1-2. (a) Lè Pòl té ékwi sé Kwityen-an an Jérouzalèm èk Joudiya, kisa ki té sitiwasyon-an an sé vil sala? (b) Pouki nou sa di lèt Pòl té wivé a lè?

 APWÉ lanmò Jézi an lanné twant twa (33 an lépòk nou), sé Kwityen-an an Jérouzalèm èk Joudiya, té ka èspéyansé an chay difikilté. Pou ègzanp, touswit apwé sé kongwigasyon-an té établi, yo koumansé pèsikité sé Kwityen-an an chay. (Twav. 8:1) Ven (20) lanné pli ta, bagay té wèd asou yo paski péyi-a té ni on gwo lafen. (Twav. 11:27-30) Kanmenm, owon lanné swasant é yonn (61 an lépòk nou), nou sa di sé Kwityen-an té ka èspéyansé on tan lapé, si nou ni pou konpawé’y épi sa ki té ni pou vini. Diwan tan lapé sala, Pòl té voyé yo on lèt, épi lèt sala té wivé a lè, paski i té ègzaktiman sa yo té bizwen pou édé yo pwépawé pou sa ki té ka vini touswit.

² Mé kisa ki té ka vini touswit? Èben, Jézi té ja di Jérouzalèm té kay détwi, èk tan sala té ka apwoché. (Louk 21:20) Konsa, lapé-a yo té ka enjwi pou ti moman-an pa té kay diwé. Kanmenm, ni Pòl ni sé Kwityen-an pa té sav ègzaktiman ki lè Jérouzalèm té kay détwi. Alò, diwan tan lapé sala, yo té ni pou fòtifyé lafwa yo pou yo sa wèsté fidèl. Èk sé sa konsèy-la Pòl té ba yo-a té kay édé yo fè.​—Hib. 10:25; 12:1, 2.

3. (a) Kisa Jézi di ki kay vini touswit? (b) Pouki nou vlé konsidiwé adan sé konsèy-la Jéhova té bay sé Kwityen-an?

³ Fwè èk sè, Jézi di la ni on tan ki ka vini épi i “kay pli mové pasé pyès lézòt tan ki ja janmen ni”. (Maf. 24:21; Wév. 16:14, 16) Wi, tan sala kay pli mové pasé sa sé Kwityen-an an Jérouzalèm èk Joudiya té èspéyansé. Alò, annou konsidiwé adan sé konsèy-la Jéhova té bay sé Kwityen-an pou édé yo, èk mannyè sé konsèy sala sa édé nou osi.

“VINI MATWITÉ AN LAFWA-A”

4. Kisa ki té fè’y difisil pou sé Kwityen-an ki té Jwif? (Gadé pòtwé-a osi.)

⁴ Jéhova té chwazi sé Jwif-la pou vini pèp li. Épi pou plizyè lanné, Jérouzalèm sété on plas ki té byen enpòtan. Sé la sé wa-a ki té ka wépwézanté Jéhova té ka wété. Èk osi, moun ki té vlé adowé Jéhova té ka fè sa an tanp-lan an Jérouzalèm. Tout sé Jwif-la ki té fidèl-la té ka swiv Lwa Moziz èk sé wèg-la sé titja Lwa sé Jwif-la té ka enstwi. Yo té ni wèg asou bagay tèl kon: manjé, sikonsizyon, èk mannyè yo sipozé twété moun ki pa té Jwif. Mé apwé lanmò Jézi, Jéhova aboli Lwa Moziz-la, èk yo pa té bizwen fè sakwifis an tanp-lan ankò. Konsa, i pa té ézé pou sé Jwif-la ki té vini kwityen pou chanjé labitid-la yo té ni an mannyè-a yo té ka adowé Bondyé. (Hib. 10:1, 4, 10) Anfen, jis kwityen ki té matwité, tèl kon zapòt Pita, té twouvé’y difisil pou fè adan sé chanjman sala. (Twav. 10:9-14; Gal. 2:11-14) Bon. Paski sé Kwityen-an té ka adowé Jéhova an mannyè nèf sala, sé titja Lwa sé Jwif-la té ka pèsikité yo.

5. Ki dé (2) gwoup moun ki té ka opozé sé Kwityen-an?

⁵ La té ni dé (2) gwoup moun ki té ka opozé sé Kwityen-an an Joudiya. Pwèmyé gwoup-la sété sé titja Lwa sé Jwif-la ki té ka pèsikité sé Kwityen-an paski yo té santi ki sé Kwityen-an té kité wilizyon sé Jwif-la. Èk lòt gwoup-la sété moun an kongwigasyon-an ki té ka di Kwityen sipozé kontiné swiv Lwa Moziz-la. Pitèt yo té ka fè sa pou yo pa twapé pèsikasyon. (Gal. 6:12) Kisa ki té kay édé sé Kwityen-an pou wèsté fidèl pou Jéhova?

6. Kisa Pòl té enkouwajé sé fwè èk sè-a pou fè? (Hibrou 5:14-6:1)

⁶ An lèt-la Pòl té ékwi-a, i ka ankouwajé sé fwè èk sè-a pou étidyé èk mèdité asou Pawòl Bondyé. (Li Hibrou 5:14–6:1.) Pòl té sèvi lévanjil ki sòti an Vyé Tèstanman-an (Liv an Bib-la ki té ékwi an langaj Hibrou èk Araméyik), épi i èspliké pouki mannyè-a sé Kwityen-an té ka adowé Jéhova twòp pli mèyè pasé mannyè-a sé Jwif-la té ka adowé Jéhova.  a Pòl ankouwajé sé Kwityen-an pou vini konnèt èk konpwann sé lévanjil-lapli mèyè. A lè sa-a, yo kay sa idantifyé fo enstwiksyon èk widjèkté yo. Konsa, yo pa kay tounen do yo asou lavéwité-a.

7. Jòdi jou, kisa moun ka simen? Konsa, kisa ki byen enpòtan pou nou fè?

⁷ Jòdi jou, tout oliwon nou, la ni moun ki ka simen èk pwomoté enfòmasyon èk wipinyon ki ka alé kont wèg Jéhova. Pou ègzanp, moun ki ka opozé nou ka di, ‘Témwen Jéhova inyowan paski yo ka obéyi sa Bib-la ka di konsèné sèks.’ Wi, pli a pli, nou ka wè mannyè-a moun ka katjilé ka alé kont mannyè-a Jéhova ka katjilé. (Prov. 17:15) Konsa, i byen enpòtan pou nou idantifyé mové katjil èk widjèkté yo. Èk sé pa pou nou kité moun ki ka opozé nou dékouwajé nou èben fè nou doubout sèvi Jéhova.—Hib. 13:9.

8. Ki mannyè nou sa fè pwogwé pou vini on pli mèyè Kwityen?

⁸ Bon. Pòl té di sé fwè èk sè-a pou kontiné fè pwogwé pou vini on pli mèyè Kwityen. Jòdi jou, nou ni pou fè menm bagay-la. Sa vlé di, nou ni pou byen ègzanminé Bib-la pou nou vini konnèt Jéhova èk katjil li pli mèyè. Wi, nou ni pou kontiné fè sa jis apwé nou batizé. Anfen, ki nou ni an chay tan an lavéwité-a èben nou djòs batizé, nou tout ni pou li èk étidyé Pawòl Dyé wèglé. Èk sa kay édé nou pou fòtifyé lafwa nou. (Sam 1:2) Alò, Pòl moutwé sé fwè èk sè-a pouki i nésésè pou ni lafwa ki fò lè i di: “Si an moun pa ni lafwa, i enposib pouʼy plè Bondyé.”​—Hib. 11:1, 6.

“MÉTÉ LAFWA NOU AN BONDYÉ [POU’Y] SOVÉ NOU”

9. Pouki sé Kwityen-an té bizwen lafwa ki fò?

⁹ Touswit, Jérouzalèm té kay détwi. Èk pou yo sa chapé kò yo, sé kwityen-an té bizwen lafwa ki fò. (Hib. 10:37-39) Jézi té di yo: “Lè zòt kay wè sòlda tout oliwon Jérouzalèm, sé lè sala zòt kay sav ki touswit yo kay détwi plas-la. Sa ki an Joudiya ni pou kouwi mouté an sé montany-lan. Sa ki an vil-la kay ni pou kité, épi sa ki an bitasyon pa ni pou alé an vil.” (Louk 21:20-24) Népòt moun ki tann diwèksyon sala té kay di i pa té ka fè sans. Pouki? Paskè lè on lawmé té ka ataké, sé moun-lan ki té ka wèsté an bitasyon-an té ka kouwi alé an vil-la paski vil-la té ni on bawad pou pwotèkté yo. Mé apwézan Jézi ka di yo tout pou sòti an vil-la èk kouwi mouté an sé montany-lan. Alò, yo té kay bizwen an chay lafwa pou obéyi koumand Jézi.

10. Avan twibilasyon-an vini, kisa sé Kwityen-an té ni pou fè? (Hibrou 13:17)

¹⁰ Sé Kwityen-an Jérouzalèm èk Joudiya té ni pou konfyé sé moun-lan Jézi té ka sèvi pou kondwi kongwigasyon-an. San dout, sé moun-lan ki té ka kondwi-a té ni pou ba yo diwèksyon asou sa yo ni pou fè, lè-a yo ni pou fè’y-la, èk mannyè-a yo ni pou fè’y. (Li Hibrou 13:17.) Lè zapòt Pòl té di sé fwè èk sè-a, ‘Obéyi sé moun-lan ki ka kondwi-a’, i pa té di yo pou fè sa paski yo té oblijé, mé i té vlé yo fè sa paski yo té ka konfyé sé ansyen-an. Konsa, sé Kwityen Hibrou-a té ni pou bati konfyans an sé ansyen-an avan twibilasyon-an vini. Si sé Kwityen-an té ka obéyi sé ansyen-an diwan tan lapé, i té kay pli ézé pou yo obéyi yo lè bagay vini pli difisil.

11. Pouki nou bouzwen an lafwa ki fò?

¹¹ Menm kon sé Kwityen Hibrou-a, nou osi bizwen lafwa ki fò. Ou wè, Bib-la ka ban nou détwa détay konsèné sa ki kay fèt diwan gwan twibilasyon-an. Mé i pa ka ban nou tout ti détay. Anplis di sa, an chay moun ka kwè vyé sistèm sala pa kay janmen bout. Mé lè nou di yo vyé sistèm sala kay bout, yo ka pwan nou sèvi wizib. (2 Pita 3:3,4) Alò, nou ni pou ni on lafwa ki fò paski Jéhova ja désidé kilè vyé sistèm sala kay bout èk “i pa kay anwita!” (Hab. 2:3) Épi nou ni ou mété tout konfyans nou an Jéhova èk ni lafwa ki i kay pwan ka nou diwan tan sala.

12. Pou édé nou chapé gwan twibilasyon-an, nou ni pou fòtifyé lafwa nou an ki moun? Èk pouki?

¹² Nou ni pou fòtifyé lafwa nou an sé moun-lan Jéhova ka sèvi pou djidé nou jòdi jou—èk sa sé “Sèvant-lan ki ni lèspwi épi ki obéyisan-an.” (Maf. 24:45) Yo ka ban nou bon diwèksyon. Èk lè gwan twibilasyon-an koumansé, menm kon sé Kwityen-an an tan pasé té wésouvwé diwèksyon, nou menm kay wésouvwé diwèksyon ki sa sové lavi nou. Bon. Fwè èk sè, i byen enpòtan pou nou konfyé sé moun-nan ki ka bay diwèksyon an ògannizasyon Jéhova. Paski si nou pa ka konfyé èk obéyi diwèksyon-an nou ka twapé apwézan, i kay difisil pou nou obéyi diwèksyon-an nou kay wésouvwé diwan gwan twibilasyon-an.

13. Pouki konsèy-la an Hibrou 13:5 té apwopwiyab?

¹³ Paditan sé kwityen-an an Jérouzalèm èk Joudiya té ka èspéwé sin-lan pou yo kouwi, yo té ni pou pwan pwokosyon pou “pa enmen lajan twòp.” Èk osi, yo té ni pou viv on lavi senp èk fiksé asou sèvis Jéhova. (Li Hibrou 13:5.) Mé pouki konsèy sala té apwopwiyab? Èben, adan di yo té ja soufè akòz di lafen épi pòvté. (Hib. 10:32-34) Mé menm si a koumansman-an yo té pawé pou soufè pou bon nouvèl-la, apwé on tan, la té ni adan di yo ki koumansé fiksé asou mannyè pou fè pli lajan paski yo té kwè lajan té kay pwotèkté yo. Mé ès lajan-an té kay pwotèkté yo lè Jérouzalèm té kay détwi? Mé non. (Jémz 5:3) Anfen, népòt moun ki té enmen byen latè, pitèt té kay twouvé’y byen wèd pou kouwi kité kay yo èk pozèsyon yo.

14. Si nou kwè Jéhova kay détwi vyé sistèm sala touswit, ki kalté disizyon nou kay vlé fè?

¹⁴ Si nou ka kwè Jéhova kay détwi vyé sistèm sala touswit, nou pa kay vlé katjilé sé pli lajan èben bagay matwiyo ki pli enpòtan. Okontwè, diwan gwan twibilasyon-an lajan pa kay ni valè. Anfen, Bib-la di moun ‘kay jété dajan yo a lawi-a’ paski yo kay wéyalizé ‘ni dajan yo ni lò yo pa kay sové yo asou jou kòlè Jéhova.’ (Izik. 7:19) Konsa, nou kay vlé fè disizyon ki kay édé nou otjipé fanmi nou èk kò nou, épi an menm di tan édé nou kontiné an sèvis Jéhova. Pou ègzanp, i pa kay on bon disizyon pou nou mété kò nou anba dèt ki pa nésésè. Èben pou pasé twòp pli tan ki nésésè ka otjipé pozèsyon nou. Èk osi nou ni pou pwan ka pou nou pa twò ataché épi sé bagay-la nou ni-a. (Maf. 6:19, 24) Paskè kon nou sav, bout sistèm ka apwoché; i tou pwé; i pa kay tadé. Alò, nou kay ni pou chwazi si nou kay mété konfyans nou an Jéhova, èben an pozèsyon nou.

“Sé Pou’w Ni Pasyans [Èk Tjébé Fò]”

15. Pouki s’e Kwityen-an té ni pou tjébé fò?

¹⁵ Sé Kwityen-an an Joudiya èk Jérouzalèm té ni pou tjébé fò an sèvis yo pou Jéhova paski twaka té kay vini asou yo touswit. (Hib. 10:36) Mé magwé an tan pasé adan di yo té èspéyansé mové pèsikasyon, la té ni an chay di yo ki pa té èspéyansé’y. Pouki? Sa sé paski yo té vini Kwityen diwan tan lapé-a. Mé pèsikasyon-an p’òkò té fini. Konsa, Pòl mansyonnen yo té kay èspéyansé pèsikasyon èk yo té kay bouzwen pou wèsté fidèl o lanmò menm kon Jézi té fè. (Hib. 12:4) Ou wè, an chay an sé Jwif-la té vini faché èk vyolan, pas an chay moun té ka vini kwityen. Pou ègzanp, djòs détwa lanné avan, Pòl té an Jérouzalèm té ka pwéché lè on gany moun fè on konplo kont li èk yo ataké’y. “La té ni plis pasé kawant (40) Jwif ki té an konplo sala.” Èk yo té di: “Nou ja fè an sèman ki sèwyé an chay ki nou pa kay manjé anyen tout tan nou pa tjwé Pòl.” (Twav. 22:22; 23:12-14) Wi, sé atitid kon sa sé Kwityen-an té ni pou aji épi, èk i pa té ézé. Mé menm si moun té ka hayi yo èk pèsikité yo, sé Kwityen-an té ni pou kontiné jwenn ansanm pou adowé Jéhova, pwéché Bon Nouvèl-la, èk fòtifyé wilasyon yo épi Jéhova.

16. Kisa Pòl té èspliké an lèt li ki sa édé nou lè nou anba twaka? (Hibrou 12:7)

¹⁶ Kisa ki té kay édé sé Kwityen Hibrou-a pou tjébé fò anba pèsikasyon? Èben, yo té ni pou konpwann sé bennéfis-la ki ni lè on moun tjenbé fò anba pèsikasyon. Pòl èspliké, lè on kwityen ka soufè anba on twaka, pitèt Bondyé ka sèvi sitiwasyon sala pou entwennen’y. (Li Hibrou 12:7.) Sé entwennman sala sa édé on moun pou kiltivé bon kawaktè ki nésésè pou on kwityen ni. Si sé Kwityen Hibrou-a té fiksé asou bennéfis kalté entwennman sala, i té kay pli ézé pou yo ni pasyans èk tjébé fò.​—Hib. 12:11.

17. (a) Kisa Pòl ankouwajé sé Kwityen-an pou fè lè yo anba pèsikasyon? (b) Kisa sé Kwityen-an té toujou ni pou chonjé?

¹⁷ Pòl ankouwajé sé Kwityen Hibrou-a pou ni kouwaj èk tjébé fò anba pèsikasyon. Bon. Pòl sété pli mèyè moun-lan pou ba yo ankouwajman sala an lèt li. Pouki nou ka di sa? Èben, avan i vini on kwityen, i té ka pèsikité sé Kwityen-an, èk i té ka wè mannyè-a yo té ka maltwété yo. I osi, té sav ki mannyè pou tjébé fò anba pèsikasyon, paski lè i menm vini on kwityen, i té ka èspéyansé diféwan kalité òpozisyon. Konsa, Pòl té byen konnèt sa i té ka di-a. (2 Kòr. 11:23-25) Alò, i fè Kwityen-an chonjé, lè yo anba pèsikasyon, yo ni pou apiyé asou Jéhova èk pa asou kò yo. Wi sa sé kéchòy yo pa janmen vlé obliyé! Sé pou wézon sala i té sa “di èvèk konfyans: “Sé Senyè-a ki ka édé mwen, mwen pa kay pè.””​—Hib. 13:6.

18. Ki mannyè nou sa pwépawé pou sé tan difisil-la ki kay vini-a?

¹⁸ Jòdi-a, adan sé fwè nou-a ka tjébé fò anba pèsikasyon. Mé ès la ni mannyè nou sa vwéman sipòté yo? Absoliman. Pou ègzanp, nou sa pwédyé ba yo. Èk délè, nou pé ni pou sèvi sa nou ni pou édé soulajé yo, tèl kon tan nou èk lajan nou. (Hib. 10:33) Wi, Bib-la di: “An fen, tout moun ki vlé viv an lavi ki nèt, menm kon Jézi Kwi moutwé yo pou fè, kay jwenn pèsikasyon.” (2 Tim. 3:12) Pou wézon sala, nou tout ni pou pwépawé pou sé tan difisil sala ki kay vini-a. Ki mannyè nou sa pwépawé? Èben, sé pou nou kontiné mété tout konfyans nou an Jéhova. Èk sé pou nou ni asiwans-lan ki Jéhova kay édé nou tjébé fò anba népòt pèsikasyon èk an tan pou vini, i kay mennen soulajman bay tout moun ki wèsté fidèl pou li.​—2 Tèsa. 1:7, 8.

19. Ki konsèy Pòl té bay sé Kwityen-an ki sa édé nou pwépawé pou gwan twibilasyon-an? (Gadé pòtwé-a osi.)

¹⁹ San dout, lèt-la Pòl té ékwi sé Kwityen-an an pwèmyé syèk-la té édé yo pwépawé kò yo pou twibilasyon-an ki té ka vini. Èk osi, i kay édé nou pou pwépawé pou gwan twibilasyon-an ki kay vini touswit. Pòl té ankouwajé sé fwè èk sè-a, pou vini konnèt èk konpwann sé lévanjil-la pli mèyè. A lè sa-a, yo kay sa idantifyé fo enstwiksyon èk widjèkté yo. Épi, yo kay sa tjenn wilasyon yo épi Jéhova fò. Osi, zapòt Pòl ankouwajé yo pou fòtifyé lafwa yo, èk swiv diwèksyon Jézi, èk diwèksyon sé moun-lan Jézi ka sèvi pou kondwi kongwigasyon-an. Osi, i di yo pou gadé pèsikasyon-an kon entwennman. Wi pitèt Bondyé ka sèvi sitiwasyon sala pou édé nou kiltivé bon kawaktè. Vwéman, nou tout ni pou apliké sé konsèy sala an lavi nou. Si nou fè sa, i kay édé nou pou tjébé fò èk wèsté fidèl pou jis lè bout-la wivé.​—Hib. 3:14.