1. Kisa Jézi kay fè touswit?

 NOU KA viv an bout, bout vyé sistèm sala! Touswit, Jézi kay jijé tout moun ki asou latè-a. Sé disip-la té mandé Jézi pou di yo, kisa ki té kay fèt pou moutwé “tan-an kay bout.” Pou wéponn kwèstyon yo, Jézi bay sé disip-la on pwofèsi. Pwofèsi-a té ka dékwi, mannyè bagay té kay yé asou latè-a, diwan tan-an avan jijman-an té kay koumansé. (Maf. 24:3) Nou sa li pwofèsi sala an Mafyou chapit 24 èk 25, an Mak chapit 13, épi an Louk chapit 21.

2. Kisa nou kay diskité an atik sala, èk ki mannyè sa kay édé nou?

² An atik sala, nou kay konsidiwé twa (3) an sé pawabòl-la Jézi sèvi an wépons li: Pawabòl-la konsèné sé mouton-an épi sé kabwit-la, pawabòl dis (10) jenn fi-a, épi pawabòl twa (3) sèvant-lan. An sé pawabòl sala, Jézi ban nou bon avètisman ki sa édé nou. Chak sé pawabòl-la ka édé nou pou konpwann, mannyè atitid nou ka afèkté jijman-an nou kay twapé. Konsa kon nou diskité sé pawabòl sala, annou fè éfò pou konpwann sé lison-an nou sa apwann an yo, èk pou wè mannyè nou sa apliké sé lison sala an lavi nou. Bon, pwèmyé pawabòl-la nou kay diskité, sé pawabòl-la konsèné sé mouton-an épi sé kabwit-la.

PAWABÒL-LA KONSÈNÉ SÉ MOUTON-AN ÉPI SÉ KABWIT-LA

3. Ki lè Jézi kay jijé moun?

³ An pawabòl-la konsèné sé mouton-an épi sé kabwit-la, Jézi ka palé konsèné jijman-an i kay pasé asou moun ki ni òpòtyounité-a pou kouté bon nouvèl-la, épi pou sipòté sé fwè’y-la ki annonté-a. (Maf. 25:31-46) Jézi kay pasé jijman sala asou sé moun sala, an finisman gwan twibilasyon-an, touswit avan Anmagèdonn koumansé. (Maf. 24:21) Wi, menm kon on bèwjé ka sépawé mouton hòd kabwit, sé kon sa Jézi kay sépawé sé moun-lan ki ka sipòté sé fwè annonté’y-la, hòd sé moun-lan ki pa ka sipòté yo.

4. Silon Izaya 11:3, 4, pouki nou sa asiwé Jézi kay jijé tout moun adan on mannyè ki jis? (Gadé pòtwé-a osi.)

⁴ Jéhova apwenté Jézi kon Jij, èvèk pwofèsi Bib ka moutwé, Jézi kay jijé adan on mannyè ki jis. (Li Izaya 11:3, 4.) Jézi ka òbzòvé mannyè moun ka konpòté kò yo, i ka òbzòvé atitid yo épi pawòl yo, èvèk i ka òbzòvé mannyè yo ka twété sé fwè’y-la ki annonté-a osi. (Maf. 12:36, 37; 25:40) Konsa, Jézi konnèt ki moun ki ka sipòté sé fwè annonté’y-la an twavay-la i ba yo pou fè-a. a Yonn an sé pli mèyè mannyè-a sé mouton-an ka sipòté sé fwè Jézi-a, sé lè yo édé yo an twavay pwèchman-an. Jézi kay jijé moun ki ka sipòté sé fwè’y-la an twavay sala kon moun ki ‘dwèt,’ èvèk sé moun sala kay an ling pou wisivwè “lavi étonnèl” asou latè-a. (Maf. 25:46; Wév. 7:16, 17) Mi on bèl wékonpans pou fidèlité yo! Wi, si sé moun sala wèsté fidèl pou Jéhova diwan gwan twibilasyon-an, èk diwan dènyé tès-la, non yo kay wèsté ékwi an “liv lavi étonnèl-la.”​—Wév. 20:15.

5. Ki avètisman Jézi té bay an pawabòl-la konsèné sé mouton-an épi sé kabwit-la? Ki moun ki sipozé antéwésé an avètisman sala?

⁵ Wèsté fidèl pou Jéhova. Avètisman-an Jézi té bay an pawabòl-la konsèné sé mouton-an épi sé kabwit-la, sé vwéman pou moun ki ni èspwa-a pou viv asou latè-a. Avètisman-an sé sa: Sé moun sala ni pou wèsté fidèl pou Jéhova. Èk yo ka moutwé yo fidèl, lè yo édé sé fwè Jézi-a an twavay pwèchman-an. Yo ka osi moutwé fidèlité yo, lè yo obéyi sé diwèksyon-an nou ka wisivwè hòd Pwensipal Konmité-a—ti gwoup-la Jézi apwenté pou diwèkté pèp li jòdi jou. (Maf. 24:45) Mé, sé pa sèlman moun ki ni èspwa pou viv asou latè-a, ki ni pou obéyi avètisman-an Jézi té bay an pawabòl sala. Sé moun-lan ki annonté-a ni pou obéyi avètisman-an osi. Pouki? Sé paski, Jézi ka òbzòvé mannyè yo ka konpòté kò yo, i ka òbzòvé atitid yo épi pawòl yo, èk yo menm ni pou wèsté fidèl osi. Anfen, Jézi bay dé (2) lòt pawabòl ki ni avètisman pou sé moun-lan ki annonté-a. Nou sa li sé pawabòl sala an Mafyou chapit 25. Apwézan, annou diskité pawabòl dis (10) jenn fi-a.

PAWABÒL DIS (10) JENN FI-A

6. Ki mannyè, senk (5) an sé fi-a moutwé yo té ni lèspwi? (Mafyou 25:6-10)

⁶ An pawabòl dis (10) jenn fi-a, Jézi palé konsèné dis (10) jenn fi ki pwan lanp yo, èk yo sòti pou alé jwenn misyé-a ki té kay mayé-a. (Maf. 25:1-4) Sé fi-a té ni èspwa pou alé an nòs-la épi misyé-a. Jézi di, senk (5) an sé fi-a “té ni lèspwi,” èk lòt senk-la té “kouyon.” Sé senk-la ki té ni lèspwi té byen pwépawé, èk yo kontiné véyé pou wè ki lè misyé-a té kay vini. Pou ègzanp, yo té ni lanp yo pou ba yo klèté an nwèsè-a, èk yo té jis ni pli lwil pou sé lanp-lan. Konsa, menm si misyé-a té anwita, ében i wivé a lannwit, yo té byen pawé pou èspéwé’y. (Li Mafyou 25:6-10.) Lè misyé-a ki té ka mayé-a wivé, sé fi-a ki té ni lèspwi, alé an nòs-la épi’y. An menm mannyè-a, si sé Kwityen-an ki annonté-a pwépawé kò yo, kontiné véyé, èk wèsté fidèl jistan Jézi wivé, yo kay sa alé an syèl pou kondwi épi’y an Wéyòm-lan. b (Wév. 7:1-3) Mé, sa kont senk (5) fi kouyon-an?

7. Kisa ki wivé (5) senk fi kouyon-an, èk pouki?

⁷ Lè misyé-a ki té kay mayé-a wivé, sé senk(5) fi kouyon-an pa té pawé. Lanp yo té kay étenn, èk yo pa té mennen pli lwil épi yo. Konsa, lè yo tann misyé-a ki té kay mayé-a té kay wivé touswit, yo té ni pou alé achté lwil. Èvèk lè misyé-a wivé, yo p’òkò té witounen. Lè sala, “senk-lan ki té pawé-a alé an nòs-la èk misyé-a ki kay mayé-a, épi yo fèmé lapòt-la.” (Maf. 25:10) Ében, pli ta senk (5) fi kouyon-an viwé, èk yo té vlé antwé an nòs-la, mé misyé-a di yo: “Mwen pa konnèt [zòt].” (Maf. 25:11, 12) Sé fi kouyon-an pa té pawé pou kontiné èspéwé misyé-a ki té kay mayé-a. Konsa, an pawabòl sala, kisa ki avètisman-an pou sé moun-lan ki annonté-a?

8-9. An pawabòl dis (10) fi-a, ki avètisman Jézi ka bay sé moun-lan ki annonté-a? (Gadé pòtwé-a osi.)

⁸ Wèsté byen pwépawé èk kontiné véyé. An pawabòl dis (10) jenn fi-a, Jézi pa té ka di, la té kay ni dé (2) gwoup moun ki annonté—yon gwoup ki té pawé pou èspéwé jistan sistèm sala bout, èk on lòt gwoup ki pa té pawé pou èspéwé. Pito sa, Jézi sèvi pawabòl sala pou èspliké sa ki té kay wivé sé moun-lan ki annonté-a, si yo pa pwépawé pou tjébé fò jis o bout la, paskè sèl mannyè yo kay wisivwè wékonpans yo, sé si yo tjébé fò jis o bout-la. (Jan 14:3, 4) Èk sa sé on bagay ki byen sèwyé. Konsa, ki nou ni èspwa-a pou alé an syèl, ében èspwa-a pou viv asou latè-a, nou tout bizwen obéyi avètisman-an Jézi bay an pawabòl dis (10) jenn fi-a. Wi, chak di nou ni pou kontiné véyé, èk pwépawé pou tjébé fò jis o bout-la.​—Maf. 24:13.

⁹ Bon, apwé Jézi sèvi pawabòl dis (10) jenn fi-a pou moutwé mannyè i enpòtan pou nou wèsté byen pwépawé èk kontiné véyé, i bay pawabòl twa (3) sèvant-lan. Èk i sèvi pawabòl sala pou moutwé mannyè i enpòtan, pou nou kontiné twavay wèd an sèvis Bondyé.

PAWABÒL TWA (3) SÈVANT-LAN

10. Kisa sé dé (2) sèvant-lan fè pou moutwé fidèlité yo? (Mafyou 25:19-23)

¹⁰ An pawabòl twa (3) sèvant-lan, Jézi palé konsèné dé (2) sèvant ki té fidèl pou mèt yo, èk on lòt sèvant ki pa té fidèl. (Maf. 25:14-18) Pou moutwé fidèlité yo, sé dé (2) sèvant fidèl-la twavay wèd pou fè pli pwofi bay mèt yo. Avan mèt-la té alé asou on voyaj, i té bay chak sé twa (3) sèvant-lan on gwo kantité lajan. Dé-a ki té fidèl-la twavay lajan-an byen, èk yo fè gwo pwofi bay mèt yo. Konsa, lè mèt-la witounen, yo té ja doublé kantité lajan-an i té kité pou yo twavay-la. Mèt-la félicité yo pou bon twavay yo, èk i envité yo pou ‘vini wéjwi épi’y.’ (Li Mafyou 25:19-23.) Mé, sa kont twazyenm sèvant-lan? Kisa’y fè épi lajan-an mèt-la té bay-la?

11. Kisa ki wivé twazyenm sèvant-lan, èk pouki?

¹¹ Twazyenm sèvant-lan wisivwè yon mil goud, èk mèt-la té vlé’y twavay lajan-an byen, pou’y fè pwofi. Mé sèvant sala té “fenyan.” Pito i twavay lajan-an, i séwé’y an tè-a. Konsa, lè mèt-la witounen, sèvant-lan pa té ni pyès lantéwé pou ba’y. Èvèk, sèvant sala pa té ni on bon atitid non plis. Paskè pito i mandé mèt-la pou pawdonnen’y, i di mèt-la, i séwé lajan-an an tè-a, paskè i sav mèt-la “sé on nonm ki wèd.” Èk sa pa té vwé. Mèt-la sété on bon nonm. Ou sa asiwé, mèt-la pa té plè épi sèvant sala. Konsa i pwan lajan’y viwé, èk i jété sèvant-lan déwò an nwèsè-a.​—Maf. 25:24, 26-30.

12. Jòdi jou, ki moun sé dé (2) sèvant fidèl-la ka wépwézanté?

¹² Sé dé (2) sèvant fidèl-la ka wépwézanté sé Kwityen-an ki annonté-a. Mèt-la sé Jézi, èk i ka envité sé Kwityen annonté-a pou ‘antwé épi vini wéjwi épi’y.’ Wi, si sé moun-lan ki annonté-a wèsté fidèl, yo kay wésisité an pwèmyé wézèwèksyon-an, èk yo kay wisivwè wékonpans yo an syèl. (Maf. 25:21, 23; Wév. 20:5b) Mé, la ni yon avètisman pou sé Kwityen-an ki annonté-a an ègzanp sèvant-lan ki té fenyan-an. Kisa ki avètisman-an?

13-14. Ki lison sé Kwityen-an ki annonté-a ka apwann an pawabòl twa (3) sèvant-lan? (Gadé pòtwé-a osi.)

¹³ Twavay wèd an sèvis Bondyé, èk fè twavay-la byen. Jézi pa té sèvi pawabòl twa (3) sèvant-lan, épi pawabòl dis (10) jenn fi-a pou moutwé, sé Kwityen-an ki annonté-a té kay vini “fenyan.” Pito sa, i sèvi sé pawabòl sala pou èspliké, kisa ki té kay wivé sé Kwityen-an ki annonté-a, si yo pa kontiné twavay wèd an sèvis Bondyé. Paskè Bondyé ba yo on bèl pwivilaj lè’y chwazi yo “pou vini moun li menm.” Mé, si yo pa kontiné twavay zélé èk fè tout sa yo pé an sèvis Bondyé, yo kay pèd bèl pwivilaj sala, èvèk yo pa kay sa alé an syèl pou kondwi épi Jézi an Wéyòm-lan.​—2 Pita 1:10.

¹⁴ Wi, pawabòl dis (10) jenn fi-a, épi pawabòl twa (3) sèvant-lan ka moutwé a klè, tout Kwityen ki annonté ni pou wèsté byen pwépawé, yo ni pou kontiné véyé, yo ni pou twavay wèd an sèvis Bondyé, èvèk yo ni pou fè twavay Bondyé byen. Mé, an sa Jézi té di-a, ès la ni pyès lòt avètisman adan’y pou sé Kwityen-an ki annonté-a? Wi, paskè sa Jézi té di an Mafyou 24:40, 41, osi ni pou fè épi dènyé jijman-an sé Kwityen-an ki annonté-a kay wisivwè.

KI MOUN YO KAY “PWAN”?

15-16. Ki mannyè Mafyou 24:40, 41 ka moutwé, sé Kwityen-an ki annonté-a ni pou kontiné véyé?

¹⁵ Touswit avan’y té bay sé twa (3) pawabòl sala, Jézi sèvi ègzanp dé (2) nonm ki té ka twavay ansanm adan on jaden, èk dé (2) madanm ki té ka pilé gwenn, pou dékwi on dènyé jijman sé moun-lan ki annonté-a kay wisivwè. Èvèk jijman sala kay moutwé kilès di yo ki ni favè Jéhova. Sé dé (2) nonm-lan té ka fè menm twavay-la mé, Jézi di yo té kay “pwan yonn, épi lòt-la té kay wèsté” dèyè. Èk menm bagay-la té kay wivé sé madanm-lan. Magwé yo dé-a té ka fè menm twavay-la, Jézi di yo té “kay pwan yonn, épi lòt-la té kay wèsté” dèyè. (Li Mafyou 24:40, 41.) Apwé’y di sa, Jézi di sé disip li-a pou kontiné “véyé,” paski yo pa té “sav ki jou mèt [yo té] kay vini.” (Maf. 24:42) Èk Jézi té di pwèskè menm bagay-la apwé i té bay pawabòl dis (10) jenn fi-a. (Maf. 25:13) Konsa, sa ka édé nou pou konpwann, chak Kwityen annonté ni pou wèsté fidèl. Si yo fè sa, Jézi kay “pwan” yo. Sa vlé di, i kay mennen yo an syèl pou kondwi épi’y an Wéyòm-lan.​—Jan 14:3.

¹⁶ Kontiné véyé. Népòt Kwityen annonté ki pa kontiné véyé, èk ki pa wèsté fidèl, kay wèsté dèyè lè Jézi sanblé “sé moun-lan Bondyé chwazi-a” pou mennen yo an syèl. (Maf. 24:31) Mé vwéman, sa Jézi té di-a sé yon avètisman pou nou tout. Paskè, ki nou ni èspwa-a pou viv an syèl, ében èspwa-a pou viv asou latè-a, chak di nou ni pou kontiné véyé, èk nou ni pou wèsté fidèl pou Jéhova jis o bout-la, pou nou sa wisivwè sé bèl bagay-la Bondyé pwonmèt pou ban nou-an.

17. Népòt lè Jéhova chwazi pou annonté on moun, pouki sa pa sipozé twakasé nou?

¹⁷ Nou konnèt Jéhova si tèlman byen, nou ni tout konfyans an jijman’y paskè nou asiwé i ka toujou fè sa ki dwèt. Konsa si Jéhova chwazi pou annonté adan sé moun-lan ki fidèl pou li an tan nou jòdi, nou pa ka kité sa twakasé nou. c Nou ka chonjé sa Jézi té di an pawabòl-la konsèné sé twavayè-a an jaden-an. (Maf. 20:1-16) Sé twavayè-a ki té koumansé twavay pli ta an jounen-an, té wisivwè menm kantité lajan, épi sé twavayè-a ki té koumansé twavay pli bonnè an jounen-an. An menm mannyè-a, tout sé Kwityen annonté-a ki wèsté fidèl kay wisivwè menm wékonpans-lan. Yo kay an syèl pou kondwi épi Jézi, ki Jéhova té chwazi yo an tan lontan, ében an tan nou jòdi.

OBÉYI SÉ AVÈTISMAN-AN

18-19. An atik sala ki lison épi avètisman nou konsidiwé?

¹⁸ Bon, ki lison épi avètisman nou apwann an atik sala? Ében, la ni on bon lison an pawabòl-la konsèné sé mouton-an épi sé kabwit-la. Pou moun ki ni èspwa-a pou viv pou tout tan asou latè-a, lison-an sé sa: yo ni pou wèsté fidèl pou Jéhova apwézan, èk diwan gwan twibilasyon-an ki kay koumansé touswit. A lè sala Jézi kay jijé tout moun ki asou latè-a, èk i kay bay tout sa ki fidèl “lavi étonnèl.”​—Maf. 25:46.

¹⁹ An sé dé (2) lòt pawabòl-la nou té konsidiwé-a, la ni avètisman pou sé Kwityen-an ki annonté-a. Pou ègzanp, an pawabòl dis (10) jenn fi-a, senk (5) di yo moutwé yo té ni lèspwi, paskè yo té byen pwépawé, yo kontiné véyé, èk yo té pawé pou èspéyé jistan misyé-a ki té kay mayé-a vini. Mé sé senk (5) fi-a ki té kouyon-an pa té pawé pou èspéyé. Konsa, misyé-a ki té kay mayé-a pa kité yo antwé an nòs-la. Lison-an an pawabòl sala sé sa: Nou ni pou kontiné véyé, èk nou ni pou pwépawé pou tjébé fò jistan Jézi mennen on bout pou vyé sistenm sala. Osi, an pawabòl twa (3) sèvant-lan, nou té konsidiwé ègzanp sé dé (2) sèvant-lan ki té fidèl. Yo twavay wèd bay mèt yo, èk yo fè twavay yo byen. Konsa mèt-la té plè épi yo. Mé mèt-la kouwi dèyè sèvant-lan ki té fenyan-an. Lison-an an pawabòl sala sé sa: Nou ni pou twavay wèd bay Jéhova, èk fè tout sa nou pé an sèvis li jis o bout-la. Finalman, nou konsidiwé yon avètisman pou sé Kwityen-an ki annonté-a: Yo ni pou wèsté fidèl èk kontiné véyé, pou yo sa wisivwè wékonpans yo. Sa vlé di, pou yo sa alé an syèl èk kondwi épi Jézi an wéyòm-lan. Sa sé on bagay yo ka èspéyé épi tout tjè yo—lè-a pou Jézi “asanblé” yo, pou mennen yo an syèl. Èk apwé Anmagèdonn, lè lè-a wivé pou mawiyaj Ti mouton-an, yo kay ‘fi-a ki kay mayé’ épi Ti mouton-an.​—2 Tèsa. 2:1; Wév. 19:9.

20. Kisa Jéhova kay fè bay moun ki obéyi avètisman’y?

²⁰ Jou jijman Jéhova kay anlè nou touswit, mé nou pa ni pyès wézon pou pè, paskè dépi nou wèsté fidèl, Papa nou Jéhova ki plen lanmityé, kay ban nou “pouvwa-a” nou bizwen, pou nou sa ni fòs pou “doubout an pwézans Gason [Lézòm-lan].” (2 Kòr. 4:7; Louk 21:36) Konsa, ki nou ni èspwa-a pou alé an syèl ében pou viv asou latè-a, si nou obéyi sé avètisman-an nou apwann an sé pawabòl-la Jézi sèvi-a, nou kay plè Jéhova. Èvèk, gwanmèsi bonté Jéhova, non nou kay wèsté ékwi “an liv lavi étonnèl-la.”​—Dann. 12:1; Wév. 3:5.