1. Kisa ki ka édé pèp Jéhova pou kontiné adowé’y magwé yo ka èspéyansé an chay pwoblenm?

 BIB-LA di, nou ka viv adan an tan ki byen difisil. (2 Tim. 3:1) Èk apa di sé pwoblenm-lan tout moun an vyé sistèm Satan ka débat épi, Témwen Jéhova ka osi èspéyansé pèsikasyon paski yo ka sèvi Jéhova. Mé, kisa ki ka édé nou pou kontiné adowé Jéhova magwé tout sé difikilté sala? Ében yon bagay ki ka édé nou sé sa: Nou vin konnèt Jéhova kon an “Bondyé ki vivan”.—Jér. 10:10; 2 Tim. 1:12.

2. Kisa nou konnèt konsèné Jéhova ki sa édé nou pou tjenbé fò?

² Jéhova sé an moun ki wéyèl. I konnèt tout sé difikilté-a nou ka èspéyansé èk i toujou pawé pou édé nou. (2 Kw. 16:9; Sam 23:4) Wi, lè nou chonjé Jéhova sé an Dyé ki vwéman vivan, sa ka édé nou pou aji épi népòt difikilté nou pé èspéyansé. Konsa, annou wè mannyè sa té vwé an lavi Wa David.

3. Lè David di ‘Jéhova vivan’, kisa i té vlé di?

³ David té konnèt Jéhova èk i té ka apiyé asou’y. Pou ègzanp, lè Wa Sòl èk lézòt moun té ka éséyé pou tjwé David, David pwédyé bay Jéhova pou édé’y. (Sam 18:6) Èk apwé Bondyé wéponn lapwiyè’y èk sové’y, i di: ‘Jéhova vivan!’ (Sam 18:46) Bon, kisa pawòl David vlé di? Ében David pa té ka annèk di Bondyé ka ègzisté. Anfen, yon liv yo ékwi asou liv Samz ka di: Lè David di pawòl sala, i té ka moutwé konfyans li an Jéhova “kon Dyé vivan-an ki té ka toujou sipòté pèp li.” Wi, David té konnèt hòd èspéyans li menm Bondyé té konnèt tout sa i té ka èspéyansé, èk i té pawé pou édé’y. Èk sa bay David an chay ankouwajman pou kontiné sèvi Jéhova èk pou glowifyé’y.​—Sam 18:28, 29, 49.

4. Ki bennéfis nou ka twapé lè nou chonjé Jéhova sé Dyé vivan-an?

⁴ Lè nou chonjé Jéhova sé Bondyé-a ki ka viv-la ki toujou pawé pou édé nou, sa ka édé nou pou sèvi Jéhova épi tout tjè nou. Sa ka ban nou fòs-la pou tjenbé fò anba difikilté, èk i ka pousé nou pou kontiné fè tout sa nou pé an sèvis li. Èk an plis di sa, sa ka fòtifyé détèminasyon nou pou wèsté pwé Jéhova.

DYÉ VIVAN-AN KAY FÒTIFYÉ’W

5. Kisa ki kay ban nou konfyans lè nou ka èspéyansé pwoblenm? (Filipay 4:13 NWT)

⁵ Si nou chonjé Jéhova vivan, sa kay édé nou pou tjenbé fò anba népòt difikilté. Wi, la pa ni pyès pwoblenm ki twò difisil pou Jéhova paski i sé Dyé Toupisan-an. Konsa i sa ban nou kouway-la nou bizwen pou tjenbé fò. (Li Filipay 4:13. NWT) Alò, nou ni bon wézon pou ni konfyans lè nou ka èspéyansé difikilté. Èk lè nou wè mannyè Jéhova ka sipòté nou lè nou anba ti difikilté, sa ka ban nou pli konfyans i kay sipòté nou lè nou anba gwo difikilté.

6. Ki èspéyans David té ni lè i té jenn ki fòtifyé konfyans li an Jéhova?

⁶ Annou konsidiwé dé (2) bagay ki té wivé David lè i té jenn ki fòtifyé konfyans li an Jéhova. Lè David té an jenn bèwjé, yon liyon té pwan yonn an sé mouton papa’y-la. Èvèk asou an lòt lokazyon, yon bè té fè menm bagay-la. Mé David moutwé an chay kouwaj paski i kouwi dèyè bè-a èk liyon-an èk i sové sé mouton-an. Mé David pa té janmen katjilé i té fè sa pa kò’y, paski i té sav sété Jéhova ki té wédé’y. (1 Sm 17:34-37) Èk David pa té janmen obliyé sé èspéyans sala. Anfen, paski i té mèdité asou yo, sa ba’y pli konfyans Bondyé-a ki ka viv-la té kay toujou la épi’y pou fòtifyé’y.

7. Lè David té ni pou goumen épi Golayèf, kisa i té fiksé asou èk ki mannyè sa té wédé’y?

⁷ Pli ta, avan David té ni ven (20) lanné, i vizité kanp lawmé Izwayèl. Mé lè i wivé la, sé sòlda Izwayèl-la té si tèlman pè pou lapéti yon sòlda Filistin yo ka kwiyé Golayèf. Nonm sala té ni an chay hòtè èk an chay gwòsè, èk i té ka ‘pwan lawmé Izwayèl sèvi wizib.’ (1 Sm 17:10, 11) Sé sòlda-a té pè paski yo té ka fiksé asou gwòsè Golayèf èk asou sa i té ka di yo. (1 Sm 17:24, 25) Mé David té ka fiksé asou an lòt bagay. Wi, David té sav Golayèf pa té ka sèlman pwan lawmé Izwayèl sèvi wizib. Mé, i té ka ensilté ‘lawmé Bondyé vivan-an’. (1 Sm 17:26) Wi, David té ka fiksé asou Jéhova. Èk i té ni konfyans-lan ki Jéhova té kay édé’y an sitiwasyon sala, menm kon i té édé’y sové sé mouton papa’y-la lè i té an bèwjé. Èk épi konfyans sala David goumen épi Golayèf, èk Jéhova wédé’y ganyen!​—1 Sm 17:45-51.

8. Kisa nou sa fè pou fòtifyé konfyans nou ki, Jéhova kay édé nou lè nou ka èspéyansé difikilté? (Gadé pòtwé-a osi.)

⁸ Menm kon David, nou osi sa tjenbé fò anba difikilté si nou ni konfyans-lan ki, Jéhova, Dyé vivan-an, toujou pawé pou édé nou. (Sam 118:6) Bon, yon mannyè nou sa bati konfyans nou an Jéhova, sé lè nou konsidiwé sé bagay-la i ja fè an tan pasé. Wi, ou sa li diféwan wakont an Bib-la ki kay fè’w chonjé mannyè Jéhova sové pèp li. (Izay. 37:17, 33-37) Osi, fè tan pou kouté ében gadé sé wapò-a asou wèbsayt-la jw.org, ki ka moutwé a klè mannyè Jéhova ka sipòté sé fwè èk sè nou-an jòdi. An plis di sa, éséyé pou chonjé mannyè Jéhova ha édé’w. Ou pé santi Jéhova pa janmen fè an bagay èstòdinè pou ou kon i té fè pou David. Mé lavéwité-a sé sa, Jéhova ja fè an chay bagay an lavi’w. Pou ègzanp, Jéhova édé’w pou vini jan’y. (Jan 6:44) Èk wézon-an ou ka kontiné sèvi’y sé paski Jéhova ka édé’w pou fè sa. Alò, mandé Jéhova pou édé’w chonjé sé lè-a i wéponn lapwiyè’w, sé lè-a i ba’w ègzaktiman sa’w té bizwen a lè-a ou té bizwen’y, èk sé lè-a i té byen otjipé’w lè ou té ka èspéyansé an mové sitiwasyon. Wi, si’w wéfléchi asou sé èspéyans sala, sa kay fòtifyé konfyans ou ki, Jéhova kay toujou la pou ba’w sipò-a ou bizwen.

9. Lè nou ka èspéyansé difikilté, kisa nou ni pou chonjé? (Pwovèb 27:11)

⁹ Si Jéhova sé an moun ki wéyèl pou nou, sa kay édé nou pou fiksé asou sa ki pli enpòtan lè nou ka èspéyansé difikilté. Poutji nou ka di sa? Ében chonjé, Satan di lè nou ka èspéyansé difikilté nou kay tounen do nou asou Jéhova. (Jòb 1:10, 11; li Pwovèb 27:11.) Alò, sa nou fè lè nou anba difikilté ka afèkté mannyè Jéhova ka santi. Wi, lè nou tjenbé fò anba difikilté nou ka moutwé Jéhova ki otan nou enmen’y, èk nou ka osi moutwé Satan sé an vyé mantè. Konsa, ki difikilté ou ka èspéyansé apwézan? Ès ou anba òpozisyon hòd gouvèdman? Ès ou ka èspéyansé pwoblenm lajan? Ès moun an tèwitwa’w pa antéwésé an bon nouvèl-la? Népòt sa ou ka èspéyansé, toujou chonjé, sitiwasyon’w ka ba’w an bèl òpòtyounité pou fè tjè Jéhova kontan. Èk pa janmen obliyé, Jéhova “pa kay kitéʼw pasé anba pyès tantasyon ki kay twò fò paséʼw.” (1 Kòr. 10:13) Wi, i kay ba’w fòs-la ou bizwen pou’w sa tjenbé fò.

BONDYÉ-A KI KA VIV-LA KAY WÉKONPANSÉ’W

10. Kisa Bondyé-a ki ka viv-la kay fè ba moun ki ka adowé’y?

¹⁰ Jéhova ka bay bon bagay pou tout moun ki ka adowé’y. (Hib. 11:6) Pou ègzanp, i ka ban nou lapé èk lakontantman apwézan, èk an tan pou vini i kay ban nou lavi étonnèl. Wi, nou sa mété tout konfyans nou an Jéhova paski nou asiwé i ni dézi-a èk pouvwa-a pou wékonpansé nou. Èk paski nou ni asiwans sala, sa ka pousé nou pou adowé’y épi tout tjè nou, menm kon sé sèvant fidèl li-a té fè an tan pasé. Anfen, annou gadé ègzanp yonn an sé sèvant fidèl sala ki té ka viv an pwèmyé syèk-la. Non’y sé Timòfi.​—Hib. 6:10-12.

11. Pouki Timòfi té twavay wèd an kongwigasyon-an? (1 Timòfi 4:10)

¹¹ Li 1 Timòfi 4:10. Wi, Timòfi mété èspwa’y an Bondyé-a ki ka viv-la. Alò sa sé wézon-an i té twavay wèd pou Jéhova, èk pou sé fwè’y èk sè’y-la. Mé, an ki mannyè i té fè sa? Ében, i swiv konsèy-la zapòt Pòl té ba li pou vini an pli mèyè titja ni an minis-lan ni an kongwigasyon-an. Timòfi osi swiv konsèy zapòt Pòl pou vini an bon ègzanp pou sé fwè èk sè-a, ni sa ki jenn ni sa ki an laj. Apa di sa, i twavay wèd pou fè ansayman ki té difisil an kongwigasyon-an. Pou ègzanp, délè i té ni pou bay sé fwè-a konsèy ki té fò, mé i toujou fè sa épi lanmityé. (1 Tim. 4:11-16; 2 Tim. 4:1-5) Wi, menm si lézòt pa té konnèt ében yo pa té ka apwésyé tout sa Timòfi té ka fè, i té ka twavay wèd épi tjè kontan paski i té asiwé Jéhova té kay wékonpansé’y.​—Ronm 2:6, 7.

12. Pouki sé ansyen-an ka kontiné pou twavay wèd an kongwigasyon-an? (Gadé pòtwé-a osi.)

¹² Jòdi, sé ansyen-an ka twavay wèd menm kon Timòfi. Èk yo sa ni konfyans-lan ki, Jéhova ka wè èk i ka apwésyé tout sa yo ka fè an kongwigasyon-an. Pou ègzanp, sé ansyen-an ni pou gadé apwé sé fwè èk sè-a, yo ni pou enstwi an kongwigasyon-an, èk yo osi ni pou pwéché bon nouvèl-la. Mé an plis di sa, an chay an sé ansyen-an ka twavay asou pwojé konstwiksyon ében yo ka twavay épi Dépatman-an Pou Pòté Soukou. La ni lòt ansyen ki ka twavay épi Gwoup Ki Ka Vizité Lé Malad ében Konmité-a Pou Konminiké Épi Lopital-la. Sé ansyen-an ka fè tout twavay sala paski yo sav kongwigasyon-an sé sa Jéhova. Konsa, yo ka twavay wèd an kongwigasyon-an épi tout tjè yo, èk yo asiwé Jéhova kay wékonpansé yo pou tout sa yo ka fè.​—Kòl. 3:23, 24.

13. Ki mannyè Jéhova ka santi konsèné tout sa nou ka fè an sèvis li?

¹³ Nou tout pa sa vini ansyen. Mé nou tout sa sèvi Jéhova épi tout tjè nou. Pou ègzanp, Jéhova ka ni tjè kontan lè i wè nou ka fè kontwibyousyon pou sipòté twavay-la ki ka fèt owon latè-a menm si kontwibyousyon nou piti. Osi, i ka bay Jéhova an chay plézi lè i wè nou lévé lanmen nou pou bay wépons an sé mitin-lan menm si nou koutja. Èk i ka ba Jéhova plézi lè nou pawdonnen moun ki ofwansé nou. Bon, menm si ou pé santi ou pa sa fè tout sa ou vlé fè bay Jéhova, ou sa ni konfyans-lan ki, Jéhova ka apwésyé tout sa ou ka fè. Wi, Jéhova vwéman enmen’w pou tout sa ou ka fè ba li, èk i kay wékonpansé’w.​—Louk 21:1-4.

ANNOU WÈSTÉ PWÉ BONDYÉ-A KI KA VIV-LA

14. Lè nou wèsté pwé Jéhova, ki mannyè sa kay édé nou wèsté fidèl? (Gadé pòtwé-a osi.)

¹⁴ Si nou wèsté pwé Jéhova, sa kay édé nou pou wèsté fidèl pou li. Annou gadé ègzanp Jozèf. Bondyé té wéyèl pou Jozèf, èk i pa té vlé fè anyen pou déplè Jéhova. (Jen. 39:9) Èk a kòz di sa Jozèf wifizé pou kouché épi madanm an lòt nonm. Alò, pou nou sa ni an wilasyon ki pwé épi Jéhova, nou ni pou fè tan pou pwédyé, èk étidyé Bib-la. Konsa, lè nou fè sé bagay sala, sa kay édé nou pou vansé pli pwé Jéhova. Anfen, menm kon Jozèf, si Jéhova sé vwéman bon jan nou, nou pa kay vlé fè pyès bagay pou déplè’y.​—Jémz 4:8.

15. Kisa nou sa apwann an sa ki té wivé jan Izwayèl an savann sèk-la? (Hibrou 3:12)

¹⁵ Lè moun doubout mété konfyans yo an Jéhova, i byen ézé pou yo tounen kont li. Pou ègzanp, konsidiwé sa ki té wivé jan Izwayèl lè yo té an savann sèk-la. Magwé yo té sav Jéhova ka ègzisté, yo koumansé pèd konfyans-lan ki, Jéhova té kay potjiwé sa yo té vwéman bizwen. Anfen, yo jik mandé: ‘Ès Jéhova anpami nou ében ès i pa anpami nou?’ (Ègz. 17:2, 7) Èk a kòz di sa, yo wébèl kont Bondyé. Èvèk ègzanp yo sé yon avètisman pou nou. Konsa, nou pa vlé swiv mové ègzanp jan Izwayèl.​—Li Hibrou 3:12.

16. Kisa ki sa fè’y difisil pou nou tjenn lafwa nou fò?

¹⁶ Latè sala ka fè’y difisil pou nou wèsté pwé Jéhova. Épi sa sé paski, an chay moun pa ka kwè an Bondyé. Èk souvan, i ka sanm sé moun-lan ki pa ka obéyi Bondyé ka enjwi an bon lavi. Alò, lè nou wè sa, sa sa fè’y difisil pou nou tjenn lafwa nou fò. Èvèk magwé nou sav Bondyé ka ègzisté, nou pé koumansé ni dé lidé, paski nou pa asiwé Jéhova kay vwéman édé nou. Anfen moun-lan ki ékwi Sam swasant twèz (73) té osi débat épi menm pwoblenm sala. Wi, i té ka wè moun oliwon’y ki pa té ka obéyi lwa Bondyé, mé sé moun sala té ka enjwi lavi yo. Konsa, i koumansé mandé kò’y si i ka fè sans pou sèvi Bondyé.​—Sam 73:11-13.

17. Kisa ki kay édé nou wèsté pwé Jéhova?

¹⁷ Kisa ki té édé moun-lan ki ékwi Sam swasant twèz (73) pou chanjé katjil li? Ében i koumansé pansé asou sa ki té kay wivé moun ki doubout konfyé Jéhova. (Sam 73:18, 19, 27) Osi, i katjilé asou sé bennéfis-la moun ki ka sèvi Bondyé ka twapé. (Sam 73:24) Konsa, nou osi sa katjilé asou tout sé bennédiksyon-an Jéhova ja ban nou. Èk an menm di tan, imajiné ki mannyè lavi nou té kay yé si nou pa té ka sèvi Jéhova. Wi, si nou chonjé sé wézon-an i bon pou nou sèvi Jéhova, sa kay édé nou pou wèsté fidèl pou li. Èvèk menm kon moun-lan ki ékwi Sam swasant twèz (73), nou kay di: ‘Mé pou mwen menm, i bon pou mwen vini pwé Jéhova.’​—Sam 73:28.

18. Poutji nou pa sipozé pè sa ki kay fèt an tan pou vini?

¹⁸ Nou sa aji épi népòt difikilté nou pé èspéyansé an sé dènyé tan sala, paski nou “ka adowé épi obéyi Bondyé, sèl Bondyé-a ki ka viv-la.” (1 Tèsa. 1:9) Wi, Bondyé mélé épi nou, èk i kay toujou édé nou. Jéhova té la épi sé sèvant li-a an tan pasé, èk i la épi nou jòdi. Anfen, touswit gwan twibilasyon-an kay koumansé. Mé nou pa pa kò nou. Jéhova kay épi nou. (Izay. 41:10) Wi, sé pou nou tout “di èvèk konfyans: ‘Sé [Jéhova] ki ka édé mwen, mwen pa kay pè.’”​—Hib. 13:5, 6.