SIJÉ POU LÉTID 19
CHANSON 22 Wéyòm-lan Ja Établi—Kité’y Vini!
Sa Nou Konnèt Konsèné Mannyè Jéhova Kay Jijé Moun An Tan Pou Vini
“[Jéhova] . . . pa vlé pyèsonn péwi.”—2 PITA 3:9.
SA NOU KAY APWANN AN ATIK SALA
Nou kay apwann mannyè nou sa asiwé, lè Jéhova jijé moun an tan pou vini, i kay fè sa ki dwèt èk jis.
1. Pouki nou sa di nou ka viv adan an tan ki byen antéwésan?
NOU ka viv adan an tan ki byen antéwésan! Èk sa sé paski toulé jou nou ka wè pwofèsi Bib ka fèt vwé. Pou ègzanp, nou ka wè ‘wa soud-la’ èk ‘wa nòd-la’ ka goumen kont yonn a lòt paski yo chak vlé kondwi latè-a. (Dann. 11:40) Osi, nou ka wè mannyè sèvant Bondyé ka pwéché bon nouvèl Wéyòm-lan owon latè-a, èk nou ka wè milyon di moun ka chwazi pou adowé Jéhova. (Izay. 60:22; Maf. 24:14) An plis di sa, nou ka wisivwè an chay manjé spiwitwèl “lè i lè manjé.”—Maf. 24:45-47.
2. (a) Lè gwan twibilasyon-an koumansé, kisa nou sa asiwé? (b) Kisa nou sipozé chonjé?
2 Jéhova ka kontiné pou édé nou byen konpwann bagay enpòtan ki kay fèt touswit. (Pwov. 4:18; Dann. 2:28) Konsa nou asiwé lè gwan twibilasyon-an koumansé, nou kay konnèt tout sa nou sipozé sav pou nou tjenbé fò èk wèsté an lilyon diwan tan difisil sala. Kanmenm, nou sipozé chonjé la ni sèten bagay nou pa konnèt konsèné tan-an ki ka vini. Alò an atik sala, nou kay diskité poutji nou fè chanjman an lakonpwann nou konsèné sèten bagay ki kay fèt an tan pou vini. Osi, nou kay wivizé adan bagay nou konnèt konsèné sa ki kay fèt an tan pou vini èk mannyè-a Jéhova kay pwan aksyon.
SA NOU PA KONNÈT
3. (a) An tan pasé kisa nou té ka di ki pa kay fèt dépi gwan twibilasyon-an koumansé? (b) Èk poutji nou té ka di sa?
3 An tan pasé, nou té ka di, dépi gwan twibilasyon-an koumansé, i kay twò ta pou moun ki pa ka sèvi Jéhova mété lafwa an li, pou yo sa chapé ladjè Anmagèdonn. Bon, wézon-an nou té ka di sa, sé paski nou té kwè, chak moun èk chak sitiwasyon an tan Déliz-la, té ka wépwézanté an bagay ki kay fèt an tan nou. Pou ègzanp nou té kwè, menm kon pyèsonn pa té sa antwé gwo batiman-an an tan Nowa apwé Jéhova té ‘fenmen lapòt-la’, pyèsonn ki pa ka sèvi Jéhova lè gwan twibilasyon-an koumansé pa kay sové.—Maf. 24:37-39.
4. An tan pasé nou té ka kwè tout bagay ki fèt an Déliz-la ka wépwézanté an bagay ki kay fèt an tan nou, poutji nou pa ka kwè sa ankò?
4 Ès nou sipozé kwè tout bagay ki fèt an tan Déliz-la ka wépwézanté an bagay ki kay fèt an tan nou? Wépons-lan sé non. Mé poutji? Ében sa sé paski, Bib-la pa ka di sa. a Sé vwé, Jézi té konpawé “tan Nowa” épi tan nou, mé i pa té di tout bagay ki fèt an tan Déliz-la ka wépwézanté an bagay ki kay fèt an tan nou. Pou ègzanp, Jézi pa té di, paski Jéhova té fenmen lapòt batiman-an avan Déliz-la pou anpéché lézòt moun sové, sa ka moutwé pyèsonn pa kay sa sové lè gwan twibilasyon-an koumansé. Kanmenm, la ni an chay bagay nou sa apwann hòd wakont Nowa èk Déliz-la.
5. (a) Ki mannyè Nowa moutwé i té ni lafwa avan Déliz-la koumansé? (Hibrou 11:7; 1 Pita 3:20) (b) Ki mannyè twavay pwèchman nou jòdi jou menm kon lè Nowa té ka pwéché?
5 Lè Jéhova di Nowa konsèné Déliz-la, Nowa moutwé i té ni lafwa lè’y bati gwo batiman-an. (Li Hibrou 11:7; 1 Pita 3:20.) Menm kon Nowa, moun ki tann bon nouvèl-la konsèné Wéyòm-lan sa moutwé lafwa yo lè yo fè sa yo apwann. (Twav. 3:17-20) Pita di, Nowa “té ka pwéché ka di moun sipozé viv mannyè Bondyé vlé yo viv-la.” (2 Pita 2:5) Kanmenm, kon nou té diskité an atik-la avan, nou pa konnèt si Nowa té pwéché bay tout moun ki té asou latè-a, avan gwo Déliz-la. Jòdi jou, nou ni on difé an tjè nou kon nou ka éséyé pwéché bay moun owon latè-a. Mé magwé tout éfò-a nou ka mété-a, nou pa kay sa janmen pwéché bay tout moun avan bout-la wivé. Ki mannyè nou sav sa?
6-7. Ki mannyè nou sav nou pa kay pwéché bay tout moun avan bout-la vini?
6 Bon. Katjilé asou sa Jézi té di konsèné twavay pwèchman nou-an. An Mafyou 24:14 Jézi té di, moun kay pwéché bon nouvèl-la “toupatou an latè-a pou tout nasyon”. Èk pwofèsi sala ka vwéman fèt jòdi jou. Wi, bon nouvèl-la konsèné Wéyòm-lan avélab an plis pasé yon mil (1,000) diféwan langaj. Èk a kòz di wèbsayt nou jw.org, plizyè moun asou latè-a jòdi sa apwann konsèné konmisyon Wéyòm-lan.
7 Kanmenm, Jézi té osi di, sé disip li-a “pa kay ni tan [pou] pasé adan tout vil”; sa vlé di pwéché bay tout moun avan i vini. (Maf. 10:23; 25:31-33) Bon, menm kon pawòl Jézi té fèt vwé an pwèmyé syèk-la, i kay fèt vwé an tan nou tou. Pou ègzanp, la ni plizyè milyon moun ki ka wèsté adan plas ében péyi, koté nou pa ni libèté pou pwéché. An plis di sa, chak minit ki pasé, plizyè san ti bébé ka fèt. Wi, nou ka fè tout sa nou pé pou pwéché bay moun an “tout nasyon, tout lafanmi, [èk] moun ki ka palé tout diféwan langaj”. (Wév. 14:6) Mé lavéwité-a sé sa, nou pa kay sa patajé bon nouvèl-la épi chak moun asou latè-a avan bout-la wivé.
8. Ki kèstyon nou pé mandé konsèné mannyè Jéhova kay jijé moun an tan pou vini? (Gadé sé pòtwé-a osi.)
8 Silon sa nou fin diskité-a, nou pé mandé: ‘Ki mannyè Jéhova èk Jézi kay jijé tout sé moun-lan ki pa té ni òpòtyounité-a pou tann bon nouvèl-la avan gwan twibilasyon-an koumansé?’ (Jan 5:19, 22, 27; Twav. 17:31) Lévanjil-la atik sala bazé asou ka di, Jéhova “pa vlé pyèsonn péwi”, pito sa, “i vlé tout moun wépanti péché yo.” (2 Pita 3:9; 1 Tim. 2:4) Mé, menm si nou konnèt Jéhova vlé moun sové, i p’òkò di nou ki mannyè i kay jijé moun ki pa té ni chans-lan pou tann bon nouvèl-la. Èk kon Dyé Toupisan-an i pa ni pyès obligasyon pou di nou sa i kay fè non plis!
Ki mannyè Jéhova kay aji épi moun ki pa té ni òpòtyounité-a pou apwann bon nouvèl-la avan gwan twibilasyon-an koumansé? (Gadé pawagwaf 8) c
9. Kisa Jéhova ja di nou i kay fè?
9 Jéhova ja sèvi Bib-la pou di nou adan sé bagay-la i kay fè. Pou ègzanp, Jéhova di nou, i kay wésisité ‘mové moun’ ki pa té ni òpòtyounité-a pou apwann konsèné bon nouvèl-la èk pou chanjé lavi yo. (Twav. 24:15; Louk 23:42, 43) Alò, sa ka lévé lòt kèstyon ki byen enpòtan.
10. Ki lòt kèstyon nou pé mandé?
10 Ès nou sa di, tout moun ki mò diwan gwan twibilasyon-an pa kay wésisité? Ében, Bib-la ka moutwé a klè, tout moun Jéhova èk sé lawmé’y-la détwi diwan ladjè Anmagèdonn pa kay wésisité. (2 Tèsa. 1:6-10) Mé, la ni moun ki pé mò diwan gwan twibilasyon-an a kòz di lòt bagay tèl kon maladi, vyéyès, aksidan, ében kwim. (Éklé. 9:11; Zèk. 14:13) Alò, ès adan sé moun sala kay wésisité anpami ‘sé mové moun-lan’ ki kay wésisité an latè nèf-la? Ében, sa sé yonn an sé bagay-la nou pa konnèt.
SA NOU KONNÈT
11. Jijman-an moun kay wisouvwè diwan Anmagèdonn, kay dépan asou kisa?
11 La ni plizyè bagay nou konnèt konsèné sa ki kay fèt an tan pou vini. Pou ègzanp, nou konnèt Jéhova kay jijé moun diwan Anmagèdonn silon mannyè-a yo twété sé fwè Jézi-a. (Maf. 25:40) Wi, sé moun-an ki sipòté Jézi èk sé fwè’y-la kay wisivwè an bon jijman. Nou osi konnèt ki, adan sé fwè Jézi-a kay asou latè-a apwé gwan twibilasyon-an koumansé èk yo kay alé an syèl djòs avan ladjè Anmagèdonn. Konsa dépi la ni adan sé fwè Jézi-a asou latè-a, i posib moun kay ni òpòtyounité-a pou sipòté yo èk twavay-la yo ka fè-a. (Maf. 25:31, 32; Wév. 12:17) Alò, pouki sé bagay sala nou konnèt-la si tèlman enpòtan?
12-13. Kisa adan moun pé fè lè yo wè “Gwan vil Babilonn-an” détwi? (Gadé sé pòtwé-a osi.)
12 Lè gwan twibilasyon-an koumansé, èk moun wè “Gwan vil Babilonn-an” détwi, adan di yo pé chonjé pou plizyè lanné Témwen Jéhova té di sa té kay fèt. Alò, a lè sala, ès adan di sé moun sala kay koumansé mété lafwa an Jéhova?—Wév. 17:5; Izik. 33:33.
13 Si adan moun koumansé mété lafwa an Jéhova lè yo wè “Gwan vil Babilonn-an” détwi, sa kay menm kon sa ki té fèt an Éjip an tan Moziz. Chonjé, yon latilyé moun alé ansanm épi jan Izwayèl lè yo kité Éjip. Pitèt adan sé moun sala té koumansé ni lafwa an Jéhova lè yo wè sé Dis (10) Modisyon-an Moziz té palé konsèné-a fèt vwé. (Ègz. 12:38) Alò, si an bagay kon sa fèt apwé “Gwan vil Babilonn-an” détwi, ès nou kay vini faché paski moun ka koumansé sèvi Jéhova djòs avan Anmagèdonn koumansé? Awa! Anfen, si sa fèt, nou vlé twété yo menm kon Papa nou an syèl. I sé ‘an Dyé ki plen mizéwikòd èk konpasyon. I pa ka faché vit èk i plen lanmityé fidèl èk lavéwité.’ b—Ègz. 34:6.
Lè moun wè “Gwan vil Babilonn-an” détwi, adan di yo kay chonjé pou plizyè lanné, Témwen Jéhova té ka di sa té kay fèt. (Gadé pawagwaf 12-13) d
14-15. Ès òpòtyounité-a pou an moun viv pou tout tan ka dépan asou lè-a i mò, ében plas-la i ka wèsté? Poutji ou ka di sa? (Sam 33:4, 5)
14 Délè an fwè èben sè pé di: “I kay pli mèyè si manm fanmi mwen ki pa ka sèvi Jéhova mò avan gwan twibilasyon-an koumansé, paski sa kay ba’y an chans pou twapé an wézèwèksyon.” Nou sa kopwann poutji an fwè èben sè pé katjilé kon sa. Yo vlé sa ki bon pou manm fanmi yo. Kanmenm, òpòtyounité-a pou yon moun viv pou tout tan pa ka dépan asou lè-a i mò. Konsa, nou vlé toujou chonjé: Jéhova sé yon Jij ki pawfé, èk i ka toujou fè bon disizyon. (Li Sam 33:4, 5.) Wi, nou sa ni tout konfyans-lan ki, ‘Jij tout latè-a’ kay fè sa ki jis.—Jen. 18:25.
15 Osi, nou vlé chonjé: Òpòtyounité-a pou yon moun viv pou tout tan pa ka dépan asou plas-la i ka wèsté-a. Non, Jéhova pa kay kondanné plizyè milyon moun, paski yo ka wèsté adan an plas, koté yo pa sa apwann konsèné Wéyòm-lan. (Maf. 25:46) Konsa pa janmen obliyé, Jij latè-a ki ka toujou fè sa ki jis, ni pli lanmityé pou sé moun sala pasé nou sa ni. Alò, nou pa sav ki mannyè Jéhova kay diwèkté bagay diwan gwan twibilasyon-an. Konsa i posib, avan Jéhova fè tout moun konnèt ki moun i yé diwan gwan twibilasyon-an, adan sé moun sala kay ni òpòtyounité-a pou apwann konsèné’y èk mété lafwa an li.—Izik. 38:16.
Apwé gwan twibilasyon-an koumansé, . . . ès i posib pou adan sé moun-nan ki wè sé bagay sala fèt, koumansé sèvi Jéhova?
16. Kisa nou konnèt konsèné Jéhova? (Gadé pòtwé-a osi.)
16 Pas nou ka étidyé Bib-la, nou konnèt Jéhova vwéman enmen moun. Wi, i voyé Gason’y pou mò pou nou twapé òpòtyounité-a pou viv pou tout tan! (Jan 3:16) Èk nou tout ja èspéyansé lanmityé Jéhova. (Izay. 49:15) Osi Jéhova konnèt non nou tout. Anfen, Jéhova konnèt nou tèlman byen ki, si nou mò, i sa wésisité nou paski i ka chonjé tout détay konsèné nou! (Maf. 10:29-31) Konsa, nou sa ni konfyans-lan ki, Papa nou an syèl kay jijé chak moun byen, paski i savan, i jis, èk i plen mizéwikòd.—Jémz 2:13.
Nou sa ni konfyans-lan ki, Jéhova kay jijé chak moun adan an mannyè ki dwèt èk jis, èk épi mizéwikòd. (Gadé pawagwaf 16)
17. Kisa nou kay diskité an lòt atik-la?
17 Kon nou apwann sé bagay nèf sala, sa ka fè nou wéyalizé i byen enpòtan pou nou kontiné pwéché. Mé pouki nou ka di sa? Èk kisa ki ka motivé nou pou kontiné pwéché? Ében an lòt atik-la, nou kay diskité sé wépons-lan pou sé kwèsyon sala.
CHANSON 76 Kouman Ou Ka Santi?
a Pou kopwann poutji nou fè chanjman sala, gadé atik-la “This Is the Way You Approved” an Gad-la Li 15 Mas, 2015, paj 7-11.
b Apwé Gwan vil Babilonn-an détwi, Gòg ki sòti péyi Magòg kay ataké tout sèvant Jéhova ki asou latè. Èk népòt moun ki koumansé sèvi Jéhova apwé “Gwan vil Babilonn-an détwi, kay èspéyansé atak sala osi.
c SA SÉ PÒTWÉ-A KA MOUTWÉ: Sé twa (3) pòtwé-a ka moutwé poutji adan moun pa ka twapé òpòtyounité-a pou apwann bon nouvèl-la: (1) an madanm ka wèsté adan an plas koté wilizyon péyi-a ka fè’y danjéwé pou pwéché bon nouvèl-la, (2) an mawi èk madanm ka wèsté adan an plas koté twavay Témwen Jéhova anba bann, èk (3) an nonm ka wèsté adan an plas ki tèlman lwen, èk i byen difisil pou sé fwè èk sè-a alé la pou pwéché bon nouvèl-la.
d SA PÒTWÉ-A KA MOUTWÉ: An jenn madanm ki té doubout sèvi Jéhova ka chonjé sa i té apwann konsèné distwiksyon “Gwan vil Babilonn-an”. I désidé pou sèvi Jéhova ankò èk pou viwé jwenn pawan’y. Alò, si bagay kon sa vwéman fèt, nou vlé moutwé mizéwikòd èk konpasyon menm kon Jéhova. Sa kay édé nou pou wéjwi lè moun wépanti èk koumansé sèvi Jéhova ankò.
