1-2. Ki diféwan bagay ki sa annékòz nou pou pléwé?

 NOU tout ja pléwé. Délè nou ka pléwé paski tjè nou plen djèwté, ében pitèt ou ha pléwé paski on bagay byen enpòtan ében spésyal té wivé’w. Pou ègzanp lè ich ou fèt, lè ou chonjé an bagay ki té touché tjè’w, ében lè ou wè on bon jan ou p’òkò wè pou plizyè lanné.

² Kanmenm, byen souvan, nou ka pléwé paski nou ka santi twis ében nou ka soufè. Pou ègzanp, pitèt an bon jan dézapwenté nou. Ében pitèt nou ka pléwé lè nou malad èk nou ka soufè pou an chay tan, ében lè an moun nou enmen mò. Délè lè nou ka èspéyansé sitiwasyon konsa, sé konmsi nou pa sa menm doubout pléwé. Anfen, nou pé jis santi kon pwofèt Jérémaya lè jan Babilonn té détwi Jérouzalèm. An Lamantasyon 3:48, 49, Jérémaya di: ‘Dlo ka désann hòd zyé mwen menm kon lawivyè . . . Dlo ka kontiné désann zyé mwen san doubout.’

3. Ki mannyè Jéhova ka santi lè’y ka wè sèvant li ka soufè? (Izaya 63:9)

³ Jéhova konnèt ki mizi fwa nou ha pléwé pou lapéti mové bagay ki ha wivé nou. Anfen Bib-la ka di nou, Jéhova konnèt chak fwa chak sèvant li ka soufè. Èk i ka tann lè nou ka plédé épi’y pou édé nou. (Sam 34:15) Kanmenm, Jéhova pa ka sèlman tann nou ében wè nou. Chonjé Jéhova sé Papa nou, èk sé pa dé enmen i enmen nou. Alò, lè’y wè nou ka pléwé sa ka fè’y santi byen twis, èk i pa ka tadé pou édé nou.—Li Izaya 63:9.

4. Ki diféwan ègzanp an Bib-la nou kay konsidiwé, èk kisa nou kay apwann konsèné Jéhova hòd sé ègzanp sala?

⁴ An Bib-la, Jéhova ka di nou mannyè i té ka santi lè sèvant li té ka pléwé, èk kisa i té fè pou édé yo. Alò an atik sala, nou kay konsidiwé ègzanp twa (3) moun; Hanna, David, èk Wa Hèzèkaya. Nou kay wè kisa ki té fè yo pléwé, ki mannyè sa té fè Jéhova santi, èk ki mannyè Jéhova té édé yo? Osi, nou kay wè mannyè Jéhova ka konfòté nou lè nou twis paski an moun nou enmen mò, lè moun twayi nou, ében lè nou malad.

JÉHOVA KA WÈ LÈ OU KA PLÉWÉ PASKI ON MOUN OU ENMEN MÒ

5. Ki mannyè sitiwasyon Hanna té fè’y santi?

⁵ Hanna té èspéyansé plizyè pwoblenm ki fè’y santi byen twis èk ki fè’y pléwé. Bon. Yonn an sé pwoblenm-lan Hanna té ni sété sa: Mawi’y té ni on lòt madanm, non’y sété Pènina, èk madanm sala té hayi Hanna an chay. Mé sé pa sa tousèl, Hanna pa té sa fè ich, mé Pènina, té ni plizyè ich. (1 Sm 1:1, 2) Èk paski Hanna pa té sa fè ich, Pènina, té ka fè lavi Hanna mizéwab. Bon. Ki mannyè ou té kay santi, si’w té adan sitiwasyon sala? Anfen lévanjil-la ka di nou, ‘Hanna té ka pléwé èk i pa té ka manjé’, èk i té ‘twis an chay.’—1 Sm 1:6, 7, 10.

6. Kisa Hanna té fè pou’y té sa santi pli mèyè?

⁶ Bon. Kisa Hanna té fè pou’y té sa santi pli mèyè? Ében mi yon bagay Hanna té fè, i té ka toujou alé an tabènak-la pou adowé Jéhova. Anfen, pitèt Hanna té pwé lakou tabènak-la lè’y ‘koumansé pwédyé bay Jéhova, èk i pa té sa doubout pléwé.’ I plédé épi Jéhova, èk i di’y: ‘Gadé soufwans sèvant ou-a èk chonjé mwen.’ (1 Sm 1:10 dézyenm pa-a, 11) Wi, Hanna dévidé tjè’y bay Jéhova. Èk san dout sa touché tjè Jéhova, paski i té enmen Hanna an chay èk i té vlé soulajé’y!

7. Ki mannyè Hanna té santi apwé i palé bay Jéhova konsèné pwoblenm li?

⁷ Bon, ki mannyè Hanna té santi apwé i pwédyé bay Jéhova èk Chèf Pwèt Ilay ba’y asiwans-lan ki Jéhova té kay wéponn lapwiyè’y? Ében wakont-lan di: ‘Hanna alé lakay li èk i manjé, èk i pa té twis ankò.’ (1 Sm 1:17, 18) Sé vwé, sitiwasyon’y pa té chanjé, mé i té santi otan pli mèyè. Èk sa sé paski, i té ni konfyans-lan ki, Jéhova té ka kopwann sitiwasyon’y èk i té kay édé’y. Èvèk sé sa Jéhova fè pou vwé. Wi, Jéhova té kopwann mannyè Hanna té ka santi, i kouté lapwiyè’y èk pli ta i édé’y pou fè plizyè ich.​—1 Sm 1:19, 20; 2:21.

8-9. An ling épi Hibrou 10:24, 25, poutji nou ni pou fè tout sa nou pé pou atandé sé mitin-lan? (Gadé pòtwé-a osi.)

⁸ Sé lison-an pou nou. Bon. Ès ou ka èspéyansé yon pwoblenm ki ka annékòz ou pou pléwé? Pitèt ou an lapenn paski an moun an fanmi’w ében on bon jan’w mò. Èk lè bagay konsa fèt, pitèt ou vlé wèsté pa kò’w. Èk nou sa kopwann sa. Mé chonjé sa Hanna té fè. I té alé an tabènak-la èk sé la Jéhova té soulajé’y. Konsa, an menm mannyè-a Jéhova kay soulajé’w èk ankouwajé’w lè ou atandé sé mitin-lan menm si ou las èben ou twis. (Li Hibrou 10:24, 25.) Wi, lè nou atandé mitin, sé Pawòl Bondyé nou ka tann, èk sa ka ban nou bon bagay pou katjilé asou. Anfen, sa sé yon mannyè Jéhova ka édé nou pou doubout katjilé asou bagay ki ka fè nou twis. Èk sa ka fè nou santi pli mèyè menm si sitiwasyon nou p’òkò chanjé.

⁹ An plis di sa, lè nou alé mitin sé fwè èk sè nou-an ka soulajé nou, yo ka ankouwajé nou, èk yo ka moutwé nou an chay lanmityé. Wi, nou ka santi pli mèyè lè nou épi sé fwè èk sè nou-an an sé mitin-lan. (1 Tèsa. 5:11, 14) Bon. Annou konsidiwé èspéyans yon fwè ki ka wann sèvis kon an piyonnè spésyal ki pèd madanm li an lanmò. I di: “Mwen ka mantjé madanm mwen si tèlman délè mwen pa sa doubout pléwé. Mé lè mwen atandé mitin, sa ka ban mwen an chay ankouwajman. Lè sé fwè èk sè-a palé ban mwen èk mwen tann èspwèsyon yo an sé mitin nou-an, sa ka vwéman soulajé mwen. Wi, mwen ka toujou santi pli mèyè lè mwen atandé mitin.” Anvéwité, Jéhova ka sèvi sé fwè èk sè nou-an pou édé nou lè nou atandé mitin.

10. Ki mannyè nou sa swiv ègzanp Hanna lè nou ka santi byen twis?

¹⁰ Bon, an lòt bagay Hanna té fè ki té édé’y sé sa: I té di Jéhova tout sa ki té asou tjè’y èk sa édé’y santi pli mèyè. Konsa ou osi, “tout bagay ou ni ki ka baʼw mal tèt, météʼy an lanmen [Jéhova]”. (1 Pita 5:7) Tann sa yon sésé té di apwé vòlè té tjwé mawi’y: “Lè yo tjwé mawi mwen, mwen té santi konmsi tjè mwen té kasé an plizyè mòso. Èk m’a té kwè mwen té sa janmen ni lakontantman an lavi mwen ankò. Mé chak kou mwen pwédyé bay Papa mwen Jéhova ki enmen mwen tèlman, mwen té ka santi pli mèyè. Délè i té wèd pou di Jéhova mannyè mwen té ka santi, mé i té ka kopwann mwen. Èk lè mwen té ka santi byen twis èk mwen té ni tèt cho, mwen té ka mandé Jéhova pou ban mwen lapé. Èvèk la menm mwen té ka santi pli mèyè, èk mwen té sa fè sa mwen té ni pou fè pou jounen-an.” Wi, lè ou pléwé bay Jéhova èk ou di’y sa ki ka fè’w santi twis, sa ka fè Jéhova santi twis osi, èk i ka byen kopwann mannyè ou ka santi. Èk menm si pwoblenm-lan la toujou, Jéhova sa soulajé’w èk ba’w lapé. (Sam 94:19; Filip. 4:6, 7) Èvèk i kay wékonpansé’w paski ou ka tjébé fò.​—Hib. 11:6.

JÉHOVA KA WÈ LÈ OU KA PLÉWÉ PASKI AN MOUN OU ENMEN TWAYI’W

11. Ki mannyè David té santi lè moun té maltwété’y?

¹¹ Diwan lavi David i èspéyansé sitiwasyon ki té byen difisil ki fè’y pléwé. An chay moun té hayi’y. Èk jis adan jan’y èk fanmi’y pa té wèsté fidèl pou li, èvèk yo té jis twayi’y. (1 Sm 19:10, 11; 2 Sm 15:10-14, 30) Diwan an tan ki té byen difisil an lavi’y, i di: “Mwen si tèlman las a kòz di lapenn. Tout lannwit mwen ka mouyé kabann mwen épi dlo zyé mwen. Èk mwen ka pléwé tèlman, kabann mwen ka mouyé nèt.” Alò pouki David té ka santi kon sa? Ében i di: “A kòz di tout sé moun-lan ki ka ban mwen pwoblenm.” (Sam 6:6, 7) Wi. Lè moun té ka maltwété David, sa twakasé’y si tèlman i pa té sa doubout pléwé.

12. Silon Sam 56:8, kisa David té asiwé?

¹² Magwé David té ka èspéyansé an chay difikilté an lavi’y, i té asiwé Jéhova enmen’y. Anfen, David té ékwi an Sam 6:8: ‘Jéhova kay tann lè mwen ka pléwé.’ Èk asou an lòt lokazyon, David té ékwi sé bèl pawòl sala an Sam 56:8. (Li’y.) Bon. Sé pawòl sala ka fè nou wè, Jéhova enmen nou an chay èk i mélé épi mannyè-a nou ka santi. Sé konmsi Jéhova té ka anmasé tout lam dlo zyé David, èk té i ka mété yo adan an boutèy, ében i té ka matjé yo adan yon liv. Vwéman, David té asiwé Jéhova té ka wè èk i té ka chonjé soufwans li. Konsa, David té vwéman kwè Papa’y an syèl té konnèt tout pwoblenm li, èk osi mannyè sé pwoblenm sala té ka afèkté’y.

13. Lè moun dézapwenté nou ében yo twayi nou, kisa nou sipozé chonjé? (Gadé pòtwé-a osi.)

¹³ Sé lison-an pou nou. Bon. Ès ou an lapenn paski yon moun ou té ka konfyé té dézapwenté’w ében té twayi’w? Pou ègzanp, pitèt ou an lapenn paski on moun ou té vlé mayé épi pa mayé’w, ében mawi ében madanm ou abandonnen’w. Ében pitèt ou an lapenn paski yon moun ou enmen kité lavéwité-a. Pou ègzanp, la té ni yon fwè apwé madanm li fè adiltè, madanm li kité’y. Mi sa fwè-a di: “M’a té sa kwè madanm mwen fè mwen sa. Èvèk mwen té twis èk faché, èk mwen té ka santi mwen pa té vo anyen.” Alò si yon moun dézapwenté’w ében twayi’w, pwan tjè èk chonjé, Jéhova pa kay janmen tounen do’y asou’w. Fwè-a osi di: “Moun pa kay toujou wèsté fidèl pou ou, mé nou sa dépan asou Jéhova paski i sé Kayè nou. Èk népòt bagay ki wivé nou, i kay toujou édé nou. I pa ka tounen do’y asou sé moun li-an.” (Sam 37:28) Osi toujou chonjé, la pa ni pyèsonn ki enmen’w pli pasé Jéhova. (Ronm 8:38, 39) Wi, lè on moun dézapwenté’w ében yo twayi’w, sa sa kasé tjè’w. Alò toujou chonjé sa: ‘Menm si an moun pa twété’w byen, Papa’w an syèl enmen’w toujou.’

14. Ki asiwans Sam 34:18 ka ban nou?

¹⁴ Si on moun twayi’w, pawòl David an Sam 34:18 sa vwéman konfòté’w. (Li’y.) An liv asou liv Samz di, èspwèsyon-an “pèd èspwa” pitèt ka palé konsèné “moun ki ka santi yo pa ni pyès bagay bon pou gadé pou.” Mé, ki mannyè Jéhova ka édé moun ki ka santi kon sa? Ében Jéhova pwé moun ki ka santi kon sa. I menm kon an manman ében an papa, ki ka tjébé èk konsolé manmay li ki ka pléwé. Alò, lè nou ka soufè paski yon moun twayi nou, ében tounen do’y asou nou, Jéhova ka santi penn nou, èk i pa kay pèdi tan pou édé nou. Wi, i toujou pawé pou konsolé nou si nou an lapenn èk si nou ka santi nou pa vo anyen. Èvèk, Jéhova ka ban nou an bèl èspwa èk sa ka édé nou pou tjébé fò lè nou an lapenn.—Izay. 65:17.

JÉHOVA KA WÈ LÈ’W KA PLÉWÉ PASKI OU MALAD

15. Pouki Wa Hèzèkaya té an twistès èk i té ka pléwé?

¹⁵ Lè Wa Hèzèkaya té twant nèf (39) lanné, i tonbé malad. Anfen, Jéhova di pwofèt Izaya pou ay di Hèzèkaya i kay mò. (2 Wa 20:1) Mé lè Wa-a tann sa, i vini tèlman twis i pa té sa doubout pléwé. Konsa i plédé épi Jéhova pou édé’y.—2 Wa 20:2, 3.

16. Kisa Jéhova té fè ba Wa Hèzèkaya?

¹⁶ Lè Jéhova té tann lapwiyè Wa Hèzèkaya èk i wè lam dlo zyé’y, i té santi lapenn ba li. Èk i di’y: ‘Mwen ha tann lapwiyè’w. Mwen ha wè lam dlo zyé’w. Èk mwen kay djéwi’w.’ Osi Jéhova moutwé Wa Hèzèkaya mizéwikòd, èk i pwonmèt li i kay fè’y viv kenz (15) lanné ankò. Èk i kay sové Jérouzalèm hòd lanmen Wa Asiriya.​—2 Wa 20:4-6.

17. Ki mannyè Jéhova ka édé nou lè nou byen malad? (Sam 41:3) (Gadé pòtwé-a osi.)

¹⁷ Sé Lison-an pou nou. Bon. Ès ou ni an maladi èk la pa ni pyès djéwizon pou li? Alò, kisa ou sa fè? Ében palé ba Jéhova an lapwiyè, menm si ou ka pléwé padan ou ka pwédyé. Anfen, Bib-la ka ban nou asiwans-lan ki “sé [Jéhova] ki Papa-a ki ni tout mizéwikòd-la, épi sé li ki ka konsolé nou tout.” (2 Kòr. 1:3, 4) Kanmenm, nou sav jòdi jou Jéhova pa kay tiwé tout soufwans nou, mé i kay toujou édé nou. (Li Sam 41:3.) Wi, Jéhova ka sèvi lisentèspwi’y pou ban nou fòs, lasajès, èk lapé pou nou sa tjébé fò. (Pwov. 18:14; Filip. 4:13) Osi, i ka ban nou èspwa-a ki, an tan pou vini pyèsonn pa kay malad.​—Izay. 33:24.

18. Ki lévanjil ki ka konsolé’w lè ou ka èspéyansé an sitiwasyon ki byen difisil? (Osi, gadé bwèt-la: “ Lévanjil Ki Ka Konsolé Nou Lè Nou Ka Pléwé.”)

¹⁸ Bon. Sa Jéhova té di Hèzèkaya té konsolé’y. Konsa nou osi sa twapé konsolasyon lè nou kouté sa Jéhova ka di nou an Pawòl li, Bib-la. Wi, lè nou an twistès Pawòl Bondyé sa konsolé nou èk édé nou pou wèsté kam. (Ronm 15:4) Pou ègzanp, la té ni yon sésé an Afwik ki vini konnèt i té ni kansè. Èk a kòz di sa, i té ka pléwé souvan. I di: “Yon lévanjil ki édé mwen an chay sé Izaya 26:3.” I osi di: “Magwé délè nou pa sa tiwé pwoblenm-lan, vèwsé sala ka pwonmèt nou ki, Jéhova sa ban nou lapé èk i sa édé nou pou tjébé fò anba népòt difikilté.” Alò lè ou menm ka èspéyansé an mové sitiwasyon ében an sitiwasyon ou pa sa chanjé, ès la ni an lévanjil ki ka konsolé’w?

19. Kisa nou sa gadé pou an tan pou vini?

¹⁹ Bout vyé sistèm Satan tou pwé, èk nou sav nou kay èspéyansé pli difikilté ki kay annékòz nou pou soufè èk pléwé. Mé kon nou té wè an ègzanp Hanna, David, èk Wa Hèzèkaya, Jéhova ka wè lam dlo zyé nou èk sa ka fè’y santi twis. Wi, Jéhova enmen nou tout ki ka wèsté fidèl ba li magwé nou ka èspéyansé penn. Èvèk i ka chonjé lam dlo zyé nou. Alò, lè nou ka èspéyansé sitiwasyon ki ka fè nou santi twis, nou vlé vidé tjè nou ba Jéhova an lapwiyè. Èk nou vlé wèsté pwé sé fwè èk sè nou-an paski yo enmen nou an chay. An plis di sa, lè nou li ében kouté Pawòl Bondyé nou kay twapé konsolasyon hòd Jéhova. Osi, nou sa ni asiwans-lan ki, si nou wèsté fidèl ba Jéhova i kay benni nou. Konsa, menm si nou ka pléwé lè an moun nou enmen twayi nou, ében an moun nou enmen mò, ében paski nou malad, Jéhova pwonmèt ki, an tan pou vini i kay swiyé tout lam dlo ki an zyé nou. (Wév. 21:4) Èvèk a lè sala, sé sèlman djèwté ki kay fè nou pléwé.