1-2. Lè’y vini pou lapwiyè nou, kisa ki pé vini an lidé nou?

 ÈS OU janmen katjilé, si Jéhova ka wéponn lapwiyè’w? Si’w ja fè sa, sa pa anyen ki dwòl, paski an chay fwè èk sè ja katjilé asou kèstyon sala, sitou lè yo ka èspéyansé difikilté. Wi, lè nou ka soufè nou pé twapé’y pli difisil pou wè mannyè Jéhova ka wéponn lapwiyè nou.

² Konsa annou konsidiwé pouki nou sa ni konfyans ki, Jéhova ka wéponn lapwiyè sèvant li. (1 Jan 5:15) Nou kay konsidiwé sé kèstyon sala: Délè, pouki i pé sanm Jéhova pa ka wéponn lapwiyè nou? Èk, an ki diféwan mannyè Jéhova ka wéponn lapwiyè an tan nou jòdi?

3. Pouki Jéhova vlé nou palé épi’y an lapwiyè?

³ Bib-la ka ban nou asiwans-lan ki, Jéhova enmen nou an chay, èk nou ni an pil valè an zyé’y. (Hag. 2:7; 1 Jan 4:10) Èvèk, sé pou wézon sala i vlé nou pwédyé pou mandé’y èd. (1 Pita 5:6, 7) Wi, Jéhova vlé édé nou pou wèsté pwé’y, èk i vlé nou andiwé lè nou ka èspéyansé difikilté.

4. Ki mannyè nou sav Jéhova ka wéponn lapwiyè sèvant li? (Gadé pòtwé-a osi.)

⁴ Bib-la ni an chay ègzanp ki ka moutwé, Jéhova ka wéponn lapwiyè sèvant li. Ès la ni yon ègzanp ki ka vini an lidé’w? Yon ègzanp sé Wa David. Diwan lavi’y, i té ni an chay lèlmi ki té byen danjéwé. Èk souvan, i té ka pwédyé pou mandé Jéhova pou èd. Asou yon lokazyon, lè’y té ka plédé épi Jéhova pou édé’y, i di: ‘Dyé Jéhova, tann lapwiyè mwen. Kouté mwen, lè mwen sipliyé’w pou èd. Wéponn mwen paski ou fidèl èk ou ka toujou fè sa ki dwèt.’ (Sam 143:1) Jéhova wéponn lapwiyè David, èvèk i sové’y anba lanmen sé lèlmi’y-lan. (1 Sm 19:10, 18-20; 2 Sm 5:17-25) Sé pou sa David té sa di épi konfyans: ‘Jéhova pwé tout moun ki ka kwiyé asou’y.’ Nou osi sa ni menm konfyans sala.​—Sam 145:18.

5. An tan pasé, ès Jéhova té ka toujou wéponn lapwiyè sèvant li an mannyè-a yo té ka èspéyé? Ba yon ègzanp. (Gadé pòtwé-a osi.)

⁵ Jéhova pa ka toujou wéponn lapwiyè nou an mannyè-a nou té ka èspéyé. Sé sa ki té wivé zapòt Pòl. I té ni an pwoblenm ki té menm kon an pikan ki té ka ‘pitjé lachè’y,’ èvèk i té ka pwédyé konsèné pwoblenm-lan. Twa (3) fwa, i mandé Jéhova pou tiwé gwo pwoblenm sala an lavi’y. Ès Jéhova té wéponn sé lapwiyè sala? Wi, Jéhova wéponn. Mé i pa wéponn an mannyè-a zapòt Pòl té ka èspéyé. Pito Jéhova tiwé pwoblenm-lan, i bay zapòt Pòl fòs-la i té bizwen pou’y té sa kontiné wèsté fidèl.​—2 Kòr. 12:7-10.

6. Délè, pouki i pé sanm Jéhova pa ka wéponn lapwiyè nou?

⁶ Délè, Jéhova pé osi wéponn lapwiyè nou adan an mannyè nou pa té ka èspéyé. Mé nou sa asiwé, Jéhova konnèt pli mèyè mannyè-a pou édé nou. Wi, Jéhova sa “fè twòp plis pasé tout sa nou mandé ében katjilé.” (Èfés. 3:20) Sé pou wézon sala, Jéhova pé wéponn lapwiyè nou a lè-a, ében adan an mannyè nou pa té ka èspéyé.

7. Pouki nou pé ni pou chanjé sa nou ka pwédyé pou? Ba yon ègzanp.

⁷ Lè nou ka konpwann divwa Jéhova pli byen, nou pé ni pou chanjé sa nou ka pwédyé pou. Pou ègzanp, annou konsidiwé èspéyans fwè Martin Poetzinger. Touswit apwé fwè sala mayé, yo mété’y an pwizon adan an kanp Nazi pou pwizonnyé. An koumansman-an, i té ka mandé Jéhova pou tiwé’y an kanp-lan pou’y sa alé otjipé madanm li èk kontiné pwéché. Mé apwé dé (2) simenn i pa té wè pyès sin pou moutwé Jéhova té kay fè yo ladjé’y. Konsa, i chanjé sa’y té ka pwédyé pou. I koumansé di Jéhova: “Jéhova souplé, moutwé mwen sa ou vlé mwen fè.” Èk i koumansé katjilé asou sa sé lòt fwè-a an kanp-lan té ka èspéyansé. An chay an sé fwè sala té byen antjèt konsèné madanm yo épi ich yo. Konsa, fwè Poetzinger di Jéhova: “Jéhova mèsi pou ansayman nèf-la ou ban mwen-an. Édé mwen pou fòtifyé èk ankouwajé sé fwè mwen-an.” Èk sa sé ègzaktiman sa i fè pou an lòt nèf (9) lanné an sé kanp-lan!

8. Ki bagay enpòtan nou ni pou chonjé lè nou ka pwédyé?

⁸ La ni an bagay ki vwéman enpòtan pou chonjé lè nou ka pwédyé. Nou ni pou chonjé Jéhova ni an lè ki fiksé pou akonpli divwa’y, èk i kay sèvi Wéyòm li pou fè sa. Lè Jéhova akonpli divwa’y, i kay tiwé tout sé pwoblenm-lan ki ka annékòz nou pou soufè. Pwoblenm tèl kon dézas natiwèl, maladi, épi lanmò. (Dann. 2:44; Wév. 21:3, 4) Mé paditan nou ka èspéyé tan sala, Jéhova ka pèwmité Satan pou kondwi latè-a. b (Jan 12:31; Wév. 12:9) Si Jéhova té ka tiwé tout pwoblenm lézòm ka èspéyansé apwézan, èk tout bagay té ka maché byen asou latè-a, i té kay sanm Satan ka kondwi latè-a byen. Wi, nou ni pou èspéyé pou Jéhova akonpli adan sé bagay-la i pwonmèt pou fè-a. Mé sa pa vlé di Jéhova pa ka édé nou apwézan. Konsa annou konsidiwé adan sé bagay-la Jéhova ka fè pou édé nou.

9. Lè nou ni an disizyon pou fè, ki mannyè Jéhova sa édé nou? Ba yon ègzanp.

⁹ Jéhova ka ban nou lasajès. Jéhova pwonmèt pou ban nou lasajès-la nou bizwen pou fè bon disizyon. Èk vwéman, nou bizwen lasajès-la Bondyé ka bay, sitou lè nou ka fè disizyon konsèné bagay ki kay afèkté nou pou lèstan lavi nou. Pou ègzanp, lè nou ka désidé si sé pou mayé opa. (Jémz 1:5) Annou konsidiwé èspéyans yon sè ki pa mayé. Non’y sé Maria. c I té ka wann sèvis kon yon piyonnè wéglé, èk i té ka enjwi ansayman’y. Apwé on lè, i jwenn on fwè. Sè-a di: “Kon mwen épi fwè-a té ka vini bon jan, sé kon sa nou koumansé santi nou enmen yonn a lòt. Mwen té sav mwen té ni pou fè yon disizyon. Konsa mwen pwédyé an chay konsèné sitiwasyon-an, paski mwen sav mwen té bizwen èd Jéhova. Mé mwen té sav Jéhova pa té kay fè disizyon mwen ban mwen.” Sè Maria ka kwè Jéhova wéponn lapwiyè’y, èk i bay lasajès. Ki mannyè? Ében kon sè-a té ka fè wichach an sé piblikasyon nou-an, i twapé diféwan atik ki édé’y jwenn wépons pou sé kèstyon-an i té ni-an. Osi, manman Maria sé yon sè ki fidèl, èk Maria kouté bon konsèy manman’y té ba’y. Konsèy sala édé Maria pou katjilé byen asou santiman’y pou fwè-a. Finalman, Maria té sa fè an bon disizyon.

10. Silon Filipay 4:13 an Bib NWT, kisa Jéhova ka fè pou édé sèvant li? Ba yon ègzanp. (Gadé pòtwé-a osi.)

¹⁰ Jéhova ka ban nou fòs-la nou bizwen pou andiwé. Lè nou ka èspéyansé pwoblenm, Jéhova ka ban nou fòs-la nou bizwen pou andiwé, menm kon’y té fè bay zapòt Pòl. (Li Filipay 4:13 NWT.) Bon, annou konsidiwé mannyè Jéhova té édé yon fwè yo ka kwiyé Benjamin, pou andiwé anba sitiwasyon ki té byen difisil. Lè Benjamin té jenn, i épi fanmi’y pasé an chay tan an kanp an péyi Afwik. Sé kanp sala sété kanp pou moun ki té oblijé kité péyi yo pou lapéti ladjè ében lòt pwoblenm. Benjamin di: “Mwen té ka toujou pwédyé pou mandé Jéhova pou ban mwen fòs-la mwen bizwen pou fè sa ki dwèt an zyé’y. Jéhova wéponn lapwiyè mwen, èk i ban mwen lapé an tjè mwen épi an lidé mwen. Osi, i ban mwen kouwaj-la pou kontiné pwéché, èk i ban mwen sé piblikasyon-an pou édé mwen wèsté pwé’y.” Benjamin di ankò: “Lè mwen li èspéyans konsèné mannyè Jéhova té édé lòt fwè èk sè pou wèsté fidèl, sa ka fòtifyé détèminasyon mwen pou wèsté fidèl.”

11-12. Ki mannyè Jéhova pé sèvi sé fwè èk sè nou-an pou wéponn lapwiyè nou? (Gadé pòtwé-a osi.)

¹¹ Jéhova ka sèvi sé fwè èk sè nou-an pou wéponn lapwiyè nou. Swè-a avan Jézi mò, i pwédyé ofon tjè’y. Èk i plédé pou Jéhova pa kité sé moun-lan kondanné’y kon an nonm ki ka sali non Bondyé. Pito i fè sa Jézi té mandé’y pou fè, Jéhova voyé yonn a sé nanj-lan pou ankouwajé’y. (Louk 22:42, 43) An menm mannyè-a, lè nou pwédyé pou èd, Jéhova pé sèvi yon fwè ében yon sè pou kwiyé nou asou fòn-lan, ében pou vizité nou lakay nou pou ankouwajé nou. Konsa, i bon pou nou tout gadé pou lokazyon pou di sé fwè èk sè nou-an an ‘bèl ti pawòl’ pou ankouwajé yo, èk fè tjè yo kontan.​—Pwov. 12:25.

¹² Annou pwan ègzanp yon sè yo ka kwiyé Miriam. Déotwa simenn apwé mawi’y mò, Miriam té lakay li pa kò’y. I té twis èvèk i té dékouwajé. I té ka pléwé tèlman, i pa té sa konsolé kò’y, èk i té bizwen an moun pou palé épi. Mé Miriam di: “Mwen pa té ni fòs-la pou kwiyé pyèsonn, konsa mwen pwédyé bay Jéhova. Paditan mwen té ka pwédyé épi pléwé, téléfòn mwen sonnen. Sé an bon jan mwen ki té ka kwiyé mwen. I sé yon ansyen.” Ansyen sala épi madanm li konsolé Miriam. Miriam té asiwé, sé Jéhova ki fè fwè sala kwiyé’y.

13. Ba yon ègzanp ki ka moutwé mannyè Jéhova sa sèvi moun ki pa ka adowé’y pou wéponn lapwiyè nou.

¹³ Jéhova pé jis sèvi moun ki pa ka adowé’y pou wéponn lapwiyè nou. (Pwov. 21:1) Délè, Jéhova ka sèvi moun ki pa ka adowé’y pou wéponn lapwiyè sèvant li. Pou ègzanp, lè Néhimaya té vlé witounen Jérouzalèm pou édé wibati vil-la, i té ni pou mandé Wa Atèzèksis pèwmisyon. Mé avan i fè sa, i pwédyé bay Jéhova. (Néhi. 2:3-6) Jéhova wéponn lapwiyè Néhimaya, èk i touché tjè wa-a pou fè’y dakò pou fè sa Néhimaya té mandé’y-la. An menm mannyè-a, jòdi jou, Jéhova sa sèvi moun ki pa ka adowé’y pou wéponn lapwiyè nou, èk édé nou lè nou bizwen èd.

14. Kisa ou apwésyé an ègzanp Soo Hing? (Gadé pòtwé-a osi.)

¹⁴ Yon sè yo ka kwiyé Soo Hing ka kwè Jéhova té sèvi yon dòktè pou édé’y. Soo Hing ni an gason ki malad an tèt. Gason-an té adan an mové aksidan, èk Soo Hing épi mawi’y kité twavay yo pou yo sa otjipé’y. A kòz di sa, bagay té vini wèd paski yo pa té ni asé lajan pou fè sa yo té bizwen fè. Soo Hing di, i té ka santi akwèdi i pa té sa kontiné tjébé fò anba tout tèt cho sala. Konsa, Soo Hing ouvè tjè’y bay Jéhova an lapwiyè, èk i mandé’y pou èd. Èvèk yon dòktè désidé pou édé yo. Gwanmèsi dòktè sala, Soo Hing épi fanmi’y wisouvwè èd hòd gouvèdman-an, èk yo twapé an plas ki pa tè twòp chè pou yo wèsté. Apwé sa, Soo Hing di: “Nou wè mannyè Jéhova té édé nou an sitiwasyon sala. Vwéman, Jéhova sé Dyé-a ‘ki ka tann lapwiyè.’”​—Sam 65:2.

15. Kisa ki té édé sè Yoko pou wéyalizé Jéhova té ka wéponn lapwiyè’y?

¹⁵ Nòmalman, Jéhova pa ka wéponn lapwiyè nou adan an mannyè ki èstòdinè. Mé wépons-lan Jéhova ka ban nou, sé ègzaktiman sa nou bizwen pou nou sa wèsté fidèl pou li. Konsa, fè asiwé ou ka toujou gadé pou wè mannyè Jéhova ka wéponn lapwiyè’w. Yon sè yo ka kwiyé Yoko té ka kwè Jéhova pa té ka wéponn lapwiyè’y. Konsa, chak fwa i mandé Jéhova pou an bagay, i koumansé ékwi’y adan an liv. Tjèk tan apwé i gadé lis-la i té ékwi-a èk i wéyalizé, Jéhova té wéponn pwèskè tout lapwiyè’y. Anfen, Yoko wéyalizé Jéhova té jis wéponn adan sé lapwiyè-a i menm té ja obliyé. Konsa tanzantan, i bon pou nou pwan an ti tan èk katjilé asou sé diféwan mannyè-a Jéhova ka wéponn lapwiyè nou.​—Sam 66:19, 20.

16. Lè’y vini pou lapwiyè nou, ki mannyè nou sa moutwé nou ni lafwa? (Hibrou 11:6)

¹⁶ Nou ka moutwé nou ni lafwa lè nou pwédyé, èk osi lè nou aksèpté wépons-lan Jéhova ban nou, népòt mannyè i chwazi pou wéponn nou. (Li Hibrou 11:6.) Bon, annou konsidiwé ègzanp yon fwè épi madanm li. Non yo sé Mike épi Chrissy. Yo té ni dézi-a pou wann sèvis an Bèfèl. Mike di: “Nou plen fòm-lan pou twavay an Bèfèl plizyè fwa. Èk nou kontiné pwédyé konsèné dézi nou, mé yo pa janmen kwiyé nou.” Mike épi Chrissy té asiwé Jéhova té konnèt pli mèyè mannyè-a pou sèvi yo an sèvis li. Konsa, yo kontiné fè tout sa yo té pé bay Jéhova. Yo wann sèvis kon piyonnè wéglé koté ki té ni labizwen. An plis di sa, yo té ka édé asou diféwan pwojé konstwiksyon. Apwézan, yo ka wann sèvis kon ansyen-an pou sékyout-la. Mike di: “Jéhova pa té toujou wéponn lapwiyè nou an mannyè-a nou té ka èspéyé mé, i wéponn. Èk i fè sa adan mannyè ki té pli mèyè pasé nou té ka èspéyé.”

17-18. Silon Sam 86:6, 7, ki konfyans nou sa ni?

¹⁷ Li Sam 86:6, 7. David té ékwi an chay an sé Samz-lan. Èk i té ni konfyans ki, Jéhova té ka tann èk wéponn lapwiyè’y. Konsa, ou sa ni menm konfyans-lan David té ni. Sé ègzanp-lan nou konsidiwé an atik sala, ka ban nou asiwans-lan ki, Jéhova sa ban nou lasajès-la épi fòs-la nou bizwen pou nou sa andiwé. Jéhova sa osi sèvi sé fwè èk sè nou-an pou édé nou. Èk i sa jis sèvi moun ki p’òkò ka adowé’y pou édé nou.

¹⁸ Osi, magwé Jéhova pa ka toujou wéponn lapwiyè nou an mannyè-a nou ka èspéyé, nou sav i kay wéponn yo, èk i kay ban nou ègzaktiman sa nou bizwen a lè-a nou bizwen’y. Konsa, kontiné pwédyé bay Jéhova épi lafwa. Èvèk ni konfyans ki, Jéhova ka tann lapwiyè’w, i kay otjipé’w apwézan, épi an latè nèf-la ‘i kay satisfè dézi tout sa ki vivan.’​—Sam 145:16.