1. Kisa an chay di nou ka débat pou fè?

 NOU tout vlé fè fòs kò nou pou fè pli pou Jéhova èk fè tjè’y kontan. Konsa, nou pé désidé pou fè bagay tèl kon: kiltivé kawaktè Kwityen, li Bib-la touléjou, fè pli byen épi létid pèsonnèl nou, èk fè plis an minis-la. Pitèt la ni bagay ou vlé fè mé ou ka débat pou fè’y. Èben, pa santi dékouwajé. Ou pa adan sitiwasyon sala ou yonn. Pou ègzanp, fwè Philip té vlé pwédyé pli byen èk i té vlé pwédyé pli souvan. Mé i té wèd pou’y twouvé tan pou pwédyé. Sa sè Erika té vlé fè, sété pou wivé mitin pou alé an minis-la pli bonnè. Mé i té ka toujou wivé ta. Èk fwè Tomáš té éséyé plizyé fwa pou li Bib-la antyè. I di: “M’a ka enjwi li Bib-la. Pou twa fwa, mwen fè éfò-a; èk chak fwa mon ka wivé liv Livitikòs èk mwen ka doubout.”

2. Pouki nou pa sipozé vini dékouwajé si nou ka débat pou fè sé bagay-la nou vlé fè pou vini pli pwé Jéhova?

² Si ou ka débat pou fè sé bagay-la ou vlé fè pou vini pli pwé Jéhova, pa vini dékouwajé. Délè i ka pwan an chay tan èk éfò pou fè on bagay menm si bagay-la nou vlé fè-a senp. Mé éfò-a ou ka fè-a ka moutwé ou vwéman ka chéwi wilasyon’w épi Jéhova èk ou vlé plè’y. Alò, toujou chonjé, Jéhova ka apwésyé tout sa ou ka fè pou plè’y. Èk osi, Jéhova byen konnèt sa ou sa fè èk i pa ka mandé’w pou fè plis pasé sa. (Sam 103:14; Mayka 6:8) Konsa, lè’w ka désidé sa ou vlé fè, fè asiwé ou sa fè sé bagay-la ou vlé fè pou vini pli pwé Jéhova. Apwézan, annou diskité yonndé bagay ou sa fè pou édé’w fè sa ou vlé fè-a.

3. Pouki i vwéman enpòtan pou ni an dézi ki fò pou fè sé bagay-la nou vlé fè-a?

³ I vwéman enpòtan pou ni an dézi ki fò pou fè sé bagay-la nou vlé fè pou vini pli pwé Jéhova. Lè an moun ni an dézi ki fò pou fè an bagay, sa ka pousé’y pou twavay wèd pou fè’y. Nou sa konpawé sa épi mannyè-a van-an ka pousé an bato. Si van-an ka kontiné vanté, matlo-a kay wivé koté-a i ka alé-a. Èk si van-an byen fò, I kay wivé pli vit. An menm mannyè-a, si nou ni an dézi ki fò pou fè sé bagay-la nou vlé fè-a, sa ka pousé nou pou twavay wèd pou fè yo. David, an fwè ki ka wèsté an péyi El Salvador, di: “Lè’w ni an dézi ki fò pou fè an bagay, ou ka twavay pli wèd. Èk ou pa kay fè anyen anpéché’w fè sa ou ja désidé pou fè.” Alò, kisa ou sa fè pou fòtifyé dézi’w lè ou vlé fè an bagay?

4. Kisa nou sa mandé Bondyé pou? (Filipay 2:13) (Gadé pòtwé-a osi.)

⁴ Mandé Bondyé pou fòtifyé dézi’w. Jéhova sa sèvi lisentèspwi’y pou fòtifyé dézi’w pou fè sé bagay-la ou vlé fè-a. (Li Filipay 2:13.) Délè, nou ka chwazi pou fè an bagay paski nou sav nou sipozé fè’y. Mé, sa pa vlé di nou vwéman vlé fè’y. Sé sa ki té wivé sè Norina ki ka wèsté Uganda. Sè-a té vlé kondwi an létid Bib. Mé dézi’y pa té fò asé pou pousé fè’y paski I kwè I pa té an bon titja. Kisa ki té édé sè Norina? I di: “Touléjou mwen té ka mandé Jéhova pou fòtifyé dézi mwen pou kondwi an létid Bib. Èk an menm di tan-an, mwen té ka twavay wèd pou vini an pli mèyè titja. Déotwa mwa apwé, dézi mwen pou kondwi an létid Bib té vini pli fò. Èk menm lanné sala, mwen koumansé dé (2) létid Bib.”

5. Kisa nou sa mèdité asou ki sa édé nou fòtifyé dézi nou?

⁵ Mèdité asou sa Jéhova ja fè ba’w. (Sam 143:5) Zapòt Pòl té mèdité asou lagwas-la Jéhova té moutwé’y, èk sa fòtifyé dézi’y pou twavay pli wèd pou Jéhova. (1 Kòrint 15:9, 10; 1 Timòfi 1:12-14) An menm mannyè-a, lè’w mèdité asou sa Jéhova ja fè ba’w, sa ka fòtifyé dézi’w pou fè sé bagay-la ou vlé fè-a. (Sam 116:12) Annou konsidiwé sa ki té édé an sésé ki an péyi Honduras ki té vlé vini an piyonnè wéglé. Sésé-a di: “Mwen té katjilé asou mizi enmen Jéhova enmen mwen. I fè mwen vini an manm an fanmi’y. Èk Jéhova ka otjipé mwen èk I ka pwotéjé mwen. Lè mwen katjilé asou tout sé bagay sala, sa fòtifyé lanmityé mwen pou Jéhova èk sa pousé mwen pou twavay wèd pou koumansé piyonnè wéglé.”

6. Ki lòt bagay nou sa fè ki sa édé nou fòtifyé dézi nou?

⁶ Fiksé asou sé bennéfis-la nou kay twapé si nou fè sé bagay-la nou vlé fè-a. An pasay yonn, nou té palé konsèné sésé Erika. I té vlé alé mitin pou pwédikasyon-an bonnè. Ann konsidiwé sa ki té édé’y pou fè sa. I di: “Mwen wéyalizé lè mwen wivé mitin pou alé an minis-la ta, mwen té ka matjé an chay bagay. Mé lè mwen wivé bonnè, mwen té sa di sé fwè èk sè-a bonjou èk pasé an ti tan épi yo. An plis di sa, mwen té sa apwann sé bagay-la mwen té sa sèvi pou édé mwen enjwi minis-la èk pwéché pli byen.” Sésé Erika fiksé asou sé bennéfis-la i té kay twapé lè i wivé mitin pou alé an minis-la bonnè. Èk kon wézilta-a, sa pousé’y pou wivé mitin-lan bonnè. Bon. Ki bennéfis ou sa fiksé asou? Si ou vlé li Bib-la touléjou èben ou vlé pwédyé pli souvan, katjilé asou mannyè sa kay édé’w fòtifyé wilasyon’w épi Jéhova. (Sam 145:18, 19) Si ou vlé dévlopé on kawaktè Kwityen, katjilé asou mannyè-a i kay édé’w ni on pli mèyè wilasyon épi lòt moun. (Kòlòsé 3:14) Konsa, si la ni bagay nou vlé fè an sèvis Jéhova, ékwi sé wézon-an nou vlé fè sé bagay sala. Èk pa anni mété’y la. Toujou viwé gadé sa ou ékwi-a. Nou té mansyonnen fwè Tomáš an pasay yonn. Mi sé sa i di: “Lè mwen ni an chay wézon pou fè sa mon vlé fè-a, mwen ka twavay pli wèd pou fè’y.”

7. Kisa ki édé Julio èk madanm li pou fè pli an minis yo?

⁷ Pasé tan épi sé moun-lan ki kay ankouwajé’w pou fè sa ou vlé fè-a. (Pwovèb 13:20) Annou konsidiwé sa ki té édé Julio èk madanm li akonpli òbjèktiv yo pou fè pli an minis-la. Julio di: “Nou fè jan épi moun ki té kay ankouwajé nou pou fè pli an minis-la. Èk tanzantan, nou té kay diskité sa nou té vlé fè épi yo. An chay di yo, té ja akonpli sé menm bagay-la nou té vlé fè-a. Konsa, yo té sa ban nou bon konsèy. Souvan, jan nou té ka mandé nou ‘koumannyè bagay ka maché?’ Èk yo ka ban nou ankouwajman.”

8. Si nou ka èspéwé pou fè sé bagay-la nou vlé fè-a sèlman lè dézi nou fò, kisa ki kay fèt? (Gadé pòtwé-a osi.)

⁸ Sa vwé, délè nou pa ni dézi-a pou fè sé bagay-la nou vlé fè-a. Mé ès sa vlé di nou sipozé doubout? Mé non. Annou konsidiwé ègzanp sala: Imajiné ou sé on matlo asou on bato. Èk ou ka voyajé pou wivé on lòt péyi. Si van-an byen fò, i ka pousé bato-a wivé lòt péyi-a pli vit. Mé délè, van-an byen fò. Lòt lè, la ni ti van. Èk délè la pa ni pyès van. Konsa, ès ou kay dépan asou van-an tousèl pou édé’w wivé lòt péyi-a? Mé non. Adan bato ni machin, èk lòt ni saviyon. Alò, ou sa sèvi sé bagay sala pou édé’w kontiné pousé douvan! Konsa, nou sa konpawé dézi nou épi van-an. Menm kon van-an, sé pa touléjou dézi nou fò. Délè, nou pa ni pyès dézi pou fè sé bagay-la nou vlé fè-a. Èk si nou ka èspéwé pou fè sé bagay-la nou vlé fè-a sèlman lè dézi nou fò, nou pa kay janmen fè yo. Konsa, menm kon ou té kay sèvi machin-nan èben saviyon-an pou édé’w pousé douvan, ou sa twapé lòt mannyè pou kontiné fè sa ou vlé fè-a. Magwé sa pa kay ézé pou fè, nou kay ni tjè kontan lè nou akonpli sa nou vlé fè-a. Mé avan nou diskité sa nou sa fè pou édé nou pousé douvan épi òbjèktiv nou, annou wéponn on kèstyon moun pé mandé.

9. Kisa nou apwann hòd ègzanp zapòt Pòl?

⁹ Délè, on moun pé mandé, ‘Mwen sav Jéhova vlé nou ni tjè kontan èk i vlé nou sèvi’y épi tout tjè nou. Mé si mwen pa ni dézi-a pou fè sa mwen vlé fè-a, ès mwen sipozé kontiné éséyé fè’y?’ (Sam 100:2; 2 Kòrint 9:7) Èben, pou édé nou wéponn kèstyon sala, annou konsidiwé ègzanp zapòt Pòl. Pòl té di: “Mwen ka twété kò mwen wèd pou fè lachè mwen obéyi mwen.” (1 Kòrint 9:25-27) Konsa, nou wè, délè zapòt Pòl pa té ni dézi-a pou fè sa Jéhova té vlé’y fè-a. Mé i fòsé kò’y pou fè’y. Ès Jéhova té plè épi sèvis zapòt Pòl? Absoliman! Èk Jéhova benni zapòt Pòl pou tout éfò’y.​—2 Timòfi 4:7, 8.

10. Ki bennéfis nou ka twapé si nou kontiné twavay asou sé bagay-la nou vlé fè-a menm si nou pa ni dézi-a pou fè yo?

¹⁰ Menm kon Jéhova té plè épi zapòt Pòl, i kay plè épi nou si nou kontiné twavay asou sa nou vlé fè-a menm si nou pa ni dézi-a pou fè yo. Èk magwé nou pa toujou enmen aktivité-a, Jéhova kay plè épi nou paski i sav nou ka fè’y paski nou enmen’y. Èk menm kon Jéhova té benni Pòl, i kay benni nou osi. (Sam 126:5) Èvèk lè nou wè mannyè Jéhova ka benni nou, sa kay ban nou dézi-a pou fè sé bagay-la nou vlé fè-a. Mi sé sa Lucyna, yon sè ki sòti Poland, di: “Délè, m’a vlé alé pwéché. Sitou lè mwen las. Mé lajwa-a mwen ka santi apwé mwen pwéché sé on bèl kado hòd Bondyé.” Ègzanp sésé Lucyna ka moutwé nou a klè, lè nou wè bennédiksyon Bondyé, sa ka fòtifyé dézi nou. Konsa, annou konsidiwé sa nou sa fè si nou pa ni dézi-a pou fè sé bagay-la nou vlé fè-a.

11. Ki mannyè Jéhova sa édé nou kontwolé kò nou?

¹¹ Mandé Jéhova pou édé’w kontwolé kò’w. Lè an moun sa kontwolé kò’y sa vlé di i sa kontwolé santiman’y èk aksyon’y. Mé lè moun tann yo ni pou kontwolé kò yo, sa ki ka vini an lidé nou sé, yo ni pou pa fè sa ki mové. Mé sé pa sa tousèl i vlé di pou kontwolé kò nou. Nou bizwen kontwolé kò nou pou fè sa ki bon osi. Èspwèsman, si sé bagay-la nou vlé fè-a difisil, ében nou pa ni dézi-a pou fè yo. Èk chonjé, anpanmi sé bagay-la lèspwi Bondyé ka édé nou fè, sé pou kontwolé kò nou. Alò, mandé Jéhova pou ba’w lisentèspwi’y pou édé’w kontwolé kò’w. (Louk 11:13; Galécha 5:22, 23) Fwè David, nou mansyonnen an pasay twa-la (3), té èspliké mannyè lapwiyè té édé’y pou fè létid pèsonnèl li chak simenn. I di: “Mwen té mandé Jéhova pou édé mwen kontwolé kò mwen. Gwanmèsi èd Jéhova, mwen ka swiv an bon pwogwanm pou fè létid pèsonnèl mwen chak simenn. “

12. Ki mannyè Ékléziyastis 11:4 sa édé nou fè sé bagay-la nou vlé fè-a?

¹² Pa èspéyé pou sitiwasyon’w vini pawfé. An latè-a sala, nou kay toujou ni pwoblenm. Konsa, si nou ka èspéyé pou sitiwasyon nou vini pawfé, nou pa kay janmen fè sé bagay-la nou vlé fè-a. (Li Ékléziyastis 11:4.) An fwè, non’y sé Dayniel, di: “Sitiwasyon nou pa kay janmen pawfé. Konsa, nou anni ni pou koumansé fè sé bagay-la nou vlé fè-a.” Paul, an lòt fwè ki ka wèsté an péyi Uganda, ka ban nou an lòt wézon pouki nou pa sipozé éspéwé pou sitiwasyon nou vini pawfé. I di: “Lè nou éséyé fè sé bagay-la nou vlé fè-a magwé nou adan an sitiwasyon ki difisil, Jéhova kay édé nou.”​—Malakay 3:10.

13. Pouki i bon pou koumansé épi bagay ki pa twò wèd pou ou fè?

¹³ Koumansé épi bagay ki pa twò wèd pou’w fè. Délè, nou pa ni dézi-a pou fè sa nou vlé fè-a paski nou kwè, yo twò wèd pou nou fè. Konsa, si sa sé sitiwasyon’w, ès ou sa koumansé épi ti bagay mizi a mizi? Pa ègzanp, si dézi’w sé pou dévlopé an kawaktè Kwityen, éséyé pou moutwé kawaktè sala an ti bagay. Èben, si dézi’w sé pou li tout Bib-la, ou sa koumansé li yonndé vèwsé touléjou. Tomáš, fwè-a nou té palé konsèné an pasay yonn-lan (1), té vlé li tout Bib-la an yon lanné mé i té ka débat pou fè’y. I di: “Mwen wéyalizé kantité chapit-la mwen té vlé li pou yon jou té twòp pou mwen. Alò, mwen désidé touléjou mwen kay li déotwa vèwsé èk mèdité asou yo. Èk sé konsa mwen koumansé enjwi li Bib-la.” Paski Tomáš té ka enjwi li Bib-la, i koumansé pasé pli tan chak jou ka li’y. Finalman, i fè sa i té vlé fè-a, i li tout Bib-la. b

14. Ki difikilté nou pé èspéyansé?

¹⁴ Malèwèzman, menm si nou ni dézi-a, èben nou ka kontwolé kò nou, nou pé èspéyansé difikilté. Pou ègzanp, “bagay [nou] pa té ka èspéyé” pé anpéché nou fè sa nou vlé fè-a. (Ékléziyastis 9:11) Ében nou pé èspéyansé pwoblenm ki ka dékouwajé èk pwan kouway nou. (Pwovèb 24:10) Ében, paski nou pa pawfé, nou pé fè lèwè ki ka fè’y difisil pou akonpli òbdjèktif nou. (Ronm 7:23) Ében délè, nou anni las. (Mafyou 26:43) Mé kisa ki sa édé nou si kéchòy fèt ki ka fè’y difisil pou fè sé bagay-la nou vlé fè-a?

15. Si kéchòy fèt ki ka fè’y difisil pou nou akonpli òbdjèktif nou, ès sa vlé di nou ni pou doubout éséyé? (Sam 145:14)

¹⁵ Si kéchòy fèt ki ka fè’y difisil pou ou fè sa ou vlé fè-a, sa pa vlé di ou ni pou doubout. Bib-la di nou kay èspéyansé an chay pwòblenm. Mé i ka osi di, épi èd Jéhova, nou kay sa éwisi. (Li Sam 145:14.) Philip, fwè-a nou té mansyonnen an pasay yonn-lan, di: “Siksé pou mwen vlé di, magwé mwen doubout pou konmen fwa, mon ka kontiné twavay asou sa mwen vlé fè-a.” Èk ou chonjé David? I di: “Lè kéchòy fèt ki ka fè’y difisil pou mwen fè sa mwen vlé fè-a, mwen pa ka gadé’y kon on jennman. Mé pito, mwen ka wè’y kon on òpòtyounité pou mwen moutwé Jéhova mizi enmen mwen enmen’y.” Wi, lè nou kontiné fè sa nou vlé fè menm si nou ni difikilté, sa ka moutwé nou vwéman vlé plè Jéhova. Pa dé kontan Jéhova ka kontan lè’y wè éfò-a nou ka fè pou vini pwé’y!

16. Délè, lè nou pa sa fè sa nou vlé fè-a, kisa sa ka moutwé?

¹⁶ Apwann hòd sé bagay-la ki té anpéché’w akonpli òbdjèktif ou. Si ou pa té akonpli òbdjèktif ou, i bon pou’w katjilé asou sa ki té fèt èk mandé kò’w, ‘Kisa mwen sa fè pou anpéché sa fèt ankò?’ (Pwovèb 27:12) Kanmenm, i bon pou chonjé ki, lè nou pa sa fè sa nou vlé fè-a, délè sa ka moutwé ki, i té twò wèd pou nou fè. Si sa sé sitiwasyon’w, pwan an ti tan pou katjilé asou sa ou vlé fè-a pou wè si’y vwéman posib pou’w fè’y.  c Toujou chonjé, Jéhova enmen’w an chay èk i pa té kay janmen di ou pa vo anyen paski ou pa sa fè sé bagay-la ou té vlé fè-a.​—2 Kòrint 8:12.

17. Pouki nou toujou ni pou chonjé sa nou ja fè?

¹⁷ Pa janmen obliyé sa ou ja fè. Bib-la ka di nou an Hibrou 6:10: “Bondyé toujou ka fè sa ki dwèt. I pa kay obliyé sé twavay-la zòt fè-a.” Konsa, sé pou ou toujou chonjé sa ou ja fè. Alò, pwan tan pou katjilé asou tout sa ou ja fè. Pou ègzanp, pitèt ou té vlé dévlopé an bon wilasyon èpi Jéhova, èk ou fè’y. Pitèt ou té vlé pwéché pli, èk ou fè’y. Èben pitèt ou té vlé batizé, èk ou fè’y. Konsa, menm kon ou té fè sé bagay-la ou té vlé fè-a an tan pasé, ou sa fè sé bagay-la ou vlé fè pou vini pli pwé Jéhova.​—Filipay 3:16.

18. Kisa nou ni pou chonjé? (Gadé pòtwé-a osi.)

¹⁸ Wi, épi èd Jéhova, nou sa fè sé bagay-la nou vlé fè-a pou vini pli pwé’y. Èk menm kon on matlo ki tjè kontan lè i wivé koté-a i ka alé-a, nou kay ni tjè kontan lè nou akonpli sé òbdjèktif nou-a. Èk i bon pou nou chonjé, an chay matlo ka enjwi voyaj-la. Konsa, toujou chonjé pou fè tan pou wè mannyè Jéhova ka édé’w èk benni’w kon ou ka kontiné twavay pou fè sa ou vlé fè-a. Èk si ou pa ladjé, Jéhova kay benni’w plis toujou.​—Galécha 6:9.