1. (a) Lè sé disip-la té mandé Jézi “ki lè tan-an kay bout”, kisa Jézi di yo? (b) Kisa Jézi ankouwajé tout sé disip li-a pou fè?

 SÉ disip Jézi-a té vlé konnèt ki mannyè èk ki lè Jérouzalèm épi tanp li té kay détwi. Konsa, détwa jou avan Jézi mò, kat (4) an sé disip li-a té apwochéʼy pou mandéʼy kèstyon asou sa. An Mafyou 24:3 yo mandé Jézi: “Ki sa ki kay fèt pou moutwé i tan pouʼw vini? Épi ki lè tan-an kay bout?” Lè Jézi wéponn yo, i pa té palé konsèné bout Jérouzalèm èk tanp li sèlman, mé i osi palé konsèné bout “dènyè tan-an”; sa sé tan-an nou ka viv adan jòdi jou. Sé pou wézon sa-a i di yo: “Pyèsonn pa sav ni jou-a ében lè-a sé bagay sala kay fèt-la. Sé nanj an syèl-la pa sav, ni mwen Gason-an, mé sé Papa mwen tousèl ki sav.” Apwé sa, i ankouwajé tout sé disip li-a pou “kontiné èspéyé” èk “kontiné véyé!”​—Mak 13:32-37.

2. Pouki i té enpòtan pou sé Kwityen-an an Jérouzalèm kontiné véyé?

² An pwèmyé syèk-la, sé Kwityen-an an Jérouzalèm té ni pou kontiné véyé. Mé pouki? Sé paski lavi yo té ka dépan asou sa. Konsa, Jézi té di sé disip li-a sa pou gadé pou, pou yo sav ki lè Jérouzalèm épi tanp li té kay détwi. I di yo an Louk 21:20: “Lè zòt kay wè sòlda tout oliwon Jérouzalèm, sé lè sala zòt kay sav ki touswit yo kay détwi plas-la.” Alò, lè yo wè sé sòlda-a oliwon Jérouzalèm, yo té ni pou obéyi avètisman Jézi èk kouwi mouté an sé montany-lan. (Louk 21:21) San dout, tout sé Kwityen-an ki té obéyi avètisman Jézi té chapé lè sòlda Ronm vini èk détwi Jérouzalèm.

3. Kisa nou kay diskité an atik sala?

³ Touswit, Bondyé kay mennen an bout pou vyé sistenm sala. Alò, nou ni pou kontiné pou pwan pwokosyon èk kontiné véyé. An atik sala, nou kay diskité mannyè nou sa pwan pwokosyon lè nou ka gadé sé bagay-la ki ka fèt an latè-a, mannyè nou sa pwan pwokosyon an mannyè-a nou ka viv lavi nou, èk mannyè nou sa byen sèvi tan nou.

4. Pouki nou sipozé antéwésé an sa ki ka fèt asou latè-a jòdi jou?

⁴ Pouki nou sipozé antéwésé an sa ki ka fèt asou latè-a jòdi jou? Èben, Jézi té di nou konsèné sé bagay-la ki té kay fèt asou latè-a ki té kay édé nou konnèt bout sistenm Satan pwé. (Maf. 24:3-14) Osi, liv Wévélasyon sé on konmisyon “Bondyé bay Jézi Kwi pouʼy té moutwé sé sèvant li-a sé bagay-la ki ni pou fèt touswit-la.” (Wév. 1:1) Èk zapòt Pita ankouwajé nou pou gadé sé pwofèsi sala, èk mannyè yo ka fèt vwé, pou édé nou tjenn lafwa nou fò. (2 Pita 1:19-21) Konsa, nou ni bon wézon pou nou antéwésé an sa ki ka fèt asou latè-a jòdi jou. Èk lè nou wè sé pwofèsi sala ka fèt vwé, sa ka fè nou byen èksité; konsa nou vlé diskité yo épi yonn a lòt.

5. (a) Lè nou ka diskité pwofèsi Bib, kisa nou pa vlé fè? (b) Lè nou ka diskité pwofèsi Bib, kisa nou vlé fè asiwé? (Gadé sé pòtwé-a osi.)

⁵ Lè nou ka diskité pwofèsi Bib, nou vlé pwan pwokosyon. Nou pa vlé di bagay pa dibonntèt nou. Pouki? Paski sa pé annékòz divizyon an kongwigasyon-an. Pou ègzanp, nou pé tann sé gouvèdman-an oliwon latè-a diskité mannyè yo kay wanjé on sitiwasyon èk mennen lapé èk sikyòrité. Pito nou di pwofèsi-a 1 Tèsalonnika 5:3 ka fèt vwé, i té kay pli mèyè pou nou fè asiwé ki, sa nou ka di a ling épi sa èslav fidèl-la ka enstwi nou jòdi jou. Konsa, lè sa nou ka di a ling épi sa ògannizasyon Jéhova ka di, nou ka édé kongwigasyon-an pou wèsté an lilyon èk pou ni “yon sèl lidé”. ​—1 Kòr. 1:10; 4:6.

6. Pouki wézon zapòt Pita té di nou pou “èspéyé pou jou-a lè Bondyé kay vini jijé latè-a”? (2 Pita 3:11-13)

⁶ Li 2 Pita 3:11-13. Zapòt Pita ka édé nou pou tjenn an lidé sé wézon-an nou ka ègzanminé pwofèsi Bib. I di nou pou “èspéyé pou jou-a lè Bondyé kay vini jijé latè-a.” Pou ki wézon? Sa sé paski i vlé nou sèvi tan-an nou wèsté an vyé sistenm sala byen. Konsa, nou pa vlé gaspiyé tan nou ka éséyé pou konnèt “ki jou ében ki nèditan” Jéhova kay mennen Anmagèdonn. (Maf. 24:36; Louk 12:40) Mé pito, nou vlé “viv lavi ki nèt épi viv bay Bondyé tousèl”. Èk lè nou fè sa, nou ka moutwé Jéhova nou vwéman enmenʼy. Kanmenm, nou ni pou toujou pwan pokosyon pou fè asiwé nou ka kontiné viv on lavi ki nèt. Mé pouki?

7. Kisa on moun ki ka pwan pwokosyon an mannyè-a i ka viv laviʼy ka fè? (Louk 21:34)

⁷ Jézi pa té sèlman di sé disip li-a pou pwan pwokosyon lè yo ka gadé sé bagay-la ki ka fèt an latè-a, mé i osi di yo pou pwan pwokosyon an mannyè-a yo ka viv lavi yo. (Li Louk 21:34.) On moun ki ka pwan pwokosyon an mannyè-a i ka viv laviʼy ka gadé pou sé danjé-a ki sa donmajé wilasyonʼy épi Jéhova. Épi i ka fè tout sa i pé pou wèsté lwen sé danjé sala. Konsa, si i fè sa, i ka tjenn kòʼy an lanmityé Bondyé.​—Pwov. 22:3; Joud 20, 21.

8. Kisa zapòt Pòl té ankouwajé tout Kwityen pou fè?

⁸ Zapòt Pòl té wépété sa Jézi té di lè i té ka ankouwajé sé Kwityen-an an Èfésòs. I di yo: “Ankò, pwan bon pokosyon ki mannyè zòt ka viv lavi zòt. Sé pa pou zòt viv kon moun ki inyowan, mé pito sa viv kon moun ki ni lasajès.” (Èfés. 5:15, 16) Ankouwajman sala byen nésésè pou nou tout jòdi jou. Pou ki wézon? Sé paski Satan ka toujou éséyé pou détwi wilasyon nou épi Papa nou, Jéhova. Alò, Bib-la ka ban nou bon konsèy lè i di nou pou “gadé ki sa Bondyé vlé [nou] fè.” (Èfés. 5:17.) Èk lè nou swiv konsèy sala, nou sa pwotéjé kò nou hòd bagay ki sa donmajé wilasyon nou épi Jéhova.

9. Kisa nou ni pou fè pou nou sa fè bon disizyon?

⁹ Bib-la pa ka palé konsèné tout bagay ki sa donmajé wilasyon nou épi Jéhova. Èk souvan, Bib-la pa ni on koumand ki ka di nou ègzaktiman sa pou nou fè. Mé pou nou sa fè bon disizyon, nou ni pou “gadé ki sa Bondyé vlé [nou] fè.” Konsa, nou vlé toujou étidyé èk mèdité asou Pawòl li. Èk lè nou fè sa, sa kay édé nou konpwann kisa Jéhova vlé nou fè. Èk osi, sa kay édé nou katjilé menm kon Jézi ka katjilé. Konsa, nou kay sa fè bon disizyon menm si nou pa ni on lwa èben on koumand ki ka di nou ègzaktiman sa pou fè. (1 Kòr. 2:14-16) Délè, i ézé pou wè bagay ki sa donmajé wilasyon nou épi Jéhova. Mé délè, i pa ézé pou wè yo.

10. Kisa ki sa donmajé wilasyon nou épi Jéhova?

¹⁰ Kon sèvant Jéhova, nou ni pou wèsté lwen bagay ki sa donmajé wilasyon nou épiʼy. Pou ègzanp, bagay tèl kon: moutwé moun ou pa mayé épi èben ou pa ni atansyon pou mayé atansyon romantik, bwè twòp, manjé twòp, palé moun mal, anmizman ki plen vyolans, pònografi èk lòt bagay kon sa. (Sam 101:3) Èvèk toujou chonjé, lèlmi nou, Denmou-a, ka toujou gadé pou òpòtyounité pou donmajé wilasyon nou épi Jéhova. (1 Pita 5:8) Konsa, nou ni pou toujou pwan pwokosyon paski Satan sa mété an lidé nou èk an tjè nou, vyé kawaktè tèl kon: anvyèj, lògèy, jalouzi, hayisans, pou di mansonj, èk pou tjenn moun an tjè. (Gal. 5:19-21) Pitèt ou pé kwè sé kawaktè sala pa danjéwé. Mé si nou pa tiwé yo an tjè nou, yo kay pwofité èk yo kay annékòz nou pou péché.​—Jémz 1:14, 15.

11. (a) Kisa ki yon danjé ki pa ézé pou wè? (b) Pouki nou vlé wèsté lwen danjé sala?

¹¹ Mi yon danjé ki pa ézé pou wè, mové konpanni. Imajiné sitiwasyon sala. Ou ka twavay épi on moun ki pa on Tèmwen Jéhova. Mé ou vlé moun sala pou wè ki Tèmwen Jéhova sé bon moun. Konsa, ou dakò pou déjiné épiʼy tanzantan. Èk sa ou wéyalizé, ou ka déjiné épiʼy souvan. Èk moun-lan koumansé santi si tèlman konfòtab épiʼw, i jis vlé tjenn vyé konmézasyon épiʼw. Mé an koumansman-an, ou ka éséyé pou inyowé sa moun-lan ka diʼw. Kanmenm, pli ou pasé tan épi moun sala, sé pli vyé konmézasyonʼy pa ka ofwanséʼw. Yon jou, i diʼw: “Apwé twavay, annou ay pwan on bwè.” Épi ou dakò èk ou alé. Apwé on tan, ou ka koumansé katjilé menm kon moun sala. Èk touswit, ou kay koumansé fè sé menm kalité bagay-la i ka fè-a. Èk sa kay afèkté wilasyonʼw épi Jéhova. Mé kanmenm, menm si on sitiwasyon kon sa pé fèt, ès sa vlé di nou pa sipozé twété moun épi jantiyès èk wèspé? Mé non, nou sipozé twété tout moun épi jantiyès èk wèspé. Mé, nou ni pou chonjé si nou pasé an chay tan épi mové konpanni, nou kay vini menm kon yo. (1 Kòr. 15:33) Konsa, si nou pwan pwokosyon an mannyè-a nou ka viv lavi nou, menm kon Jézi té di nou pou fè, nou pa kay swiv mové konpanni. (2 Kòr. 6:15) Wi, nou kay wè danjé-a, èk wèsté lwenʼy.

12. Ki twavay Jézi té bay sé disip li-a pou fè?

¹² Jézi té vlé sé disip li-a pou tjenn kò yo anbawasé paditan yo té ka èspéwé bout sistenm-lan. Konsa, i ba yo twavay pou fè. I di yo pou pwéché bay tout “moun an Jérouzalèm, an tout Joudiya épi Sanmariya épi toupatou an latè-a.” (Twav. 1:6-8) Wi, sa vwéman sété an chay twavay pou sé disip li-a fè! Mé magwé sa, yo obéyi koumand Jézi èk byen sèvi tan yo ka pwéché Bon Nouvèl-la.

13. Pouki nou ni pou byen sèvi tan nou? (Kòlòsé 4:5)

¹³ Pou nou pwan pwokosyon an mannyè-a nou ka viv lavi nou, nou ni pou katjilé byen sèwiyé asou mannyè-a nou ka sèvi tan nou. Pou ki wézon? Sa sé paski, jòdi jou ‘bagay nou pa ka èspéyé ka wivé nou sibitman.ʼ (Éklé. 9:11) Jòdi nou la, denmen nou pa la. Konsa, mi sé sa Kòlòsé 4:5 ka ankouwajé nou pou fè: “Sé pou zòt sèvi an chay lasajès adan mannyè-a zòt ka kondwi kò zòt douvan sé sa ki pa ka kwè an Jézi-a. Sèvi byen tout ti chans zòt jwenn pou zòt sa simen Bon Nouvèl-la.”

14-15. Ki mannyè nou sa byen sèvi tan nou? (Hibrou 6:11, 12) (Gadé pòtwé-a osi.)

¹⁴ Ki mannyè nou sa byen sèvi tan nou? Èben, lè nou ka sèvi tan nou pou fè divwa Jéhova èk lè nou ka sèvi tan nou pou fòtifyé wilasyon nou épiʼy, nou ka byen sèvi tan nou. (Jan 14:21) Alò, nou ka swiv konsèy-la an 1 Kòr. 15:58 ki di nou: “Doubout fò épi pa kité anyen soukwéʼw. Toujou twavay wèd kon zòt ka twavay bay Senyè-a”. Konsa, si nou swiv konsèy sala, lè bout-la vini, si sa sé bout lavi nou èben bout vyé sistenm sala, nou pa kay wigwété nou pa té fè asé bay Jéhova.​—Maf. 24:13; Ronm 14:8.

¹⁵ Bon, Jézi té di i kay épi nou jis an bout latè-a. Èk i ja tjenn pwonmèt sala. Èk i ka kontiné pou diwèkté sé disip li-a, kon yo ka pwéché Bon Nouvèl-la oliwon latè-a. An sé mitin nou-an èk an sé piblikasyon nou-an, Jézi ka enstwi nou mannyè-a pou pwéché. Èk osi, i ka ban nou tout sa nou bizwen pou nou sa pwéché Bon Nouvèl-la. (Maf. 28:18-20) Konsa, nou ka swiv diwèksyon Jézi lè nou twavay wèd pou pwéché èk enstwi lézòt. Èk nou ka swiv diwèksyonʼy osi, lè nou kontiné pou pwan pwokosyon kon nou ka éspéwé gwan jou Jéhova. Si nou apliké konsèy-la an Hibrou 6:11, 12, nou kay “ka èspéyé èk konfyans” “jis an bout-la”.​—Liʼy.

16. Kisa nou détèminé pou fè?

¹⁶ Épi tout sé mové bagay-la ki ka fèt asou latè-a, nou pa sa èspéwé pou bout-la vini! Èk délè nou pé jis katjilé i ka pwan tan pou vini. Mé kanmenm, pwofèt Habakòk ka ban nou asiwans-lan ki jou Jéhova “pa kay anwita!” (Hab. 2:3) Anfen, Jéhova ja désidé jou-a èk nèditan-an i kay mété an bout pou vyé sistenm Satan. Èk lè jou sala wivé, Jéhova kay akonpli tout sé bèl bagay-la i pwonmèt pou fè-a. Konsa, sé pou nou détèminé pou “kontiné gadé pou Jéhova,” épi “èspéwé épi pasyans asou Dyé salvasyon” nou.​—Mayk. 7:7.