1. Ki lison ki enpòtan Jéhova té enstwi Abrahanm?

 AN CHAY lanné ki pasé, Bondyé té sèvi an nanj pou di Abrahanm i té kay détwi vil Sòdonm épi Gomòra. Magwé Abrahanm té ni lafwa ki fò an Bondyé, lè i tann sa, sa té vwéman difisil pou’y konpwann. Alò, i mandé Bondyé: ‘Ès ou kay vwéman détwi bon moun ansanm épi lé méchan? . . . Ès Jij tout latè-a pa kay fè sa ki jis?’ Konsa, Jéhova moutwé bon jan’y Abrahanm pasyans, èk i wédé’y apwann an lison ki byen enpòtan. Lison-an sé sa; Bondyé pa kay janmen détwi moun ki dwèt. Èk nou tout ka twapé bennéfis èk konsolasyon an lison sala jòdi jou.​—Jen. 18:23-33.

2. Ki mannyè nou sa asiwé Jéhova ka toujou fè sa ki dwèt èk i ka moutwé mizèwikòd lè i ka jijé moun?

² Lè Jéhova ka jijé moun, i ka toujou fè sa ki dwèt èk i ka moutwé mizèwikòd. Ki mannyè nou sav sa? Ében nou sav sa paski ‘Jéhova ka wè sa ki an tjè’ moun. (1 Sm 16:7) Anfen, sé li sèlman ki vwéman konnèt ‘sa ki an tjè tout lézòm’. Ès sa pa èstòdinè? (1 Wa 8:39; 1 Kw. 28:9) Wi, Jéhova pli savan pasé nou. Alò, nou pa kay toujou byen konpwann pouki Jéhova ka fè sèten bagay. Èk zapòt Pòl di konsèné Jéhova an Ronm 11:33: “Ki moun ki sa èspliké jijmanʼy?”

3-4. Ki kwèsyon nou pé mandé, èk kisa nou kay diskité an atik sala? (Jan 5:28, 29)

³ Menm si nou konnèt Jéhova ka toujou fè sa ki dwèt, délè nou pé ni kwèsyon tèl kon sa Abrahanm té mandé. Pou ègzanp nou pé mandé: ‘Ès i posib moun Jéhova té détwi an tan Sòdonm épi Gomòra kay viwé viv ankò? Ès i posib adan di yo kay wésisité lè ‘moun ki mové kay wésisité’?’​—Twav. 24:15.

⁴ Annou diskité sa nou konpwann konsèné wézèwèksyon-an. Nou té wisivwè chanjman an lakonpwann nou konsèné moun ki kay “wésisité èk [ki] kay ni lavi étonnèl” èvèk sa ki “kay wésisité èk [ki] kay jwenn kondannasyon.” a (Li Jan 5:28, 29.) Mé la ni pli chanjman nèf, èk nou kay diskité yo an atik sala èvèk an lòt atik-la. Pwèmyé, nou kay konsidiwé sa nou pa konnèt konsèné jijman Jéhova, èk apwé nou kay konsidiwé sa nou konnèt.

SA NOU PA KONNÈT

5. Kisa nou té ka di an tan pasé konsèné sé moun-an Jéhova té détwi an Sòdonm épi Gomòra?

⁵ An tan pasé, sé piblikasyon nou-an té ka diskité sa ki ka wivé moun Jéhova jijé kon moun ki mové. Nou té ka di, moun Jéhova détwi kon sé moun-an an Sòdonm épi Gomòra pa kay wésisité. Mé apwé Pwensipal Konmité-a fè an chay lapwiyè èk an chay wichach asou sitiwasyon sala, nou wéyalizé nou pa sa di sé moun sala pa kay wésisité. Konsa, pouki wézon nou ka di sa?

6. (a) Ki ègzanp nou ni an Bib-la koté Jéhova té jijé moun ki té mové? (b) Kisa nou pa konnèt konsèné sé mové moun sala?

⁶ La ni plizyè wakont an Bib-la ki ka moutwé koté Jéhova té jijé moun ki té mové. Pou ègzanp, apa di Nowa èk fanmi’y, Jéhova té détwi tout sé moun-lan an latè-a an Déliz-la. Osi, Jéhova sèvi sé jan Izwayèl-la pou détwi sèt (7) diféwan nasyon ki té ka viv an Tè Pwonmèt-la. Èk adan yon swè Jéhova sèvi yon nanj pou tjwé yon san katwiven senk mil (185,000) sòlda, an lawmé Asiriya. (Jen. 7:23; Dito. 7:1-3; Izay. 37:36, 37) Konsa, ès Bib-la ka di nou Jéhova désidé pou tjwé tout sé moun sala pou tout tan, èk i pa kay janmen wésisité pyès di yo? Non. Bib-la pa ka di nou sa. Poutji nou sa di sa?

7. Kisa nou pa konnèt konsèné sé moun-lan ki té détwi an Déliz-la, èk an Tè Pwonmèt-la? (Gadé pòtwé-a.)

⁷ An sé ègzanp-lan nou mansyonnen-an, nou pa konnèt si Jéhova té jijé chak an sé moun sala konplètman, ében pou tout tan. Osi, nou pa konnèt si sé moun sala té ni yon òpòtyounité pou konnèt konsèné Jéhova èk pou wépanti. Wi, sé vwé, Bib-la ka di nou Nowa “té ka pwéché ka di moun sipozé viv mannyè Bondyé vlé yo viv-la.” (2 Pita 2:5) Mé kanmenm, Bib-la pa ka di nou Nowa té éséyé pwéché bay chak moun asou latè-a paditan i té ka bati gwo batiman-an. Osi, nou pa sav si tout sé moun méchan-an ki té ka viv an Tè Pwonmèt-la té ni òpòtyounité-a pou apwann konsèné Jéhova èk pou chanjé lavi yo.

8. Kisa nou pa konnèt konsèné sé moun-lan an Sòdonm épi Gomòra?

⁸ Bon, annou konsidiwé sé moun-lan Jéhova té tjwé lè i té détwi Sòdonm épi Gomòra. Bib-la ka di nou, Lòt, an bon nonm, té ka viv anpami yo. Kanmenm nou pa sav si Lòt té pwéché ba yo tout. Sé vwé, sé moun sala té vwéman mové. Kanmenm, ès chak di yo té konnèt diféwans-lan ant sa ki bon èk sa ki mové? Ében, i byen posib adan di yo pa té konnèt diféwans-lan. Ès ou chonjé sa Bib-la ka di konsèné gwoup-la ki té vlé anvyolé sé étwanjé-a ki té vini lakay Lòt? Bib-la ka di, gwoup-la té ni ‘tibway èk gwan nonm’. (Jen. 19:4; 2 Pita 2:7) Alò i ka sanm sé moun-lan an Sòdonm té lévé adan mové sitiwasyon sala. Sé sa yo té abitwé épi, èk an chay di yo pa té janmen ni òpòtyounité-a pou apwann konsèné Jéhova èk wèg li. Alò, ès nou sa di, Jéhova, Dyé-a ki plen mizèwikòd, pa kay wésisité pyès an sé moun sala? Non, nou pa sa di sa. Wi, Jéhova té ni dwa-a pou détwi sé moun sala paski yo té mové. Jéhova té jis di Abrahanm, la pa té ni pa menm dis (10) nonm ki té bon an vil-la. (Jen. 18:32) Kanmenm, ès nou sa di, pyès adan yo pa kay witounen anpami sé mové moun-lan ki kay wésisité-a? Non, nou pa sa di sa!

9. Kisa nou pa konnèt konsèné Sòlomonn?

⁹ Bib-la osi ni wakont konsèné moun ki té bon ki doubout sèvi Jéhova. Yonn an sé moun sala sété Wa Sòlomonn. Sòlomonn té konnèt Jéhova èk mannyè pou adowé’y. Èvèk Jéhova benni Sòlomonn an chay. Kanmenm pli ta an lavi Sòlomonn, i koumansé adowé fo dyé. Konsa, sa fè Jéhova byen faché. Èk a kòz di péché Sòlomonn, tout nasyon Izwayèl soufè pou plizyè san lanné. Lè Sòlomonn mò, Bib-la di, yo ‘téwé’y ansanm épi ayèl li’. Èk anpami sé ayèl sala, sété nonm fidèl-la Wa David. (1 Wa 11:5-9, 43; 2 Wa 23:13) Mé magwé Bib-la di yo téwé’y épi ayèl li, ès èspwèsyon sala ka ba nou asiwans-lan ki, Jéhova kay wésisité Sòlomonn? Non, Bib-la pa ka di sa. Adan moun kwè Sòlomonn kay wésisité paski Bib-la di an Ronm 6:7 “péché pa sa kondwi an moun ki ja mò ankò.” Sa vwé. Mé kanmenm, sa pa vlé di tout moun ki ja mò kay wésisité. Anfen, paski an moun ja mò, sa pa vlé di i ni dwa-a pou viv ankò. Chonjé, wézèwèksyon-an sé an kado hòd Jéhova, èk i kay sèlman bay moun i vlé bay òpòtyounité-a pou sèvi’y pou tout tan bèl kado sala. (Jòb 14:13, 14; Jan 6:44) Alò, ès Sòlomonn kay wisouvwè bèl kado sala? Ében, nou pa konnèt wépons-lan pou kèstyon sala. Sé Jéhova ki konnèt si Sòlomonn kay wésisité opa. Mé sa nou asiwé, sé sa: Jéhova kay fè sa ki dwèt.

SA NOU KONNÈT

10. Silon Izikèl 33:11, ki mannyè Jéhova ka santi lè’y ni pou détwi moun? (Gadé pòtwé-a osi.)

¹⁰ Li Izikèl 33:11. An sé lévanjil-la, Jéhova ka di nou mannyè i ka santi lè’y ni pou détwi lézòm. Osi, zapòt Pita ékwi pwèskè menm bagay-la pwofèt Izikèl té ékwi. Zapòt Pita di: “[Jéhova] . . . pa vlé pyèsonn péwi.” (2 Pita 3:9) Vwéman, sé pawòl sala ka konfòté nou. Alò, nou sav Jéhova pa kay détwi on moun pou tout tan, si i pa ni an bon wézon pou’y fè sa. Wi, Jéhova plen mizèwikòd, èk i toujou pawé pou moutwé moun mizèwikòd lè’y wè la ni bon wézon pou’y fè sa.

11. Ki moun ki pa kay wésisité, èk ki mannyè nou sav sa?

¹¹ Kisa nou konnèt konsèné moun ki pa kay wésisité? Ében Bib-la ka ban nou déotwa ègzanp. b Pou ègzanp, Jézi di Jida Iskariyòt pa kay wésisité. (Mak 14:21; gadé osi Jan 17:12 c) Wi, Jida té sav sa i té fè-a té kont Jéhova èk Gason’y, mé i fè’y kanmenm. (Gadé Mak 3:29 d) Osi, Jézi té di adan mèt wilizyon ki té ka òpozé’y, té kay mò èk yo pa té kay twapé an wézèwèksyon. (Maf. 23:33) Èk an plis di sa, zapòt Pòl té ékwi konsèné apòsta ki pa wépanti. Èvèk i di yo pa kay twapé an wézèwèksyon.​—Hib. 6:4-8; 10:29.

12. Kisa sa nou konnèt konsèné mizèwikòd Jéhova? Bay an ègzanp.

¹² Kon nou ja diskité, Jéhova plen mizèwikòd èk i “pa vlé pyèsonn péwi”. Mé ki mannyè i ja moutwé adan moun ki té fè péché ki gwav mizèwikòd? Pou ègzanp Wa David té fè péché ki gwav, tèl kon adiltè èk i tjwé an moun ki té innosan. Mé David té wépanti, alò Jéhova moutwé’y mizèwikòd èk i pawdonnen’y. (2 Sm 12:1-13) An lòt ègzanp sé Wa Mannasa. Pou pwèskè tout lavi’y i té fè an chay mové bagay. Mé Jéhova moutwé’y mizèwikòd èk i pawdonnen’y paski i té wépanti. (2 Kw. 33:9-16) Konsa sé ègzanp sala ka fè nou wè, Jéhova ka moutwé moun mizèwikòd sèlman si la ni bon wézon pou’y fè sa. Anfen, Jéhova kay wésisité moun ki té fè péché ki gwav si yo té wépanti.

13. (a) Pouki Jéhova té moutwé jan Ninivè mizèwikòd? (b) Kisa Jézi té di konsèné jan Ninivè?

¹³ Nou osi konnèt mannyè Jéhova té moutwé jan Ninivè mizèwikòd. Pou ègzanp, Bondyé té di Jonna: ‘Mwen ja wè tout sé mové bagay-la yo ka fè-a.’ Mé lè yo té wépanti hòd péché yo, Jéhova té pawdonnen yo. Anfen Jéhova té ni pli mizèwikòd pasé Jonna. Wi, Jonna té si tèlman faché, Jéhova té ni pou fè’y chonjé ki jan Ninivè ‘pa konnèt diféwans-lan ant sa ki bon èk sa ki mové’. (Jonna 1:1, 2; 3:10; 4:9-11) Èk osi, lè Jézi té ka enstwi moun konsèné mannyè Jéhova jis èk i plen mizèwikòd, i sèvi ègzanp jan Ninivè. Jézi di: “Asou jou jijman-an moun péyi Ninivè kay doubout.”​—Maf. 12:41.

14. Lè Bib-la di “asou jou jijman-an moun péyi Ninivè kay doubout”, kisa sa vlé di?

¹⁴ Lè Jézi di “asou jou jijman-an moun péyi Ninivè kay doubout”, kisa sa vlé di? Ében Jézi té di, an tan ki ka vini, moun “kay wésisité èk yo kay jwenn kondannasyon.” (Jan 5:29) Alò, Jézi té ka palé konsèné tan-an lè i kay kondwi pou yon mil (1,000) lanné. Èk diwan tan sala “ni bon ni mové, kay wésisité.” (Twav. 24:15) Konsa pou moun ki mové, yo “kay wésisité èk yo kay jwenn kondannasyon.” Sa vlé di, apwé sé moun sala wésisité, Jéhova èk Jézi kay òbzòvé yo pou wè si yo ka obéyi èk ka fè sé bagay-la yo ka apwann. Alò, si Bondyé wésisité yonn an sé jan Ninivè-a èk i wifizé adowé Jéhova, Jéhovah pa kay kité’y kontiné viv. Non, moun sala kay jwenn kondannasyon. (Izay. 65:20) Mé sé moun-lan ki chwazi pou adowé Jéhova kay twapé chans-lan pou viv pou tout tan!​—Dann. 12:2.

15. (a) Pouki nou pa sipozé di pyèsonn ki té détwi an Sòdonm épi Gomòra pa kay wésisité? (b) Ki mannyè nou sipozé konpwann sa ki ékwi an Joud vèwsé 7? (Osi, gadé enfòmasyon-an anba sijé-a: “ Kisa Joud Té Vlé Di?”)

¹⁵ Lè Jézi té ka palé konsèné jan Sòdonm épi Gomòra, i di, asou “jou jijman-an”, i kay pli ézé pou yo pasé pou sé moun-lan ki té widjèkté sé pawòl li-a. (Maf. 10:14, 15; 11:23, 24; Louk 10:12) Kisa sa vlé di? Ès Jézi té ka sèlman sèvi yon ègzanp pou moutwé mannyè moun ki té ka viv an tan’y, té pli mové pasé jan Sòdonm épi Gomòra? Non. Ében i bon pou chonjé, lè Jézi té di “asou jou jijman-an moun péyi Ninivè kay doubout”, i té ka enstwi an bagay ki kay vwéman fèt. An menm mannyè-a, lè Jézi palé konsèné jan Sòdonm épi Gomòra asou “jou jijman-an”, nou sa di, adan di yo kay wésisité. Konsa Jézi té ka palé konsèné menm “jou jijman-an” pou jan Ninivè èk jan Sòdonm épi Gomòra. An plis di sa, nou ni pou chonjé sa Jézi té di konsèné moun ki “kay jwenn kondannasyon.” Jézi di “sa ki ja fè mové kay wésisité.” (Jan 5:29) Wi, ni Jan Ninivè ni jan Sòdonm épi Gomòra té fè mové bagay. Alò, si jan Ninivè té twapé òpòtyounité-a pou wépanti, i posib adan moun an Sòdonm épi Gomòra kay wésisité asou “jou jijman-an”, pou twapé chans-lan pou wépanti. Èk nou pé jis twapé òpòtyounité-a pou enstwi yo konsèné Jéhova èk Jézi Kwi.

16. Kisa Jéhova ka ègzanminé pou’y désidé kilès moun i kay wésisité? (Jérémaya 17:10)

¹⁶ Li Jérémaya 17:10. An vèwsé sala, nou ka wè mannyè-a Jéhova ka jijé. Jéhova ka toujou ‘ègzanminé tjè moun, [èk i] ka ègzanminé katjil moun’. Alò, an wézèwèksyon-an ki kay fèt an tan pou vini, Jéhova kay désidé kilès moun i kay wésisité. Wi, i kay ‘bay chak moun sa yo méwité silon mannyè yo’. Konsa Jéhova kay fè sa ki nésésè, mé i kay moutwé mizèwikòd sèlman si la ni bon wézon pou’y fè sa. Alò, nou pa janmen vlé di sèten moun pa kay wésisité, si Bib-la p’òkò di sa!

‘ÈS JIJ TOUT LATÈ-A PA KAY FÈ SA KI JIS?’

17. Kisa ki kay wivé moun ki mò?

¹⁷ Dépi tan-an Adanm épi Èv sipòté Satan èk wébèl kont Jéhova, konmen bilyon moun ja mò. Wi, lanmò sé vwéman an mové “lèlmi”! (1 Kòr. 15:26) Mé kisa ki kay wivé tout sé moun sala ki ja mò? Ében an ti gwoup, sa vlé di yon san kawant kat mil (144,000) moun adan sé disip Jézi-a kay wésisité èk yo kay viv pou tout tan an syèl. (Wév. 14:1) Kanmenm, majòwité sé moun-lan ki té enmen Jéhova kay wésisité pou enjwi lavi asou latè-a. Èk si yo wèsté fidèl pou Jéhova diwan mil (1,000) lanné-a Jézi kay kondwi-a, yo kay viv asou latè-a pou tout tan. (Dann. 12:13; Hib. 12:1) Bon, diwan menm tan sala Jéhova kay osi wésisité ‘moun ki mové’. Sé moun sala sé moun ki pa té sèvi Jéhova, èvèk adan di yo té jis ‘fè bagay ki té byen mové’. Wi, Jéhova kay wésisité yo pou ba yo òpòtyounité-a pou apwann konsèné’y, èk pou sèvi’y. (Louk 23:42, 43) Kanmenm, ès sa vlé di Jéhova kay wésisité tout moun ki té mové? Ében wépons-lan sé non. Èk sa sé paski la ni moun ki té tèlman méchan èk ki té tèlman détèminé pou wébèl kont Jéhova, konsa Jéhova ja kondanné yo. Wi, Jéhova ja désidé sé moun sala pa kay wisouvwé an wézèwèksyon.​—Louk 12:4, 5.

18-19. (a) Pouki nou sa ni konfyans Jéhova kay fè sa ki jis lè i jijé moun ki mò? (Izaya 55:8, 9) (b) Kisa nou kay konsidiwé an lòt atik-la?

¹⁸ Ès nou sa ni konfyans-lan ki Jéhova kay toujou fè an bon disizyon lè i ka jijé moun? Absoliman! Èk menm kon Abrahanm, nou sa ni konfyans-lan ki Jéhova, ‘Jij tout latè-a’, kay toujou fè sa ki jis paski i ni tout lasajès, i plen mizèwikòd, èk i pawfé. Èk Jéhova ja entwennen Gason’y Jézi, èk i ba’y wèskonsabilité-a pou jijé tout moun. (Jan 5:22) Wi, ni Jéhova ni Jézi konnèt tout sa ki an lidé nou èk an tjè nou. (Matt. 9:4) Konsa, lè yo ka jijé yo kay toujou fè ‘sa ki jis’!

¹⁹ Alò, annou détèminé pou kontiné konfyé Jéhova èk tout sé disizyon’y-lan. Nou sav nou pa ni dwa-a pou jijé moun. Mé Jéhova ni dwa-a èk abilité-a pou fè sa! (Li Izaya 55:8, 9.) Èk sa sé wézon-an nou ka konfyé tout jijman Jéhova. Èk nou ka osi konfyé tout jijman Wa nou Jézi, paski nou sav i kay jijé épi jistis èk mizèwikòd menm kon Papa’y. (Izay. 11:3, 4) Bon, an atik sala, nou diskité mannyè Jéhova kay jijé moun ki mò. Kanmenm, ki mannyè Jéhova èk Jézi kay jijé moun diwan gwan twibilasyon-an? Kisa nou pa konnèt konsèné jijman sala? Èk kisa nou konnèt konsèné jijman sala? Alò nou kay diskité sé kèstyon sala an lòt atik-la.