Lè zapòt Pòl té ékwi sé Kwityen-an an Tèsalonnika, i di yo: “Si pyèsonn anpami zòt pa ka obéyi konmisyon-an nou ka ékwi an lèt sala, matjé moun sala.” (2 Tèsa. 3:14) An tan pasé, si yon fwè èben yon sè té ka kontiné inyowé pwensip Bib, sé ansyen-an té ka bay an diskou pou vèti kongwigasyon-an. Èk apwé, kongwigasyon-an té kay asosiyé épi moun sala sèlman an mitin èk an pwédikasyon-an.

Kanmenm, i nésésè pou nou fè on chanjman paski konsèy-la zapòt Pòl té bay-la, ni pou fè épi on disizyon chak Kwityen ni pou fè pou kò’y lè sèten sitiwasyon lévé. Konsa, i pa nésésè pou sé ansyen-an bay on diskou pou vèti kongwigasyon-an. Alò, pouki nou chanjé mannyè-a nou ka konpwann 2 Tèsalonnika 3:14? Ében annou konsidiwé sa zapòt Pòl té ka palé konsèné lè’y bay konsèy sala.

Zapòt Pòl té òbzòvé ki, adan fwè èk sè an kongwigasyon-an pa té ka swiv konsèy Bib. I té ba yo konsèy ki té bazé asou Pawòl Bondyé, mé yo wifizé swiv konsèy-la. Anfen, pli bonnè i té ba yo koumand sala: ‘Moun-an ki wifizé twavay pa sipozé manjé nonplis.’ Apa di sa, adan di yo pa té ka fè anyen pasé antwé an zafè moun. Konsa, ki mannyè kongwigasyon-an té sipozé twété sé fwè èk sè sala?​—2 Tèsa. 3:6, 10-12.

Ében Pòl di “matjé moun sala”. Bon. Mo pawòl sala zapòt Pòl sèvi an langaj Gwik vlé di, pou idantifyé moun sala èk pou pwan pwokosyon pou pa kité’y enflouwansé’w. Konsa, lè zapòt Pòl bay konsèy sala i té ka palé bay tout moun an kongwigasyon-an, pa bay sé ansyen-an sèlman. (2 Tèsa. 1:1; 3:6) Alò chak Kwityen ki òbzòvé yon fwè èben yon sè ka dézobéyi konsèy Bib, té kay désidé pou “hédi [kòʼy] lwen” fwè èben sè sala.

Bon, ès sa vlé di yo té ni pou twété moun-lan menm kon on moun sé ansyen-an tiwé an kongwigasyon-an? Ében non. Èk nou sav sa paski zapòt Pòl osi di: ‘Vèti moun-lan kon on fwè.’ Alò fwè-a èben sè-a té kay asosiyé épi moun-lan i matjé-a sèlman an sé mitin-lan èk an pwédikasyon-an. Poutji nou ka di sa? Ében zapòt Pòl di: “Pou’y sa twouvé kò’y hont.” Wi, lè nou asosiyé épi fwè-a èben sè-a sèlman an sé mitin-lan èk an pwédikasyon-an, sa pé fè’y santi hont a kòz di sa’y ka fè, èk sa pé pousé’y pou chanjé mannyè’y.​—2 Tèsa. 3:14, 15.

Alò, ki mannyè on Kwityen sa konnèt lè’y sipozé “matjé” on moun? Ében pwèmyéman, nou ni pou fè asiwé moun-lan pa ka swiv konsèy Bib kon Pòl té di. Bon, Pòl pa té ka palé konsèné moun ki té ka fè bagay ki té ka alé kont konsyans nou, mé ki pa ka alé kont pwensip Bib ében wèg Bondyé. Osi i pa té ka palé konsèné moun ki pa ka fè menm chwa épi nou. Èk i pa té ka palé konsèné moun ki ofwansé nou nonplis. Anfen, Pòl té ka palé konsèné moun ki twapé konsèy hòd Pawòl Bondyé mé yo pa vlé obéyi’y.

Jòdi, si nou òbzòvé on fwè ében on sè ka kontiné dézobéyi konsèy Bib, a nou kay fè disizyon-an pou asosiyé épi’y sèlman an sé mitin-lan èk an pwédikasyon-an. Èk paski sa sé on disizyon pèwsonnèl, nou pa kay diskité’y épi lòt fwè èk sè an kongwigasyon-an. Kanmenm, nou sa diskité’y épi fanmi nou ki ka viv an menm kay épi nou ki Témwen Jéhova. Èk lè moun-lan chanjé atitid li èk kondwit li, nou kay koumansé pasé tan épi’y menm kon nou té ka fè avan.