SIJÉ POU LÉTID 36
CHANSON 89 Kouté, Apwann, Obéyi, Èk Bondyé Kay Benni’w
Nou Vlé Fè Sa Pawòl Bondyé Di
“Sé pouʼw fè sa pawòl Bondyé di. Sé pa pouʼw kouté tousèl.”—JÉMZ 1:22.
SA NOU KAY APWANN AN ATIK SALA
Atik sala kay édé nou fòtifyé dézi nou pou pa sèlman li Pawòl Bondyé toulé jou, mé osi pou katjilé asou sa nou li, èk pou fè sa nou apwann.
1-2. Pouki sèvant Bondyé ni on chay lakontantman? (Jémz 1:22-25)
JÉHOVA èk gason’y vlé nou ni lakontantman an lavi nou. Anfen moun-lan ki ékwi Sam 119:2 di: “Pa dé bon i bon pou moun ki ka swiv enstwiksyon [Bondyé] èk ki ka chaché pou li épi tout tjè yo.” Osi an Louk 11:28 Jézi bay asiwans-lan ki: “[Sé] moun-an ki ka tann pawòl Bondyé èk ki ka obéyiʼy-la benni plis.”
2 Sèvant Jéhova ni an chay lakontantman. Mé pouki nou ni lakontantman kon sa? Ében la ni plizyè wézon. Mé yonn an sé wézon-an sé sa: Nou ka li ében kouté Pawòl Bondyé toulé jou. Èk nou ka fè tout sa nou pé pou fè sa nou apwann.—Li Jémz 1:22-25.
3. Ki bennéfis nou ka twapé lè nou fè sa Pawòl Bondyé di?
3 Lè nou fè sa Pawòl Bondyé di, la ni plizyè bennéfis nou ka twapé. Pou ègzanp, nou ka fè Jéhova kontan èk sa ka ban nou tjè kontan. (Éklé. 12:13) Osi, sa ka édé nou pou ni on pli mèyè wilasyon épi fanmi nou, èk sé fwè èk sè-a an kongwigasyon-an. Pitèt ou ja èspéyansé sa. An plis di sa, nou ka chapé an chay an sé pwòblenm-lan moun ki pa ka swiv Pawòl Bondyé ka èspéyansé. Anfen, an Sam 19:7-11 David chanté konsèné lwa Bondyé, wèg li, èk jijman’y. Èk i di ‘lè nou obéyi yo nou kay wisivwè bon bagay’.
4. Pouki i pa toujou ézé pou li ében kouté Pawòl Bondyé, èk pou fè sa’y ka di?
4 Bon. I pa toujou ézé pou nou li, ében kouté Bib-la asou òdiyo, èk pou fè sa’y ka di, paski nou ni si tèlman bagay pou fè. Mé magwé sa, i enpòtan pou nou chwazi on lè, pou li ében kouté Bib-la asou òdiyo èk pou étidyé’y. Paski sa kay édé nou konpwann sa Jéhova vlé nou fè. Alò annou diskité déotwa bagay ki sa édé nou pou li ében kouté Bib-la asou òdiyo toulé jou. Osi nou kay diskité sa ki kay édé nou pou mèdité asou sa nou li, èk pou gadé pou diféwan mannyè pou fè sa nou apwann.
FÈ TAN POU LI ÉBEN KOUTÉ PAWÒL BONDYÉ ASOU ÒDIYO
5. Mansyonnen yonndé bagay nou ni pou fè ki ka pwan an chay tan?
5 Pèp Jéhova toujou ni an chay bagay pou fè. Èk sa sé paski nou ka pasé an chay tan ka fè diféwan bagay Bib-la di ki enpòtan. Pou ègzanp, plizyè di nou ka twavay pou otjipé kò nou èk fanmi nou. (1 Tim. 5:8) Osi, adan di nou ka otjipé fanmi nou ki malad èben ki an laj. Èk nou tout ni pou gadé apwé santé nou èk sa ka pwan tan. An plis di sa, nou ni wèskonsabilité an kongwigasyon-an. Pou ègzanp, nou ni pou fè tout sa nou pé pou pwéché bon nouvèl-la. Alò épi tout sé wèskonsabilité sala, ou pé mandé: ‘Ki mannyè mwen sa fè tan pou li Bib-la toulé jou, pou mèdité asou’y èk pou éséyé fè sa i ka di?’
6. Ki mannyè nou sa fè asiwé nou li Bib-la ében kouté’y asou òdiyo toulé jou? (Gadé pòtwé-a osi.)
6 Bib-la di nou ni pou “toujou chwazi sa ki pli bon.” (Filip. 1:10) Èk yonn an sé pli bon bagay-la nou sa fè, sé pou li ében kouté Bib-la toulé jou. Konsa, nou ni pou fè asiwé nou fè tan pou fè sa. Anfen Bib-la ka di: ‘Moun-lan ki ni tjè kontan, sé moun-lan ki ka pwan plézi pou obéyi lwa Bondyé Senyè-a, èk i ka étidyéʼy lajouné kon lannwit.’ (Sam 1:1, 2) Konsa, sa ka moutwé a klè, nou ni pou fè tan pou li ében kouté Bib-la. Mé kanmenm, ki lè ki pli bon pou nou fè sa? Ében nou chak ni diféwan sitiwasyon, alò nou chak ni pou chwazi ki lè ki pli bon pou nou. Mé bagay-la ki pli enpòtan sé sa, nou ni pou chwazi an lè ki kay édé nou pou li ében kouté Bib-la toulé jou. Pou ègzanp, yon fwè non’y sé Victor di: “Mwen enmen li Bib-la lé bonmaten. Èk menm si mwen pa enmen lévé bonnè, a lè sala la pa ni an chay bagay pou distwé mwen. Lidé mwen ka klè, èk mwen sa fiksé asou sa mwen ka li ében asou sa mwen ka kouté.” Pitèt menm bagay-la vwé pou ou. Alò mandé kò’w: ‘Ki lè ki pli bon pou mwen li ében kouté Pawòl Bondyé?’
Ki lè ki pli bon pou ou li ében kouté Bib-la? Kisa ou sa fè pou li ében kouté Bib-la toulé jou? (Gadé pawagwaf 6)
FÈ TAN POU KATJILÉ ASOU SA OU LI
7-8. Kisa ki pé anpéché nou twapé bennéfis hòd sa nou li? Ba yon ègzanp.
7 Si ou ha chwazi an bon lè pou li ében kouté Bib-la, sa sé an bon bagay. Kanmenm nou ni pou pwan pwokosyon. Kisa nou vlé di? Pou ègzanp, ès ou janmen li an bagay èk touswit apwé ou pa ka chonjé sa ou fini li-a? Sa ha wivé nou tout, ès pa? Èk menm bagay sala sa wivé nou lè nou ka li ében kouté Bib-la. Pitèt nou ja désidé pou li plizyè chapit an Bib-la toulé jou, èk sa sé on bon bagay. Nou sipozé ni an plan pou li Bib-la toulé jou, èk fè tout sa nou pé pou tjenn plan sala. (1 Kòr. 9:26) Kanmenm, nou ni pou fè plis pasé annèk li Bib-la toulé jou si nou vlé twapé bennéfis hòd sa nou ka li.
8 Bon, katjilé asou ègzanp sala: Lè lapli tonbé sa sé on bon bagay. Kanmenm, si twòp lapli tonbé adan an ti mouman sa pa bon, paski tè-a pa kay sa byen sèvi dlo-a pou sé plan-an pwofité. Alò i pli mèyè lè lapli-a tonbé an mizi an mizi, paski a lè sala tè-a sa byen sèvi dlo-a pou édé sé plan-an pwofité. Èk sé menm bagay-la lè nou ka li ében kouté Pawòl Bondyé. Nou pa vlé fè’y tèlman vit pou nou pa twapé bennéfis. Pito sa, nou vlé fè’y adan an mannyè ki kay ban nou tan pou katjilé asou sa nou li, pou chonjé sa nou li, èk pou sèvi sa nou apwann an lavi nou.—Jémz 1:24.
Menm kon tè-a bizwen tan pou byen sèvi lapli-a, nou ni pou fè tan pou wéfléchi asou, èk pou fè sa nou li an Pawòl Bondyé. (Gadé pawagwaf 8)
9. Kisa ou sipozé fè si ou wéyalizé ou ka li Bib-la twò vit?
9 Bon, ès délè ou ka li Bib-la twò vit? Ében, si sé sa, kisa ou sipozé fè? Ou sipozé pwan tan’w pou li, pou’w sa katjilé asou sa ou ka li, ében fè tan apwé ou li pou katjilé asou sa ou fin li-a. Èk sa pa difisil pou fè. Pou ègzanp, ou pé désidé pou pasé pli tan lè ou ka étidyé, pou’w sa ni asé tan pou katjilé asou sa ou li. Ében ou pé désidé pou pa li an chay vèwsé, pou’w sa ni tan pou katjilé asou sa ou li. Ès ou chonjé Victor? Nou té palé konsèné’y an pawagwaf sis (6). I di: “Lè mwen ka li Bib-la, mwen pa ka li an chay, pitèt yon chapit tousèl. Èk paski mwen ka li lé bonmaten, mwen sa katjilé asou sa mwen li-a diwan jouné-a.” Konsa, pwen-an sé sa: Ou sa désidé ki mizi ou kay li, mé sa ki enpòtan sé sa, lè’w ka li Bib-la pwan tan’w pou fè sa, pou’w sa byen katjilé asou sa ou ka li-a.—Sam 119:97; gadé bwèt-la “ Bon Kwèsyon Nou Sa Mandé Kò Nou.”
10. Lè nou ka li Bib-la, kisa nou sa fè ki kay édé nou pou fè sa nou ka apwann? Bay yon ègzanp. (1 Tèsalonnika 5:17, 18)
10 Lè ou ka li Bib-la katjilé asou mannyè-a ou sa fè sa ou ka li-a. Wi, padan ou ka li on pòsyon an Bib-la ou sa mandé kò’w: ‘Ki mannyè mwen sa sèvi enfòmasyon sala apwézan èben an tan pou vini?’ Pou ègzanp, ann di ou li 1 Tèsalonnika 5:17, 18. (Li’y.) Bon. Apwé ou li sé vèwsé sala ou sa pwan an ti tan pou mandé kò’w: ‘Ès mwen ka pwédyé souvan? Èk ès mwen ka pwédyé ofon tjè mwen?’ Osi ou sa pwan tan pou mèdité asou bagay ou vlé wimèsyé Bondyé pou. Pitèt ou sa katjilé asou twa (3) bagay ou vlé di Bondyé mèsi pou. Wi, menm si ou pwan déotwa minit pou katjilé asou sa ou apwann an Bib-la, sa kay édé’w pou konpwann Pawòl Bondyé pli mèyè èk pou fè sa’y ka di. Èk si toulé jou ou fè sa ou apwann an Bib-la, sa kay édé’w vini on pli mèyè Kwityen. Mé, kisa nou sipozé fè si nou wéyalizé nou ni on chay chanjman pou fè?
FÈ PLAN KI WÉZONNNAB
11. Poutji nou pé santi dékouwajé délè? Bay yon ègzanp.
11 Lè’w ka li Bib-la, pitèt délè ou ka santi dékouwajé lè’w wéyalizé ou ni on chay chanjman pou fè. Katjilé asou ègzanp sala: Lendi, padan ou ka li Bib-la ou li konsèy konsèné mannyè nou pa sipozé moutwé pwéféwans. (Jémz 2:1-8) Èk ou wéyalizé ou ni pou fè pli mèyè asou sa, alò ou désidé pou twété moun adan on pli bon mannyè. Èk sa bon! Madi, ou li konsèné mannyè ou ni pou kontwolé pawòl ou, èk ou wéyalizé ou ni pou fè pli mèyè asou sa tou. (Jémz 3:1-12) Paski délè ou ka palé adan on mannyè ki pa janti ében ki ka dékouwajé lézòt. Alò ou désidé pou fè éfò-a pou palé adan on mannyè ki kay ankouwajé lézòt. Li Mèkwédi, kon’w ka li Bib-la, ou li Bondyé pa vlé nou fè jan épi latè-a. (Jémz 4:4-12) Èk ou wéyalizé ou ni pou pwan pli pokosyon épi sa ou ka li, gadé, èk kouté. Konsa, bò Jédi ou ka santi tèlman dékouwajé paski ou ka wè ou ni si tèlman chanjman pou fè.
12. Lè nou ka li Bib-la, si nou wéyalizé nou ni pou fè on chay chanjman, pouki nou pa sipozé santi dékouwajé? (Gadé nòt-la an bout paj-la osi.)
12 Si’w wéyalizé lè’w ka li Bib-la ou ni on chay chanjman pou fè, pa santi dékouwajé. Èk sa sé paski, sa ka moutwé ou ni imilité èk ou ni an tjè ki onnèt. Anfen lè an moun ni imilité, èk i ni an tjè ki onnèt, i ka li Bib-la épi dézi-a pou fè pli mèyè. a Nou osi ni pou chonjé, nou ni pou kontiné mété “kawaktè nèf-la”. (Kòl. 3:10) Alò, kisa ki kay édé nou pou fè sa Bib-la ka di?
13. Ès i bon pou éséyé fè tout sa nou li an Bib-la yon sèl fwa? (Gadé pòtwé-a osi.)
13 Bon. Pito nou éséyé fè tout sa nou li an Bib-la yon sèl fwa, annèk éséyé pou fè yonn dé bagay. (Pwov. 11:2) Pou ègzanp, ou sa ékwi on lis konsèné sé chanjman-an ou ni pou fè, èk annèk chwazi yonn ében dé bagay pou’w twavay asou. Èk pli ta, lè’w fè pwogwé ou sa chwazi yonn dé lòt bagay asou lis ou ou vlé twavay asou. Mé, ki koté ou sipozé koumansé?
Pito ou éséyé fè tout sa ou li an Bib-la yon fwa, i kay bon pou chwazi pitèt yonn ében dé bagay pou twavay asou. (Gadé pawagwaf 13-14)
14. Ki chanjman ou sa koumansé épi?
14 Ou sa désidé pou koumansé épi an bagay ki kay pli ézé pou’w fè. Ében ou sa koumansé épi yonn ou vwéman ni pou twavay asou. Bon, dépi ou chwazi bagay-la ou vlé twavay asou, fè wichach an sé piblikasyon nou-an. Pitèt ou sa sèvi Watch Tower Publications Index èben Research Guide for Jehovah’s Witnesses. Osi, pwédyé bay Jéhova èk mandé’y pou ba’w dézi-a èk kouway-la pou fè sé chanjman-an ou vlé fè-a. (Filip. 2:13) Èk apwé sa, twavay wèd pou fè sa ou apwann. Èvèk lè’w wè ou ka fè pwogwé an kawaktè-a ou vlé dévlopé-a èben chanjman-an ou vlé fè-a, sa kay pousé’w pou fè lòt chanjman. Èk pitèt i kay vini pli ézé pou fè sé lézòt chanjman-an ou vlé fè-a.
KITÉ PAWÒL BONDYÉ “TWAVAY FÒ ANDIDAN[’W]”
15. Ki mannyè pèp Jéhova diféwan épi lòt moun ki ka li Bib-la? (1 Tèsalonnika 2:13)
15 An chay moun ka di yo ha li Bib-la plizyè fwa. Mé, ès yo ka vwéman kwè sa Bib-la ka enstwi? Ès yo ka fè sa Bib-la ka di? Èk ès yo ka kité Pawòl Bondyé chanjé lavi yo èk kawaktè yo? Malèwèzman, pou an chay sé moun sala wépons-lan sé non. Mé pèp Jéhova diféwan. Wi, menm kon sé Kwityen-an an pwèmyé syèk-la, nou ka aksèpté Bib-la pa kon pawòl moun “mé kon pawòl Bondyé”. Èvèk nou ka fè tout sa nou pé pou swiv konsèy Bib an lavi nou.—Li 1 Tèsalonnika 2:13.
16. Kisa ki sa édé nou pou fè sa Pawòl Bondyé di?
16 I pa toujou ézé pou li Pawòl Bondyé èk pou fè sa i ka di. Pou ègzanp, nou pé ni pou goumen wèd pou fè tan pou li. Osi, nou pé li Bib-la tèlman vit nou pa ni tan pou katjilé asou sa nou ka li. Èk nou pé santi dékouwajé lè nou wè kantité chanjman nou ni pou fè an lavi nou. Mé népòt difikilté nou pé ni, épi èd Jéhova nou sa ganyen a bout li. Alò, annou fè lidé nou pou aksèpté èd Jéhova èk pou pa annèk kouté Pawòl li tousèl, mé pou fè sa Pawòl li ka di. Wi, pli nou li Pawòl Bondyé èk fè sa i ka di, sé pli lakontantman nou kay ni an lavi nou.—Jémz 1:25.
CHANSON 94 Bondyé Mèsi Pou Pawòl Ou
a Gadé vidiyo sala asou jw.org, Sa Kopawans Ou Ka Di— Li Bib-la.
