1. Lè’y vini pou lavéwité-a ki an Bib-la, kisa ki katjil ou?

 KON pèp Jéhova, nou enmen lavéwité-a ki an Pawòl li. Anfen, nou ka bazé lafwa nou asou lavéwité sala. (Ronm 10:17) Nou asiwé, Jéhova établi kongwigasyon Kwityen-an pou’y vini “pilotwi èk fondasyon lavéwité-a.” (1 Tim. 3:15) Èvèk nou ka “obéyi sé moun-an” ki ka pwan douvan an ògannizasyon Jéhova épi tout tjè nou, kon yo ka èspliké lavéwité-a ki an Bib-la, èk yo ka ban nou bon diwèksyon pou édé nou fè volonté Bondyé.​—Hib. 13:17.

2. Silon Jémz 5:19, kisa ki pé wivé nou, apwé nou apwann lavéwité-a?

² Kanmenm, apwé nou apwann lavéwité-a, èk nou dakò i enpòtan pou nou swiv diwèksyon ògannizasyon Jéhova ka ban nou, i posib pou nou kité chimen lavéwité-a. (Li Jémz 5:19.) Èvèk sé sa Satan té kay kontan, paskè i vlé nou pèd tout konfyans an Bib-la, épi an ògannizasyon Jéhova.​—Èfés. 4:14.

3. Pouki nou ni pou kontiné obéyi lavéwité-a épi tout tjè nou? (Èfésòs 6:13, 14)

³ Li Èfésòs 6:13, 14. Touswit, Satan kay simen an chay mansonj pou kwennen sé nasyon-an, èk fè yo òpozé Jéhova. (Wév. 16:13, 14) Nou sa asiwé, Satan kay fè pli bagay ankò, pou’y kwennen pèp Jéhova. (Wév. 12:9) Sé sa ki fè i tèlman enpòtan pou nou apwann pou idantifyé diféwans-lan ant lavéwité-a épi mansonj. Èk sé sa ki fè nou ni pou kontiné obéyi lavéwité-a épi tout tjè nou. (Ronm 6:17; 1 Pita 1:22) Anfen, si nou pa ka obéyi lavéwité-a, nou pa kay chapé anba gwan twibilasyon-an!

4. Kisa nou kay diskité an atik sala?

⁴ An atik sala, nou kay idantifyé dé (2) kawaktè Kwityen ki kay édé nou pou, konnèt lavéwité-a ki an Bib-la, èk aksèpté diwèksyon hòd ògannizasyon Jéhova. Apwé sa, nou kay diskité twa (3) bagay nou ni pou fè, pou nou sa kontiné swiv lavéwité-a.

KAWAKTÈ KI KAY ÉDÉ NOU POU KONNÈT LAVÉWITÉ-A

5. Kisa’y vlé di pou ni kwentif Jéhova?

⁵ Kwentif Jéhova. Lè nou ni kwentif Jéhova, sa vlé di, nou enmen’y si tèlman, nou pa janmen vlé fè anyen ki kay déplè’y. Wi, nou vlé ni favè Jéhova. Konsa, nou kontan pou apwann diféwans-lan ant sa ki bon èk sa ki pa bon, èk diféwans-lan ant lavéwité épi mansonj. (Pwov. 2:3-6; Hib. 5:14) Nou ni pou chonjé, souvan, sé bagay-la ki ka plè lézòm, sé bagay ki ka déplè Jéhova. Konsa, nou pa sa janmen kité pèwèz pou lézòm vini pli fò pasé lanmityé nou pou Jéhova.

6. Ki mannyè pèwèz pou lézòm té afèkté dis (10) an sé èspiyon-an?

⁶ Si pèwèz nou pou lézòm vini pli fò pasé kwentif nou pou Jéhova, nou pé koumansé pèd konfyans an abilité Jéhova pou sové pèp li. Nou ka wè sa a klè an ègzanp sé douz (12) èspiyon-an ki té alé gadé péyi-a Jéhova té pwonmèt pou bay Jan Izwayèl. Pou dis (10) di yo, pèwèz-la yo té ni pou sé Kénannayt-la té pli fò pasé kwentif yo pou Jéhova. Konsa, yo di sé Jan Izwayèl-la: “Nou pa sa alé goumen épi sé moun sala, paskè yo pli fò pasé nou.” (Lim. 13:27-31) Èk vwéman, sé Kénannayt-la té ka gadé pli fò pasé Jan Izwayèl. Mé, Jan Izwayèl sété pèp Jéhova, konsa népòt moun ki té kwè Jan Izwayèl pa té kay sa bat sé lèlmi yo-a, pa té ka chonjé Jéhova. Sé dis (10) èspiyon-an té sipozé fiksé asou sa Jéhova té vlé Jan Izwayèl fè. Osi, yo té sipozé mèdité asou sa Jéhova té ja fè ba yo, an ti tan avan sa. Si yo té fè sa, yo té kay wéyalizé, fòs-la sé Kénannayt-la té ni-an pa té anyen, lè’w konpawé’y épi pouvwa-a Jéhova ni-an. Mé, Jòchwa épi Kélèb pa té kon sé dis (10) èspiyon-an. Yo té ni lafwa an Jéhova, èk yo té vlé ni favè’y. Konsa, yo di pèp Izwayèl: “Si Jéhova kontan nou, i kay vwéman mennen nou an péyi-a, èk i kay ban nou’y.”​—Lim. 14:6-9.

7. Kisa nou sa fè pou fòtifyé kwentif nou pou Jéhova? (Gadé pòtwé-a osi.)

⁷ Pou fòtifyé kwentif nou pou Jéhova, nou ni pou katjilé asou kisa ki kay plè’y, chak fwa nou ni on disizyon pou fè. (Sam 16:8) Osi, lè’w ka li sé wakont-la ki an Bib-la, mandé kò’w kwèstyon sala: ‘Si mwen té adan sitiwasyon sala, ki disizyon mwen té kay fè?’ Pou ègzanp, annou di, ou té la ka kouté sé dis (10) èspiyon-an. Ès ou té kay kwè sa yo té ka di-a èk vini pè? Ében, ès lanmityé’w pou Jéhova èk dézi’w pou plè’y té kay pli fò pasé pèwèz ou pou sé Kénannayt-la? Jòchwa épi Kélèb té palé lavéwité-a konsèné Jéhova, mé yon jennéwasyon antyè anpanmi Jan Izwayèl pa té kwè sa. An wézilta di sa, Jéhova pa kité jennéwasyon sala antwé Tè Pwonmèt-la.​—Lim. 14:10, 22, 23.

8. Ki kawaktè nou sipozé twavay wèd pou dévlopé, èk pouki?

⁸ Imilité. Jéhova ka fè moun ki ni imilité konnèt lavéwité-a. (Maf. 11:25) Èvèk lè nou té aksèpté èd pou apwann lavéwité-a, nou moutwé nou té ni imilité. (Twav. 8:30, 31) Mé, si nou pa pwan pokosyon, nou sa anmasé lògèy èk pèd imilité-a nou ni-an. Èvèk si nou ni lògèy, nou pé koumansé kwè, lopinyon nou pli bon pasé pwensip Bib, èk sé diwèksyon-an nou ka twapé hòd ògannizasyon Jéhova.

9. Kisa nou sa fè pou nou kontiné dévlopé imilité?

⁹ Pou kontiné dévlopé imilité, i bon pou nou chonjé, nou pa anyen lè nou konpawé kò nou épi Jéhova. (Sam 8:3, 4) Osi, nou sa pwédyé èk mandé Jéhova pou édé nou vini moun ki ni imilité, èk moun ki vlé apwann konsèné’y. Jéhova kay wéponn lapwiyè nou, èvèk i kay édé nou pou mété katjil li nou ka jwenn an Pawòl li èk hòd ògannizasyon’y, avan lopinyon nou. Konsa, lè’w ka li Bib-la, gadé pou pwèv ki ka moutwé, Jéhova enmen moun ki ni imilité èk i hayi moun ki ni lògèy. Èvèk fè tout sa’w pè pou’w kontiné ni imilité, èspwèsman si’w wisouvwè yon ansayman enpòtan.

KISA KI SA ÉDÉ NOU POU KONTINÉ OBÉYI LAVÉWITÉ-A?

10. Ki moun Jéhova ja sèvi pou enstwi pèp li èk ba yo diwèksyon?

¹⁰ Kontiné konfyé diwèksyon hòd ògannizasyon Jéhova. An tan pasé, Jéhova té sèvi Moziz pou enstwi pèp li èk ba yo diwèksyon. Apwé Moziz mò, Jéhova sèvi Jòchwa pou fè sa. (Jòch. 1:16, 17) Èk lè jan Izwayèl té ka gadé sé nonm sala kon nonm ki té ka wépwézanté Bondyé, bagay té ka maché byen épi nasyon-an. Plizyè san lanné apwé sa, kongwigasyon Kwityen-an té ògannizé, èk Bondyé koumansé sèvi sé douz (12) zapòt-la pou bay pèp li enstwiksyon épi diwèksyon. (Twav. 8:14, 15) Pli ta, sé ansyen-an an Jérouzalèm té ka édé sé zapòt-la pou bay pèp Bondyé diwèksyon, èk sé kongwigasyon-an té ka swiv sé diwèksyon-an sé fwè fidèl sala té ka ba yo. An wézilta di sa, “sé gany sé moun-an ki kwè an Jézi-a té ka vini pli fò an lafwa-a, épi pli an plis moun té ka kwè toulé jou.” (Twav. 16:4, 5) Jòdi jou, Jéhova ka osi benni nou lè nou obéyi sé diwèksyon-an nou ka wisouvwè hòd ògannizasyon’y. Mé, ki mannyè ou kwè Jéhova té kay santi, si nou pa wèspèkté sé fwè-a i apwenté pou pwan douvan an ògannizasyon-an? Pou wéponn kwèstyon sala, annou diskité sa ki té fèt lè jan Izwayèl té ka alé an Tè Pwonmèt-la.

11. Kisa ki té wivé sé moun-lan an Izwayèl ki pa té ni wèspé pou Moziz, moun-lan Jéhova té chwazi pou djidé pèp li? (Gadé pòtwé-a osi.)

¹¹ Diwan tan-an Jan Izwayèl té ka alé an Tè Pwonmèt-la, adan sé nonm-lan ki té ni gwo pozisyon anpanmi pèp-la, lévé kont Moziz, èk kont ansayman-an Jéhova té bay-la. Sé nonm sala di Moziz épi Éronn: “Tout pèp-la [pa Moziz tousèl], sé moun ki sen, yo tout. Èk Jéhova anpanmi yo.” (Lim. 16:1-3) Bon, i té vwé, “tout pèp-la” sété moun ki té sen, an zyé Jéhova. Mé chonjé, sé Jéhova ki té chwazi Moziz pou djidé pèp li. (Lim. 16:28) Konsa, lè sé moun-lan ki wébélé-a té ka kwititjé Moziz, sé Jéhova yo té ka kwititjé. Pito yo té fiksé asou sa Jéhova té vlé fèt, yo fiksé asou sa yo menm té vlé​—pli pouvwa èk pli gwo pozisyon. Bondyé tjwé tout sé nonm-lan ki té ka ankouwajé pèp-la pou wébélé-a. Èk i tjwé plizyè mil moun-lan ki té ka sipòté yo-a, osi. (Lim. 16:30-35, 41, 49) Konsa jòdi jou, nou sa asiwé, moun ki pa ni wèspé pou sé diwèksyon-an nou ka wisouvwè hòd ògannizasyon Jéhova, pa ni favè’y.

12. Pouki nou sa kontiné konfyé ògannizasyon Jéhova?

¹² Lè i nésésè pou nou fè chanjman an mannyè-a nou ka konpwann sèten bagay an Bib-la, ében an mannyè-a nou ka fè twavay pwèchman-an, Pwensipal Konmité-a pa ka fè kòlonng pou fè sé chanjman sala. (Pwov. 4:18) Sa sé paski, sa ki pli enpòtan pou yo sé sa, yo vlé plè Jéhova. Osi, Pwensipal Konmité-a ka fè tout sa yo pé pou bazé tout disizyon yo ka fè asou ‘sé bon pawòl lavéwité-a.’ Sa vlé di, yo ka bazé disizyon yo asou Pawòl Bondyé ki an Bib-la. Konsa, nou sa toujou konfyé ògannizasyon Jéhova.

13. Kisa ki ‘sé bon pawòl lavéwité-a,’ èk kisa nou sipozé fè épi’y?

¹³ “Tjenbé sé bon pawòl lavéwité sala.” (2 Tim. 1:13) Sé “bon pawòl lavéwité sala” sé enstwiksyon Jézi, èk tout enstwiksyon-an ki an Bib-la. (Jan 17:17) Nou ka bazé tout sa nou ka kwè adan, asou Pawòl Bondyé. Sé sa ògannizasyon Jéhova ka ankouwajé nou pou fè. Konsa, dépi nou kontiné swiv Pawòl Bondyé, nou kay enjwi bennédiksyon’y.

14. Kisa ki té fèt paski adan sé Kwityen-an pa té tjenn ‘sé bon pawòl lavéwité-a?’

¹⁴ Bon, kisa ki pé fèt si nou pa ‘tjenn sé bon pawòl lavéwité-a?’ Pou twapé wépons-lan pou kwèstyon sala, annou konsidiwé yon ègzanp. An pwèmyé syèk-la, adan sé Kwityen-an té ka simen yon mansonj. Yo té ka di, jou Senyè-a ja vini. I sanm yo té jis ni on lèt ki té ka di sa, èvèk yo té ka di sé zapòt Pòl ki té ékwi lèt sala. Adan sé Kwityen-an an vil Tèsalonnika kwè mansonj sala, èk yo koumansé simen enfòmasyon-an avan yo pwan tan pou véwifyé si sa té vwé. Mé, si yo té chonjé sé bagay-la zapòt Pòl té enstwi yo-a, yo pa té kay kwè mansonj sala. (2 Tèsa. 2:1-5) Zapòt Pòl ankouwajé yo pou pa kwè tout sa yo tann. Èk an finisman dènyè lèt-la i ékwi yo-a, i di yo: “Mwen Pòl ka voyé bonjou [bay zòt]. Mwen ka ékwi sa épi lanmen mwen menm. Sé kon sa mwen ka siyé non mwen an bout tout lèt [pou zòt] sa asiwé sé mwen ki voyé lèt sala.” Konsa, an tan pou vini sa té kay édé yo pou konnèt kisa pou kwè.​—2 Tèsa. 3:17.

15. Lè nou tann, ében li bagay ki pa an ling épi sa nou ka apwann an Bib-la, kisa nou sa fè pou pwotéjé kò nou? Ba yon ègzanp. (Gadé sé pòtwé-a osi.)

¹⁵ Ki lison nou sa apwann an sa zapòt Pòl té di sé fwè-a an vil Tèsalonnika? Ében lison-an sé sa, nou ni pou sèvi bon jijman lè nou tann bagay ki pa an ling épi sa nou ka apwann an Bib-la, ében lè nou tann nouvèl ki sipwi nou. Mi sé sa ki té fèt an Soviet Union-lan. Plizyè lanné ki pasé, sé lèlmi nou-an voyé on lèt bay sé fwè-a ki an péyi sala, èk i té ka sanm sé Pwensipal òfis Tèmwen Jéhova ki té voyé lèt-la ba yo. Lèt-la té ka ankouwajé sé fwè-a pou fòmé on lòt ògannizasyon, yonn ki pa té ni anyen pou fè épi ògannizasyon Jéhova. I pa té sanm la té ni anyen mal épi lèt-la, mé sa pa kwennen sé fwè-a ki té fidèl, paskè yo wéyalizé, sa ki té an lèt-la pa té an ling épi sa yo té ja apwann an Bib-la. Jòdi jou, délè, sé lèlmi nou-an ka sèvi bagay tèl kon intannèt-la, épi “social media” pou éséyé twoublé nou, èk divizé nou. Konsa, pito nou kité sé bagay sala ‘twoublé lidé nou,’ i bon pou nou pwan tan pou fè asiwé sa nou ka tann-lan ében li-a, sé bagay ki an ling épi sa nou ja apwann an Bib-la. An mannyè sala nou kay sa pwotéjé kò nou.​—2 Tèsa. 2:2; 1 Jan 4:1.

16. Silon Ronm 16:17, 18, kisa nou sipozé fè si on moun ka simen enfòmasyon ki pa an ling épi sa ki an Bib-la?

¹⁶ Wèsté an lilyon épi moun ki fidèl pou Bondyé. Jéhova vlé nou adowé’y an lilyon épi sé fwè èk sè nou-an. Èk dépi nou kontiné swiv lavéwité-a, nou kay sa wèsté an lilyon. Mé, népòt moun ki ka simen enfòmasyon ki pa an ling épi Pawòl Bondyé, ka mété divizyon an kongwigasyon-an. Konsa, Jéhova ka vèti nou pou “tjenn kò nou byen lwen sé moun sala.” Si nou pa fè sa, sa pé annékòz nou pou kité lavéwité-a.​—Li Ronm 16:17, 18.

17. Lè nou sa idantifyé lavéwité-a èk nou ka swiv li, ki bennéfis nou ka twapé?

¹⁷ Si nou sa idantifyé lavéwité-a èk nou ka swiv li, nou kay wèsté pwé Jéhova èk lafwa nou kay wèsté fò. (Èfés. 4:15, 16) Osi, Satan pa kay sa kwennen nou épi fò enstwiksyon’y, èk sé mansonj-lan i ka simen-an. Èvèk diwan gwan twibilasyon-an nou kay sa doubout fò paskè Jéhova kay pwotéjé nou. Konsa, kontiné swiv lavéwité-a, “épi Bondyé ki ka ban nou lapé an tjè nou, kay toujou la épiʼw.”​—Filip. 4:8, 9.