1. Pouki i pé difisil pou nou obéyi?

 ÈS OU ka twapé’y difisil pou obéyi délè? Si wépons ou sé wi, sé pa ou tousèl. Wa David té ka santi menm mannyè-a. Konsa, i pwédyé pou Jéhova édé’y. (Li Sam 51:12) David té enmen Jéhova an chay. Kanmenm, délè i té difisil pou’y té sa obéyi Jéhova. Èk menm kon David i pé difisil pou nou obéyi Jéhova osi. Mé pouki? Wézon-an sé sa: Pwèmyéman, nou pa pawfé èk a kòz di sa, nou ni on dispozisyon pou dézobéyi. Dézyenm-lan sé, Satan wébèl kont Bondyé, èk i ka kontiné fè tout éfò pou fè nou fè menm bagay-la osi. (2 Kòr. 11:3) Twazyenm, nou ka viv oliwon moun ki ka dézobéyi Jéhova. Èk sa ka fè’y byen ézé pou nou adòpté menm atitid sala. (Èfés. 2:2) Konsa, nou ni pou goumen wèd pou nou pa péché èk pou wézisté chalè-a Satan èk latè-a ka mété asou nou pou dézobéyi Bondyé. Alò, nou ni pou fè tout éfò pou obéyi Jéhova èk sé moun-lan Jéhova bay lotowité-a.

2. Menm kon pwofèt Izaya, kisa nou vlé fè?

² Li Izaya 50:5. Menm kon pwofèt Izaya, nou vlé toujou obéyi Bondyé. Èk nou ni pou pawé pou obéyi sé moun-lan Bondyé bay lotowité-a. Mé si sé moun-lan Bondyé bay lotowité-a, mandé nou pou dézobéyi sé koumand li-a, Bondyé vlé nou obéyi’y pito nou obéyi sé moun sala.—Twav. 4:18-20.

3. Pouki i enpòtan pou obéyi moun Jéhova bay lotowité?

³ Nou pé twapé i pli ézé pou obéyi Jéhova pasé lézòm. Èk wézon-an pou sa sé sa: Jéhova pawfé èk sé lwa’y-la pawfé. (Sam 19:7) Ou sav, sé pa mannyè sala i yé épi lézòm ki ni lotowité paski yo pa pawfé. Mé menm si lézòm pa pawfé, Jéhova bay pawan, gouvèdman péyi-a, èk sé ansyen-an lotowité. (Prov. 6:20; 1 Tèsa. 5:12; 1 Pita 2:13, 14) Konsa, i enpòtan pou nou obéyi yo paski sa ka moutwé nou ka obéyi Jéhova. Mé délè, nou pé pa dakò épi diwèksyon yo, èben nou pé pa vlé swiv diwèksyon yo. Konsa, kisa nou sa fè? Èben, apwézan annou konsidiwé mannyè nou sa obéyi sé moun-lan Jéhova bay lotowité-a.

4. Pouki an chay manmay ka twapé’y tèlman wèd pou obéyi pawan yo?

⁴ La ni an chay jenn moun ki pa ka “kouté papa yo épi manman yo”. (2 Tim. 3:1, 2) Mé pouki i tèlman wèd pou yo obéyi manman yo èk papa yo? Èben, adan pawan ka mandé ich yo pou fè sa yo menm pa ka fè. Èk kon wézilta, sé ich yo-a ka kwè, pawan yo twò ipokwit. Osi, adan jennès ka kwè paski latè-a chanjé si tèlman, konsèy pawan yo pa bon. Anfen yo ka kwè, konsèy pawan yo pa ka fè sans. Alò, si ou sé on jenn moun, ès sé kon sa ou ka santi? Vwéman, nou pa sipwi an chay jennès ka twapé’y difisil pou obéyi konsèy Jéhova. Mé i vo tout éfò pou swiv bon konsèy-la Jéhova ban nou an Èfésòs 6:1. Jéhova di nou la: “Zòt sé manmay-la sipozé obéyi papa épi manman zòt, paski Senyè-a di zòt pou fè sa.” Mé kisa ki kay édé’w pou obéyi pawan’w?

5. Pouki i té wimakab Jézi té ka obéyi pawan’y? (Louk 2:46-52)

⁵ Jennès, ou sa apwann obéyisans hòd Jézi. I sé pli mèyè ègzanp-lan Jéhova ban nou. (1 Pita 2:21-24) Jézi sété on moun ki té pawfé, mé pawan’y pa té pawfé èk yo té ka fè lèwè. Magwé sa, Jézi té ka wèspèkté èk obéyi yo kon lévanjil-la di manmay sipozé fè. (Ègz. 20:12) Délè, pawan Jézi té ka malkonpwann li. Pou ègzanp, lè Jézi té douz (12) lanné, i té alé Jérouzalèm épi pawan’y. Mé lè yo té ka déviwé lakay yo, yo pa té wéyalizé Jézi pa té épi yo. Alafen, lè Jozèf èk Mari jwenn Jézi, manman’y blanmé’y pou tout tèt cho-a i té ba yo-a paski i té wèsté an Jérouzalèm. Vwéman, Jozèf èk Mari té sipozé fè asiwé tout manmay yo la épi yo. Konsa, Jézi té sa di yo sa sété fòt yo. Mé pito i fè sa, i ba yo on wépons ki té senp èk ki té moutwé i ni wèspé pou yo. Mé Jozèf èk Mari “pa té konpwann ki sa i té ka di yo-a.” Kanmenm, “Jézi witounen an Nazawèt épi manmanʼy èk papaʼy épi i té ka obéyi yo.” (Li Louk 2:46-52.)

6-7. Kisa ki kay édé jenn moun pou obéyi pawan yo?

⁶ Alò jenn moun, lè pawan’w fè on lèwè èben yo ka malkonpwann ou, ès ou ka twapé’y wèd pou obéyi yo? Kisa ki kay édé’w lè’w twapé’y wèd pou obéyi pawan’w? Èben, pwèmyéman, katjilé asou mannyè Jéhova ka santi. Ou wè, Bib-la di lè’w ka obéyi pawan’w, “sa kay plè Bondyé an chay.” (Kòl. 3:20) Vwéman, Jéhova sav, délè pawan’w pa ka kopwann ou; èk délè yo ka fè wèg ki pa ézé pou obéyi. Mé Jéhova ka kontan lè ou fè lidé’w pou obéyi yo.

⁷ Dézyenm. Katjilé mannyè pawan’w ka santi. Wi, lè ou obéyi pawan’w sa ka fè yo kontan èk yo kay ni pli konfyans an ou. (Prov. 23:22-25) Anfen, zòt kay vini pli pwé yonn a lòt. On fwè ki sòti péyi Belgium, non’y sé Alexandre di: “Lè mwen koumansé obéyi pawan mwen, nou vini pli pwé yonn a lòt. Nou té ni pli lakontantman.” Bon èk twazyenm; katjilé asou sé bennéfis-la an ou kay twapé an tan pou vini lè ou obéyi pawan’w. Paulo, ki ka wèsté an péyi Bwazil di: “Paski mwen ja apwann mannyè pou obéyi pawan mwen, sa ka édé mwen pou obéyi Jéhova èk lézòt moun ki ni lotowité.”  b Vwéman, Pawòl Bondyé ka ba’w bon wézon pou obéyi pawan’w. Mi sa i di: “Mannyè sala tout bagay pé maché byen épiʼw, épi ou pé viv pou an chay tan asou latè-a.”—Èfés. 6:2, 3.

8. Pouki an chay jenn moun ka fè disizyon-an pou obéyi pawan yo?

⁸ Plizyè jenn moun ka wè mannyè bagay ka maché byen pou yo, lè yo obéyi pawan yo. Pou ègzanp, Luiza, ki sòti péyi Bwazil, an koumansman-an pa té konpwann pouki pawan’y pa té ba’y on pòtab. I té ka katjilé pwèskè tout jenn moun an laj li ni on pòtab èk i pa té ni yonn. Apwé on lè, i vini wéyalizé pawan’y té ka vwéman pwotéjé’y. Mi sé sa i di: “Avan, sé wèg-la pawan mwen té ka mété-a té fè mwen santi akonmsi mwen té andan on pwizon. Mé atjwèlman, mwen sav lè mwen obéyi pawan mwen, sa ka édé mwen. Konsèy yo ka vwéman pwotéjé lavi mwen.” Elizabeth, on jenn sésé ki sòti Lanméwik ka twouvé’y wèd pou obéyi pawan’y délè. Mi sa i di: “Lè mwen pa byen konpwann on wèg pawan mwen bay, mwen ka katjilé asou sé tan-an lè wèg yo té pwotéjé mwen.” On lòt sè, non’y sé Monica, ki ka wèsté an Armenia di, bagay té kay toujou maché byen pou li lè i obéyi pawan’y. Mé lè i dézobéyi, bagay pa té kay maché byen pyès.

9. Kisa an chay moun ka di konsèné obéyisans pou sé lwa gouvèdman-an?

⁹ An chay moun di nou bizwen gouvèdman lézòm èk nou ni pou obéyi adan an sé lwa-a gouvèdman péyi-a ka bay. (Ronm 13:1) Osi, yo ka di nou pa oblijé obéyi yon lwa si nou pa enmen lwa sala, èben si lwa sala pa jis. Pou ègzanp, annou konsidiwé sa moun an yon péyi an Europe ka di lè’y vini pou lwa-a pou péyé taks. Mi sé sa yo di: “An moun pa sipozé péyé taks si i kwè taks-la pa jis.” Pou wézon sala, sé moun-lan ki ka wèsté an péyi sala pa ka péyé tout taks-la gouvèdman-an ka mandé yo pou péyé.

10. Pouki nou ka obéyi lwa gouvèdman?

¹⁰ Bib-la di a klè, sé Satan ki ka kontwolé tout sé gouvèdman-an asou latè-a èk akòz di sa moun ka soufè an chay. (Sam 110:5, 6; Éklé. 8:9; Louk 4:5, 6) Osi, Bib-la ka di, touswit Bondyé kay détwi sé gouvèdman sala. Kanmenm, Jéhova ka pèwmité gouvèdman lézòm pou kondwi pou yo sa tjenn lapé asou latè-a. Anfen, Ronm 13:2 di: ”‏Sé sa ki wifizé obéyi lwa gouvèdman péyi-a ka dézobéyi Bondyé.” Wi, Jéhova vlé nou obéyi lwa yo. Konsa, nou ni pou “ba yo tout sa ki ka vini pou yo.” Wi, nou ni pou ba yo wèspé, nou ni pou péyé taks èk nou ni pou obéyi lwa yo. (Ronm 13:1-7) Bon. Délè nou pé santi an lwa wèd pou nou obéyi paski i ka fè nou dépansé an chay lajan èben paski i pa jis. Lè nou ka santi kon sa, sé pou nou toujou chonjé nou ka obéyi lwa gouvèdman paski nou enmen Jéhova èk nou vlé obéyi’y. Wi, nou kay obéyi tout lwa gouvèdman si yo pa ka mandé nou pou dézobéyi lwa Bondyé.​—Twav. 5:29.

11-12. (a) Kisa Jozèf èk Mari té fè pou obéyi lwa gouvèdman-an? (Louk 2:1-6) (b) Ki mannyè Jéhova té benni yo? (Gadé sé pòtwé-a osi.)

¹¹ Nou sa apwann bon lison an ègzanp Jozèf èk Mari. Yo té pawé pou obéyi lwa gouvèdman péyi-a menm si i té difisil pou yo fè sa. Annou konsidiwé ègzanp sala. (Li Louk 2:1-6.) Lè Mari té pwèskè pawé pou akouché, gouvèdman-an mandé yo pou fè on bagay ki té kay byen difisil. An tan sala, “Siza Ogis sété wa tout Ronm èk tout plas ki té anba kondwit Ronm.” I té pasé on lwa pou tout moun ki té ka wèsté an péyi-a pou alé wéjistwé. Kisa sa té vlé di pou Jozèf èk Mari? Èben, yo té ni pou kité vil yo èk alé Bèfléyenm. Voyaj sala pa té yonn ki té ézé. Èk an plis di sa, Mari té pawé pou akouché. Yo té ni pou voyajé katwiven twèz (93) lyé pou wivé Bèfléyenm. Èk chimen-an té mové. Yo té ni pou mouté désann an chay mòn. Konsa, sa pa té kay ézé pou Mari pyès! Èk pitèt, yo té byen twakasé konsèné santé Mari èk ti bébé-a ki té an matwis li. Pitèt yo té ka mandé kò yo, ‘Sipozé Mari akouché asou chimen-an? Kisa nou kay fè? Koumannyè nou kay pwotéjé Mèsaya-a, ti bébé-a Mari ka pòté-a?’ Alò, kisa Jòzèf èk Mari té kay fè? Ès yo té kay kité sé difikilté-a yo té kay èspéyansé-a anpéché yo obéyi lwa gouvèdman-an?

¹² Magwé i pa té ézé pou Jozèf èk Mari, yo pa té kité sé difikilté-a yo té kay èspéyansé-a anpéché yo obéyi lwa-a. Èk pou wézon sala, Jéhova benni yo. Lè Mari wivé Bèfléyenm i akouché on ti gason ki té ni bon santé. Épi an mannyè sala, sa yo té fè-a té édé akonpli on pwofèsi Bib!​—Mayk. 5:2.

13. Lè nou obéyisan, ki mannyè sa kay édé sé fwè èk sè nou-a?

¹³ Lè nou obéyi lwa gouvèdman, nou ka twapé bennéfis èk lézòt ka twapé bennéfis osi. An ki mannyè? Èben, lè nou obéyi lwa-a, nou pa ka twapé sé mové konsékans-lan moun ka twapé lè yo dézobéyi lwa-a. (Ronm 13:4) Èk osi, lè nou obéyi sé lwa gouvèdman-an, tout moun kay wè Tèmwen Jéhova sé moun ki obéyisan. Pou ègzanp, annou konsidiwé yon èspéyans ki té fèt plizyé lanné ki pasé an péyi Nigeria. Diwan an mitin, sòlda antwé Sal Wéyòm-lan èk yo té ka chaché pou moun ki pa té vlé péyé taks. Mé chèf ofisyé-a di sé sòlda-a pou kité Sal Wéyòm-lan paski “Tèmwen Jéhova ka toujou péyé taks yo”. Wi, lè nou obéyi lwa gouvèdman, nou ka édé tjenn bon wépitasyon-an Tèmwen Jéhova ni. Èk yon jou, bon wépitasyon sala, pé édé pwotéjé sé fwè èk sè nou-a.​—Maf. 5:16.

14. Ki twa bagay Joanna fè ki té édé’y obéyi moun ki ni lotowité?

¹⁴ Magwé nou sav nou ka twapé an chay bennéfis lè nou obéyisan, nou pé twouvé’y difisil pou obéyi sé lwa gouvèdman-an. Annou konsidiwé èspéyans Joanna, an sè ki ka wèsté an Lanméwik. I di: “I té byen wèd pou mwen obéyi moun ki ni lotowité paski yo té ja maltwété adan fanmi mwen.” Konsa, Joanna té bizwen fè èfò pou chanjé mannyè i té ka gadé moun ki ni lotowité. Kisa i té fè? Joanna té fè twa bagay. Pwèmyé bagay-la Joanna té fè sé sa; i doubout li bagay asou intannèt-la ki té ka palé kont sé gouvèdman-an paski sé bagay sala té ka fè’y hayi sé gouvèdman-an pli. (Pwov. 20:3) Dézyenm bagay-la Joanna fè sé sa; i pwédyé èk i mandé Jéhova pou èd pou’y sa konfyé’y èk èspéwé gouvèdman’y pito i èspéyé pou on lòt gouvèdman kondwi péyi-a. (Sam 9:9, 10) Èk twazyenm bagay-la i fè; sé pou li sé piblikasyon nou-a ki té ka palé konsèné mannyè Kwityen ki vwé endiféwan, sa vlé di yo pa ka sipòté ni yonn ni lòt. (Jan 17:16) Sé bagay sala vwéman édé Joanna pou chanjé mannyè-a i té ka gadé moun ki ni lotowité. Wi, apwézan Joanna ni lapé an lidé èk an tjè’y paski i ka obéyi èk ka wèspèkté sa ki ni lotowité.

15. Pouki délè i pé difisil pou nou obéyi diwèksyon ki sòti hòd ògannizasyon Jéhova?

¹⁵ Jéhova ka di nou: “Obéyi sé moun-an ki ka kondwi zòt-la èk swiv sa yo ka di.” (Hib. 13:17) Nou sav sé Jézi ki ka kondwi kongwigasyon-an èk i pawfé. Mé sé fwè-a i apwenté-a pou pwan douvan asou latè-a pa pawfé. Délè i pé difisil pou nou obéyi yo, èspwèsman lè yo mandé nou pou fè on bagay nou pa vlé fè. Yon fwa, lè zapòt Pita té twapé diwèksyon, i té an dé lidé pou fè’y. Mi sitiwasyon-an: Lwa Moziz-la pa té pèwmité sé Jwif-la pou manjé adan sé zanimo-a. Mé yon nanj vini di Pita pou manjé sa Lwa Moziz-la pa té pèwmité yo pou manjé. A lè sa-a, Pita wifizé obéyi diwèksyon sala. Pa yon fwa tousèl, mé twa fwa! (Twav. 10:9-16) Mé pouki Pita wifizé obéyi diwèksyon-an? Sa sé paski sa té on bagay nèf èk i té ja abitwé ka fè bagay diféwan. Konsa, sa pa té ka fè sans pou li. Bon. Si i té difisil Pita obéyi diwèksyon ki sòti hòd on nanj ki pawfé, nou pa sipozé sipwi lè nou twouvé’y difisil pou obéyi diwèksyon ki sòti hòd lézòm ki pa pawfé.

16. Menm si Pòl té sa di diwèksyon-an i wisouvwè-a pa wézonnab, kisa i té fè? (Twavay 21:23, 24, 26)

¹⁶ Zapòt Pòl té ka obéyi diwèksyon, jis diwèksyon i té sa twouvé ki pa wézonnab. Pou ègzanp, sé Kwityen-an ki té Jwif-la té tann mansonj konsèné Pòl. Mi sé sa moun té ka di asou Pòl. Yo té ka di, “[Pòl] ka enstwi tout sé Jwif-la ki ka viv an péyi sé moun lòt nasyon-an yo pa bizwen swiv lwa sé Jwif-la.” (Twav. 21:21) Konsa, sé ansyen-an an Jérouzalèm di Pòl pou pwan kat nonm èk alé an tanp-lan pou piwifyé kò’y silon Lwa Moziz-la. Konsa, si i fè sa, i té kay moutwé ki i té ka òbzòvé lwa-a. Mé Pòl té sav, Kwityen pa té anba Lwa Moziz-la ankò. Èk an plis di sa, i pa té fè anyen ki pa té bon. Kanmenm, i pa té dézobéyi. I pwan aksyon vitman. Lévanjil-la di: “Kon sa Pòl pwan menm kat sé nonm-lan, épi an li denmen, yo fè sa lwa sé Jwif-la di yo ni pou fè pou Bondyé aksèpté pwonmèt yo.” (Li Twav. 21:23, 24, 26.) Paski Pòl té obéyi sé diwèksyon-an, i édé tjenn lilyon-an anpanmi sé fwè-a.​—Ronm 14:19, 21.

17. Kisa ou apwann an èspéyans Stephanie?

¹⁷ Yon sè, non’y sé Stephanie, té twouvé’y difisil pou aksèpté diwèksyon-an sé fwè-a té ba’y. Ou wè, li èk mawi’y té ka wann sèvis adan on gwoup ki té ka édé on lòt langaj. Yo té kontan pou wann sèvis an gwoup sala. Mé lofis bwanch-lan té pwan disizyon-an pou pa kontiné épi gwoup sala ankò. Èk yo voyé Stephanie èk mawi’y adan on kongwigasyon ki té ka palé langaj péyi-a. Mi sa Stephanie di: “Mwen té dézapwenté an pil. Mwen pa té kwè sé kongwigasyon-an ki té ka palé langaj péyi-a té bizwen pli èd pasé sé gwoup-la ki té ka édé lòt langaj.” Menm si Stephanie pa té dakò épi disizyon-an, i té fè lidé’y pou sipòté diwèksyon-an. Mi sa Stephanie di ankò: “Apwé on lè, mwen wè disizyon sé fwè-a té savan. Wi, nou ja vini manman èk papa pou sé fwè èk sè-a an kongwigasyon nou. An chay di yo pa ni fanmi an lavéwité-a. Atjwèlman nou sé fanmi yo èk nou ka ankouwajé yo. Pou ègzanp, mwen ka étidyé épi on sè ki djòs koumansé pwéché épi kongwigasyon-an ankò. Épi, mwen ni pli tan pou fè létid pèwsonnèl mwen.” Stephanie di ankò: “Konsyans mwen klè paskè mwen sav mwen té fè tout sa mwen pé pou wèsté obéyisan.”

18. Ki bennéfis nou kay twapé lè nou obéyi?

¹⁸ Nou sa apwann obéyisans menm kon Jézi. Bib-la di, “soufwans-lan i soufè-a fèʼy apwann ki mannyè pou obéyi Bondyé.” (Hib. 5:8) Alò, i pa té ézé pou li. Menm kon Jézi, délè nou ka apwann obéyisans anba sitiwasyon ki difisil. Pou ègzanp, lè COVID-la té koumansé, pwensipal konmité-a té di, nou pa té kay tjenn mitin an Sal Wéyòm-lan èk nou pa té kay pwéché kay an kay jistan i té sòv pou fè sa. Ès i té difisil pou ou obéyi? Kanmenm, paski ou té obéyi, sa té pwotéjé’w hòd maladi-a. Èk osi, sa té édé’w vini pli pwé sé fwè èk sè-a. An plis di sa, nou sav Jéhova té byen plè épi’w. Konsa, nou tout byen pwépawé pou obéyi népòt enstwiksyon nou kay wisouvwè diwan gwan twibilasyon-an ki ka vini. Anfen, obéyisans kay sové lavi nou!​—Jòb 36:11.

19. Kisa ki pli enpòtan wézon-an nou ka obéyi Jéhova?

¹⁹ Nou ja apwann, lè nou obéyi Jéhova nou kay twapé an chay bennédiksyon. Mé pli enpòtan wézon-an pouki nou ka obéyi Jéhova, sé paski nou enmen’y èk nou vlé plè’y. (1 Jan 5:3) Bon. Magwé nou pa sa janmen péyé Jéhova pou tout sa i ja fè ban nou, nou sa obéyi’y èk sé moun-lan i bay lotowité-a. (Sam 116:12) Lè nou fè sa, nou ka moutwé nou sé moun ki savan. Èk silon Pwovèb 27:11, lè nou moutwé nou savan, ‘nou ka fè tjè Jéhova kontan’.