1. Ki mannyè zapòt Pòl té ka santi konsèné sèvant ministiriyal?

 SÈVANT ministiriyal ka fè twavay ki byen enpòtan an kongwigasyon-an. Anfen, zapòt Pòl té ka vwéman apwésyé sé nonm fidèl sala. Pou ègzanp, lè i ékwi sé Kwityen-an an Filipay, i voyé bonjou bay sé ansyen-an èk bay sé sèvant ministiriyal-la.​—Filip. 1:1.

2. Ki mannyè fwè Luis ka santi kon i ka wann sèvis kon an sèvant ministiriyal?

² Plizyè fwè ki yo jenn ki yo an laj, ka twapé an chay djèwté kon yo ka wann sèvis kon sèvant ministiriyal. Pou ègzanp, Devan té dizwit (18) lanné lè i vini an sèvant ministiriyal. Mé Luis té ni plis pasé senkant (50) lanné lè i vini an sèvant ministiriyal. Lè yo mandé Luis ki mannyè i ka santi kon i ka wann sèvis kon an sèvant ministiriyal, i di: “Pa dé kontan mwen kontan pou wann sèvis kon an sèvant ministiriyal an kongwigasyon-an. Sé fwè èk sè-a ja moutwé mwen an chay lanmityé, èk apwézan mwen sa moutwé yo lanmityé mwen déviwé!” Wi, an chay sèvant ministiriyal ka santi menm mannyè-a.

3. Kisa nou kay diskité an atik sala?

³ Si’w sé an fwè ki batizé, èk ou p’òkò an sèvant ministiriyal, ès ou sa twavay pou vini yonn? Kisa ki sa pousé’w pou fè sa? Èk ki kawaktè Bib-la di ou bizwen pou’w sa vini an sèvant ministiriyal? Ében an atik sala, nou kay diskité sé kwèsyon sala. Mé pwèmyéman, annou diskité ki kalté twavay an sèvant ministiriyal ka fè.

KI TWAVAY YON SÈVANT MINISTIRIYAL KA FÈ AN KONGWIGASYON-AN?

4. Ki diféwan twavay sèvant ministiriyal ka fè an kongwigasyon-an? (Gadé pòtwé-a osi.)

⁴ Anba diwèksyon lisentèspwi Jéhova, sé ansyen-an ka apwenté fwè ki batizé pou wann sèvis kon sèvant ministiriyal. Èk sé fwè sala ka édé sé ansyen-an fè an chay bagay ki enpòtan an kongwigasyon-an. Pou ègzanp, adan sèvant ministiriyal ka fè asiwé sé pwoklanmatè-a ni asé tèwitwa èk piblikasyon pou minis yo. Osi, adan di yo ka édé nétwayé èk tjenn Lasal Wéyòm-lan an bon kondisyon. An plis di sa, adan di yo ka wann sèvis kon atandan, èk yo ka kontwolé ikipman-an pou son èk vidiyo diwan sé mitin-lan. Mé bagay-la ki pli enpòtan sé sa, sèvant ministiriyal sé nonm ki enmen Jéhova, épi yo ka viv lavi yo adan an mannyè ki ka plè’y. Osi, yo ni an chay lanmityé pou sé fwè èk sè yo-a. (Maf. 22:37-39) Bon, kisa an fwè ki batizé sa fè pou vini an sèvant ministiriyal?

5. Kisa yon fwè ni pou fè pou vini an sèvant ministiriyal?

⁵ Bib-la ka di nou sé kawaktè-a an fwè ni pou dévlopé pou’y sa vini an sèvant ministiriyal. (1 Tim. 3:8-10, 12, 13) Alò, si ou vlé vini an sèvant ministiriyal pou’w sa édé lézòt, ou ni pou apwann konsèné sé kawaktè sala, èk twavay wèd pou dévlopé yo. Mé pwèmyéman, ou ni pou mandé kò’w pouki ou vlé vini an sèvant ministiriyal.

POUKI OU VLÉ VINI AN SÈVANT MINISTIRIYAL?

6. Kisa ki sipozé pousé’w pou édé sé fwè èk sè-a? (Mafyou 20:28; Gadé pòtwé-a osi.)

⁶ Katjilé asou ègzanp Jézi, sé lanmityé pou Papa’y èk pou moun ki té ka enflouwansé tout sa i té fè. Èk lanmityé sala pousé’y pou twavay wèd, èk pou jis fè bagay adan moun té kwè yo té twò enpòtan pou fè. (Li Mafyou 20:28; Jan 13:5, 14, 15) Wi, si tout sa ou ka fè bazé asou lanmityé, Jéhova kay benni’w, èk i kay édé’w pou kwalifyé pou’w sa vini an sèvant ministiriyal.​—1 Kòr. 16:14; 1 Pita 5:5.

7. Si an fwè vlé vini an sèvant ministiriyal paski i vlé moun ba’y lonnè, pouki sa pa bon?

⁷ Souvan, moun an latè-a ka bay moun ki ka fè konmsi yo enpòtan lonnè. Mé pèp Jéhova pa kon sa. Lè an fwè enmen moun menm kon Jézi, i pa kay vlé kontwolé yo, èk i pa kay vlé yo kwè i enpòtan. Anfen, si an fwè ki ka katjilé kon sa vini an sèvant ministiriyal ében yon ansyen, i kay kwè i twò enpòtan pou fè sèten bagay an kongwigasyon-an. (Jan 10:12) Mé i bon pou chonjé, Jéhova pa kay benni pyèsonn ki ka fè bagay paski yo kwè yo enpòtan, ében yo vlé moun ba yo lonnè.​—1 Kòr. 10:24, 33; 13:4, 5.

8. Ki bon konsèy Jézi té bay sé zapòt li-a?

⁸ Délè, jis bon jan Jézi té vlé sèten wèskonsabilité, mé wézon-an yo té vlé sé wèskonsabilité sala pa té bon. Pou ègzanp, katjilé asou sa zapòt Jan èk zapòt Jémz té fè. Yo mandé Jézi pou ba yo gwo pozisyon an Wéyòm li. Bon, Jézi pa té di i té bon yo té mandé pou sé pozisyon sala. Pito sa, tann sa i di sé douz (12) zapòt-la: “Si zòt pyès vlé ni lotowité anlè sé lézòt-la, ou kay ni pou sèvi yonn a lòt sèvant. Épi si yonn vlé sé li ki pwèmyé, kitéʼy abésé kòʼy épi vini sèvant zòt tout.” (Mak 10:35-37, 43, 44) Alò, fwè ki vlé vini sèvant ministiriyal paski yo vwéman vlé édé lézòt, kay vini an bennédiksyon pou kongwigasyon-an.​—1 Tèsa. 2:8.

KISA KI SA ÉDÉ’W DÉVLOPÉ DÉZI-A POU ÉDÉ SÉ FWÈ’W-LA?

9. Kisa ki sa édé’w dévlopé dézi-a pou vini an sèvant ministiriyal?

⁹ San pyès dout ou enmen Jéhova, èk ou vlé édé sé fwè’w èk sè’w-la. Kanmenm, pitèt ou pa ni dézi-a pou fè twavay-la sèvant ministiriyal ka fè. Alò, kisa ki sa édé’w dévlopé dézi-a pou vini an sèvant ministiriyal? Ében, ou sa katjilé asou lajwa-a ou kay santi paski ou ka édé sé fwè’w èk sè’w-la. Chonjé Jézi di: “Tjèʼw ka pli kontan lè ou bay pasé lè ou wisivwè.” (Twav. 20:35) Èk Jézi pa té annèk di sa, i fè sa i té di. Èvèk Jézi té ni an chay lajwa paski i té édé lézòt. Konsa, si’w swiv ègzanp Jézi, ou kay ni lajwa sala tou.

10. Ki mannyè Jézi moutwé i té kontan édé lézòt? (Mak 6:31-34)

¹⁰ Annou gadé yon ègzanp ki ka moutwé Jézi té kontan édé lézòt. (Li Mak 6:31-34.) Yon jou, Jézi èk sé zapòt li-a té las. Konsa yo chaché pou an plas koté yo té sa pozé. Mé yon latilyé moun té wivé la avan yo, paski yo té vlé Jézi enstwi yo. Jézi té sa di non, paski li èk sé zapòt li-a pa té ni ‘an ti chans pou pozé ében manjé.’ Ében i té sa annèk enstwi yo yonn dé bagay èk voyé yo alé. Mé paski Jézi té vwéman enmen moun, “i koumansé enstwi yo an chay bagay.” Èk i kontiné enstwi yo, menm si i té “ka vini ta.” (Mak 6:35) Èvèk i fè sa paski sé moun-lan té “fè’y lapenn.” Wi, Jézi té vlé enstwi sé moun-lan, paski i té enmen yo. Anfen, i té ka bay Jézi an chay lajwa pou édé moun.

11. An ki lòt mannyè Jézi té wédé moun? (Gadé pòtwé-a osi.)

¹¹ Jézi té édé moun lè i té ka enstwi yo konsèné Bondyé. Mé Jézi osi wédé moun adan lòt mannyè. Pou ègzanp, Jézi potjiwé manjé bay moun, èk i mandé sé disip li-a pou sépawé manjé-a anpami sé moun-lan. (Mak 6:41) An mannyè sala Jézi enstwi sé disip li-a mannyè pou wédé moun. Bon. Ègzanp Jézi ka moutwé a klè, twavay-la sé sèvant ministiriyal-la ka fè, sé an twavay ki byen enpòtan. Imajiné lajwa-a sé zapòt-la té ni pou twavay ansanm épi Jézi pou bay sé moun-lan manjé, jis lè “tout moun ki té la manjé bouden plen épi yo té satisfè”! (Mak 6:42) Bon, sa sé annèk yon ègzanp pou moutwé mannyè Jézi té mété lantéwé lézòt moun douvan sa li. Wi, sé sa Jézi té ka fè tout tan-an i té asou latè-a. (Maf. 4:23; 8:16) Anfen, i té ka bay Jézi an chay lajwa èk satisfaksyon lè i té ka enstwi moun èk wédé yo. Alò, an menm mannyè-a ou osi kay ni an chay lajwa, si ou fè tout sa ou pé pou vini an sèvant ministiriyal pou édé moun.

12. Pouki nou pa sipozé kwè nou pa ni pyès abilité pou édé kongwigasyon-an?

¹² Si ou ka santi ou pa ni pyès abilité spésyal pou édé kongwigasyon-an, pa santi dékouwajé. San dout, ou ha dévlopé bèl kawaktè ou sa sèvi pou édé kongwigasyon-an. Pou ègzanp ou sa katjilé asou sa zapòt Pòl di an 1 Kòrint 12:12-30. Èk apwé mandé Jéhova pou édé’w wè mannyè ou sa swiv sé pwensip-la ki an sé vèwsé sala. Wi, zapòt Pòl fè’y a klè ki, ou èk chak sèvant Jéhova, ni an twavay pou fè an kongwigasyon-an ki valowab èk nésésè. Alò, si ou ni pou twavay asou sèten kawaktè pou’w sa vini an sèvant ministiriyal, pa santi dékouwajé. Pito sa, fè tout sa ou pé an sèvis ou pou Jéhova, èk pou édé sé fwè èk sè’w-la. Èk ou sa asiwé sé ansyen-an kay tjenn ou an lidé èk yo kay ba’w twavay ou sa fè, avan ou vini an sèvant ministiriyal.​—Ronm 12:4-8.

13. Pouki i pa twò difisil pou vini an sèvant ministiriyal?

¹³ Katjilé asou sa, pwèskè tout sé kawaktè-a Bib-la di sèvant ministiriyal sipozé ni, sé kawaktè tout Kwityen sipozé ni. Pou ègzanp, tout Kwityen sipozé vansé pwé Jéhova. Tout Kwityen sipozé ni lajwa lè yo ka édé lézòt. Èk tout Kwityen sipozé viv adan an mannyè ki ka plè Bondyé. Alò, si ou sé an fwè, pitèt ou ja dévlopé pwèskè tout sé kawaktè-a yon sèvant ministiriyal sipozé ni. Konsa annou diskité sé bagay-la ou sa fè pou vini an sèvant ministiriyal.

SA OU NI POU FÈ POU VINI AN SÈVANT MINISTIRIYAL

14. Kisa i vlé di pou ‘méwité wèspé’? (1 Timòfi 3:8-10, 12 NWT)

¹⁴ Bon. Annou diskité sa 1 Timòfi 3:8-10, 12 (NWT) ka di konsèné sé kalifikasyon-an pou sèvant ministiriyal. 1 Timòfi 3:8-10, 12 NWT (Li’y.) Yon sèvant ministiriyal ‘méwité wèspé.’ Bon. Sa pa vlé di i pa sa bay blag ében enjwi kò’y, paski Bib-la ka di la ni an lè pou wi. (Éklé. 3:1, 4) Mé si ou vlé vini an moun ki ‘méwité wèspé’, népòt ansayman ou ni, ou kay twavay wèd pou fè’y byen. Èk lè sé fwè èk sè-a wè ou sé an moun yo sa dépan asou, èk ou ka pwan wèskonsabilité’w sèwyé, yo kay wèspèkté’w.

15. (a) Kisa èspwèsyon-an ‘yo pa sipozé ni dé lanng’ vlé di? (b) Kisa èspwèsyon-an ‘yo pa sipozé moun ki vowas pou lajan’ vlé di?

¹⁵ Èspwèsyon-an ‘pa ni dé lanng’ vlé di ou sé an moun ki sensè, onnèt, èk moun sa konfyé’w. Èvèk i osi vlé di, ou ka tjenn pawòl ou, èk ou pa ka kwennen moun. (Pwov. 3:32) Osi, èspwèsyon-an ‘pa vowas pou lajan’ vlé di, ou onnèt lè ou ka fè biznis épi moun èk an mannyè-a ou ka mennajé kontwibyousyon kongwigasyon-an. An plis di sa, ou pa kay pwan lavantaj asou sé fwè èk sè-a an kongwigasyon-an pou fè lajan.

16. (a) Kisa èspwèsyon-an ‘yo pa sipozé bwè twòp diven’ vlé di? (b) Kisa èspwèsyon-an ‘on konyans ki nèt’ vlé di?

¹⁶ Èspwèsyon-an ‘yo pa sipozé bwè twòp diven’ vlé di, ou pa an moun ki ka bwè twòp alkòhòl, èk moun pa konnèt ou kon on moun ki ka bwè twòp. Èk pou ni ‘on konsyans ki nèt’ vlé di, ou ka viv lavi’w an ling épi pwensip Jéhova. Wi, menm si ou pa pawfé, ou ni an bon wilasyon épi Jéhova, èk sa ka ba’w lapé an lidé’w èk an tjè’w.

17. Kisa èspwèsyon-an ‘tèsté yo avan pou wè si yo kapab’ vlé di? (1 Timòfi 3:10 (NWT); Gadé pòtwé-a osi.)

¹⁷ Èspwèsyon-an ‘tèsté yo avan pou wè si yo kapab’ vlé di sé ansyen-an ha wè ou ka pwan wèskonsabilité’w sèwyé, èk yo sa dépan asou’w. Alò, lè sé ansyen-an ba’w yon ansayman, i enpòtan pou’w swiv diwèksyon yo, èk sé diwèksyon-an hòd ògannizasyon-an. Osi, i enpòtan pou’w konpwann ègzaktiman sa ou ni pou fè, èk ki lè ou ni pou fini ansayman-an. Èk lè’w twavay wèd pou fè ansayman’w byen, sé fwè èk sè-a an kongwigasyon-an kay wè a klè ou sé on moun ki ka pwan wèskonsabilité’w sèwyé, èk yo kay apwésyé sa. An plis di sa, sé ansyen-an sé pou zòt toujou pawé pou étwennen sé fwè-a ki batizé. (Li 1 Timòfi 3:10 (NWT).) Alò ès la ni jenn fwè an kongwigasyon’w ki batizé, ki pitèt dis (10) pou katòz (14) lanné ében pli jenn? Ès yo ka pwépawé byen pou sé mitin-lan èk fè létid pèwsonnèl yo? Ès yo ka bay wépons souvan an sé mitin-lan èk patisipé an minis-la? Ében si la ni jenn fwè kon sa an kongwigasyon’w, bay yo twavay pou fè ki apwopwiyab pou laj yo èk sitiwasyon yo. An mannyè sala, ou ka tèsté sé jenn fwè sala avan ‘pou wè si yo kapab.’ Èk si yo kontiné fè pwogwé, yo sa jis vini sèvant ministiriyal lè yo ant disèt (17) pou diznèf (19) lanné di laj.

18. Ki sa èspwèsyon-an ‘la pa ni pyès akizasyon kont yo’ vlé di?

¹⁸ Èspwèsyon-an ‘la pa ni pyès akizasyon kont yo’ vlé di pyèsonn pa sa kwititjé’w èben di ou ka fè bagay ki mové. Mé an menm di tan, nou sav moun sa manti asou Kwityen. Pou ègzanp, yo té manti asou Jézi. Èk Jézi di yo té kay fè disip li menm bagay-la. (Jan 15:20) Kanmenm, si ou tjenn kondwit ou nèt menm kon Jézi, ou kay ni an bon wépitasyon an kongwigasyon-an.​—Maf. 11:19.

19. Ki sa èspwèsyon-an ‘yo sipozé ni yon sèl madanm’ vlé di?

¹⁹ ‘Yo sipozé ni yon sèl madanm.’ Pwèmyé mawiyaj-la Jéhova té fè té ant yon nonm èk yon fanm. Èk sé ègzanp sala tout Kwityen sipozé swiv. (Maf. 19:3-9) Alò, yon nonm ki an Kwityen pa sipozé fè imowalité sèksyouwal. (Hib. 13:4) Sa osi vlé di, i kay toujou wèsté fidèl pou madanm li. Èk an plis di sa, i pa kay janmen moutwé pyès lòt moun antansyon romantik.​—Jòb 31:1.

20. Ki mannyè yon nonm sa ‘kondwi manmay [li] épi kay [li] byen’?

²⁰ ‘Yo sipozé kondwi manmay yo épi kay yo byen.’ Si ou sé yon tèt fanmi, ou ni pou pwan wèskonsabilité’w sèwyé. Pou ègzanp, ou kay fè létid fanmi-an toulé simenn. Osi, ou kay pwéché épi madanm ou èk manmay ou souvan. Èk ou kay édé manmay ou dévlopé an bon wilasyon épi Jéhova. (Èfés. 6:4) Anfen, an nonm ki ka otjipé fanmi’y sa gadé apwé kongwigasyon-an tou.​—Gadé 1 Timòfi 3:5.

21. Sé fwè nou-an, si ou p’òkò ka ka wann sèvis kon an sèvant ministiriyal, ki sa ou sa fè?

²¹ Sé fwè nou-an, si ou p’òkò an sèvant ministiriyal, nou ka ankouwajé’w pou li atik sala byen èk pwédyé bay Jéhova konsèné sitiwasyon’w. Osi, étidyé sé kalifikasyon-an pou sèvant ministiriyal, èk twavay wèd pou kwalifyé. An plis di sa, katjilé asou lanmityé-a ou ni pou Jéhova èk pou sé fwè èk sè-a. Èvèk fòtifyé lanmityé’w pou sé fwè èk sè-a, èk katjilé asou wézon-an ou vlé édé yo. (1 Pita 4:8, 10) Wi, twavay wèd pou vini an sèvant ministiriyal, èk ou kay èspéyansé an chay lajwa kon ou ka édé sé fwè èk sè-a an kongwigasyon-an. Alò nou ka swété’w bennédiksyon Jéhova, kon ou ka fè tout sa ou pé pou vini an sèvant ministiriyal!​—Filip. 2:13.