1-2. Ki difikilté sèvant fidèl Jéhova pé èspéyansé?

 LÈ ON mové bagay fèt an lavi nou, lavi nou sa chanjé sibitman èk konplètman, èk pitèt i pa kay janmen viwé mannyè-a i té yé avan. Pou ègzanp, Luis a sé on fwè ki té fidèl pou Jéhova, èk yon jou dòktè’y di’y i ni kansè, èk i té annèk ni déotwa mwa pou viv. Monika èk mawi’y ki té yon ansyen té byen anbawasé ka sèvi Jéhova ansanm. Mé, yon jou Monika vin’ apwann mawi’y té ka péché an séwan pou an chay tan. Osi, nou ni ègzanp Olivia yon sè ki pa mayé. I té ni pou kouwi kité kay li, paski on mové siklonn té ka apwoché. Malèwèzman lè’y witounen kay li, i wè kay-la kwazé. Wi, adan on ti mouman, lavi Luis, Monika, èk Olivia té chanjé konplètman. Alò, ès ou ja èspéyansé on mové bagay ki té chanjé lavi’w konplètman?

² Menm si nou sé sèvant Jéhova, menm kon tout lézòt moun, nou ni pou aji épi difikilté, èk nou ka tonbé malad osi. Èk an plis di sa, nou ni pou tjenbé fò anba òpozisyon èk pèsikasyon hòd moun ki hayi pèp Jéhova. Bon. Toujou chonjé, Jéhova pa ka anpéché nou èspéyansé difikilté, mé i pwonmèt pou édé nou. (Izay. 41:10) Wi, épi èd Jéhova nou sa tjenn djèwté nou, fè bon disizyon, èk wèsté fidèl pou li menm si sitiwasyon nou byen difisil. Konsa, an atik sala, nou kay diskité kat (4) mannyè Jéhova ka édé nou lè bagay ki téwib fèt an lavi nou. Èk osi, nou kay diskité kisa nou sa fè pou twapé bennéfis hòd èd-la Jéhova ka bay.

JÉHOVA KAY PWOTÉJÉ’W

3. Lè nou ka èspéyansé on sitiwasyon ki téwib, délè kisa nou pé twapé i difisil pou fè?

³ Pwoblenm-lan. Lè nou ka èspéyansé on sitiwasyon ki téwib, délè i pé difisil pou katjilé byen, èk fè bon disizyon. Mé pouki? Ében sa sé paski, nou pé santi byen twis èk antjèt. Osi, nou pé santi akonmsi nou pèd, èk nou pa sav sa pou fè. Pou ègzanp, annou konsidiwé mannyè sé dé (2) sè-a nou té mansyonnen pli bonnè-a té ka santi diwan difikilté yo. Olivia di: “Apwé siklonn-lan kwazé kay mwen, mwen té santi akonmsi mwen té pèd, èk tèt mwen té plen, m’a té sav sa pou fè.” Èk apwé mawi Monika té twayi’y, mi sa’y di: “Mwen té dézapwenté an pil. Osi mwen santi akonmsi on moun té pitjé mwen épi on kouto. Èk i té difisil pou mwen fè sé bagay-la mwen té abitwé fè. M’a té janmen kwè sa té kay wivé mwen.” Alò, ki mannyè Jéhova pwonmèt pou édé nou lè tèt nou plen, èk nou pa sav sa pou fè?

4. Silon Filipay 4:6, 7, kisa Jéhova pwonmèt pou fè ban nou?

⁴ Kisa Jéhova pwonmèt pou fè ban nou? Ében Jéhova pwonmèt pou ban nou “lapé an [tjè nou] épi an [lidé nou]”. (Li Filipay 4:6, 7.) Wi, nou ka santi lapé sala paski nou ni on bon wilasyon épi Jéhova. “Lapé sala tèlman bon pyèsonn pa sa fini konpwann li.” Sa vlé di, i pli bèl pasé nou sa imajiné. Pou ègzanp, ès ou ja ouvè tjè’w an lapwiyè bay Jéhova, èk apwé ou té santi kam? Wi, wézon-an ou té santi kon sa, sé paski Jéhova té “ba’w lapé an tjèʼw épi an lidéʼw”.

5. Ki mannyè lapé Bondyé ka pwotéjé tjè nou épi lidé nou?

⁵ Filipay 4:7 (NWT) osi di, ‘lapé Bondyé kay pwotéjé tjè nou épi lidé nou’. An tan lontan, èspwèsyon-an ‘pwotéjé’ sété an èspwèsyon ki té ka dékwi sòlda ki té ka pwotéjé on vil èk tjenn li sòv hòd lèlmi. Alò, sé moun-lan ki té ka wèsté an vil-la té sa dòmi an lapé paski yo té sav sé sòlda-a té ka pwotéjé yo. An menm mannyè-a, lè lapé Bondyé ka pwotéjé tjè nou épi lidé nou, sa ka fè nou santi kam paski nou sav nou sòv. (Sam 4:8) Wi, menm kon Hanna, menm si sitiwasyon nou pa chanjé la menm, nou sa santi kam. (1 Sm 1:16-18) Èk lè nou ka santi kam i ka pli ézé pou nou sa katjilé byen èk fè bon disizyon.

6. Kisa nou sa fè pou twapé lapé-a Bondyé ka bay? (Gadé pòtwé-a osi.)

⁶ Kisa nou sipozé fè? Ében, menm kon moun adan on vil té kay kwiyé gad-la pou pwotèkté yo, nou osi sa mandé Jéhova pou édé ében pwotèkté nou. Konsa, ki mannyè nou sa fè sa? Ében, ou sa pwédyé jis tan Bondyé ba’w lapé an tjè’w èk an lidé’w. (Louk 11:9; 1 Tèsa. 5:17) Luis nou té palé konsèné pli bonnè-a, di mannyè i épi madanm li Ana té sa tjenbé fò lè yo apwann i té ni annèk déotwa mwa pou viv. Luis di: “Adan on mouman kon sa, i ka byen difisil pou fè disizyon konsèné santé’w, èk lòt bagay. Mé nou té sa ni lapé diwan tan difisil sala, sèlman paski nou té pwédyé.” Wi, Luis épi madanm li di, byen souvan yo té ka ouvè tjè yo an lapwiyè bay Jéhova, èk yo té mandé’y pou ba yo lapé an lidé yo, an tjè yo, èk lasajès-la pou fè bon disizyon. Èvèk yo santi èd Jéhova. Konsa, si ou ka aji épi on sitiwasyon ki téwib, ouvè tjè’w an lapwiyè bay Jéhova. Èk lè’w fè sa, lapé-a Jéhova ka bay, kay pwotéjé tjè’w épi lidé’w.—Ronm 12:12.

JÉHOVA KAY FÈ’W DOUBOUT FÒ

7. Ki diféwan imosyon nou sa ni lè nou ka èspéyansé on sitiwasyon ki difisil?

⁷ Pwoblenm-lan. Délè lè nou ka èspéyansé on sitiwasyon ki difisil, sa ka afèkté santiman nou, katjil nou, èk aksyon nou. Menm kon on mové tan sa pousé on batiman an tout diféwan diwèksyon asou lanmè-a, sé konsa nou ka ni tout diféwan kalté imosyon lè nou ka aji épi on sitiwasyon ki difisil. Pou ègzanp, Ana nou té palé konsèné pli bonnè-a di i santi plizyè diféwan imosyon apwé mawi’y mò. I di: “Délè mwen té ka santi andidan mwen vid, èk mwen té ka santi lapenn pou kò mwen. Osi mwen té ka santi faché Luis pa té la ankò.” An plis di sa, délè Ana té ka santi i té pa kò’y, èk délè i té ka ni tèt cho lè’y té ni pou fè disizyon mawi’y té ka fè. Osi, délè, i té ka santi i té adan on mové tan asou lanmè-a. Konsa, ki mannyè Jéhova ka édé nou lè tèt nou plen?

8. Silon Sam 16:8, ki asiwans Jéhova ka ban nou?

⁸ Kisa Jéhova pwonmèt pou fè ban nou? Ében, Jéhova ka ban nou asiwans-lan ki, i kay édé nou pou anyen pa jété nou atè. (Li Sam 16:8.) Bon. Lè la ni mové tan asou lanmè-a, batiman-an ka soukwé an chay. Mé plizyè batiman ni bagay anba yo ki sa tjenn yo fò asou lanmè-a. Konsa diwan on mové tan, van-an pa ka soukwé yo twòp. Èk moun ki asou batiman-an sa santi sòv èk konfòtab padan yo asou voyaj yo. Kanmenm, sé bagay-la ki ka édé batiman-an pou pa soukwé twòp ka twavay pli mèyè lè batiman-an ka alé douvan. An menm mannyè-a, lè nou kontiné sèvi Jéhova diwan tan ki difisil, i kay édé nou pou anyen pa jété nou atè.

9. Lè nou sèvi sé zouti-a nou ni pou fè wichach, ki mannyè sa sa édé nou pou ni lapé? (Gadé pòtwé-a osi.)

⁹ Kisa nou sipozé fè? Ében, lè’w ka débat épi plizyè diféwan imosyon, fè tout sa’w pé pou kontiné pwédyé, atandé mitin, èk pwéché. Kanmenm, pitèt ou pa kay sa fè tout sa ou té ka fè avan, mé chonjé, Jéhova pa vlé nou fè pli pasé nou sa fè. (Gadé Louk 21:1-4.) Osi, fè tan pou létid pèwsonnèl ou èk mèditasyon. Pouki wézon? Ében, sa sé paski, Jéhova ja ban nou bèl atik èk vidiyo ki sa édé nou pou anyen pa jété nou atè diwan tan ki difisil. b Monika nou té palé konsèné pli bonnè-a, di, kon’y té ka santi sé vyé imosyon-an ka lévé, i té ka alé an sé zouti-a nou ka sèvi pou fè wichach pou twapé konsèy. Pou ègzanp, i té ka fè wichach asou mo pawòl-la “waj”. Délè i té ka fè wichach asou mo pawòl-la “twayi” ében mo pawòl-la “fidèlité”. Èk apwé, i té ka li jis lè i santi pli mèyè. I di: “Lè mwen koumansé fè wichach, mwen té ka santi antjèt an chay. Mé, kon mwen té ka kontiné li, mwen santi akonmsi Jéhova té ka anbwasé mwen. Osi, kon mwen té ka li, mwen té ka wéyalizé Jéhova té ka konpwann mannyè mwen té ka santi, èk i té ka édé mwen.” Wi, lè’w twapé èd kon sa hòd Jéhova, sa sa osi édé’w pou tjenbé fò jis lè ou santi kam.—Sam 119:143, 144.

JÉHOVA KAY SIPÒTÉ’W

10. Ki mannyè nou pé santi apwé kéchòy téwib fèt an lavi nou?

¹⁰ Pwoblenm-lan. Apwé kéchòy téwib fèt an lavi nou, la pé ni jou nou ka santi fèb èk nou pa ni djèwté. Osi, délè nou pé santi menm kon yon moun ki té ka jwé spò, mé apwézan i blésé épi i ka bwété lè’y ka maché. Alò menm kon moun-lan ki blésé-a, la ni bagay ki té ézé pou nou fè avan, mé apwézan i difisil pou nou fè yo. Ében, pitèt nou pa ni dézi-a pou fè bagay ki té ka ban nou djèwté avan. Wi, menm kon Ilaydja nou pé santi i difisil pou lévé hòd kabann nou. Nou annèk vlé dòmi. (1 Wa 19:5-7) Alò, kisa Jéhova pwonmèt pou fè lè nou ka santi fèb?

11. An ki lòt mannyè Jéhova ka édé nou? (Sam 94:18)

¹¹ Kisa Jéhova pwonmèt pou fè ban nou? Ében Jéhova pwonmèt pou sipòté nou. (Li Sam 94:18.) Wi, menm kon yon moun ki té ka jwé spò èk ki blésé bouzwen sipò pou maché, nou bouzwen èd pou kontiné an sèvis nou pou Jéhova. Èk, sé an mouman kon sa Jéhova ka ban nou asiwans sala: ‘Mwen Jéhova, Bondyé’w-la, mwen ka tjenbé lanmen dwèt ou. Èk mwen sé moun-lan ki ka di’w, ‘Ou pa bizwen pè. Mwen kay édé’w’.’ (Izay. 41:13) Wi, Wa David té èspéyansé èd sala. Pou ègzanp, lè David té ka èspéyansé pwoblenm èk lèlmi’y té ka ataké’y, i di Jéhova: ‘Ou ka sipòté mwen épi lanmen dwèt ou.’ (Sam 18:35) Bon. Koumannyè Jéhova ka sipòté nou?

12. Ki moun Jéhova pé sèvi pou édé nou lè nou ka santi fèb?

¹² Souvan lè Jéhova ka sipòté nou, i ka pousé lézòt moun pou édé nou. Pou ègzanp, lè David té ka santi fèb, jan’y Jonatann vizité’y pou fòtifyé’y èk pou enkouwajé’y. (1 Sm 23:16, 17) Osi, Jéhova té sèvi Ilaycha pou édé Ilaydja. (1 Wa 19:16, 21; 2 Wa 2:2) Èk jòdi jou, Jéhova sa sèvi jan nou, fanmi nou, ében sé ansyen-an pou sipòté nou. Mé lè nou ka soufè épi imosyon nou, pitèt nou pa kay vlé moun oliwon nou. Nou annèk vlé wèsté pa kò nou. Wi, an chay moun ka santi kon sa. Alò, kisa nou sipozé fè pou twapé sipò Jéhova?

13. Kisa nou sipozé fè pou twapé bennéfis hòd èd-la Jéhova ka ban nou? (Gadé pòtwé-a osi.)

¹³ Kisa nou sipozé fè? Fè tout sa’w pé pou pa wèsté pa kò’w. Pouki nou ka di sa? Ében, sa sé paski, lè nou wèsté pa kò nou, nou kay sèlman katjilé asou kò nou épi sé pwoblenm-lan nou ka èspéyansé-a. Èk a kòz di sa, nou pa kay sa fè bon disizyon. (Pwov. 18:1) Wi sa vwé, lè kéchòy téwib fèt an lavi nou, délè nou bouzwen pasé tan pa kò nou. Mé, si nou sèlman vlé wèsté pa kò, nou ka wifizé èd hòd sé moun-lan Jéhova ka sèvi pou sipòté nou. Konsa, menm si i wèd pou ni moun oliwon’w diwan on tan ki difisil, aksèpté èd-la fanmi’w, jan’w èk sé ansyen-an ka ba’w. Wi, Jéhova ka sèvi yo pou sipòté’w.—Pwov. 17:17; Izay. 32:1, 2.

JÉHOVA KAY KONSOLÉ’W

14. Kisa ki sa fè nou pè?

¹⁴ Pwoblenm-lan. Délè nou ka èspéyansé sitiwasyon ki ka fè nou pè. Pou ègzanp, Bib-la ka di nou konsèné sèvant fidèl Jéhova an tan pasé ki té pè an chay èk ki té ka jis twanblé a kòz di lèlmi yo èk lòt pwoblenm. (Sam 18:4; 55:1, 5) An menm mannyè-a, nou pé santi pè a kòz di òpozisyon nou ka èspéyansé an lékòl, an twavay, hòd fanmi nou, ében hòd gouvèdman-an. Osi, pitèt nou ni on pwoblem épi santé nou, épi nou pè nou kay mò. Wi, diwan tan kon sa, menm kon on ti manmay, nou ka santi nou pa sav sa pou fè. Konsa, ki mannyè Jéhova ka édé nou an mouman kon sa?

15. Silon Sam 94:19, kisa Jéhova pwonmèt pou fè ban nou?

¹⁵ Kisa Jéhova pwonmèt pou fè ban nou? Ében Jéhova pwonmèt pou konsolé épi soulajé nou. (Li Sam 94:19.) Sam sala ka fè nou chonjé on tifi ki pè pou alé dòmi a kòz di on mové tan. Kanmenm papa tifi-a ka alé an chanm li èk anbwasé’y jis lè sonmèy pwan’y. Magwé mové tan-an p’òkò doubout, tifi-a ka santi sòv kon papa’y ka anbwasé’y. Wi, lè nou ka èspéyansé sitiwasyon ki difisil, nou bouzwen Papa nou ki an syèl pou anbwasé nou jis lè nou santi kam. Mé, kisa nou sipozé fè pou twapé soulajman hòd Jéhova?

16. Kisa nou sa fè pou Jéhova konsolé èk soulajé nou? (Gadé pòtwé-a osi.)

¹⁶ Kisa nou sipozé fè? Toujou pasé tan épi Jéhova. Ki mannyè nou sa fè sa? Ében, lè nou palé épi Jéhova an lapwiyè, èk lè nou li ében kouté Pawòl li, nou ka pasé tan épi Jéhova. (Sam 77:1, 12-14) Èk si’w ka toujou pasé tan épi Jéhova, lè’w ka èspéyansé on sitiwasyon ki difisil, ou kay mandé’y pou èd. Anfen, sa sé pwèmyé bagay-la ou kay fè. Wi, di Jéhova tout sa ki ka fè’w pè, èk sa ki ka fè’w antjèt. Èk toujou chonjé pou kouté’y lè’w fè tan pou li ében kouté Pawòl li, èk si’w fè sa, ou kay wè mannyè i ka konsolé’w. Osi, lè’w li sèten pòsyon an Bib-la, sa sa konsolé’w èk soulajé’w lè’w pè. (Sam 119:28) Pou ègzanp, ou sa twapé enkouwajman hòd liv Jòb, liv Samz, liv Pwovèb, èk an sa Jézi di an Mafyou chapit sis (6). Bon. Lè’w pwédyé bay Jéhova èk ou li ében kouté Pawòl li, Jéhova kay konsolé’w èk soulajé’w.

17. Ki asiwans nou sa ni?

¹⁷ Nou sa ni asiwans-lan ki, Jéhova kay toujou édé nou si kéchòy téwib fèt an lavi nou. Non. Nou pa kay janmen pa kò nou. (Sam 23:4; 94:14) Wi, Jéhova pwonmèt pou pwotéjé nou, pou édé nou pou anyen pa jété nou atè, pou sipòté nou, èk pou konsolé nou. Mi sé sa Izaya 26:3 di konsèné Jéhova: ‘Ou kay pwotéjé moun ki ka apiyé asou’w. Ou kay ba yo lapé ki pa kay doubout paski yo ka mété konfyans yo an ou.’ Konsa mété konfyans ou an Jéhova, èk fè tout sa’w pé pou twapé èd li. Èk si’w fè sa, ou kay twapé fòs diwan tan ki difisil.