1. Ki bèl atitid pèp Jéhova ja moutwé dépi tan lontan?

 ÈS OU enmen Jéhova an chay? Mé wi, kouman! Ében sé pa ou yonn. Dépi tan lontan, an chay moun ja moutwé yo enmen Jéhova an chay menm kon ou. (Sam 104:33, 34) Èk an chay moun ja fè sakwifis pou adowé Jéhova. Wi, sé sa sé Nazarayt-la an nasyon Izwayèl té fè. Alò ki moun sé Nazarayt-la té yé, èk kisa nou sa apwann hòd ègzanp yo?

2. (a) Ki moun sé Nazarayt-la té yé? (Limowo 6:1, 2) (b) Pouki adan jan Izwayèl té chwazi pou vini Nazarayt?

² Mo pawòl-la “Nazarayt” sòti hòd yon èspwèsyon an langaj Hibrou ki vlé di, yon moun yo chwazi ében mété apa. Bon. Sé Nazarayt-la sété jan Izwayèl ki té zélé pou fè sakwifis pou adowé Jéhova adan on mannyè ki spésyal. Lwa-a Jéhova té bay nasyon Izwayèl té fè’y posib pou on nonm ében on fanm fè on sèman ki spésyal bay Jéhova. Wi, moun-lan ki fè sèman sala té ka chwazi pou viv kon yon Nazarayt pou on sèten tan. a (Li Limowo 6:1, 2.) Anfen lè yon jan Izwayèl fè on sèman pou vini yon Nazarayt, i té ni pou swiv sèten konmand sé lézòt jan Izwayèl-la pa té ni pou swiv. Konsa, pouki yon jan Izwayèl té ka chwazi pou vini yon Nazarayt? Ében, sa sé paski, i té ni an chay lanmityé bay Jéhova èk an chay apwésiyasyon pou tout sa Jéhova ja fè ba li.—Dito. 6:5; 16:17.

3. Ki mannyè pèp Jéhova jòdi jou ka swiv ègzanp sé Nazarayt-la?

³ Lè lwa Jézi wiplasé lwa-a Jéhova té bay nasyon Izwayèl-la pèp Jéhova pa té sa vini Nazarayt ankò. (Gal. 6:2; Ronm 10:4) Mé kanmenm, menm kon sé Nazarayt-la, jòdi, pèp Jéhova ka sèvi’y épi tout tjè yo, lam yo, lidé yo, épi fòs yo. (Mak 12:30) Osi menm kon sé Nazarayt-la, pèp Jéhova jòdi ka osi fè on sèman lè nou dèdiké lavi nou pou Jéhova. Èk pou nou viv an ling épi sèman sala menm kon sé Nazarayt-la, nou oblijé fè sa Jéhova vlé nou fè, èk nou ni pou fè sakwifis pou nou sa sèvi’y. Alò apwézan nou kay ègzanminé mannyè sé Nazarayt-la viv lavi yo an ling épi sèman yo. Èk osi nou kay apwann bèl lison konsèné mannyè nou sa viv lavi nou an ling épi sèman nou. b (Maf. 16:24) Annou konsidiwé détwa ègzanp.

TOUJOU PAWÉ POU FÈ SAKWIFIS

4. Silon Limowo 6:3, 4, ki sakwifis sé Nazarayt-la té fè?

⁴ Li Limowo 6:3, 4. Sé Nazarayt-la pa té sipozé bwè alkòhòl èk yo pa té ni pou manjé wézen fwé ében wézen sèk. Mé kanmenm, lòt jan Izwayèl té ka enjwi sé bagay sala. Èk sa sé paski sé bagay sala pa té mové. Anfen, Bib-la di, diven sé an kado hòd Bondyé èk diven sa “fè tjè [lézòm] djé”. (Sam 104:14, 15) Konsa, menm si sé bagay sala sa bay an moun tjè kontan, sé Nazarayt-la té pawé pou fè sakwifis. c

5. Ki sakwifis Madián èk Marcela té fè, èk pou ki wézon yo té fè sé sakwifis sala?

⁵ Menm kon sé Nazarayt-la, nou osi ka fè sakwifis pou nou fè pli pou Jéhova. Annou konsidiwé ègzanp fwè Madián èk madanm li Marcela. d Yo té ka enjwi an bon lavi. Madián té ka fè an chay lajan èk yo té ka wèsté adan an bèl kay. Kanmenm, yo té vlé fè pli an sèvis yo pou Jéhova. Alò yo désidé pou fè déotwa chanjman. Yo di: “Nou koumansé dépansé mwens lajan, nou chaché pou an pli piti kay pou nou wèsté èk nou vann motoka nou.” Madián èk Marcela pa té oblijé fè sé sakwifis sala. Mé yo fè’y paski sa té kay édé yo pou fè pli an sèvis Jéhova. Anfen, yo satisfè épi sa yo ni, èk yo byen kontan épi sé disizyon-an yo fè-a.

6. Pouki Kwityen jòdi jou ka fè sakwifis bay Jéhova? (Gadé pòtwé-a osi.)

⁶ Pèp Jéhova jòdi kontan pou fè sakwifis pou yo sa ni pli tan pou sèvi Jéhova. (1 Kòr. 9:3-6) Nou pa oblijé fè sé sakwifis sala pou nou plè Jéhova. Èk sé bagay-la nou ka ladjé èben kité dèyè sé pa bagay ki mové. Pou ègzanp, adan fwè èk sè ka chwazi pou pa ni kay yo menm èben pou pa aksèpté an twavay yo vwéman enmen. Osi plizyè fwè èk sè ja chwazi pou kité asé tan pasé avan yo désidé pou mayé, ében yo chwazi pou pa ni ich apwé yo mayé. Èk lézòt fwè èk sè ka chwazi pou wann sèvis koté ki bizwen pli pwoklanmatè menm si yo ni pou kité fanmi yo èk bon jan yo dèyè. Mé poutji nou ka fè sakwifis kon sa? Ében sa sé paski nou vlé bay Jéhova pli mèyè nou. Èk nou sa asiwé, Jéhova ka vwéman apwésyé népòt kalité sakwifis nou fè pou plè’y.—Hib. 6:10.

TOUJOU PAWÉ POU WÈSTÉ DIFÉWAN

7. Pouki i pitèt té difisil pou an Nazarayt tjenn sèman’y? (Limowo 6:5) (Gadé pòtwé-a osi.)

⁷ Li Limowo 6:5. Sé Nazarayt-la té sèwmanté pou pa koupé chivé yo. Sa sété yon mannyè yo té ka moutwé yo té ka abésé kò yo konplètman douvan Jéhova. Konsa, si yon Izwalayt sété an Nazarayt pou an chay tan, chivé’y té kay vini lonng èk i té kay ézé pou moun wè sa. Èk si sé moun-lan oliwon’y té ka wèspèkté’y, èk yo té ka sipòté disizyon’y pou tjenn sèman’y kon an Nazarayt, sa té kay fè’y pli ézé pou’y wèsté diféwan. Mé malèwèzman, la té ni lè koté sé jan Izwayèl-la pa té ka apwésyé ében sipòté sé Nazarayt-la. Pou ègzanp, diwan tan pwòfèt Amòs, jan Izwayèl ki té tounen apòsta ‘té ka kontiné bay sé Nazarayt-la diven pou bwè’. I ka sanm yo té vlé sé Nazarayt-la kasé sèman-an yo té fè bay Jéhova pou pa bwè. (Amòs 2:12) Wi, délè sé Nazarayt-la té bouzwen an chay kouwaj pou tjenn sèman yo èk pou wèsté diféwan.

8. Ki mannyè èspéyans Benjamin ankouwajé’w?

⁸ Menm si nou koutja, Jéhova sa ban nou kouwaj-la pou wèsté diféwan menm kon i té fè bay sé Nazarayt-la. Konsidiwé ègzanp Benjamin, an tibway ki ni dis (10) lanné ki ka wèsté an péyi Norway. Lékòl li té ni an sélébwasyon pou sipòté moun an péyi Ukraine ladjè-a té afèkté. Yo té mandé sé manmay-la an lékòl-la pou abiyé an koulè nasyonnal Ukraine èk pou chanté an chanson pou moutwé sipò yo. Benjamin pa té vlé pwan pa an sélébwasyon-an, konsa i doubout lwen plas-la yo té ka tjenn sélébwasyon nasyonnal-la. Kanmenm an titja wè’y èk i di’y: “Ou ni pou vin’ ansanm épi nou. Nou tout ka èspéyé’w!” Kisa Benjamin fè? Ében épi kouwaj i apwoché titja-a èk i di’y: “Mwen pa ka mélé an zafè sé nasyon-an, èk mwen pa ka pwan pa an démonstwasyon politik. Anfen, la ni an chay Témwen Jéhova ki an pwizon paski yo wifizé pwan pa an ladjè.” Titja-a aksèpté èsplikasyon’y èk i di Benjamin i pa té ni pou pwan pa an sélébwasyon-an. Kanmenm an chay an sé manmay-la té vlé sav poutji Benjamin pa té patisipé. Benjamin té santi tèlman pè i pwèskè pléwé. Magwé sa, i moutwé kouwaj èk i di tout klas-la menm bagay-la i té di titja-a. Èk pli ta, Benjamin di pawan’y i santi Jéhova té édé’y pou moutwé kouwaj pou fè défans lafwa’y.

9. An ki mannyè nou sa fè tjè Jéhova kontan?

⁹ Paski nou chwazi pou obéyi Jéhova, sa kay fè moun wè nou diféwan. Konsa nou bouzwen kouwaj pou di moun an plas twavay nou ében an lékòl, nou sé Témwen Jéhova. Èk kon atitid èk aksyon moun an latè-a ka vini pli mové, i kay pli wèd pou nou swiv pwensip Bib èk pou patajé bon nouvèl-la épi moun. (2 Tim. 1:8; 3:13) Mé nou vlé toujou chonjé, lè nou moutwé kouwaj èk nou wèsté diféwan, nou ka ‘fè tjè Jéhova kontan’.—Pwov. 27:11; Mala. 3:18.

MÉTÉ JÉHOVA PWÈMYÉ AN LAVI’W

10. Ki mannyè koumand-lan an Limowo 6:6, 7 té sa mété lafwa yon Nazarayt anba tès?

¹⁰ Li Limowo 6:6, 7. Yon Nazarayt pa té sipozé vini pwé kadav an moun ki mò. Pitèt ou ka katjilé, sa pa an gwo sakwifis. Mé an tan Bib, sa té kay an pwòblenm pou yon Nazarayt lè yon moun an fanmi’y mò. Pouki nou ka di sa? Ében an tan Bib, lè an moun té ka awanjé an lètèman, yo té oblijé vini pwé kadav moun-lan ki mò. (Jan 19:39, 40; Twav. 9:36-40) Èk pou wézon sala yon Nazarayt pa té sa pwan pa an koutim sala pou yon lètèman. Anfen, lè yon moun adan an fanmi mò, sa sé an sitiwasyon ki byen difisil. Mé yon Nazarayt té ka moutwé lafwa lè i tjenn pwonmèt li pou pa vini pwé kadav yon moun ki mò, menm si moun sala sé fanmi’y. Kanmenm nou asiwé Jéhova té ka fòtifyé sé Nazarayt-la pou andiwé anba sitiwasyon kon sa ki tèlman difisil.

11. Kisa an Kwityen sipozé détèminé pou fè lè i ka fè disizyon konsèné fanmi’y? (Gadé pòtwé-a osi.)

¹¹ Kon Kwityen, nou ka pwan dèdikasyon nou pou Jéhova byen sèwiyé. Èk sa ka afèkté sé disizyon-an nou ka fè èk sé aksyon-an nou ka pwan an fanmi nou. Vwéman nou ka twavay wèd pou otjipé fanmi nou. Mé mi an bagay nou pa kay janmen fè: Nou pa kay janmen mété dézi moun an fanmi nou douvan sa Jéhova vlé nou fè. (Maf. 10:35-37; 1 Tim. 5:8) Wi, kon sèvant Jéhova nou vlé plè’y. Èk pou wézon sala, délè nou kay ni pou fè disizyon fanmi nou pa kay kontan.

12. Kon Alexandru té ka pwan ka fanmi’y, kisa i té fè, èk kisa i pa té fè?

¹² Annou konsidiwé èspéyans Alexandru èk madanm li Dorina. Apwé yo té étidyé Bib-la pou yon lanné, Dorina désidé pou doubout létid-la, èk i té vlé Alexandru doubout étidyé tou. Mé Alexandru palé byen dous épi Dorina èk i di’y, i kay kontiné fè létid li. Mé Dorina pa té kontan sa pyès. Konsa i éséyé pou fè Alexandru doubout létid li. Alò Alexandru di i té vlé konpwann pouki madanm li té ka santi kon sa, mé i pa té ézé pou’y konpwann. Anfen, délè i té vlé doubout létid li lè Dorina té ka kwititjé’y ében di’y mové pawòl. Kanmenm, Alexandru kontiné mété Jéhova pwèmyé, èk an menm di tan, i kontiné moutwé madanm li an pil lanmityé èk wèspé. Wi, bon ègzanp Alexandru ankouwajé madanm li pou koumansé létid li ankò, èk pli ta Dorina batizé.​—Gadé vidiyo-a, Alexandru and Dorina Văcar: “Lanmityé Ni Pasyans Épi I Ni Bon Mannyè” anba sèksyon-an “Lavéwité-a Ka Chanjé Lavi Moun” asou jw.org.”

13. Ki mannyè nou sa moutwé Jéhova èk fanmi nou lanmityé?

¹³ Sé Jéhova ki établi awanjman fanmi-an, èk i vlé nou ni an fanmi ki plen lakontantman. (Èfés. 3:14, 15) Konsa, pou nou sa ni lakontantman an fanmi nou, nou ni pou moutwé ni Jéhova ni fanmi nou lanmityé. Sa vlé di, nou ni pou fè sakwifis pou adowé Jéhova, osi nou ni pou otjipé fanmi nou èk twété yo épi lanmityé èk wèspé. Èk si nou fè sé bagay sala, nou sa ni asiwans-lan ki, Jéhova kay apwésyé tout sé sakwifis-la nou ka fè.—Ronm 12:10.

ENKOUWAJÉ YONN A LÒT POU SWIV ÈGZANP SÉ NAZARAYT-LA

14. Ki moun nou vlé enkouwajé épi pawòl nou?

¹⁴ Tout moun ki chwazi pou adowé Jéhova ni pou toujou pawé pou fè sakwifis paski yo enmen Jéhova. Mé délè i pa ézé pou fè sa. Konsa ki mannyè nou sa édé yonn a lòt pou fè sakwifis bay Jéhova? Ében, nou sa enkouwajé yonn a lòt épi pawòl nou. (Jòb 16:5) Bon. ‘Ès la ni fwè ében sè an kongwigasyon’w ki ka éséyé pou viv on lavi ki senp pou fè pli bay Jéhova? Ès ou konnèt jenn moun ki ka fè tout sa yo pé pou wèsté diféwan menm si i difisil pou yo fè sa? Ès la ni étidyan Bib ében fwè èk sè ki ka fè fòs kò yo pou wèsté fidèl pou Jéhova magwé yo ka twapé òpozisyon hòd fanmi yo?’ Alò annou pwan tout òpòtyounité nou twapé pou enkouwajé sé fwè èk sè nou-an, sé jenn moun nou-an, èk étidyan Bib nou osi. Wi, nou vlé di yo nou ka vwéman apwésyé yo pou kouwaj yo èk pou tout sa yo ka fè bay Jéhova.—Filém. 4, 5, 7.

15. Ki mannyè adan fwè èk sè ja édé lézòt Kwityen ki ka wann sèvis an plen?

¹⁵ Délè, nou sa édé lézòt Kwityen ki ka wann sèvis an plen. (Pwov. 19:17; Hib. 13:16) Èk sé sa an sè ki an laj té vlé fè. Sè-a ka wèsté an Sri Lanka. Yo té hosé lajan pennchann li, alò sè-a té vlé édé dé (2) jenn sè ki té ka piyonnè. Magwé bagay té wèd, sè-a ki an laj té vlé yo kontiné an minis yo. Konsa, i désidé i té kay ba yo an ti kontwibyousyon toulé mwa pou édé yo péyé bil téléfòn yo. Wi, i a klè sè sala ni an chay lanmityé!

16. Kisa nou sa apwann hòd ègzanp sé Nazarayt-la?

¹⁶ Nou vwéman sa apwann an chay bagay hòd bon ègzanp sé Nazarayt-la! Anfen, sèman-an sé Nazarayt-la té fè ka osi enstwi nou an bagay konsèné Papa nou, Jéhova. Wi, Jéhova sav nou vlé plè’y èk i sav nou vlé fè sakwifis pou nou tjenn dèdikasyon nou. Konsa, i ka ban nou òpòtyounité-a pou moutwé nou enmen’y. (Pwov. 23:15, 16; Mak 10:28-30; 1 Jan 4:19) An plis di sa, ègzanp sé Nazarayt-la ka enstwi nou ki, Jéhova ka wè sé sakwifis-la nou ka fè ba li, èk i enmen nou pou sa. Alò, annou détèminé pou kontiné sèvi Jéhova, èk pou ba li pli mèyè nou.