1-2. Ki moun Zadòk té yé? (1 Kwonnikèl 12:22, 26-28)

 IMAJINÉ plis pasé twa san kawant mil (340,000) nonm. Èk yo asanblé ansanm pou fè David wa nasyon Izwayèl. Pou twa (3) jou, sé nonm sala té ka wèsté asou sé mòn-lan bò vil Hèbronn. Yo té ka wi, yo té ka palé, èk yo té ka chanté chanson pou glowifyé Jéhova. (1 Kw. 12:39) Èk anpami tout sé moun sala, la té ni an jenn nonm an chay moun pa té kay òbzòvé. Non’y sété Zadòk. Mé Jéhova té wè’y, èk Jéhova fè asiwé nou konnèt i té la. Alò ki moun Zadòk té yé? (Li 1 Kwonnikèl 12:22, 26-28.)

² Bon, Zadòk sété an pwèt ki té ka twavay ansanm épi Chèf Pwèt Abiyafa. Osi, Bondyé té bay Zadòk an chay lasajès èk abilité-a pou konpwann divwa’y. (2 Sm 15:27) Alò, paski moun té sav i té savan, yo té ka mandé’y pou konsèy lè yo té bizwen èd. Mé Zadòk osi sété an nonm ki té ni an chay kouwaj. Èk an atik sala, nou kay fiksé asou kawaktè sala. Wi, nou vlé apwann ki mannyè Zadòk té moutwé kouwaj.

3. (a) Pouki pèp Bondyé bizwen kouwaj? (b) Kisa nou kay diskité an atik sala?

³ Diwan sé dènyé tan sala, Satan ka twavay pli wèd pasé avan pou détwi lafwa nou an Jéhova. (1 Pita 5:8) Konsa nou vwéman bizwen kouwaj, paski si nou ni kouwaj, nou kay sa andiwé jis tan Jéhova mennen an bout pou Satan èk vyé sistèm li. (Sam 31:24) Alò, annou diskité twa (3) mannyè nou sa moutwé kouwaj menm kon Zadòk.

SIPÒTÉ WÉYÒM BONDYÉ

4. Pouki pèp Jéhova bizwen kouwaj pou sipòté Wéyòm Bondyé? (Gadé pòtwé-a osi.)

⁴ Kon pèp Jéhova, nou ka sipòté Wéyòm Bondyé épi tout tjè nou. Mé kanmenm, nou bizwen kouwaj pou fè sa. (Maf. 6:33) Pou ègzanp, an latè méchan sala, nou bizwen an chay kouwaj pou viv an ling épi wèg Jéhova, èk pou pwéché bon nouvèl-la konsèné Wéyòm-lan. (1 Tèsa. 2:2) Nou osi bizwen kouwaj pou pa mélé kò nou an zafè pòlitik, èspwèsman lè moun ka ban nou chalè pou fè sa. (Jan 18:36) Anfen, paski sèvant Jéhova pa ka mélé kò yo an zafè pòlitik, èk yo pa ka sipòté ladjè, an chay di yo ja èspéyansé difikilté. Pou ègzanp, adan di yo ja pèd twavay yo ében lajan-an yo ni an bank-lan, moun ja bat adan di yo, èk adan di yo ja alé lajòl. Wi, nou vwéman bizwen kouwaj pou sipòté Wéyòm Bondyé.

5. Pouki Zadòk té bizwen kouwaj pou sipòté David?

⁵ Zadòk pa té alé Hèbronn pou annèk sélébwé paski David té vini wa. Non, i alé la épi fèman’y. (1 Kw. 12:38) Èk i té pawé pou alé an batay épi David pou goumen kont lèlmi nasyon Izwayèl. Bon. Pitèt Zadòk pa té ni an chay èspéyans ka goumen kon an sòlda, mé i a klè, i té ni an chay kouwaj.

6. Ki mannyè ègzanp David té wédé Zadòk moutwé kouwaj? (Sam 138:3)

⁶ Chonjé Zadòk sété yon pwèt, alò ki mannyè i té posib pou’y ni otan kouwaj kon sa? Ében Zadòk té konnèt an chay nonm ki té ni an chay fòs èk kouwaj. Èk san dout i apwann hòd ègzanp yo. Pou ègzanp, David sété yonn an sé moun sala. Anfen kouwaj David kon an ‘majò sòlda’ èk kon ‘yon chèf lawmé’, annékòz tout pèp Izwayèl pou vlé fè’y vini wa. (1 Kw. 11:1, 2) Èk an plis di sa, David té ka toujou apiyé asou Jéhova pou édé’y hòd sé lèlmi’y-la. (Sam 28:7; li Sam 138:3.) Zadòk osi apwann mannyè pou moutwé kouwaj hòd ègzanp lòt nonm kon Djèhòyada, èk gason’y Bennaya ki sété yon sòlda. Èk san dout i osi apwann kouwaj, hòd sé venndé (22) chèf sé lawmé-a ki té sipòté David. (1 Kw. 11:22-25; 12:26-28) Wi, tout sé nonm sala té moutwé an chay kouwaj, paski yo té détèminé pou fè David wa yo, èk pou pwotèkté’y.

7. (a) Jòdi jou, la ni plizyè fwè èk sè ki ka moutwé kouwaj. Ba yon ègzanp? (b) Lè’w té gadé vidiyo-a kisa ou apwann konsèné fwè Nsilu?

⁷ Lè nou katjilé asou mannyè sé fwè èk sè nou-an ja moutwé kouwaj pou yo wèsté fidèl pou Jéhova èk Wéyòm li, sa ka enkouwajé nou pou moutwé kouwaj tou. Pou ègzanp, lè wa nou Jézi Kwi té asou latè-a, i moutwé kouwaj lè’y wifizé pwan pa an zafè pòlitik. (Maf. 4:8-11; Jan 6:14, 15) Èk i té ka toujou apiyé asou Jéhova pou bay kouwaj-la èk fòs-la i té bizwen pou fè sa ki dwèt. Osi, jòdi jou, la ni plizyè ègzanp jenn fwè ki pa ka sipòté, ében pwan pa an ladjè ében pòlitik. Alò, si ou fè tan pou li ében kouté sé èspéyans yo-a asou jw.org, sa kay ba’w on chay ankouwajman èk sa kay motivé’w pou moutwé kouwaj. a

ÉDÉ SÉ FWÈ’W ÈK SÈ’W-LA

8. An ki sitiwasyon sé ansyen-an bizwen kouwaj pou édé sé fwè èk sè yo-a?

⁸ Pèp Bondyé enmen wédé yonn a lòt. (2 Kòr. 8:4) Mé délè yo bizwen an chay kouwaj pou yo fè sa. Pou ègzanp, lè an péyi ni ladjè sé ansyen-an sav sé fwè èk sè-a bizwen enkouwajman èk sipò. Wi yo bizwen bagay tèl kon, Bib-la, sé piblikasyon nou-an, had, manjé, èk on plas pou wèsté. Èk paski sé ansyen-an enmen sé fwè èk sè yo-a on chay, yo ka fè tout sa yo pé pou potjiwé sa sé fwè èk sè-a bizwen, menm si i byen danjéwé pou yo fè sa. (Jan 15:12, 13) Èk lè yo fè sa, yo ka moutwé kouwaj menm kon Zadòk.

9. Silon 2 Sanmyèl 15:27-29, kisa David mandé Zadòk pou fè? (Gadé pòtwé-a osi.)

⁹ Bon, annou konsidiwé mannyè Zadòk té édé sé fwè’y-la diwan an tan ki té byen danjéwé. Lavi David té an danjé, paski gason’y, Absolonm té vlé tjwé’y pou’y té sa vini wa. (2 Sm 15:12, 13) Konsa, David té ni pou kouwi kité Jérouzalèm vitman. Alò David di sé sèvant li-a: ‘Lévé ann’ kouwi alé, paski nou pyès pa kay chapé anba lanmen Absolonm!’ (2 Sm 15:14) Kanmenm, kon sé sèvant li-a té ka kité, David wéyalizé on moun té ni pou wèsté an Jérouzalèm pou fè’y konnèt sa Absolonm té vlé fè. Alò David voyé Zadòk èk lòt pwèt viwé Jérouzalèm pou véyé Absolonm ba li. (Li 2 Sanmyèl 15:27-29.) Èk yo té ni pou pwan bon pokosyon, paski sa David di yo pou fè té sa vwéman mété lavi yo an wis. Chonjé, Absolonm sété on nonm ki té ka gadé pou kò’y tousèl, i té vyolan, èk i té jis twayi papa’y. Alò, imajiné sa’y té kay fè Zadòk, èk sé lézòt pwèt-la si’y té apwann yo té ka twavay bay David kont li.

10. Ki mannyè Zadòk èk sé pwèt-la té pwotéjé David?

¹⁰ David mandé Zadòk èk on lòt bon jan’y Houchay, pou édé’y épi on plan. (2 Sm 15:32-37) Houchay té ni pou fè akonmsi i ka sipòté Absolonm èk ba’y konsèy konsèné mannyè pou ataké David. Èk sa té kay bay David asé tan pou pwépawé pou ataké Absolonm. (2 Sm 17:8-16) Bon, lè Absolonm kouté konsèy Houchay, Houchay di Zadòk èk Abiyafa sa Absolonm kay fè. Èk yo fè asiwé David vin konnèt konsèné plan Absolonm. (2 Sm 17:17) Wi, épi èd Jéhova, Zadòk èk sé lézòt pwèt-la édé pwotéjé lavi David.​—2 Sm 17:21, 22.

11. Ki mannyè nou sa moutwé kouwaj menm kon Zadòk lè nou ka édé sé fwè èk sè nou-an?

¹¹ Lè sé fwè èk sè nou-an an danjé èk yo bizwen èd, ki mannyè nou sa moutwé kouwaj menm kon Zadòk? (1) Toujou obéyi diwèksyon. Èk sa sé paski diwan tan ki danjéwé, i byen enpòtan pou nou swiv diwèksyon pou nou sa wèsté an lilyon. Konsa, obéyi diwèksyon hòd òfis bwanch-la. (Hib. 13:17) Osi. souvan sé ansyen-an sipozé wivizé sé enstwiksyon-an konsèné mannyè pou pwépawé pou on dézas èk sa pou fè apwé on dézas. (1 Kòr. 14:33, 40) (2) Ni kouwaj, mé pwan bon pokosyon. (Pwov. 22:3) Toujou katjilé byen avan ou fè kéchòy. Èvèk fè tout sa’w pé pou wèsté sòv. (3) Dépan asou Jéhova. Toujou chonjé, Jéhova vlé ou èk sé fwè èk sè’w-la wèsté sòv. Èk i sa osi édé’w pou wèsté sòv lè’w ka édé sé fwè èk sè-a.

12-13. Kisa ou apwann an èspéyans Viktor èk Vitalii? (Gadé pòtwé-a osi.)

¹² Annou konsidiwé èspéyans dé (2) ansyen. Non yo sé Viktor èk Vitalii. Sé dé ansyen sala té ka twavay wèd pou mennen manjé èk dlo bay sé fwè èk sè yo-a an Ukraine. Viktor di: “Nou té ka chaché pou manjé toupatou. Èk souvan, nou té ka tann bal ka pété byen pwé nou. Yon fwè té ban nou manjé hòd boutik li. Èk manjé-a fwè-a ban nou té édé an chay fwè èk sè pou an bon ti tan. Èk paditan nou té ka mété manjé-a asou tròk-la, an bonm tonbé apipwé swasant sis (66) pyé hòd nou. Mé mèsi Bondyé bonm-lan pa té pété. Èvèk diwan tout lajouné-a, mwen té ka plédé épi Jéhova pou ban mwen kouwaj-la mwen té bizwen-an pou kontiné édé sé fwè èk sè-a.”

¹³ Èk fwè Vitalii di: “Nou té bizwen an chay kouwaj. Pwèmyé voyaj-la mwen té fè-a té pwan douz (12) nèditan. Épi mwen té ka pwédyé ba Jéhova tout tan sala.” Wi, fwè Vitalii té moutwé kouwaj, mé an menm di tan i té pwan pokosyon. Anfen, Vitalii di: “Mwen té mandé Jéhova pou ban mwen lasajès èk pou édé mwen pou pa fè anyen ki danjéwé. Alò mwen té ka drayv sèlman asou sé chimen-an sé moun-lan an lotowité di nou pou sèvi. Anfen, lafwa mwen té vini pli fò lè mwen wè mannyè sé fwè èk sè-a té ka twavay ansanm. Yo té ka tiwé bagay an chimen-an. Yo té ka sanblé manjé, had, èk lòt bagay ki enpòtan, épi mété yo asou tròk-la. Osi, paditan mwen èk Viktor té ka voyajé, sé fwè èk sè-a té ka ban nou manjé èk an plas pou pozé.”

WÈSTÉ FIDÈL POU JÉHOVA

14. Ki mannyè nou pé santi lè an moun nou enmen kité Jéhova?

¹⁴ Yonn an sé bagay-la ki sa kasé tjè nou sé lè an moun an fanmi nou ében an bon jan kité Jéhova. (Sam 78:40; Pwov. 24:10) Èk paski nou enmen moun-lan an chay, i ka pli difisil pou nou aji épi sitiwasyon-an. Konsa, si nou ja èspéyansé an sitiwasyon kon sa, i kay bon pou ègzanminé ègzanp Zadòk. Poutji nou ka di sa? Ében sa sé paski Zadòk té wèsté fidèl pou Jéhova. Alò ègzanp li sa fòtifyé nou.

15. Pouki Zadòk té bizwen kouwaj pou wèsté fidèl pou Jéhova? (1 Wa 1:5-8)

¹⁵ Lè Wa David té an vyéyès li èk i té pwé lanmò’y, Adonayja, gason David, té éséyé pou vini wa magwé i té sav sé Sòlomonn Jéhova té vlé vini wa. (1 Kw. 22:9, 10) Èk Abiyafa désidé pou sipòté Adonayja. (Li 1 Wa 1:5-8.) Mé lè Abiyafa fè sa, i moutwé i pa té fidèl pou ni David ni Jéhova! Kanmenm Zadòk wèsté fidèl pou Jéhova magwé bon jan’y Abiyafa pa té fè sa. Bon. Imajiné mannyè sa té kasé tjè Zadòk. Èk nou sa konpwann sa, paski pou plis pasé kawant (40) lanné, Abiyafa èk Zadòk té twavay ansanm kon pwèt. (2 Sm 8:17) Pou ègzanp, yo dé-a té ka pwan ka ‘Bwèt Agwéman Bondyé’. (2 Sm 15:29) Yo toulédé té ka sipòté David kon wa yo. Èk yo té ka fè an pil lòt bagay an sèvis Jéhova ansanm.​—2 Sm 19:11-14.

16. Kisa ki té édé Zadòk pou wèsté fidèl?

¹⁶ Lè Abiyafa twayi David, i pa té wèsté fidèl pou Jéhova. Mé magwé sa, Zadòk té wèsté fidèl pou Jéhova. Èk David té sav i té sa toujou konfyé Zadòk. Anfen, lè David vini konnèt konsèné plan Adonayja, David voyé Zadòk, Nafann èk Bennaya pou annonté Sòlomonn kon wa. (1 Wa 1:32-34) Alò, i ka sanm Zadòk té twapé enkouwajman pou wèsté fidèl hòd lòt sèvant Bondyé tèl kon Nafann. Wi, Nafann té osi wèsté fidèl pou Jéhova èk i té ka sipòté Wa David. (1 Wa 1:38, 39) Èvèk lè Sòlomonn vini wa, i ‘mété Zadòk kon [chèf] pwèt-la an plas Abiyafa.’​—1 Wa 2:35.

17. Si an moun ou enmen kité Jéhova, ki mannyè ou sa imité ègzanp Zadòk?

¹⁷ Si an moun ou enmen tounen do’y asou Jéhova, ou sa fè menm kon Zadòk. Wi, ou sa moutwé Jéhova ou kay chwazi pou wèsté fidèl pou li. (Jòch. 24:15) Èk Jéhova kay vwéman ba’w fòs-la èk kouway-la ou bizwen-an pou fè sa ki bon. Osi palé ba Jéhova an lapwiyè, èk wèsté pwé sé jan’w-lan ki fidèl pou Jéhova. An plis di sa, ou sa ni konfyans-lan ki, Jéhova ka apwésyé fidèlité’w, èk i kay wékonpansé’w.​—2 Sm 22:26.

18. Kisa ou apwann an èspéyans Marco èk Sidse?

¹⁸ Annou gadé ègzanp fwè Marco èk madanm li, Sidse. Yo ni dé (2) gwan fi ki désidé pou kité lavéwité-a. Lè sa fèt mi sa Marco di: “Dépi ich ou fèt, ou enmen yo an chay. Ou kay fè népòt bagay pou pwotéjé yo. Alò lè ich ou désidé pou kité Jéhova, sa ka vwéman kasé tjè’w. Mé Jéhova ka édé nou pou tjébé fò. I ja fè asiwé ki, nou sa enkouwajé yonn a lòt. Konsa, lè mwen dékouwajé a kòz di sa ich nou fè, madanm mwen ka konfòté mwen èk i ka enkouwajé mwen pou fè sa ki dwèt. Èk lè madanm mwen dékonpòté, mwen ka fè menm bagay-la ba li”. Èk Sidsé di: “Si Jéhova pa té ban nou fòs-la nou té bizwen, nou pa té kay sa tjébé fò. Mwen té vwéman twis èk mwen té ka blanmé kò mwen paski sé fi mwen-an kité Jéhova. Alò mwen di Jéhova mannyè mwen ka santi. An ti tan pasé, èk yon jou mwen wè an sésé mwen pa té wè pou an chay lanné. I tjébé mwen asou zépòl mwen, i gadé mwen an zyé mwen, èk i di mwen: ‘Sidse, pa obliyé, sé pa fòt ou!’ Wi épi sipò Jéhova, mwen té sa kontiné ni lajwa an sèvis li”.

19. Kisa ou détèminé pou fè?

¹⁹ Jéhova vlé nou tout pou ni kouwaj menm kon Zadòk. (2 Tim. 1:7) Kanmenm, i pa vlé nou dépan asou kouway nou menm. Pito sa, Jéhova vlé nou dépan asou’y. Alò, lè’w adan an sitiwasyon èk ou bizwen kouwaj, kwiyé asou Jéhova. Èk ou sa ni asiwans-lan ki, Bondyé kay ba’w kouwaj menm kon Zadòk!​—1 Pita 5:10.