1-2. Kisa pawan sipozé fè lè ich yo mandé yo kwèsyon?

 POU lévé manmay pa ézé. I sé an chay twavay! Si ou sé an pawan épi ou ni jenn manmay, nou ka aplodi’y pou tout twavay-la ou ka fè-a pou lévé sé ich ou-a an lavéwité-a. Jéhova byen plè épi sa. (Dito. 6:6, 7) Kon sé manmay-la ka pwofité, yo pé koumansé mandé kwèsyon konsèné sa nou ka kwè adan, pouki Jéhova koumandé nou pou pa fè sèten bagay, èk pouki Bib-la ka di sèten bagay pa bon.

² Kon on pawan, lè ou tan sé ich ou-a ka kwèstyonnen sèten bagay, ou pé katjilé, ‘Yo pa ni asé lafwa an Bondyé èk an Bib-la.’ Mé, sé pa pou ou pè, paskè kon sé manmay-la ka pwofité, yo bizwen mandé kèstyon pou yo sa fòtifyé lafwa yo. (1 Kòr. 13:11) Konsa, lè yo mandé kèstyon, ou sa sèvi tan sala pou édé yo apwann mannyè pou katjilé èk wézonnen. Épi a lè sa-a, yo kay sa fòtifyé lafwa yo an Bondyé èk an Bib-la.

3. Kisa nou kay diskité an atik sala?

³ An atik sala, nou kay apwann mannyè pawan sa édé ich yo pou (1) dévèlopé lafwa ki fò an Jéhova èk an Bib-la, (2) bati apwésiyasyon yo pou wèg Bondyé ki an Bib-la, èk (3) èspliké sa yo ka kwè adan. Osi, nou kay diskité pouki i bon pou manmay mandé kèstyon. Èk nou kay diskité diféwan bagay ou sa fè épi manmay ou, ki kay ba’w pli òpòtyounité pou palé épi yo asou sa ou ka kwè adan.

ÉDÉ ICH OU POU DÉVÈLOPÉ LAFWA KI FÒ AN JÉHOVA ÈK AN BIB-LA

4. Ki Kèstyon ich ou pé mandé? Èk pouki?

⁴ Pawan ki Kwityen sav, sé pa paski yo ni lafwa an Bondyé, ich yo kay ni lafwa an Bondyé. Menm kon ou, pawan, pa té fèt épi lafwa an Jéhova, ich ou pa té fèt épi lafwa an Jéhova. Alò, kon ich ou ka pwofité, yo kay ni kèstyon tèl kon: ‘Ki mannyè mwen sav la ni on Bondyé? Èk ès mwen sa vwéman kwè sa Bib-la ka di?’ Épi sa bon, paski Bib-la ka ankouwajé nou pou sèvi abilité-a nou ni pou ‘wézonnen’, èk “ègzanminé tout sé konmisyon-an byen.” (Ronm 12:1; 1 Tèsa. 5:21) Konsa, ki mannyè ou kay sa édé ich ou pou fòtifyé lafwa’y?

5. Kisa pawan sa fè pou édé ich yo fòtifyé lafwa yo an Bib-la? (Ronm 12:2)

⁵ Ankouwajé manmay ou pou fè asiwé pou kò’y menm, pawòl Bondyé sé lavéwité. (Li Ronm 12:2.) Lè ich ou mandé’w kèstyon, pwan òpòtyounité sala pou moutwé’y mannyè pou jwenn sé wépons-lan. Ou sa sèvi sé zouti-a nou ni pou fè wichach. Pou ègzanp, si ich ou ka kwèsyonnen si Bib-la sé vwéman pawòl Bondyé, ou sa ankouwajé’y pou alé asou jw.org, èk chaché pou enfòmasyon èk vidiyo ki kay ba’y pwèv ki, Bib-la sé vwéman “pawòl Bondyé”. (1 Tèsa. 2:13) Èben, mi on lòt bagay ou sa fè pou édé’y fòtifyé lafwa’y an Bib-la. Ou sa ankouwajé ich ou pou fè wichach konsèné vil Ninivè an tan lontan. An tan pasé, moun ki té ka fè wichach té di, vil Ninivè pa té janmen ègzisté. Mé owon lanné mil wit san senkant (1850), yo jwenn pwèv ki vil sala té ka vwéman ègzisté. (Zèf. 2:13-15) Konsa, sa ka bay pwèv ki, sé wakont-la an Bib-la aplon.  a Alò, pawan ankouwajé sé ich ou-a pou konpawé sa sé piblikasyon nou-a épi enfòmasyon lézòt moun ja fè wichach asou. Sa kay fòtifyé lafwa’y an sa Bib-la ka di.

6. Ki mannyè pawan sa édé ich yo katjilé asou pouki Bib-la aplon? Ba yon ègzanp. (Gadé pòtwé-a osi.)

⁶ Édé ich ou pou katjilé asou pouki yo sa kwè Bib-la aplon. Wi, pawan, ou ni an chay òpòtyounité pou palé épi ich ou konsèné bagay an Bib-la ki byen antéwésan, èben konsèné bagay ki sa fè lafwa’y an Bondyé pli fo. Ou pé jwenn sé òpòtyounité sala, lè ou wè bagay ki té la dépi tan lontan, lè ou wè on bèl jaden, èben lè ou vizité ofis bwanch Témwen Jéhova. Lè ou wè on bagay ki ni on bèl listwa dèyè’y, ou sa sèvi’y pou édé ich ou wè mannyè Bib-la vwéman aplon. Pou ègzanp, la ni on wòch yo ka kwiyé Moabite Stone.  b Wòch sala ni twa mil (3,000) lanné èk i ni non Bondyé ékwi asou’y. Ès ich ou konnèt sa? Épi menm wòch sala di, Micha, wa Mowab, wébèl kont Izwayèl. Èk Bib-la di menm bagay-la an 2 Wa 3:4, 5. Alò, lè ich ou wè pwèv ki Bib-la vwé èk aplon, lafwa’y kay vini pli fò.​—Gadé 2 Kwonnikèl 9:6.

7-8. (a) Kisa nou sa apwann an sé bèl modèl-la nou ka wè an nati? Ba yon ègzanp. (Gadé pòtwé-a osi.) (b) Ki kèstyon ou sa mandé ich ou pou édé’y kwè la ni on Kwéyatè?

⁷ Ankouwajé ich ou pou katjilé konsèné kwiyasyon. Paditan ou épi ich ou ansanm, ki zòt ka pwan an ti maché èben zòt ka fè on ti twavay an jaden-an, édé yo wè kantité bèl bagay èstòdinè ki an nati. Èk ou kay vlé fè sa paski sé bèl bagay èstòdinè sala ka ba pwèv ki, sé on Kwéyatè ki ni entèlijans èk lasajès ki fè yo tout. Pou ègzanp, si ou byen gadé bagay an nati, ou kay òbzòvé sèten bagay ni menm modèl-la. Ou sa wè yon ègzanp on modèl ki ka pawèt an nati, lè ou gadé kokiyaj kalmason-an, sèten flè, mannyè-a fèy sèten plan awanjé èben mannyè-a sèten gwoup étwal ka pawèt an syèl-la. c Siyantis ja fè plizyè wichach asou mòdèl sala pou an chay tan. Èk lè yo byen ègzanminé mòdèl sala, yo ka wè on mòdèl limowo ka toujou pawèt. Yo ka kwiyé mòdèl limowo sala, “Fibonacci sequence”. d

⁸ Bon. Kon ich ou ka apwann pli konsèné siyans an lékòl, i kay apwann la ni lòt modèl toupatou an nati. Pou ègzanp, sé bwanch pyébwa-a pa ka pwofité vikivay. Yo ka swiv on mòdèl siyantis ka kwiyé, Fractal. Èk nou sa jwenn modèl Fractal sala an lòt bagay ki an nati osi. Mé kèstyon-an sé sa, ‘Ki moun ki fè sé bèl mòdèl sala nou ka wè an nati?’ Pli ich ou wéfléchi asou kwèstyon sala, sé pli i kay dévlopé lafwa ki fò, èk i kay konpwann, sé Bondyé ki kwéyé tout bagay. (Hib. 3:4) Kon ich ou ka vini pli gwan, ou sa mandé’y kwèstyon sala: “Pouki Bondyé kwéyé nou? Ès ou ka kwè sé li ki konnèt pli mèyè mannyè-a pou nou sa jwenn lakontantman?” Lè sala, ou sa èspliké ki, Bondyé ban nou Bib-la pou moutwé nou mannyè nou sa ni lakontantman.

ÉDÉ ICH OU POU BATI APWÉSIYASYON POU WÈG BONDYÉ

9. Ki wézon ich ou pé ni pou kwèstyonnen valè wèg Bondyé ki an Bib-la?

⁹ Si ich ou ka kwèsyonnen valè wèg Bondyé ki an Bib-la, éséyé pou wè pou ki wézon i ka kwèsyonnen’y. Ès i pa ka dakò épi wèg Bib-la? Èben èskè i pa sa èspliké sa i ka kwè adan? Èben, népòt sa ich ou di’w ki pé wézon-an, ou sa wédé’y pou apwésyé wèg Bondyé ki an Bib-la, lè ou étidyé liv-la Ou Sa Ni On Bon Lavi Pou Tout Tan! épi’y. e

10. Ki mannyè ou sa édé ich ou pou fè Jéhova pli bon jan’y?

¹⁰ Édé ich ou pou fè Jéhova pli bon jan’y. Lè ou ka étidyé Bib-la épi ich ou, sèvi kèstyon èk ilistwasyon an liv-la Ou Sa Ni On Bon Lavi Pou Tout Tan! pou’w éséyé sav kisa ki an tjè’y. (Pwov. 20:5) Pou ègzanp, lison 8 ka konpawé Jéhova épi on bon jan ki ka fè nou chonjé sèten bagay ki ka pwotéjé èk bennéfyé nou. Apwé zòt fini ègzanminé 1 Jan 5:3, ou sa mandé ich ou: “Nou sav Jéhova sé on Bon jan pou nou. Konsa koumannyè nou dwé gadé sa i mandé nou pou fè?” Sa pé pawèt kon on kwèsyon ki senp. Mé lè ou pozé kwèsyon kon sa, sa ka édé ich ou pou konpwann ki, Bondyé ka ban nou wèg paski i vwéman enmen nou.​—Izay. 48:17, 18.

11. Ki mannyè nou sa édé ich nou wè wézon-an i bon pou swiv pwensip Bib? (Pwovèb 2:10, 11)

¹¹ Diskité ki mannyè nou sa twapé bennéfis lè nou swiv sé pwensip-la ki an Bib-la. Pawan, lè ou ka li Bib-la, èben tèks-la pou jounen-an épi ich ou, diskité mannyè pwensip Bib-la ja édé fanmi’w. Ében ou sa sèvi lokasyon sala pou édé ich ou konpwann i toujou bon pou di lavéwité-a èk pou twavay wèd. (Hib. 13:18) Ou sa osi èspliké, lè nou swiv konsèy-la ki an Bib-la, i sa édé nou pou ni pli bon santé èk lajwa. (Pwov. 14:29, 30) Alò, pli ich ou ka konpwann pouki i bon pou obéyi sa Bib-la ka di, i kay toujou vlé swiv sé pwensip-la ki an Bib-la.​—Li Pwovèb 2:10, 11.

12. Kisa yon papa ka fè pou édé ich li wè lasajès-la ki an Bib-la pli ho pasé lasajès lézonm?

¹² Steve sé on papa ki ka wèsté an France. I èspliké mannyè i èk madanm li té édé Ethan, jenn gason yo, pou konpwann ki, Jéhova ka fè lwa paski i enmen nou. Steve di: “Nou té ka mandé’y kwèsyon tèl kon: ‘Pouki Jéhova vlé nou obéyi koumandman sala? Koumannyè sa ka moutwé i enmen nou? Kisa ki kay fèt si ou pa apliké pwensip sala?’” Bon. Sé konmézasyon sala ka édé Ethan pou dévèlopé lafwa ki fò an Jéhova èk an pawòl li. Steve osi di: “Objèktiv nou sé pou édé Ethan pou wè, Bib-la ni lasajès ki pli ho pasé lasajès lézonm.”

13. Ki mannyè pawan sa étwennen ich yo pou apliké pwensip Bib? Ba yon ègzanp.

¹³ Étwennen ich ou pou apliké pwensip Bib. Ki mannyè ou sa fè sa? Èben mi yon ègzanp. Pitèt titja-a bay ich ou yon asaynman pou li an sèten liv. Épi sé moun-lan ki an liv-la ka fè bagay Jéhova di ki pa bon pou fè. Èk liv-la ka dékwi sé bagay sala akonmsi la pa ni anyen mové épi sé bagay sala. Èvèk liv-la ka jis ankouwajé nou pou imité sé moun-lan ki adan’y-lan. Èben, ou sa mandé ich ou, ‘Kouman Jéhova ka santi lè i wè moun ka fè sé bagay sala?’ (Pwov. 22:24, 25; 1 Kòr. 15:33; Filip. 4:8) Sa sa édé ich ou pou wè pouki i bon pou obéyi wèg Jéhova. Èk si titja’y èben lòt kanmawad an klas li mandé’y wipinyon’y asou liv-la, i kay sa palé asou sa i ka kwè adan.

ÉDÉ ICH OU POU ÈSPLIKÉ SA YO KA KWÈ ADAN

14. Ki sijé ki pé difisil pou on jenn Kwityen palé asou, èk pouki?

¹⁴ Délè, sé jennès-la pa ka santi alèz pou di lézòt moun sa yo ka kwè adan. Pou ègzanp, yo pé santi pè si yo ni pou èspliké wézon-an yo pa ka kwè an èvolousyon. Nou pé mandé: ‘Mé pouki pou yo pè?’ Èben, pitèt titja yo ja di èvolousyon sé on bagay ki wéyèl paski siyans ka sipòté’y. Si ou sé yon pawan, kisa ou sa fè pou édé manmay ou ni konfyans-lan ki, sa Bib-la ka di sé vwéman lavéwité?

15. Kisa ki sa édé on jenn Kwityen ni pli konfyans an sa i ka kwè adan?

¹⁵ Édé ich ou pou ni pli konfyans an sa yo ka kwè adan. Ich ou pa bizwen santi hont èben jennen paski i konnèt lavéwité-a konsèné kwiyasyon. (2 Tim. 1:8) Pouki? Èben sa sé paskè, la ni an chay siyantis ki pa ka kwè lavi koumansé sibitman èben pa chans. Èk sé siyantis sala ka wè évidans-lan ki, sé on moun ki ni lasajès ki fè tout bagay. Konsa, yo pa ka kwè èvolousyon, menm si évolousyon sé on sijé yo ka enstwi an lékòl toupatou owon latè-a. Bon. Mi yon bagay ki sa édé ich ou pou ni pli konfyans an sa yo ka kwè adan. Èk sa sé, si yo pansé asou sé wézon-an lòt fwè èk sè ka kwè la ni on Kwéyatè ki fè tout bagay. f

16. Ki mannyè pawan sa édé yo pou èspliké wézon-an i kwè la ni on Kwéyatè? (1 Pita 3:15) (Gadé pòtwé-a osi.)

¹⁶ Pwépawé ich ou pou èspliké bay moun wézon-an i kwè la ni on Kwéyatè. (Li 1 Pita 3:15.) Pawan, i té kay on bon bagay si ou épi ich ou gadé sé atik-la asou jw.org ki ka diskité évolousyon. Épi apwé, ich ou sa chwazi èsplikasyon-an i santi ki pé édé lòt moun konpwann la ni on Kwéyatè. Fè’y chonjé, i pa bizwen fè chikann épi kanmawad li ki an lékòl. Épi ankouwajé’y pou tjenn èsplikasyon’y senp èk klè si on moun dakò pou palé épi’y asou sijé sala. Pou ègzanp, kanmawad li pé di: “Mwen ka kwè sèlman sa mwen ka wè. Épi m’a janmen wè Bondyé!” Konsa, i sa wéponn li èk di: “Imajiné ou ka maché adan on fowé ki pa ni pyès moun. Épi ou jwenn an bèl kay. Kisa ou kay kwè? Oblijé! Sé on moun ki bati kay sala paski évidans-lan douvan’w. Alò, an menm mannyè-a, sé kon sa syèl-la èk latè-a èk tout sa ki adan’y, ka moutwé a klè ki sé yon moun ki fè’y.”

17. Ki mannyè pawan sa édé ich yo pou gadé pou òpòtyounité pou di lézòt konsèné Bib-la? Ba yon ègzanp.

¹⁷ Ankouwajé ich ou pou gadé pou òpòtyounité pou di lézòt konsèné Bib-la. (Ronm 10:10) Ou sa di, lè’w ka apwann mannyè pou di lézòt konsèné Bib-la, menm kon lè’w ka apwann pou jwé mizik. Lè ou koumansé apwann jwé mizik, ou kay pwatiké mizik ki byen senp èk ézé. Èk kon tan ka pasé, i kay pli alèz pou ou jwé népòt kalté mizik. An menm mannyè-a, on jenn Kwityen sa koumansé di lézòt konsèné Bib-la adan on mannyè ki senp. Pou ègzanp, i pé di yonn an sé manmay-la ki an lékòl li-a: “Ès ou té sav, siyantis ka kòpi sa yo ka wè an nati? Kité mwen moutwé’w on bèl vidiyo.” Apwé sa, i sa moutwé manmay-la on vidiyo ki an sèksyon-an Bagay Èstòdinè An Kwiyasyon asou jw.org. Èk apwé sa, i pé di: “Si siyantis ka jwenn laglwa pou on bagay yo kòpi an nati, ki moun ki méwité pli laglwa pou sa nou ka wè an nati?” Pitèt sa pé lévé lentéwé manmay-la èk fè’y anvi konnèt pli.

KONTINÉ ÉDÉ ICH OU FÒTIFYÉ LAFWA’Y

18. Ki mannyè pawan sa kontiné édé ich yo fòtifyé lafwa yo?

¹⁸ Jòdi jou, majòwité moun an latè-a pa ni pyès lafwa an Jéhova. (2 Pita 3:3) Konsa, pawan, kon ou ka étidyé Bib-la épi ich ou, ankouwajé’y pou ègzanminé sé sijé-a ki kay fè’y ni pli wèspé pou Pawòl Bondyé èk sé wèg-la ki adan’y-la. Ankouwajé’y pou sèvi lidé’y, lè’w moutwé’y sé bèl bagay èstòdinè-a ki an kwiyasyon. Édé’y pou apwésyé sé pwofèsi ki an Bib-la ki ja fèt vwé. Èk pa janmen obliyé pou pwédyé épi ich ou, èk pwédyé pou’y; paski sa tèlman enpòtan. Lè ou fè sé bagay sala, ou sa asiwé, Jéhova kay wékonpansé’w pou tout éfò-a ou mété pou édé ich ou fòtifyé lafwa’y. ​—2 Kw. 15:7.