1. Koumannyè Jéhova té fòtifyé sé sèvant fidèl li-a an tan pasé?

 SOUVAN Pawòl Bondyé ka dékwi nonm ki fidèl kon nonm ki fò. Mé yo pa té sèlman ni kouway fizikal, yo té ni kouwaj, lafwa yo té fò, yo té ka tjenbé fò, èk yo té ni èd Jéhova osi. Kanmenm, sé pa tout lè yo té ka santi yo ni fòs. Pou ègzanp, délè Wa David té ka santi ‘fò kon an moutany’, mé délè i té ka santi fèb èk i té ka ‘vini pè an chay’. (Sam 30:7) Osi nou ni ègzanp Sanmsin. Lèspwi Jéhova té ba Sanmsin fòs, mé Sanmsin té konnèt san pouvwa Jéhova, i té kay ‘pèd fòs li èk vini fèb menm kon sé lézòt nonm-lan’. (Jij 14:5, 6; 16:17) Wi, Jéhova té sèvi lisentèspwi’y pou bay sé sèvant fidèl li-a pouvwa-a yo té bouzwen.

2. Pouki zapòt Pòl té di magwé i fèb i té fò? (2 Kòrint 12:9, 10)

² Zapòt Pòl menm té di i té bouzwen fòs hòd Jéhova. (Li 2 Kòrint 12:9, 10.) Wi, menm kon an chay di nou, zapòt Pòl té ni pwoblenm épi santé’y. (Gal. 4:13, 14) Osi i té difisil pou’y fè sa ki bon délè. (Ronm 7:18, 19) Èk délè i té ka santi pè konsèné sa ki pitèt té kay wivé’y. Mé magwé Pòl té fèb, i té vini fò. (2 Kòr. 1:8, 9) Konsa, pouki zapòt Pòl té di magwé i fèb i té fò? Ében, sé paski Jéhova ba li pouvwa-a i té bouzwen pou tjenbé fò anba sé pwoblenm-lan i té ka èspéyansé-a.

3. Ki kwèsyon nou kay wéponn an atik sala?

³ Jéhova osi pwonmèt pou ban nou fòs-la nou bouzwen pou tjenbé fò. (1 Pita 5:10) Mé nou pa sa twapé èd hòd Jéhova si nou pa fè éfò-a. Pou ègzanp, yon enjin sa bay on vwati pouvwa-a i bouzwen pou on moun drayv li. Kanmenm, si moun-lan pa fè éfò-a pou bay vwati-a gyas i pa kay wivé koté-a i vlé alé. An menm mannyè-a Jéhova toujou pawé pou ban nou fòs-la nou bouzwen-an, mé nou ni pou fè éfò-a pou Jéhova édé nou. Alò, kisa Jéhova ja ban nou pou nou sa wèsté fò? Èk kisa nou ni pou fè pou wisivwè pouvwa sala? Ében, an atik sala nou kay twapé sé wépons-lan pou sé dé (2) kwèsyon sala kon nou ka diskité koumannyè Jéhova té édé pwòfèt Jonna, Mari manman Jézi, èk zapòt Pòl. Èk osi, an atik sala nou kay diskité koumannyè Jéhova ka fòtifyé sé sèvant li-a jòdi jou, menm kon i té fòtifyé sé sèvant li-a an tan lontan.

4. Kisa nou sa fè pou Jéhova ban nou kouwaj?

⁴ Yon mannyè nou sa wisouvwè kouwaj hòd Jéhova sé lè nou mandé’y pou kouwaj an lapwiyè. Wi, Jéhova sa wéponn lapwiyè nou èk i sa ban nou ‘pouvwa-a ki sòti an li’. (2 Kòr. 4:7) Osi, an lòt mannyè nou sa wisouvwè fòs-la nou bouzwen, sé lè nou fè tan pou li èk mèdité asou Pawòl Bondyé. (Sam 86:11) Wi, konmisyon-an ki an Bib-la “ni an pil pouvwa”. (Hib. 4:12) Alò, annou toujou pwédyé bay Jéhova èk annou kontiné li Pawòl li. Anfen, si nou fè sé bagay sala, nou kay wisouvwè fòs-la nou bizwen pou tjenbé fò, pou tjenn djèwté nou, èk pou akonpli népòt ansayman menm si i difisil. Bon, apwézan, annou gadé ègzanp pwòfèt Jonna, pou wè mannyè Jéhova té ba li fòs-la i té bouzwen-an.

5. Poutji pwòfèt Jonna té bouzwen kouwaj?

⁵ Pwòfèt Jonna té bouzwen an chay kouwaj. Poutji nou sa di sa? Ében, sa sé paski Jéhova té ba li an ansayman ki té difisil, èk Jonna té pè pou alé koté-a Jéhova té voyé’y-la. Anfen Jonna té si tèlman pè, i alé asou an batiman ki té ka voyajé byen lwen plas-la i té sipozé alé-a. Èk kisa ki té wézilta-a? Ében, Jonna mété lavi’y èk lavi tout sé moun-lan asou batiman-an an danjé. Wi, wakont-lan ki an Bib-la di nou, Bondyé voyé an mové siklonn. Èk lè Jonna wéyalizé yo tout té kay mò a kòz di dézobéyisans li, i di sé nonm-lan pou jété’y an lanmè-a. Alò lè yo jété’y an lanmè-a siklonn-lan doubout èk lanmè-a vini kam. Osi, an gwo pwéson valé’y. Bon, mété kò’w an plas Jonna. Ki mannyè ou kwè i té ka santi? Ès i té kwè i té kay mò? Ès i té kwè Jéhova té tounen do’y asou’y? Wi, san dout, padan Jonna té an bouden pwéson-an, mouyé, èk an nwèsè, i oblijé té ni an chay pèwèz.

6. Silon Jonna 2:1, 2, 7, kisa Jonna té fè pou twapé kouwaj lè’y té an bouden pwéson-an?

⁶ Kisa Jonna té fè pou twapé kouwaj lè’y té pa kò’y an bouden pwéson-an? Bib-la di nou, Jonna pwédyé bay Jéhova. (Li Jonna 2:1, 2, 7.) Wi, menm si Jonna té dézobéyi Jéhova, i té ni konfyans-lan ki, paski i té wépanti èk abésé kò’y, Jéhova té kay kouté lapwiyè’y. An lòt bagay Jonna fè ki fòtifyé’y sé sa: I wéfléchi asou sé lévanjil-la. Ki mannyè nou sav sa? Ében nou sav sa paski lè nou gadé lapwiyè Jonna, an Jonna chapit 2, plizyè fwa Jonna sèvi sé menm mo pawòl-la èk sé èspwèsyon-an ki ékwi an liv Samz. (Pou yon ègzanp konpawé Jonna 2:2, 5 épi Sam 69:1; 86:7.) Wi, Jonna té konnèt adan sé vèwsé-a an liv Samz byen, èk i wéfléchi asou yo diwan tan difisil-la i té ka èspéyansé-a. Èk sa ba’y konfyans-lan ki, Jéhova té kay édé’y. Èk Jéhova sové’y pou vwé. Wi Jéhova té vwéman bay Jonna kouwaj, paski pli ta i té pawé pou fè twavay-la Jéhova té di’y pou fè-a.​—Jonna 2:10–3:4.

7-8. Ki mannyè an fwè an Taiwan té twapé fòs-la pou’y tjenbé fò anba difikilté?

⁷ Ègzanp Jonna sa édé nou lè nou ka èspéyansé difikilté. Pou ègzanp, Zhiming, b sé an fwè ki ka viv an péyi Taiwan. I ni plizyè pwoblenm épi santé’y èk i ka osi èspéyansé mové òpozisyon hòd fanmi’y a kòz di lafwa’y an Jéhova. Ki mannyè Zhiming ka tjenbé fò anba sé difikilté sala? Ében, Jéhova ka ba’y fòs-la i bouzwen lè i pwédyé èk lè i étidyé Pawòl Bondyé. Zhiming di: “Chak lè mwen ni on pwoblenm nèf, mwen ka ni an chay tèt cho, èk i pa ézé pou mwen vini kam pou mwen fè létid pèwsonnèl mwen.” Kanmenm, Zhiming ka apiyé asou Jéhova pou èd. I osi di: “Pwèmyéman, mwen ka pwédyé bay Jéhova. Èk apwé sa, mwen ka kouté sé chanson nou-an. Délè mwen ka jis chanté sé chanson-an. Èk sa ka édé mwen pou vini kam pou mwen sa koumansé étidyé.”

⁸ An lòt bagay ki ka édé Zhiming pou tjenbé fò sé létid pèwsonnèl li. Pou ègzanp, Zhiming té ni pou fè an gwo lopowasyon. Mé san’y té byen ba. A kòz di sa, an nòs té ka bay Zhiming chalè pou pwan san. Kanmenm swè-a avan lopowasyon’y, Zhiming té ka li an èspéyans konsèné an sè. Sè-a té fè menm kalté lopowasyon-an èk san sè-a té jis pli ba pasé sa Zhiming. Mé sè-a wifizé pwan san èk lopowasyon-an té an siksé. Alò èspéyans sala bay Zhiming fòs-la i té bouzwen pou wèsté fidèl pou Jéhova.

9. Si’w ka èspéyansé an difikilté ki ka ba’w tèt cho, kisa ou sa fè? (Gadé sé pòtwé-a osi.)

⁹ Lè ou ka èspéyansé difikilté ès ou janmen santi ou twò antjèt pou pwédyé bay Jéhova? Ében ès ou janmen santi ou twò las pou étidyé Pawòl li? Si sa ja wivé’w, i bon pou chonjé Jéhova ka kopwann sitiwasyon’w. Alò, menm si ou annèk di an ti lapwiyè, ou sa ni asiwans-lan ki, Jéhova kay wéponn lapwiyè’w èk i kay ba’w sa ou bizwen. (Èfés. 3:20) Osi, si sitiwasyon’w ka fè’w santi i twò wèd pou ou li ében étidyé Pawòl Bondyé, ou sa kouté Bib-la ében sé piblikasyon nou-an asou òdiyo. Ében ou pé chwazi pou kouté yonn an sé chanson nou-an, ében gadé yonn an sé vidiyo nou-an. Wi, lè nou anba difikilté, nou toujou vlé pwédyé bay Jéhova. Èk nou osi vlé gadé pou mannyè-a Jéhova ka wéponn lapwiyè nou an Pawòl li, èk an sé lézòt pwovizyon-an i ka potjiwé ban nou. Si nou fè sa, Jéhova kay fè nou vini fò.

10. Ki mannyè sé fwè èk sè nou-an sa ban nou fòs?

¹⁰ Jéhova sa sèvi sé fwè èk sè nou-an pou ban nou fòs-la nou bouzwen. Wi, yo sa ‘édé nou an chay’ lè nou ka aji épi on pwoblenm, ében lè nou ka débat épi yon ansayman ki difisil. (Kòl. 4:10, 11) Osi nou bouzwen sé fwè èk sè nou-an sitou ‘lè nou an lapenn’. (Pwov. 17:17) Èk lè nou ka santi nou pa ni fòs, yo sa édé nou, yo sa konsolé nou, èk yo sa ankouwajé nou pou kontiné wèsté fidèl pou Jéhova. Alò annou konsidiwé koumannyè Mari, manman Jézi, té twapé fòs hòd lézòt.

11. Pouki Mari té bouzwen kouwaj?

¹¹ Mari té bouzwen kouwaj pou fè volonté Bondyé. Ès ou sa imajiné tèt cho-a Mari té ni lè nanj-lan Gabwiyèl di’y i té kay vini ansent? Ében chonjé, Mari pa té mayé. Osi Mari p’òkò té ni pyès zanfan, konsa i pa té konnèt mannyè pou lévé zanfan. Èk i té ni pou lévé tibway-la ki té kay vini Mèsaya-a. An plis di sa, i pa té janmen ni sèks. Konsa, koumannyè i té kay di fiyansé’y Jozèf i ansent? Ès ou pa kay dakò sa té byen difisil pou Mari fè? Mé wi!​—Louk 1:26-33.

12. Silon Louk 1:39-45, ki mannyè Mari té twapé fòs-la i té bouzwen-an?

¹² Koumannyè Mari té twapé fòs-la pou akonpli ansayman difisil sala? Ében, i dépan asou lézòt pou èd. Pou ègzanp, i mandé Gabwiyèl pou ba’y pli enfòmasyon konsèné ansayman-an. (Louk 1:34) Osi, touswit apwé sa, i voyajé byen lwen pou vizité Élizabèt, fanmi’y, “adan yon vil an sé mòn péyi Jouda-a”. Èk sa sété on bon voyaj. Pouki nou ka di sa? Ében, Élizabèt enkouwajé Mari èk di Mari konsèné on bèl pwofèsi Jéhova té bay konsèné Jézi. (Li Louk 1:39-45.) Apwé sa Mari di, Jéhova “ka fè gwan twavay épi lanmen’y”. (Louk 1:46-51) Wi, Jéhova té sèvi Gabwiyèl èk Élizabèt pou fòtifyé Mari.

13. Kisa ki té fèt lè yon sésé mandé sé fwè’y èk sè’y-la pou èd?

¹³ Wi, menm kon Mari, ou osi sa twapé fòs hòd sé fwè’w èk sè’w-la. Dasuri, yon sésé hòd péyi Bolivia té twapé fòs hòd sé fwè’y èk sè’y-la. Papa’y té byen malad èk maladi-a pa té ni pyès djéwizon. Konsa lè’y té lopital, Dasuri pa té vlé kité’y pa kò’y. (1 Tim. 5:4) Èk sa pa té ézé. Dasuri di: “Plizyè fwa, mwen santi mwen pa té sa kontiné.” Alò, kisa i fè? Ès i té mandé sé fwè èk sè-a pou èd? Ében, Dasuri di: “An koumansman-an mwen pa té mandé pou èd, paski mwen pa té vlé anbété sé fwè-a.” I osi di: “Sé Jéhova ki kay ban mwen èd-la mwen bouzwen-an. Mé mwen wéyalizé, lè mwen pa mandé pou èd, mwen té ka aji épi sitiwasyon-an pa kò mwen.” (Pwov. 18:1) Konsa Dasuri i ékwi déotwa fwè èk sè èk i di yo konsèné sitiwasyon’y. Èk yo ba’y èd-la i té bouzwen-an. Apwé sa i di: “Mwen pa sa dékwi ki otan sé fwè-a té fòtifyé mwen. Yo mennen manjé an lopital-la ban mwen, èk yo konsolé mwen épi bèl lévanjil. Lè nou sav nou pa pa kò nou, sa sé on bèl bagay toubonnman. Wi, chak di nou sé an pa an gwo fanmi Jéhova. Èk sé fwè èk sè nou-an vlé édé nou, yo vlé pléwé épi nou lè nou ka soufè, èk yo vlé enkouwajé nou pou kontiné adowé Jéhova ansanm épi yo.”

14. Pou ki wézon nou sipozé aksèpté èd hòd sé ansyen-an?

¹⁴ Yonn an sé mannyè-a Jéhova ka ban nou fòs, sé lè’y sèvi sé ansyen-an pou édé nou. Wi, sé ansyen-an vwéman sé on bèl kado Jéhova ka sèvi pou fòtifyé èk wéfwéchi nou. (Izay. 32:1, 2) Konsa, lè’w ni tèt cho, pa santi pè pou di sé ansyen-an sa ki ka twakasé’w. Èk lè yo ofè’w èd, aksèpté èd-la yo ka ofè’w-la. Pouki i bon pou fè sa? Ében toujou chonjé, sa sé yonn an sé mannyè-a Jéhova ka ban nou fòs.

15. Ki bèl èspwa Kwityen ka chéwi?

¹⁵ Tout sé pwonmèt-la ki an Pawòl Bondyé ka ban nou èspwa èk fòs pou kontiné adowé Bondyé nou Jéhova. (Ronm 4:3, 18-20) Konsa ki bèl èspwa Kwityen ka chéwi? Ében, adan Kwityen ni èspwa-a pou viv pou tout tan an syèl, mé majòwité di nou ni èspwa-a pou viv pou tout tan adan on bèl pawadi asou latè-a. Wi, èspwa-a Jéhova ban nou bèl, paski i ka édé nou pou tjenbé fò lè nou anba difikilté, i ka édé nou pou kontiné pwéché bon nouvèl-la, èk i ka pousé pou édé sé fwè èk sè nou-an. (1 Tèsa. 1:3) Wi, sé menm èspwa sala ki té fòtifyé zapòt Pòl.

16. Pouki zapòt Pòl té bouzwen fòs?

¹⁶ Zapòt Pòl té bouzwen fòs pou tjenbé fò. Anfen, lè’y té ékwi sé Kwityen-an an Kòrint, i konpawé kò’y épi vésèl ki fèt épi matwiyo ki pa fò. Wi, ‘twaka té ka pézé asou’y an tout fasad, i té twoublé, yo té pèsikité’y, èk yo té jis fésé’y a tè’. Non, i pa té ézé pou zapòt Pòl. Délè lavi’y té jis an danjé. (2 Kòr. 4:8-10) Zapòt Pòl té ékwi kongwigasyon-an an Kòrint diwan twazyenm voyaj li kon yon misyonnè. Mé sa pa té finisman pwoblenm li. Wi, zapòt Pòl té kay jwenn pli difikilté diwan lèwèstan voyaj li kon yon misyonnè. Pou ègzanp, an gany moun té bat li, yo té awété’y, i té pwèskè néyé, èk yo té mété’y an pwizon.

17. Silon 2 Kòrint 4:16-18, kisa ki té bay zapòt Pòl fòs-la pou tjenbé fò?

¹⁷ Zapòt Pòl té twapé fòs-la pou tjenbé fò lè’y fiksé asou èspwa-a i té ni-an. (Li 2 Kòrint 4:16-18.) Wi, Pòl di sé Kwityen-an an Kòrint menm si kò’y té “ka fini anyen jou apwé jou”, sa pa té kay dékouwajé’y. Èk sa sété paski i té ka fiksé asou èspwa-a i té ni pou viv pou tout tan an syèl. I té sav èspwa sala té “an lonnè ki twòp pli ho pasé tout twaka”. Anfen, Pòl té ka apwésyé èspwa sala si tèlman ki, i té pawé pou tjenbé fò anba népòt difikilté. Wi, lè Pòl té mèdité asou bèl èspwa sala, sa fè’y santi i té “ka vini fò jou apwé jou”.

18. Ki mannyè èspwa-a Tihomir èk fanmi’y ni pou tan ki ka vini ja fòtifyé yo?

¹⁸ Tihomir sé a fwè ki ka viv an péyi Bulgaria. Déotwa lanné pasé, pli jenn fwè’y-la, Zdravko, mò adan an aksidan. Sa annékòz Tihohmir an chay lapenn pou an chay tan. Kisa ki ka bay Tihomir, madanm li, èk gason’y fòs-la pou andiwé? Ében, yo ka fiksé asou èspwa wézèwèksyon-an. Wi, yo ka imajiné mannyè i kay yé. Tihomir di: “Nou ka diskité ki koté an pawadi-a nou pitèt kay jwenn épi Zdravko, ki kalité manjé nou kay pwépawé ba li, ki moun nou kay envité pou pwenmyé fèt-la nou kay tjenn lè i witounen, èk kisa nou kay di’y konsèné dènyé tan-an.” Wi, lè Tihomir èk fanmi’y fiksé asou èspwa yo pou tan ki ka vini, sa ka ba yo fòs-la pou tjenbé fò kon yo ka èspéyé jou-a lè Jéhova kay wésisité fwè’y-la.

19. Kisa ou sa fè pou fòtifyé èspwa’w? (Gadé pòtwé-a osi.)

¹⁹ Kisa ou sa fè pou fòtifyé èspwa’w? Ében, si’w ni èspwa-a pou viv asou latè-a pou tout tan, ou sa li ében kouté sé lévanjil-la ki an Bib-la ki ka dékwi Pawadi-a, èk ou sa mèdité yo. (Izay. 25:8; 32:16-18) Osi fè tan pou imajiné mannyè-a lavi kay yé an latè nèf-la. Wi, imajiné kò’w an pawadi-a. Katjilé asou: ‘Ki moun ou kay wè? Ki diféwan son ou kay tann? Èk ki mannyè ou kay santi?’ An plis di sa, gadé sé pòtwé-a ki an sé piblikasyon nou-an, ében gadé sé vidiyo mizik nou-an, tèl kon; I Tou Pwé, Lapé Pou Tout Tan!, ében Djèwté Nou Jou Apwé Jou. Sa kay édé’w imajiné mannyè pawadi-a kay yé. Alò, si nou ka toujou fè tan pou katjilé asou mannyè lavi kay yé an latè nèf-la, nou kay tjenn an lidé nou ki, sé pwoblenm-lan nou ka èspéyansé apwézan “la pou an ti tan tousèl”. (2 Kòr. 4:17) Wi, èspwa-a Jéhova ba’w-la sa édé’w pou tjenbé fò lè’w ka èspéyansé pwoblenm.

20. Koumannyè nou sa twapé fòs magwé nou fèb?

²⁰ Wi, magwé nou fèb, ‘Bondyé ka ban nou fòs’. (Sam 108:13) Èvèk Jéhova ja ban nou sa nou bouzwen pou twapé fòs hòd li. Konsa, lè’w bouzwen èd pou fè yon ansayman ki difisil, pou tjenbé fò lè’w ka èspéyansé pwoblenm, ében pou tjenn lajwa’w, palé bay Jéhova an lapwiyè èk kontiné fè létid pèwsonnèl ou. Osi, aksèpté èd hòd sé fwè èk sè-a. Èk toujou fè tan pou katjilé asou bèl èspwa-a nou ni pou tan ki ka vini. Wi, si ou fè sé bagay sala, “Bondyé kay [ba’w] kouway adan tout kouway-la li yonn ni-an. Kon sa ou pé doubout fò épi ni pasyans épi lajwa an [tjè’w]”.—Kòl. 1:11.