1. Ki diféwan mò pawòl épi èkspwèsyon Bib-la ka sèvi pou dékwi Jéhova?

 ÈS ou janmen éséyé pou imajiné Jéhova? Lé’w ka palé épi’y an lapwiyè, kisa ki ka vini an lidé’w? Magwé nou pa sa wè Jéhova, Bib-la ka sèvi sèten mo pawòl épi èkspwèsyon pou dékwi Jéhova. Pou ègzanp, Sam 84:11 ka di, Jéhova sé “klèté” nou, èk i ka “pwotèkté” nou. Èvèk Hibrou 12:29 ka di, Bondyé “menm kon an difé ki ka détwi tout sa ki an chimenʼy.” Osi, pwofèt Izikèl té ni on vizyon, koté’y tè wè Bondyé. Èk mi sé konsa i dékwi Jéhova. I di, Jéhova té menm kon on métal ki ka kléwé. Twòn li té menm kon on wòch safaya. Èk tout oliwon Jéhova té ni on lakansyèl ki té byen bwiyan. (Izik. 1:26-28) Wi, Bib-la ka dékwi Jéhova adan an mannyè ki èstòdinè. Èvèk nou pé étonnen lè nou katjilé asou adan sé èkspwèsyon-an Bib-la ka sèvi pou dékwi Jéhova. Anfen, nou pé tèlman étonnen, nou pé jis santi akwèdi nou pa vo anyen.

2. Ki diféwan bagay ki sa fè’y difisil pou adan di nou vansé pwé Jéhova?

² Bon, la ni sèten sitiwasyon ki sa anpéché nou vansé pwé Jéhova. Pou ègzanp, kon nou pa sa wè’y nou pé twapé’y difisil pou kwè i enmen nou. Adan di nou ja èspéyansé an chay mové bagay an lavi nou, èvèk pou lapéti sa nou ka kwè Jéhova pa sa janmen enmen nou. Osi, pitèt nou pa té ni on papa ki té enmen nou, konsa i wèd pou nou wè Jéhova kon an Papa ki enmen nou. Tout sé bagay sala sa fè’y difisil pou nou vansé pwé Jéhova, paski si nou pa ka kwè Jéhova vwéman enmen nou, nou pa kay vlé vansé pwé’y. Jéhova konnèt tout sa. I ka konpwann mannyè nou ka santi, èk i enmen nou an chay. Konsa an Bib-la, i ka di nou ki moun i vwéman yè. Sé akwèdi Jéhova ka sèvi Bib-la pou entwodwi kò’y, èk moutwé nou sé bèl kawaktè-a i ni-an tèl kon, lanmityé épi konpasyon.

3. Pouki nou sipozé apwann pli konsèné lanmityé-a Jéhova ni-an?

³ Mò pawòl-la ki ka dékwi Jéhova pli byen sé lanmityé. Anfen, Bib-la ka di nou, “lanmityé sé kawaktè Bondyé.” (1 Jan 4:8) Sa vlé di, sé lanmityé ki ka pousé Jéhova pou fè tout sa’y ka fè. Wi, Jéhova ni an chay lanmityé. Èvèk lanmityé-a i ni-an si tèlman fò, i ka jis moutwé moun ki pa enmen’y lanmityé. (Maf. 5:44, 45) An atik sala, nou kay apwann pli konsèné Jéhova épi lanmityé-a i ni-an. Èvèk i byen enpòtan pou nou fè sa, paski pli nou apwann konsèné Jéhova, sé pli nou kay enmen’y.

JÉHOVA ENMEN NOU AN CHAY

4. Ki ègzanp Bib-la ka sèvi pou édé nou konpwann konpasyon-an Jéhova ni pou nou? (Gadé pòtwé-a osi.)

⁴ Imajiné on manman kon’y ka otjipé ti manmay li. I ni ti manmay-la asou tjwis li, èvèk i ka palé bay ti manmay-la adan an ti vwa ki kam épi dous. Lè ti manmay-la ka pléwé, manman-an ka konfòté’y èk i ka fè asiwé ti manmay-la ni sa’y bizwen. Manman-an ka fè tout sa paski i enmen ich li, èk i ni konpasyon pou li. Ében Bib-la ka di nou, Jéhova ni an chay “konpasyon.” (Jémz 5:11) Osi, Jéhova ka konpawé kò’y épi on manman ki ka moutwé ich li lanmityé épi jantiyès. (Izay. 66:12, 13) Wi, menm kon an manman ka moutwé lanmityé èk konpasyon pou ich li èk i ka otjipé’y byen, sé konsa Jéhova ka gadé apwé nou. Konsa lè nou ni tèt cho ében nou ka èspéyansé pwoblenm, nou sa asiwé Jéhova kay édé nou paski i enmen nou an chay, èk i ni konpasyon pou nou. Sé menm kon Samis-la té di: ‘Lè nou akablé épi twaka, Jéhova ka konsolé nou èk i ka soulajé nou.’​—Sam 94:19.

5. Ki kalité lanmityé Jéhova ni pou nou, èk ki asiwans sa ka ban nou?

⁵ Jéhova plen lanmityé. (Sam 103:8) Mé, i ni on lanmityé spésyal pou sèvant li. Kalité lanmityé-a i ni pou sèvant li sé lanmityé fidèl. Pou lapéti sa, Jéhova pa ka doubout enmen nou lè nou fè an bagay ki pa bon. Annou pwan ègzanp nasyon Izwayèl. Kantité fwa yo péché kont Jéhova épi blésé tjè’y! Mé, lè yo chanjé épi yo wépanti, Jéhova ba yo asiwans-lan ki, i té enmen yo toujou. Pou ègzanp, i di yo: “Ou vini ni an chay valè an zyé mwen. Ou enpòtan pou mwen, èk mwen enmen’w.” (Izay. 43:4, 5) Jéhova ni menm kalité lanmityé sala pou nou jòdi. Èk nou sa dépan asou sa. Menm si nou fè lèwè ki byen gwav, Jéhova pa ka abandonnen nou. Lè nou wépanti èk nou viwé jwenn li, nou kay wéyalizé i enmen nou toujou. Jéhova pwonmèt, i ‘kay pawdonnen nou konplètman.’ (Izay. 55:7) Èk lè Jéhova pawdonnen nou, nou ka santi léjè. Nou ka santi akwèdi Jéhova ka soulajé tjè nou, paski kon Bib-la di, lè Jéhova pawdonnen nou, i ka “wéfwéchi” nou.​—Twav. 3:19 NWT.

6. Kisa nou apwann konsèné Jéhova an Zèkaraya 2:8?

⁶ Li Zèkaraya 2:8. Zyé nou sé an bagay ki byen sansib, èk byen valowab pou nou. Konsa lè Jéhova konpawé nou épi koko zyé’y, sé konmsi i ka di: ‘Népòt moun ki fè zòt, pèp mwen ditò, ka blésé sa ki byen valowab pou mwen.’ Wi, Jéhova enmen nou an chay, konsa i ka toujou konpwann mannyè nou ka santi, èk i vwéman vlé pwotèkté nou. Lè Jéhova wè nou an lapenn ében nou twis, i menm ka santi twis. Konsa, nou sa asiwé Jéhova kay wéponn lapwiyè nou, lè nou fè kon Samis-la èk mandé’y pou, ‘pwotéjé [nou] menm kon koko zyé’y.’ (Sam 17:8)

7. Pouki nou bizwen fòtifyé konfyans nou ki, Jéhova enmen nou?

⁷ Jéhova vlé chak di nou ni asiwans-lan ki, i enmen nou. Mé i sav, sèten bagay nou ja èspéyansé, èben sèten sitiwasyon nou ka èspéyansé apwézan, sa fè’y wèd pou nou kwè i vwéman enmen nou. Konsa kisa ki kay fòtifyé konfyans nou ki, Jéhova enmen nou? Ében i bon pou nou konsidiwé mannyè Jéhova ka moutwé i enmen Jézi, sé moun-lan ki annonté-a, èk nou tout.

MANNYÈ JÉHOVA KA MOUTWÉ I ENMEN NOU

8. Pouki Jézi té asiwé Papa’y té enmen’y?

⁸ La pa ni pyèsonn an inivès-la ki sa ni on wilasyon ki diwé pou pli tan pasé wilasyon-an Jéhova épi Gason’y Jézi ni. Sa sé paski, pou plizyè syèk lanné, yo té ansanm an syèl. Diwan tout tan sala yo vini byen pwé, èk yo dévlopé lanmityé ki byen fò pou yonn a lòt. Èvèk Jéhova pa fè kòlonng pou moutwé mizi enmen i enmen Jézi. Pou ègzanp, an Mafyou 17:5, Jéhova té sa senpliman di: ‘Sala sé yonn-lan ki ni favè mwen.’ Mé, pito sa, i kwiyé Jézi, “Gason mwen.” Èk i di ankò, “Pa dé enmen mwen enmen’y.” Wi, Jéhova té vlé tout moun konnèt, i enmen Gason’y Jézi, épi i té byen plè épi’y, èspwèsman kon Jézi té kay bay lavi’y pou sové lézòm. (Èfés. 1:7) Lanmityé-a Jéhova ni pou Jézi tèlman wéyal, Jézi pa té ni pyès dout ki, Papa’y té enmen’y. Anfen, plizyè fwa an lévanjil-la, Jézi sèvi èkspwèsyon ki ka moutwé, i té asiwé Papa’y enmen’y.​—Jan 3:35; 10:17; 17:24.

9. An Ronm 5:5 kisa ki ka édé nou konpwann mizi enmen Jéhova enmen sé moun-lan ki annonté -a? (Èspliké wépons ou.)

⁹ Jéhova ka osi moutwé lanmityé-a i ni pou sé fwè èk sè-a ki annonté-a. (Li Ronm 5:5.) Òbzòvé èkspwèsyon-an, “mizi lanmityé Bondyé ni pou nou,” an Ronm 5:5. An langaj-la yo té ékwi vèwsé sala pwèmyé fwa-a, i ka moutwé, lanmityé-a Jéhova ni pou sé moun-lan ki annonté-a si tèlman fò, i menm kon an lawivyè dlo. Mi an bèl èkspwèsyon ki ka édé nou konpwann mizi enmen Jéhova enmen sé fwè èk sè sala! Èvèk yo sav Jéhova enmen yo. Kon lévanjil-la an Joud 1 di: “Yo ka viv an lanmityé li menm Papa-a.” Èk Zapòt Jan ka fè nou konnèt mannyè yo ka santi konsèné lanmityé-a Bondyé ni pou yo, lè’y di: “Gadé kalité lanmityé-a Papa-a ja ban nou-an. Anfen, i ka kwiyé nou ich li.” (1 Jan 3:1) Mé, ès sa vlé di, sé sèlman sé moun-lan ki annonté-a Jéhova enmen? Mé non! Jéhova ja moutwé i enmen nou tout.

10. Kisa ki pli gwo bagay-la Jéhova fè pou moutwé i enmen’w?

¹⁰ Pli gwo bagay-la Jéhova fè pou moutwé i enmen nou sé wanson-an. Lè Jéhova ban nou wanson-an, i moutwé la pa ni pyèsonn an inivès-la ki ni pli lanmityé pasé li! (Jan 3:16; Ronm 5:8) Djòs katjilé asou sa, Jéhova ban nou Gason spésyal li-a, yonn-lan i té ka chéwi pli-a. Èvèk i kité gason sala mò pou tout moun. Konsa nou sa jwenn pawdonnasyon pou péché nou, èk nou sa fè jan épi Bondyé. (1 Jan 4:10) Pli nou katjilé asou pwi-a Jéhova épi Jézi péyé pou ban nou wanson-an, sé pli nou kay konpwann kantité lanmityé yo ni pou chak di nou. (Gal. 2:20) Èvèk Jéhova pa té péyé wanson-an senpliman paski jistis-li té ka mandé’y pou fè sa. Non, wanson-an sé yon kado ki ka moutwé lanmityé Jéhova pou nou. Wi, lè Jéhova kité Jézi, Gason spésyal li-a soufè èk mò ban nou, i ban nou pwèv ki, i enmen nou an chay.

11. Kisa nou apwann an Jérémaya 31:3?

¹¹ Kon nou ja wè, Jéhova pa ka djòs santi lanmityé pou nou, i osi ka fè nou konnèt mizi enmen i enmen nou. (Li Jérémaya 31:3.) Pou ègzanp, Jéhova édé nou pou vini pwé’y paski i enmen nou. (Gadé Ditonronnonmi 7:7, 8.) Èk la pa ni anyen ében pyèsonn ki sa tiwé nou an lanmityé-a Jéhova ni pou nou. (Ronm 8:38, 39) Konsa, lè’w katjilé asou lanmityé-a Jéhova ni pou ou, ki mannyè ou ka santi? David té sa wè a klè, mannyè Jéhova té enmen’y èk mannyè i té ka otjipé’y. Sé li ki ékwi Sam 23. Li Sam sala pou’w wè konfyans-lan David té ni an Jéhova, èk pitèt sa kay édé’w pou ni menm konfyans-lan.

LÈ’W CHONJÉ JÉHOVA ENMEN’W KI MANNYÈ OU KA SANTI?

12. An yonndé mo pawòl, èspliké sa Sam 23 ka di.

¹² Li Sam 23:1-6. Sam 23 sé yon chanson David té ékwi pou moutwé i té asiwé Jéhova té enmen’y, èk i té kay toujou otjipé’y. I palé konsèné mannyè li épi Bondyé té ni on bon wilasyon. I jis kwiyé Jéhova Bèwjé’y. Èvèk i pa té pè pou kité Jéhova djidé’y. Anfen, i té ka dépan asou Jéhova konplètman. David té ni konfyans ki, i té kay enjwi lanmityé-a Jéhova ni pou li touléjou. Mé kisa ki bay David konfyans sala?

13. Pouki David té asiwé Jéhova té kay toujou otjipé’y?

¹³ “Mwen pa ka mantjé anyen.” David té ka santi i té ni bon otjipasyon paski Jéhova té ka toujou ba’y sa’y té bizwen. Osi, David té sav Jéhova sété jan’y èk i té byen plè épi’y. Sé sa ki fè i té asiwé, népòt sa’y té èspéyansé an tan pou vini, Jéhova té kay kontiné ba’y tout sa’y té bizwen. Wi, David pa té ni pyès dout ki, Jéhova té enmen’y èk i té kay toujou otjipé’y. Konsa, pito i kité sé pwoblenm-lan i té ka èspéyansé-a twakasé lidé’y èk fè’y vini antjèt, i té ni lakontantman èk i té byen satisfè épi sa’y té ni.​—Sam 16:11.

14. Ki mannyè Jéhova pé moutwé lanmityé pou nou?

¹⁴ Jéhova ka otjipé nou épi lanmityé, èspwèsman lè nou ka èspéyansé pwoblenm an lavi nou. Annou pwan ègzanp yon sè yo ka kwiyé Claire. a Sè sala ka wann sèvis an Bèfèl pou pli pasé ven (20) lanné, èk i pa té sav kisa pou fè paski fanmi’y té ka èspéyansé yon pwoblenm sèwyé apwé on lòt. Pou ègzanp, papa’y èspéyansé on mové strok. On sésé’y twapé kò’y èskonminiké. Èk bagay té tèlman wèd épi fanmi-an, yo pèd on ti biznis yo té ni, èvèk yo pèd kay yo osi. Ki mannyè Jéhova otjipé yo èk moutwé i enmen yo? Mi sé sa sè Claire di: “Jéhova fè asiwé fanmi mwen té toujou ni sa yo té bizwen chak jou. Plizyè fwa, Jéhova ba yo pli pasé mwen té sa janmen imajiné. Byen souvan, mwen ka katjilé sé diféwan lokasyon-an lè mwen èspéyansé lanmityé Jéhova, èk sa ka édé mwen pou kontiné tjébé fò lè mwen ka èspéyansé difikilté.”

15. Kisa ki édé David pou jwenn fòs ankò? (Gadé pòtwé-a osi.)

¹⁵ “I ka viwé ban mwen kouway nèf.”  David té ka èspéyansé an chay pwoblenm épi difikilté. Sé sa ki fè délè i té twakasé. (Sam 18:4-6) Mé, Jéhova té ka moutwé David tèlman lanmityé, èk i té ka otjipé’y byen, konsa sa édé David pou ni fòs ankò. Anfen, i té ka santi akwèdi Jéhova té ka mennen’y “pozé koté zèb-la pli bèl,” èk i té ka mennen’y “bwè koté dlo-a pli dous.” Sé sa ki fòtifyé David, èk édé’y pou kontiné sèvi Jéhova épi djèwté.​—Sam 18:28-32.

16. Ki mannyè lanmityé Jéhova ka ba’w fòs?

¹⁶ Jòdi jou osi, sé sèlman ‘paski Jéhova ni lanmityé fidèl pou nou, ki fè nou pa ka fini nèt,’ lè nou ka èspéyansé pwoblenm épi difikilté an lavi nou. (Lama. 3:22; Kòl. 1:11) Annou pwan ègzanp on sè yo ka kwiyé Rachel. Diwan panndèmik COVID-19-lan, mawi’y kité ni li ni Jéhova, èk sa kasé tjè’y. Kisa Jéhova fè pou édé’y? Mi sé sa sè-a di: “Jéhova sèvi an chay bon jan pou moutwé mwen lanmityé. Sé jan sala té ka pasé tan épi mwen, yo té ka pòté manjé ban mwen, yo té ka voyé bèl ti mèsaj épi lévanjil pou ankouwajé mwen, yo té ka souwi ban mwen, èk yo té ka fè mwen chonjé, Jéhova té ka kontiné otjipé mwen. Jéhova ban mwen an gwo fanmi ki enmen mwen, èk mwen ka toujou wimèsyé’y pou sa.”

17. Pou ki wézon David pa té “pè anyen ki mové”?

¹⁷ “Mwen pa kay pè anyen ki mové, paski ou la épi mwen.” David té ni an chay mové lèlmi, èk souvan lavi’y té an danjé. Kanmenm, kon’y té sav Jéhova té enmen’y, i té ka santi sòv paski i té sav Jéhova té kay pwotéjé’y. David té sa wè a klè Jéhova té la épi’y an tout sitiwasyon i té ka èspéyansé, èvèk sa ba’y kouwaj. Alò, an yon chanson i di: “[Jéhova] délivwé mwen anba tout sa ki té ka fè mwen pè.” (Sam 34:4) Wi, délè David té byen pè, mé i té sa ganyen a bout pèwèz li paski i té sav, Jéhova té enmen’y.

18. Lè’w asiwé Jéhova enmen’w, ki mannyè sa ka fòtifyé’w lè’w pè?

¹⁸ Lè’w ka èspéyansé on sitiwasyon ki ka fè’w pè, èvèk ou asiwé Jéhova enmen’w, ki mannyè sa ka édé’w? Ében annou pwan ègzanp on sè yo ka kwiyé Susi. Sè sala ka wann sèvis kon yon piyonnè, èk i èspliké mannyè i épi mawi’y té ka santi lè gason yo pwan lavi’y. I di: “Lè an mové bagay kon sa fèt an lavi’w, i ka fè’w santi akwèdi dé bwa’w kasé. Èvèk ou ka pè, paski ou ka kwè lòt mové bagay kay wivé’w. Mé lanmityé-a Jéhova ni pou nou ka fè nou santi sòv, paski nou sav Jéhova kay pwotéjé nou.” Osi, Rachel, sè-a nou té mansyonnen pli bonnè-a di: “Yon swè, mwen té tèlman twis tjè mwen té ka kasé. Mwen té byen antjèt èk mwen té pè toubonnman. Mwen pléwé fò kon mwen té ka kwiyé asou Jéhova. Èvèk la menm, mwen santi Jéhova soulajé tjè mwen, èk i kalmé mwen menm kon an manman ka kalmé ti bébé’y. Èk sonmèy pòté mwen alé. Sa sé on bagay mwen pa kay janmen oblijé.” Apwézan, annou pwan ègzanp on fwè yo ka kwiyé Tasos. Fwè sala ka wann sèvis kon yon ansyen, èk i pasé kat (4) lanné an pwizon paski i wifizé antwé an lawmé-a. Ki mannyè Jéhova té otjipé’y èk moutwé’y lanmityé? Mi sé sa i di: “Jéhova ban mwen tout sa mwen té bizwen, èk i jis ban mwen pli. Mwen té ja ni konfyans an Jéhova, mé èspéyans sala fè mwen pli asiwé mwen sa mété tout konfyans mwen an Jéhova. Osi, gwanmèsi lisentèspwi Jéhova, mwen té sa ni tjè kontan magwé mwen té andan an sitiwasyon ki ka fè moun pèd èspwa. Sa édé mwen pou wè, pli mwen konfyé an Jéhova sé pli mwen kay santi lanmityé’y pou mwen. Konsa, mwen koumansé wann sèvis kon yon piyonnè wéglé paditan mwen té an pwizon.”

VANSÉ PLI PWÉ BONDYÉ NOU-AN KI PLEN KONPASYON

19. (a) Si nou asiwé Jéhova enmen nou, kisa nou kay di’y an lapwiyè? (b) Apanmi sé vèwsé-a ki ka palé konsèné lanmityé Jéhova, kilès ki ka touché tjè’w pli? (Osi, gadé enfòmasyon-an anba sijé-a: “ Déotwa Vèwsé Ki Ka Édé Nou Santi Lanmityé-a Épi Konpasyon-an Jéhova Ni Pou Nou.”)

¹⁹ Tout sé èspéyans-lan nou diskité an atik sala ka ban nou pwèv ki, Jéhova, “Bondyé-a ki ni tout lanmityé,” la épi nou! (2 Kòr. 13:11) I antéwésé an chak di nou, èvèk nou asiwé i kay “toujou pwotèkté” nou paski i ni lanmityé fidèl pou nou. (Sam 32:10) Pli nou mèdité asou sé diféwan mannyè-a Jéhova ja moutwé nou lanmityé, sé pli nou kay wè mizi enmen i enmen nou, èk sé pli nou kay vini bon jan épi’y. Nou pa pè pou palé épi’y an lapwiyè èk di’y mannyè nou bizwen lanmityé’y. Èvèk nou sa di’y tout bagay ki ka fè nou antjèt paski nou asiwé i ka konpwann nou èk, i vwéman vlé édé nou.​—Sam 145:18, 19.

20. Pouki lanmityé Jéhova ka fè nou anvi vansé pli pwé’y?

²⁰ Menm mannyè chalè on bon difé ka chofè nou lè tan-an fwèt, sé konsa lanmityé Jéhova ka konsolé nou èk i ka fè nou anvi vansé pwé’y. Èk magwé lanmityé Jéhova ni an pil fòs, i osi ni konpasyon adan’y. Alò, kité Jéhova moutwé’w mizi lanmityé èk konpasyon i ni pou ou. Lè sala, chak di nou kay sa di épi tout tjè nou: “Mwen enmen Jéhova”!​—Sam 116:1.