1-2. (a) Ki bagay enpòtan on fwè ében on sè sipozé fè, avan yo koumansé gadé pou on moun pou yo mayé? (b) Kisa nou kay diskité an atik sala?

 ÈS OU té kay kontan mayé? Bon, lavéwité-a sé sa, on moun pa oblijé mayé pou yo sa ni tjè kontan. Mé, la ni an chay fwè èk sè, ni sa ki jenn ni sa ki an laj, ki té kay kontan pou mayé. Kanmenm, avan’w koumansé gadé pou on moun pou’w mayé, la ni sèten bagay enpòtan ou ni pou fè. Pou ègzanp, ou ni pou ni on bon wilasyon épi Jéhova, ou ni pou konnèt kò’w byen, èk ou ni pou adan an pozisyon pou’w otjipé moun-lan ou mayé épi-a. a (1 Kòr. 7:36) Si’w ja fè sé bagay sala avan’w mayé, i kay pli alèz pou’w ni siksé an mawiyaj ou.

² Mé bagay-la sé sa, i pa toujou ézé pou twapé on bon moun pou’w mayé. (Pwov. 31:10) Èk menm si ou jwenn on moun ou vlé konnèt pli mèyè, pitèt i pa ézé pou’w koumansé moutwé lantéwé an moun-lan, èk pasé tan épi yo pou’w vini konnèt yo pli mèyè. Konsa an atik sala, nou kay diskité ki sa on fwè ében on sè ki pa mayé sa fè pou yo jwenn on bon moun pou yo mayé, èk koumansé on wilasyon épi moun-lan. Nou kay osi wè, ki sa lézòt moun an kongwigasyon-an sa fè, pou sipòté fwè èk sè ki vlé mayé.

KISA KI SA ÉDÉ’W JWENN ON BON MOUN POU’W MAYÉ?

3. Kisa on fwè ében an sè ni pou konsidiwé lè yo ka gadé pou on moun pou yo mayé?

³ Si’w vlé mayé, i bon pou’w konnèt ki kalté moun ou vlé mayé, avan’w koumansé pasé tan épi on moun pou wè si’y bon pou zòt mayé. Paski si’w pa konnèt kisa ou vlé, ou pé koumansé pasé tan épi moun ki pa bon pou’w mayé, ében ou pé jis pèd chans-lan pou’w jwenn on moun ki bon pou’w mayé. Bon, lè’w sé yon Tèmwen Jéhova, népòt moun ou vlé mayé sipozé on fwè ében on sè ki batizé. (1 Kòr. 7:39) Mé, menm si on moun batizé, sa pa vlé di moun sala sé an bon moun pou’w mayé. Konsa, mandé kò’y sé kwèstyon sala: ‘Kisa mwen vlé akonpli an lavi mwen, èk an sèvis mwen pou Jéhova? Ki bon kawaktè Kwityen mwen vlé moun-lan mwen mayé épi-a ni? Ès mwen wézonnab an sa mwen vlé adan moun-lan mwen vlé mayé épi?’

4. Ki diféwan bagay adan fwè èk sè ki vlé mayé ka mansyonnen an lapwiyè yo?

⁴ Si’w vlé mayé, san dout ou ja palé épi Jéhova pou mandé’y pou édé’w jwenn on bon moun pou’w mayé. (Filip. 4:6) Èk non, Jéhova pa ka pwonmèt pou bay pyèsonn on madanm ében on mawi. Mé ou sa asiwé, Jéhova mélé épi’w. I konnèt santiman’w, i konnèt sa’w bizwen, èk i sa édé’w kon’w ka éséyé pou jwenn on bon moun pou’w mayé. Konsa, kontiné palé épi Jéhova an lapwiyè, èk di’y tout sa’w ka santi èk tout sa’w vlé. (Sam 62:8) Osi, ou sa mandé Jéhova pou ba’w lasajès épi pasyans. (Jémz 1:5) Annou pwan ègzanp John. b I sé on fwè hòd Lanméwik ki pa mayé. Èk i èspliké adan sé bagay-la i ka mansyonnen an lapwiyè’y. I di: “Mwen ka di Jéhova sé bèl kawaktè-a mwen ka gadé pou an sè-a mwen vlé mayé épi-a. Osi, mwen ka pwédyé pou òpòtyounité pou mwen jwenn on sè ki bon pou mwen mayé. Èvèk mwen ka mandé Jéhova pou édé mwen dévlopé sé bèl kawaktè Kwityen-an ki kay édé mwen pou vini an bon mawi.” Annou pwan an lòt ègzanp. Tanya, sé on sè hòd péyi Sri Lanka. I di: “Paditan mwen ka gadé pou on moun ki bon pou mwen mayé, mwen ka mandé Jéhova pou édé mwen wèsté fidèl pou li, pou ni yon atitid ki pozitiv, èk pou ni tjè kontan.” Konsa, menm si i ka pwan pli tan pasé ou té ka èspéyé pou’w jwenn on bon moun pou’w mayé, toujou chonjé, Jéhova pwonmèt i kay otjipé’w byen, èvèk i kay ba’w lanmityé-a épi antansyon-an ou bizwen.​—Sam 55:22.

5. Si’w sé on Kwityen ki p’òkò mayé èk ou vlé mayé, ki mannyè ou sa jwenn on moun ki enmen Jéhova pou’w mayé? (1 Kòrint 15:58) (Gadé pòtwé-a osi.)

⁵ Bib-la ka ankouwajé nou pou “toujou twavay wèd . . . bay Senyè-a.” (Li 1 Kòrint 15:58.) Sa vlé di, nou sipozé byen anbawasé an sèvis Jéhova. Mé, lè’w ka fè tout sa’w pé bay Jéhova, ou ka pasé pli tan épi an chay diféwan fwè èk sè ki ka osi fè tout sa yo pé an sèvis Jéhova. Konsa, apa di bon asosiyasyon-an ou kay enjwi épi sé fwè èk sè sala, ou kay ni bèl òpòtyounité pou’w jwenn lòt fwè èk sè ki pa mayé, èk ki enmen Jéhova. Èvèk kon’w kontiné fè tout sa’w pé bay Jéhova, ou kay ni tjè kontan.

6. Paditan on fwè ében on sè ki pa mayé ka gadé pou on bon moun pou yo mayé, ki pokosyon yo ni pou pwan?

⁶ Mé, si’w sé on fwè ében on sè ki pa mayé èk ou ka gadé pou on moun pou’w mayé, sé pou’w pwan bon pokosyon pou’w pa janmen kité sa vini bagay-la ki pli enpòtan an lavi’w. (Filip. 1:10) Toujou chonjé, ki ou mayé opa, sé wilasyon’w épi Jéhova ki kay ba’w lakontantman ki wéyal. Konsa, pa kité anyen distwé lidé’w, èk anpéché’w fiksé asou sa’w bizwen fè pou tjenn wilasyon’w épi Jéhova fò. (Maf. 5:3) Osi, paditan ou p’òkò mayé, ou pé ni pli tan pou’w fè pli bay Jéhova. (1 Kòr. 7:32, 33) Pou ègzanp, Jessica sé on sè hòd Lanméwik. Sè sala mayé lè’y té pwèskè kawant (40) lanné. Mé mi sé sa i di: “Avan mwen té mayé, mwen té ka tjenn kò mwen byen anbawasé an minis-la. Èvèk sa édé mwen pou wèsté kontanté, magwé mwen té vlé mayé.” Konsa, kon on moun ki p’òkò mayé, sèvi tan-an ou ni-an byen.

PWAN TAN’W POU ÒBZÒVÉ MOUN-LAN OU ANTÉWÉSÉ ANDAN-AN

7. Pouki i bon pou’w òbzòvé on moun avan’w di moun-lan ou antéwésé an yo? (Pwovèb 13:16)

⁷ Bon, si’w jwenn on moun èk ou ka kwè moun sala kay on bon moun pou’w mayé, kisa’w sipozé fè? Ès ou sipozé fè moun-lan konnèt, ou antéwésé an yo la menm? Ében Bib-la ka di, on moun ki savan, ka apwann nòlaj konsèné on bagay avan yo pwan aksyon. (Li Pwovèb 13:16.) Konsa, si la ni on moun ou antéwésé adan, i kay bon pou’w òbzòvé moun-lan byen avan ou palé épi yo. Pou ègzanp, ou sa pwan tan èk òbzòvé mannyè i ka twété sé fwè èk sè-a an kongwigasyon-an, manm fanmi’y, ében jan’y, avan ou désidé pou di moun-lan anyen. Yon fwè hòd péyi Netherlands yo ka kwiyé Aschwin di: “I pa ka pwan jè tan pou’w santi ou antéwésé adan on moun, mé sé santiman sala sa dispawèt byen vit osi. Konsa, si’w pwan tan’w pou òbzòvé moun-lan avan, ou pa kay koumansé on wilasyon épi on moun ou pa vwéman antéwésé adan.” An plis di sa, apwé’w òbzòvé moun-lan, ou pé jis wéyalizé moun sala sé pa on bon moun pou’w mayé.

8. Lè on moun ki pa mayé ka òbzòvé on moun i antéwésé adan, kisa’y sa gadé pou? (Gadé pòtwé-a osi.)

⁸ Lè’w ka òbzòvé on moun ou antéwésé adan san yo sav, kisa ki kay édé’w pou konnèt moun-lan pli mèyè? Ében, ou sa gadé pou wè mannyè moun-lan ka konpòté kò’y lè’y an sé mitin-lan, ében lè’y ka pasé tan épi sé fwè èk sè-a. Osi, ou sa òbzòvé ki moun ki jan’y. Èk Jézi té di, sa ki an tjè on moun sé sa ki ka sòti an bouch yo. Konsa, òbzòvé sa’y kontan palé konsèné. Sé bagay sala sa édé’w pou konnèt sèten bagay konsèné pèsonnalité moun-lan, kondwit li, èk wilasyon’y épi Jéhova. (Louk 6:45) I bon osi pou’w mandé kò’w kèstyon sala, ‘ès moun sala ni menm dézi-a mwen ni, lè’y vini pou sa mwen vlé akonpli an lavi mwen, èk an sèvis Jéhova?’ On lòt bagay ou sa fè, sé palé épi sé anyen-an an kongwigasyon moun-lan, ében lòt Kwityen ki matwité èk ki konnèt moun-lan byen. (Pwov. 20:18) Ou sa mandé yo konsèné wépitasyon moun-lan, épi kawaktè’y. (Rouf 2:11) Mé, kon’w ka òbzòvé moun-lan, pwan pokosyon pou’w pa fè ében di anyen ki kay anbawasé moun-lan, ében fè’y santi hont. Èvèk moutwé wèspé pou moun-lan. Konsa pa toujou pwi an pyé’y, èk pa fouyé kò’w twò fon an zafè moun-lan.

9. Avan’w di on moun ou antéwésé an yo, kisa’w ni pou fè asiwé?

⁹ Bon, pou konmen tan ou ni pou òbzòvé on moun avan’w di moun-lan ou antéwésé an yo? Ében sa sé an bagay ou ni pou katjilé byen, paskè si’w palé épi moun-lan twò vit, moun-lan pé kwè ou sé on moun ki pa ka pwan tan pou katjilé byen, avan ou fè on disizyon. (Pwov. 29:20) Èvèk si’w pwan twòp tan avan’w palé bay moun-lan, yo pé kwè ou sé on moun ki ka pwan twòp tan pou fè disizyon. (Éklé. 11:4) Konsa, katjilé sitiwasyon-an byen, paskè sé pa pou’w twò pwésé, mé sé pa pou’w pwan twòp tan nonplis. Èk chonjé, menm si ou antéwésé adan on moun, ou pa oblijé asiwé ou kay mayé épi moun-lan avan’w palé ba yo. Mé, ou ni pou fè asiwé ou pawé pou mawiyaj. Èvèk ou ni pou fè asiwé ou ka kwè, moun sala kay on bon moun pou’w mayé.

10. Si’w òbzòvé on moun antéwésé andan’w, mé ou menm pa antéwésé an moun-lan, kisa’w sipozé fè?

¹⁰ Si’w òbzòvé on moun antéwésé adan’w mé ou menm pa antéwésé an moun-lan, moutwé moun-lan pa aksyon’w, ou pa ni kalité lantéwé sala an yo. Èk moutwé moun-lan sa a klè, paskè, si’w fè ében di anyen pou fè on moun kwè ou vlé konnèt yo pli mèyè, lè ou sav ou pa antéwésé an moun-lan, sa sé on bagay ki pa bon.​—1 Kòr. 10:24; Èfés. 4:25.

11. Si’w ni wèskonsabilité-a pou gadé pou on bon moun pou mayé épi on jan’w ében on fanmi’w, kisa ou sipozé fè, èk kisa ou ni pou chonjé?

¹¹ An sèten kilti, sé pawan ében lòt gwanmoun an fanmi-an ki ka chwazi ki moun ich yo, ében moun an fanmi yo kay mayé. Èk la ni lòt kilti koté, fanmi on moun ki pa mayé ében jan’y, ka gadé pou on moun yo kwè ki kay bon pou moun-lan mayé, èvèk yo ka fè awanjman pou sé dé (2) moun-lan jwenn, pou wè si yo vlé pasé tan ansanm pou konnèt yonn a lòt pli mèyè. Konsa, si’w ni wèskonsabilité-a pou gadé pou on bon moun pou mayé on jan’w ében on fanmi’w, ou ni pou fè asiwé ou konnèt kisa jan’w ében fanmi’w vlé. Mé, ou osi ni pou fè asiwé ou konnèt kisa moun-lan ou twapé ba yo-a vlé. Èk lè’w jwenn on moun ou kwè ki kay bon pou jan’w ében fanmi’w mayé, éséyé pou vini konnèt moun sala byen. Fè tout sa’w pé pou’w konnèt pèsonnalité moun-lan, épi kawaktè’y. An plis di sa, ou ni pou éséyé pou konnèt ki kalité wilasyon moun-lan ni épi Jéhova. Paskè on bon wilasyon épi Jéhova otan pli enpòtan pasé lajan, endikasyon, ében gwo pozisyon. Èvèk toujou chonjé, menm si ou ka gadé pou on moun pou jan’w ében fanmi’w mayé, ou pa sa fè disizyon yo ba yo. Ou pé édé yo pou jwenn yonn a lòt, mé sé yo ki ni pou désidé si yo kay mayé yonn a lòt opa.​—Gal. 6:5.

MANNYÈ POU KOUMANSÉ PASÉ TAN ÉPI ON MOUN POU’W KONNÈT LI PLI MÈYÉ

12. Si ou vlé koumansé pasé tan épi on moun pou’w vini konnèt yo pli mèyè, ki mannyè ou sa fè moun-lan konnèt sa?

¹² Si ou vlé koumansé pasé tan épi on moun pou’w vini konnèt li pli mèyè, ki mannyè ou sa fè moun-lan konnèt sa? c Ében ou sa fè awanjman pou’w palé épi moun-lan, swé fas a fas adan an plas piblik, ében asou téléfòn-lan. Di moun-lan, ou antéwésé an li, èk ou vlé konnèt li pli mèyè. Èvèk lè’w ka palé épi moun-lan, palé fèplé èk adan on mannyè ki klè. (1 Kòr. 14:9) Si moun-lan di’w, i bizwen pwan tan pou’y katjilé avan i ba’w on wépons, bay moun-lan kantité tan-an i bizwen pou fè sa. (Pwov. 15:28) Èvèk si moun-lan di’w i pa vlé’w, ében i pa vlé pasé tan épi’w pou konnèt ou pli mèyè, ou ni pou wèspèkté disizyon moun-lan.

13. Si on moun di’w yo antéwésé an ou, kisa’w sa fè? (Kòlòsé 4:6)

¹³ Si on moun vini di’w yo antéwésé an ou, ében yo vlé pasé tan épi’w pou vini konnèt ou pli mèyè, kisa’w sa fè? Ében, i bon pou chonjé, moun-lan pitèt té bizwen ni an chay kouwaj pou yo sa di’w sa, konsa twété moun-lan épi jantiyès èk wèspé. (Li Kòlòsé 4:6.) Si’w bizwen pwan an ti tan pou katjilé avan’w bay moun-lan on wépons, di moun-lan sa. Mé, éséyé pou pa pwan twòp tan avan’w wéponn moun-lan. (Pwov. 13:12) Èk si’w pa antéwésé an moun-lan, fè asiwé ou di moun-lan sa a klè, èk adan on mannyè ki janti. Annou konsidiwé ègzanp yon fwè hòd péyi Austria. Non’y sé Hans. Lè on sè té apwoché’y pou di’y i antéwésé adan’y, mi sé sa i fè. I di: “Mwen palé bay sè-a adan an mannyè ki té fèplé. Mé, mwen fè’y épi jantiyès. Èvèk mwen bay wépons mwen la menm, paskè mwen pa té vlé’y kwè mwen té antéwésé adan’y. Èk mwen pa té vlé’y kwè mwen té kay chanjé lidé mwen nonplis, konsa apwé sa, mwen pwan bon pokosyon an mannyè-a mwen té ka aji épi sè-a.” Mé, si’w antéwésé an moun-lan, èk ou vlé koumansé pasé tan épi yo pou vini konnèt yo pli mèyè, di moun-lan sa. Èk palé épi moun-lan konsèné kisa ou vlé fèt diwan tan-an zòt ka vini konnèt yonn a lòt pli mèyè. Silon kilti zòt ében lòt sitiwasyon, ou épi moun-lan pé ni diféwan lidé asou sa.

KISA NOU SA FÈ POU SIPÒTÉ FWÈ ÈK SÈ KI PA MAYÉ?

14. Ki mannyè nou sa ankouwajé fwè èk sè ki pa mayé, pa pawòl nou?

¹⁴ Bon. Ki mannyè nou sa ankouwajé èk sipòté fwè èk sè ki pa mayé, mé ki vlé mayé? Yon mannyè nou sa fè sa, sé lè nou pwan pokosyon épi sa nou di yo. (Èfés. 4:29) Pou ègzanp, nou sa mandé kò nou sé kwèstyon sala: ‘Ès mwen ka gaskonnen fwè èk sè ki vlé mayé? Lè mwen wè on fwè ki pa mayé èk on sè ki pa mayé ka palé, ès mwen ka katjilé yo enmen yonn a lòt?’ (1 Tim. 5:13) An plis di sa, sé pa pou nou janmen fè fwè èk sè ki pa mayé santi akwèdi, sé paski yo ni on défo, ében yo pa bon asé, ki fè on moun p’òkò mayé épi yo. Menm fwè-a nou té mansyonnen an paragraf twèz-la di, la ni fwè ki ka mandé’y: ‘Pouki ou p’òkò mayé? Chonjé, ou pa tèlman jenn ankò.’ Pawòl kon sa ka fè sé fwè èk sè sala santi, moun pa ka apwésyé yo, èk i ka mété pli prèchò asou yo pou fè yo mayé. Pito nou fè sa, ès i pa té kay pli mèyè pou nou gadé pou lokasyon pou ankouwajé sé fwè èk sè sala?​—1 Tèsa. 5:11.

15. (a) An ling épi pwensip-la ki an Ronm 15:2, kisa nou sipozé konsidiwé avan nou édé on fwè ében on sè pou twapé on moun pou yo mayé? (Gadé pòtwé-a osi.) (b) Ki bèl ti pwen ou apwésyé an vidéyo-a?

¹⁵ Délè, nou pé gadé yon sè ében yon fwè ki pa mayé, èk nou pé di an lidé nou, ‘A! sè sala té kay fè an bon madanm pou tèl fwè, ében fwè sala té kay fè on bon mawi pou tèl sè.’ Adan an sitiwasyon kon sa, kisa nou sipozé fè? Ében Bib-la di, nou sipozé konsidiwé santiman lézòt. (Li Ronm 15:2.) Èk chonjé, chak moun épi chak sitiwasyon diféwan. Pou ègzanp, an chay fwè èk sè ki pa mayé pa vlé pyèsonn gadé pou moun ba yo pou yo mayé. Nou sipozé wèspèkté sa. (2 Tèsa. 3:11) Èvèk la ni fwè èk sè ki té kay kontan pou nou édé yo jwenn on bon moun pou yo mayè, mé nou ni pou pwan pokosyon pou pa fouyé né nou an zafè moun. Konsa èspéyé jistan moun-lan mandé’w pou èd, avan’w koumansé gadé pou moun ba yo. d (Pwov. 3:27) La osi ni fwè èk sè ki simyé jwenn on moun paditan yo ka pasé tan épi an gwoup fwè èk sè, pito on moun éséyé pou mété yo ansanm. An ling épi sa, Lydia, yon sè ki pa mayé hòd péyi Germany di: “Si la ni on sè èk on fwè ou kwè ki kay bon ansanm, ou sa annèk envité toulédé pou pasé tan épi an gwoup fwè èk sè. Ou kay ba yo chans-lan pou yo jwenn yonn a lòt, èvèk yo kay désidé kisa pou fè apwé sa.”

16. Kisa fwè èk sè ki pa mayé sipozé chonjé?

¹⁶ I bon chonjé, ki nou mayé opa, nou tout sa ni on bon lavi. (Sam 128:1) Konsa, si’w vlé mayé mé ou p’òkò jwenn on bon moun pou’w mayé, kontiné pou fiksé asou sèvis ou pou Jéhova. Sin Yi sé on sè hòd péyi Macao. Mi sé sa i di: “Lè’w katjilé kantité tan ou kay sa pasé épi moun-lan ou mayé épi an pawadi-a, tan-an ou ka pasé kon an moun ki pa mayé apwézan, byen kout. Konsa, enjwi tan-an ou ni apwézan kon an moun ki p’òkò mayé, èk sèvi tan sala byen.” Bon, ès ou ja ka pasé tan épi on moun pou’w vini konnèt yo pli mèyè? An lòt atik-la nou kay diskité ki mannyè sa sa édé’w pou fè on bon disizyon lè’y vini pou mawiyaj.