yo ka gadé pou népòt chanjman ki kay moutwé moun-lan ka koumansé wépanti. Èk pawòl-la nou li an Hozéya 14:4, ka bay tout moun ki ha kité Jéhova asiwans-lan ki i enmen yo èk i vlé yo witounen.

10-11. Ki mannyè sé ansyen-an kay édé moun yo tiwé an kongwigasyon-an pitèt plizyè lanné pasé?

¹⁰ Bon. La ni moun yo tiwé an kongwigasyon-an plizyè lanné pasé. Adan sé moun sala pa ka menm chonjé wézon-an sé ansyen-an té tiwé yo an kongwigasyon-an. Èk adan di yo ha doubout péché gwav-la yo té ka fè-a. Alò ki mannyè sé ansyen-an kay édé sé moun sala? Ében sé ansyen-an kay fè tout sa yo pé pou chaché pou sé moun sala. Èk lè yo vizité yo, yo kay jis pwédyé épi yo èk ankouwajé yo pou viwé an kongwigasyon-an. Kanmenm, si an moun ha kité kongwigasyon-an pou an chay lanné, wilasyon’y épi Jéhova kay fèb. Konsa i kay bizwen èd pou fòtifyé wilasyon’y épi Jéhova èk apwann lavéwité-a ankò. Alò, si moun-lan di i vlé viwé an kongwigasyon-an, menm si sé ansyen-an p’òkò aksèpté’y viwé, yo kay fè awanjman pou an moun fè an létid Bib épi’y. Kanmenm, sé ansyen-an sèlman ki kay fè awanjman-an pou létid Bib sala.

¹¹ Sé ansyen-an vlé moutwé moun konpasyon èk lanmityé menm kon Jéhova. Alò, yo kay chaché pou tout moun ki ha kité Jéhova èk yo kay ankouwajé yo pou witounen. Èk dépi moun-lan fè chanjman-an an katjil li èk kondwit li, sé ansyen-an pa kay fè kòlonng pou aksèpté’y viwé an kongwigasyon-an.​—2 Kòr. 2:6-8.

12. (a) An ki sitiwasyon sé ansyen-an ni pou pwan bon pwokosyon? (b) Pouki nou pa ni pou kwè moun ki fè sèten péché pa sa wisouvwè mizéwikòd Jéhova? (Gadé nòt-la an bout paj-la osi.)

¹² La ni sitiwasyon koté sé ansyen-an ni pou pwan bon pwokosyon avan yo aksèpté an moun viwé an kongwigasyon-an. Pou ègzanp, si moun-lan té abizé manmay, si i té tounen apòsta, ében si i té fè bagay pa èspwé pou dévosé moun-lan i mayé épi-a. An sé sitiwasyon sala sé ansyen-an ni pou fè asiwé moun-lan vwéman wépanti. (Mala. 2:14; 2 Tim. 3:6) Èk sa sé paski yo ni pou pwotéjé sé fwè èk sè-a an kongwigasyon-an. Kanmenm nou vlé chonjé, Jéhova kay aksèpté népòt moun ki fè péché ki gwav an kongwigasyon’y ankò, dépi moun-lan vwéman wépanti èk doubout mové kondwit li. Alò, menm si sé ansyen-an ni pou fè asiwé moun-lan vwéman wépanti, yo pa janmen sipozé kwè Jéhova pa sa moutwé moun sala mizéwikòd. b​—1 Pita 2:10.

SA KONGWIGASYON-AN SA FÈ

13. Ki diféwans la ni ant mannyè-a nou sipozé twété yon moun sé ansyen-an kowijé an kongwigasyon-an èk an moun yo tiwé an kongwigasyon-an?

¹³ Kon nou té diskité an atik twant kat (34), délè sé ansyen-an pé fè yon anonsman pou di yo kowijé an moun an kongwigasyon-an. Alò adan an sitiwasyon kon sa, nou sa kontiné pou asosiyé épi moun sala. Pouki nou ka di sa? Ében sa sé paski moun-lan ha chanjé mové katjil li èk kondwit li. (1 Tim. 5:20) Alò i sé yon Témwen Jéhova toujou. Èk i bizwen sé fwè èk sè-a an kongwigasyon-an pou ankouwajé’y pou kontiné fè sa ki dwèt. (Hib. 10:24, 25) Kanmenm, lè sé ansyen-an tiwé an moun an kongwigasyon-an, sitiwasyon sala diféwan. Nou ‘pa ni anyen pou fè épi moun’ sala. Non, nou ‘pa ka menm manjé épi an moun kon sa.’​—1 Kòr. 5:11.

14. Lè an moun sé ansyen-an tiwé an kongwigasyon-an atandé mitin, ki disizyon yon Kwityen sa fè? (Gadé pòtwé-a osi.)

¹⁴ Bon, ès konsèy-la an 1 Kòrint 5:11 ka di nou pa sipozé envité an moun sé ansyen-an tiwé an kongwigasyon-an pou atandé an mitin? Ében si’y atandé an mitin, nou pa menm ni pou di’y bonjou? Non, lévanjil-la pa ka di nou sa. Sé vwé, nou pa ni pou asosiyé épi moun-lan, sa vlé di pasé tan épi’y. Kanmenm, si moun-lan sé fanmi nou, ében i té bon jan nou avan sé ansyen-an tiwé’y an kongwigasyon-an, nou sa chwazi pou envité moun-lan pou atandé mitin. Èk si moun-lan atandé mitin, ki mannyè nou sipozé twété’y? Ében an tan pasé, nou pa té kay menm di moun-lan bonjou. Kanmenm, apwézan chak Kwityen kay ni pou désidé pou kò’y sa i kay fè silon konsyans li. Adan Kwityen pé santi konfòtab pou di moun-lan bonjou èk byenvini’y. Mé, yo pa kay tjenn an lonng konvézasyon épi moun-lan ében pasé tan épi’y ka fè lòt bagay.

15. An 2 Jan 9-11, zapòt Jan di, nou pa sipozé di adan moun “bonjou”. Ki moun i té ka palé konsèné? (Gadé osi bwèt-la “ Ès Zapòt Jan Èk Zapòt Pòl Té Ka Palé Konsèné Menm Kalité Péché-a?”)

¹⁵ Bib-la di, nou pa ni pou di adan moun ki fè péché ki gwav bonjou. Anfen Bib-la di si nou di an moun kon sa bonjou, nou ka “dakò épi vyé twavay-la i ka fè-a.” (Li 2 Jan 9-11.) Bon, kontèks sé vèwsé sala ka moutwé, zapòt Jan té ka palé konsèné an moun ki té tounen apòsta. Èben an moun ki té ka éséyé fè lézòt moun fè sa Bib-la di yo pa sipozé fè. (Wév. 2:20) Konsa, si an moun ka pwomoté lésisyon apòsta, ében ka ankouwajé lézòt pou fè bagay ki pa bon, sé ansyen-an pa kay vizité moun sala. Bon, i posib pou moun sala wépanti. Kanmenm jis tan sa fèt, nou pa kay di moun sala bonjou, èk nou pa kay envité’y pou atandé an mitin.

MOUTWÉ KONPASYON ÈK MIZÉWIKÒD MENM KON JÉHOVA

16-17. (a) Kisa Jéhova vlé péchè fè? (Izikèl 18:32) (b) Ki mannyè sé ansyen-an sa twavay ansanm épi Jéhova, lè yo ka éséyé édé an moun ki fè an péché ki gwav?

¹⁶ Bon, kisa nou apwann an sé senk (5) atik-la an Gad sala? Ében nou apwann ki, Jéhova pa vlé pyèsonn détwi! (Li Izikèl 18:32.) Wi Jéhova vlé moun ki fè péché ki gwav vin jan’y ankò. (2 Kòr. 5:20) Èk sa sé wézon-an Jéhova ka toujou ankouwajé sé sèvant li-a ki kité’y pou wépanti, èk viwé jwenn li. Èvèk sé ansyen-an an kongwigasyon-an ni gwan pwivilaj-la pou twavay ansanm épi Jéhova. Wi yo ka fè sa, lè yo fè tout sa yo pé pou édé moun ki fè péché ki gwav pou wépanti.​—Ronm 2:4; 1 Kòr. 3:9.

¹⁷ Imajiné lajwa-a ki an syèl lè yon péchè wépanti! Wi, Papa nou Jéhova ka ni an chay lajwa, chak kou yonn an sé mouton’y-lan witounen an kongwigasyon-an. Asiwéman, lanmityé nou pou Papa nou Jéhova ka agwandi lè nou mèdité asou konpasyon’y, mizéwikòd li, èk jantiyès li.​—Louk 1:78.