1-2. Si ou ni pou fè pli pwogwé pou ou sa kwalifyé pou batenm, pouki ou pa sipozé santi dékouwajé? (Gadé pòtwé-a ki asou kouvèti Gad-la.)

 SI OU vlé batizé sa sé on bon bagay toubonnman. Konsa, ès ou kwè ou pawé pou batizé? Si ou kwè sa, èk si sé ansyen-an dakò, pa tadé pou batizé népòt òpòtyounité-a ou twapé. Paski, lèʼw batizé Jéhova kay benniʼw èk ou kay ni on bèl lavi an sèvis li.

² Kanmenm, ès sé ansyen-an ében lòt moun ja diʼw, ou ni pou fè pli pwogwé avan ou batizé? Ében, ès ou wéyalizé sa pou kòʼw menm? Si sa sé sitiwasyonʼw, pa santi dékouwajé, mé chonjé, ki ou jenn ki ou an laj, ou sa fè pwogwé pou ou batizé.

3. Ki kwèsyon nonm-lan ki sòti an péyi Ifiyopiya té mandé Filip, èk ki kwèsyon nou pé mandé kò nou? (Twavay 8:36, 38)

³ Li Twavay 8:36, 38. Yon nonm ki té ni on gwo pozisyon an péyi Ifiyopiya mandé Filip: “Ki sa ki pou anpéché mwen wisivwè batenm?” Konsa, i a klè, nonm-lan vwéman té vlé batizé. Kanmenm, nou pé mandé kò nou: Ès nonm-lan té kwalifyé pou batenm?

4. Ki mannyè nonm Ifiyopiya-a té moutwé i té vlé kontiné apwann?

⁴ Avan nonm Ifiyopiya-a té jwenn épi Filip, lévanjil-la di, i “té sòti adowé Bondyé an Jérouzalèm”. (Twav. 8:27) Alò, magwé i té ka wèsté jis péyi Ifiyopiya, i té apwann konsèné sé lévanjil-la ki té ékwi an langaj Hibrou-a, èk i té aksèpté wilizyon sé Jwif-la. Alò, sa ka moutwé, nonm sala té enmen apwann konsèné Bondyé. Mé, magwé i té ja apwann tèlman bagay, i té vlé kontiné apwann. Nou sav sa, paski lè Filip té jwenn li asou chimen-an, lévanjil-la di nou, nonm-lan té ka li liv pwòfèt Izaya. (Twav. 8:28) Èk magwé lévanjil sala pa té ézé pou konpwann, nonm-lan té ka éséyé byen wèd pou konpwann li. Konsa, i a klè i pa té satisfè épi sa i té ja apwann i té vlé apwann plis toujou.

5. Ki sakwifis nonm Ifiyopiya-a té fè paski i té vlé adowé Jéhova?

⁵ Nonm Ifiyopiya-a té ni on gwo pozisyon an péyiʼy. I “té wèskonsab tout wichès Kandas, wenn Ifiyopiya”. (Twav. 8:27) Kanmenm, magwé i té ni on chay wèskonsabilité èk nou asiwé i té byen anbawasé, i fè tan pou adowé Jéhova. I pa té satisfè pou annèk apwann lavéwité-a, i apliké sa té ka apwann. Èk sa sé wézon-an i kité Ifiyopiya èk i alé jis Jérouzalèm pou adowé Jéhova an tanp-lan. San dout, voyaj sala té kouté nonm-lan an chay tan èk dépans. Mé népòt sa i té koutéʼy, nonm-lan té kay fè sakwifis-la, paski i té vlé adowé Jéhova.

6-7. Kisa nonm Ifiyopiya-a té apwann ki té édé lanmityéʼy pou Jéhova pou kontiné pwofité?

⁶ Filip té édé nonm Ifiyopiya-a konpwann bagay nèf ki té byen enpòtan an lévanjil-la. Pou ègzanp, Filip édéʼy konpwann sé Jézi ki Mèsaya-a. (Twav. 8:34, 35) Wi, nonm Ifiyopiya-a té kontan pou tann sa Jézi té fè ba li. Mé, konʼy apwann sé bagay nèf sala, kisa i té kay fè? Ès i té kay désidé pou wèsté an wilizyon sé Jwif-la? Janmen. Okontwè, nonm-lan désidé pou batizé kon on disip Jézi. Mé, kisa ki motivéʼy pou fè sa? Sé paski Ianmityéʼy pou Jéhova èk Jézi té pwofité. Konsa, paski Filip té wè nonm-lan té kwalifyé pou batenm, i batizéʼy la menm.

⁷ Alò, si ou swiv ègzanp nonm Ifiyopiya-a, ou sa fè ganm pou pwépawé pou batenm. Konsa menm kon nonm Ifiyopiya-a ou osi sa di: ‘Ki sa ki pou anpéché mwen pou wisivwè batenm?ʼ Mé chonjé, nonm Ifiyopiya-a té fè twa (3) bagay: (1) i té kontiné apwann, (2) i té apliké sa i té ka apwann, èk (3) lanmityéʼy pou Bondyé té kontiné pwofité. Bon, annou konsidiwé mannyè ou sa swiv ègzanp nonm Ifiyopiya-a pou ou kwalifyé pou batenm.

8. Kisa Jan 17:3 di ou ni pou fè?

⁸ Li Jan 17:3. Ès lévanjil sala té édéʼw fè disizyon-an pou étidyé Pawòl Bondyé? Wi, lévanjil sala té édé an chay di nou pou koumansé étidyé Pawòl Bondyé. Èk anfen, Bib-la ka di nou, nou kay ni pou kontiné apwann konsèné Bondyé. (Éklé. 3:11) Wi, menm si nou ka viv pou tout tan, nou kay toujou ni pou kontiné apwann konsèné Jéhova. Èk pli nou apwann konsèné Papa nou, sé pli nou kay vansé pwéʼy.​—Sam 73:28.

9. Kisa zapòt Pòl enkouwajé nou pou fè apwé nou apwann sé enstwiksyon senp-lan ki an Bib-la?

⁹ Lè nou té koumansé étidyé Bib-la, nou apwann bagay ki senp. Anfen, lè zapòt Pòl té ékwi sé fwè Hibrou-a, i kwiyé sé enstwiksyon senp sala “pwèmyé lison konmisyon Bondyé”. Mé, zapòt Pòl pa té ka di enstwiksyon senp sala pa té enpòtan, pito sa, i té ka moutwé i té menm kon lèt ki té ka nouwi on ti bébé. (Hib. 5:12; 6:1) An menm di tan-an, zapòt Pòl té enkouwajé sé fwè-a pou manjé gwo manjé. Sa vlé di, i té vlé yo fouyé pli fon an Pawòl Bondyé pou apwann plis konsènéʼy. Konsa, ès ou ja dévlopé on lapéti pou sé gwo manjé-a ki an Bib-la? Ès ou vlé kontiné fè pwogwé èk apwann plis konsèné Jéhova èk volontéʼy?

10. Pouki i difisil pou an chay di nou étidyé?

¹⁰ Pou an chay di nou, pou étidyé sé on bagay ki difisil. Mé pou ki wézon? Sé paski adan di nou pa té alé lékòl, konsa nou pa té apwann li èk ékwi. Èk jis adan di nou ki sa li èk ékwi, pa kontan étidyé. Alò, ès sé konsa ou ka santi? Ében, si sé konsa ou ka santi pa dékouwajé, Jéhova kay édéʼw. Chonjé i pawfé, èk i sé pli mèyè Titja-a nou sa janmen ni.

11. Poutji nou sa di, Jéhova vwéman sé ‘Gwan Titjaʼ nou?

¹¹ Sé Jéhova menm ki kwiyé kòʼy ‘Gwan Titjaʼwʼ. (Izay. 30:20, 21) Èk i ni bon wézon poutji i bay kòʼy tit sala, paski i ni pasyans, i janti, èk i ka byen konpwann chak di nou. (Sam 130:3) Osi, i pa ka fiksé asou fèblès nou, pito sa, i ka fiksé asou sa nou sa fè. Èk i pa ka janmen mandé nou pou fè plis pasé nou sa fè. Toujou chonjé, sé Jéhova ki fè sèvèl ou, èk sa sé on bèl kado. (Sam 139:14) Alò, sé Jéhova ki ban nou dézi-a pou apwann, konsa i vlé nou kontiné apwann pou tout tan, èk i vlé nou enjwi sa nou ka apwann. Konsa, apwézan sé lè-a nou ni “pou anvi” konnèt sé lavéwité-a ki an Bib-la. (1 Pita 2:2) Bon, kisa ki sa édéʼw? Ében ou sa fè plan konsèné diféwan bagay ou vlé fè pli mèyè, èvèk ou sa li ében kouté, èk étidyé Bib-la wégiliyèman. (Jòch. 1:8) Èk épi èd Jéhova, mizi an mizi, ou kay enjwi li ében kouté Pawòl li, èk osi ou kay enjwi apwann konsènéʼy.

12. Pouki i si tèlman enpòtan pou étidyé èk mèdité asou lavi èk minis Jézi?

¹² Bib-la ni lavéwité-a konsèné Jézi, konsa, i bon pou fè tan pou étidyé èk mèdité asou lavi èk minis Jézi. Mé, pouki i si tèlman enpòtan pou nou fè sa? Sé paski i pa posib pou nou adowé Jéhova, si nou pa swiv ègzanp Jézi èspwèsman an sé dènyé jou sala. (1 Pita 2:21) Anfen, Jézi di sé disip li-a, yo té kay èspéyansé pwòblenm. (Louk 14:27, 28) Mé, i té ni konfyans-lan ki, yo té kay wèsté fidèl pou Bondyé menm kon li. (Jan 16:33) Konsa, étidyé lavi Jézi èk éséyé pou swiv ègzanp li touléjou.

13. Kisa ou toujou ni pou mandé Jéhova, èk pouki?

¹³ Nou ni pou fè pli pasé étidyé Bib-la èk pwan nòlaj. Mé, pouki nou ka di sa? Sa sé paski nòlaj tousèl pa asé. Konsa, nou ni pou sèvi sa nou apwann konsèné Jéhova pou édé nou vansé pwéʼy, èk dévlopé bèl kawaktè, tèl kon lanmityé pou li èk lafwa an li. (1 Kòr. 8:1-3) Alò, padan ou ka kontiné apwann konsèné Jéhova, toujou mandéʼy pou baʼw pli lafwa. (Louk 17:5) Anfen, Jéhova ka toujou wéponn lapwiyè kon sa. Èk, lè ou apwann lavéwité-a konsèné Jéhova, sa kay édéʼw ni lafwa ki fò, èk sa kay édéʼw fè pwogwé.​—Jémz 2:26.

14. Ki mannyè zapòt Pita té moutwé i byen enpòtan pou apliké sa nou apwann? (Gadé pòtwé-a osi.)

¹⁴ Zapòt Pita té moutwé i byen enpòtan pou Kwityen kontiné apliké sa yo apwann. Èk sé pou wézon sala i mansyonnen wakont-la konsèné Nowa. Jéhova té di Nowa i té kay sèvi gwo dlo, pou détwi mové moun an tan sala. Alò, pou Nowa èk fanmiʼy annèk sav konsèné gwo dlo-a, pa té kay asé pou sové lavi yo. Chonjé, an 1 Pita 3:20, Pita té palé konsèné tan-an avan gwo dlo-a i di: “patan batiman-an té ka fèt-la.” Konsa, nou ka wè a klè an vèwsé sala Nowa èk fanmiʼy apliké sa yo té apwann hòd Jéhova, èk yo bati an gwo batiman. (Hib. 11:7) Pita osi di, sa Nowa fè menm kon batenm. An 1 Pita 3:21, zapòt Pita ékwi: “Dlo sala kon batenm-lan ki sové zòt apwézan-an.” Konsa, éfò-a ou ka fè pou pwépawé pou batenm, menm kon twavay-la Nowa èk fanmiʼy té ka fè, lè yo té ka bati batiman-an. Alò, kisa ou ni pou fè pou pwépawé pou batenm?

15. Kisa i vlé di pou wépanti?

¹⁵ Yonn an sé pwèmyé bagay-la nou ni pou fè avan nou batizé sé pou wépanti. (Twav. 2:37, 38) Sa vlé di, nou ni pou wigwété tout péché nou ja fè. Lè nou fè sa, sa kay édé nou fè chanjman an lavi nou. Konsa, ès ou doubout viv vyé lavi?, ès ou doubout sèvi tabak?, ès ou doubout sèvi mo sal? ében doubout fè lòt bagay ki ka déplè Jéhova? (1 Kòr. 6:9, 10; 2 Kòr. 7:1; Èfés. 4:29) Alò, si ou pʼòkò doubout sé bagay sala, kontiné fè éfò pou fè chanjman. Osi, ou sa mandé moun-lan ki ka étidyé Bib-la épiʼw ében sé ansyen-an an kongwigasyonʼw pou baʼw èd èk konsèy. Èvèk si ou sé an jenn moun èk ou ka viv épi pawanʼw, ou sa mandé yo pou édéʼw doubout népòt vyé labitid ki sa anpéchéʼy batizé.

16. Kisa nou sa fè pou édé nou vansé pli pwé Jéhova?

¹⁶ I vwéman enpòtan pou ou toujou fè bagay ki kay édéʼw pou vansé pli pwé Jéhova. Ou sa fè bagay tèl kon atandé mitin, èk wéponn kwèsyon an sé mitin-lan. (Hib. 10:24, 25) Èk lè ou kwalifyé pou pwéché épi kongwigasyonʼw, fè asiwé ou ka toujou fè tan pou pwéché. Chonjé, pli ou pwéché sé pli ou kay enjwiʼy. (2 Tim. 4:5) Mé, si ou sé an jenn moun ki ka viv épi pawanʼw, mandé kòʼw: ‘Ès pawan mwen toujou ni pou di mwen pou alé mitin ében alé pwéché? Ében ès mwen ka fè sé bagay sala paski mwen vwéman vlé fè yo?ʼ Bon, lè ou fè lidéʼw menm pou fè sé bagay sala, sa ka moutwé ou vwéman enmen Jéhova, èk ou ka mété lafwaʼw an li. Èk osi, sa ka moutwé ou ka apwésyé tout sé bagay-la Jéhova ka baʼw. Wi, Bondyé ka aksèpté népòt sakwifis nou fè kon an kado. (2 Pita 3:11; Hib. 13:15) Konsa, lè nou ba Jéhova an kado, èk i sòti ofon tjè nou, sa ka vwéman fè Jéhova kontan. (Gadé 2 Kòrint 9:7.) Osi, lè nou ba Jéhova pli mèyè nou, sa ka fè nou kontan.

17-18. Ki bèl kawaktè ki kay édéʼw pou kontiné fè pwogwé pou batizé? Èk pouki kawaktè sala enpòtan? (Pwovèb 3:3-6)

¹⁷ Konʼw ka pwépawé pou batenm, ou kay èspéyansé pwòblenm. Pou ègzanp, adan moun pé pwanʼw sèvi wizib, yo pé jis opozéʼw ében pèsikitéʼw. (2 Tim. 3:12) Osi, pitèt ou ka goumen wèd pou doubout an vyé labitid, mé délè ou ka tonbé an menm mové labitid-la. Ében délè ou pé jis pèd pasyans èk santi kontwayé paski i ka pwan twòp tan pou kwalifyé pou batenm. Alò, ki bèl kawaktè ki kay édéʼw pou kontiné fè pwogwé pou batizé? Sé lanmityé pou Jéhova. Wi, lanmityé pou Jéhova kay édéʼw kontiné fè pwogwé pou kwalifyé pou batenm.

¹⁸ Lanmityé pou Jéhova sé an bèl kawaktè. Anfen, sa sé pli bèl kawaktè-a ou sa ni. (Li Pwovèb 3:3-6.) Alò, lè lanmityéʼw pou Jéhova byen fò, ou sa ganyen a bout népòt pwòblenm ou pé èspéyansé. Bib-la ka toujou palé konsèné lanmityé fidèl-la Jéhova ka moutwé sèvant li. Sa vlé di, Jéhova pa kay janmen anbandonnen sèvant li ében doubout enmen yo. (Sam 100:5) Bib-la osi di nou, Bondyé fèʼw an imaj li. (Jen. 1:26) Alò, ki mannyè ou sa moutwé lanmityé fidèl menm kon Jéhova?

19. Kisa ou sa fè pou dévlopé pli apwésiyasyon pou tout sa Jéhova ja fè ba ou? (Galécha 2:20)

¹⁹ Pouʼw sa moutwé Jéhova lanmityé fidèl, ou ni pou dévlopé apwésiyasyon pou tout sa i ka fè ba ou. (1 Tèsa. 5:18) Alò, touléjou, i kay bon pou mandé kòʼw, ‘Ki mannyè Jéhova ja moutwé mwen i enmen mwen?ʼ Èk osi, lè ou ka pwédyé, mansyonnen sé diféwan bagay-la Jéhova fè ba ou, èk fè asiwé ou wimèsyéʼy. Èk toujou chonjé wézon-an Jéhova ka fè sé bagay sala ba ou, sé paski i vwéman enmenʼw. Èk sé konsa zapòt Pòl té santi. (Li Galécha 2:20.) Konsa, mandé kòʼw, ‘Ès mwen vlé moutwé Jéhova lanmityé déviwé?ʼ Alò, lanmityé pou Jéhova kay édéʼw pou kontiné goumen kont tantasyon èk pou aji épi népòt difikilté. Wi, lanmityé sala kay pouséʼw pou kontiné fè sé bagay-la ki kay édéʼw vansé pli pwé Jéhova.

20. Kisa ou ni pou fè pou dèdiké laviʼw bay Jéhova? Èk pouki disizyon sala si tèlman enpòtan?

²⁰ Kon tan ka pasé, lanmityéʼw pou Jéhova kay pouséʼw pou di an lapwiyè ki byen spésyal. Sa sé an lapwiyè koté ou kay dèdiké laviʼw bay Bondyé. An lapwiyè sala ou ka di Bondyé ou vlé adowéʼy pou tout tan. Osi, ou ka pwonmèt li ou kay adowéʼy ni lè bagay bon ni lè bagay mové. Èvèk ou pa janmen ni pou fè pwonmèt sala ankò. Anfen, disizyon sala sé pli enpòtan disizyon-an ou kay janmen fè, paski lè ou dèdiké laviʼw bay Jéhova, ou kay sèvant li pou tout tan. Sa vwé, lè ou dèdiké laviʼw bay Jéhova, sa sé an disizyon ki sèwyé. Mé an menm di tan i bon pou chonjé, on tout sé disizyon-an ou kay fè an laviʼw, disizyon-an pou dèdiké laviʼw bay Jéhova sé pli mèyè disizyon-an ou kay janmen fè. (Sam 50:14) Osi chonjé, Satan kay éséyé kwazé lanmityéʼw pou Papaʼw Jéhova, paski i vléʼw doubout sèviʼy. Kanmenm pa janmen kité Satan fè sa! (Jòb 27:5) Wi, lanmityéʼw pou Jéhova kay édéʼw tjenn pwonmèt ou pou adowéʼy pou tout tan. Èk an plis di sa, lanmityéʼw pou Jéhova kay édéʼw kontiné vansé pli pwéʼy pou tout tan.

21. Pouki nou sa di batenm sé koumansman-an èk pa finisman-an?

²¹ Apwé ou dèdiké laviʼw bay Jéhova, di sé ansyen-an on kongwigasyonʼw ou vlé batizé. Mé toujou chonjé, batenm sé koumansman-an pa finisman-an, paski èspwaʼw sé pou kontiné sèvi Jéhova pou tout tan. Alò, sé apwézan ou ni pou fòtifyé lanmityéʼw pou Jéhova. Pou ègzanp, fè plan pou fè pli an sèvis ou pou Jéhova, pou lanmityéʼw pou li vini pli fò jou apwé jou. Èvèk kon lanmityéʼw pou Jéhova ka vini pli fò, sa kay pouséʼw pou batizé. Alò, jou-a ou batizé-a kay an bèl jou. Mé, kon nou ja di, sa sé annèk koumansman-an pa finisman-an. Konsa, nou vwéman vlé lanmityéʼw pou Jéhova èk Gasonʼy Jézi kontiné pwofité pou tout tan!