1-2. Pouki Jéhova fè nou pou ni pli tjè kontan lè nou fè bon bay lézòt, pasé lè yo fè bon ban nou?

 NOU KA ni pli tjè kontan lè nou fè bon bay lézòt pasé lè yo fè bon ban nou. Èk sé kon sa Jéhova fè nou. (Twav. 20:35) Bon. Ès sa vlé di nou pa ka ni djèwté lè moun fè bon ban nou? Mé non! Pou ègzanp, nou tout ka kontan lè nou wisivwè on kado, mé magwé sa, nou ka èspéyansé pli lakontantman lè nou fè bon ba lézòt pasé lè yo fè bon ban nou. Èk Jéhova té ni bon wézon pou fè nou kon sa. Mé, poutji nou ka di sa?

² Ében paski Jéhova fè nou kon sa, nou sa fè bagay pou bay kò nou pli tjè kontan. Wi, lè nou katjilé asou diféwan mannyè nou sa édé lézòt, èk nou fè éfò-a pou édé yo, sa ka ban nou pli tjè kontan. Bon, ès Jéhova pa fè nou adan on bèl mannyè? Absoliman!​—Sam 139:14.

3. Pouki Bib-la ka kwiyé Jéhova “Bondyé-a ki ni tjè kontan-an”?

³ Bib-la ka di, moun ki ka bay ka ni tjè kontan. Alò, nou sa konpwann poutji Bib-la ka osi di, Jéhova sé “Bondyé-a ki ni tjè kontan-an”. (1 Tim. 1:11) Anfen pwèmyé moun-lan ki fè bon bay lézòt sé Jéhova, èk pyèsonn pa sa bay pli pasé Jéhova. Wi, kon zapòt Pòl di an Twavay 17:18: “Sé li ki ban nou lavi épi sé li ki ka fè nou maché épi sé li ki fè nou sa nou yé-a.” Osi, nou ka dakò épi Jémz 1:17 koté i di: “Sé Bondyé ki ka bay tout bon kado èk tout bon bagay ki pa ni défo.”

4. Kisa nou sa fè pou nou sa ni pli tjè kontan?

⁴ Bon, nou tout vlé ni pli tjè kontan, mé kisa nou sa fè pou nou sa ni pli tjè kontan? Ében, nou sa swiv ègzanp Jéhova an mannyè-a i donnan. (Èfés. 5:1) Mé délè, moun pa ka moutwé apwésiyasyon pou sa nou fè ba yo. Konsa, an atik sala nou kay diskité mannyè Jéhova vwéman donnan èk mannyè-a nou sa swiv bèl ègzanp li. Alò, sa kay édé nou pou kontiné fè bon bay lézòt èk èspéyansé pli lajwa.

MOUTWÉ OU DONNAN MENM KON JÉHOVA

5. Ki diféwan bagay Jéhova ka ban nou?

⁵ Jéhova ka ni tjè kontan kon’y ka ban nou plizyè bagay. Pou ègzanp, Jéhova ka ban nou sé bagay-la nou bizwen. Délè, pitèt nou pa ni tout sé bagay-la nou vlé, mé Jéhova ka fè asiwé i ka ban nou tout sé bagay-la nou bizwen. Pou ègzanp, Jéhova ka ban nou manjé, had, èk on plas pou wèsté. (Sam 4:8; Maf. 6:31-33; 1 Tim. 6:6-8) Bon. Ès Jéhova oblijé ban nou tout sé bagay-la i ka ban nou-an? Mé non! Alò, kisa ki ka pousé Jéhova pou ban nou sé bagay-la nou bizwen?

6. Kisa nou apwann an Mafyou 6:25, 26?

⁶ Ében wézon-an Jéhova ka ban nou sa nou bizwen, sé paski i enmen nou. Bon, annou konsidiwé sa Jézi di an Mafyou 6:25, 26. (Li’y.) Bon. Ès ou òbzòvé Jézi sèvi bagay an kwéyasyon? I palé konsèné sé jibyé-a èk i di: “Yo pa ka planté ni yo pa ka wékòlté épi mété sé gwenn-an la pou apwé.” Osi, Jézi di: “Mé Papaʼw Bondyé ka ba yo manjé.” Èk apwé sa, tann sa’y di: “Ou ni twòp pli valè pasé sé jibyé sala.” Alò, kisa Jézi té ka di nou la? Ében, Jézi té ka di nou, sèvant Bondyé ni twòp pli valè an zyé Papa-a pasé sé zannimo-a èk sé jibyé-a. Alò, si’y ka bay sé zannimo-a èk sé jibyé-a sa yo bizwen, nou asiwé i kay ban nou sa nou bizwen tou. Wi, menm kon on papa ki enmen fanmi’y, Jéhova ka potjiwé ban nou paski i enmen nou.—Sam 145:16; Maf. 6:32.

7. Kisa nou sa fè pou moutwé nou donnan menm kon Jéhova? (Gadé pòtwé-a osi.)

⁷ Nou sa moutwé nou donnan menm kon Jéhova, lè nou kité lanmityé nou pou sé fwè èk sè nou-an pousé nou pou édé yo. Pou ègzanp, ès ou konnèt on fwè ében sè ki bizwen manjé ében had? Ében, Jéhova sa sèvi’w pou édé yo. Anfen, pèp Jéhova toujou pawé pou édé lézòt apwé on dézas. Pou ègzanp, diwan COVID-19-la, fwè èk sè sépawé manjé, had, èk lòt bagay épi moun ki té ni on labizwen. Osi, an chay fwè èk sè bay donnasyon pou sipòté twavay-la ki ka fèt owon latè-a. Èk sa té édé sé fwè èk sè-a owon latè-a ki té ni on labizwen. Wi, tout sé fwè èk sè sala té byen donnan! Èk yo moutwé yo ka swiv konsèy-la an Hibrou 13:16, koté i di: “Pa obliyé pouʼw fè bonté èk édé yonn a lòt, paski sé sakwifis kon sa ki ka plè Bondyé.”

8. Ki mannyè nou sa sèvi kouway-la Jéhova ka ban nou? (Filipay 2:13)

⁸ Jéhova ka ban nou kouway. Jéhova benyen kouway, èk i ka ba Jéhova an chay plézi pou ba sèvant li kouway. (Li Filipay 2:13.) Bon. Ès ou janmen pwédyé pou kouway-la pou goumen kont tantasyon? Ében pou kouway-la pou tjenbé fò anba an sitiwasyon ki byen difisil? Ében pitèt ou ha pwédyé pou kouway-la pou fè sa ou ni pou fè pou jouné-a. Èk lè Jéhova wéponn lapwiyè’w, ou kay dakò épi sa zapòt Pòl té di. An Filipay 4:13 (NWT), i di: ‘Mwen sa fè tout bagay gwanmèsi moun-lan ki ka ban mwen kouway-la.’

9. Ki mannyè nou sa swiv ègzanp Jéhova èk sèvi kouway nou pou édé lézòt? (Gadé pòtwé-a osi.)

⁹ Nou pa ni kouway kon Jéhova, èk nou pa sa bay lòt moun kouway kon i ka fè. Mé nou sa swiv ègzanp Jéhova lè nou sèvi kouway nou pou édé lézòt. Pou ègzanp, nou sa sèvi kouway nou pou édé fwè èk sè ki malad ében ki an laj. Pitèt nou sa nétwayé kay yo ében alé an boutik-la pou fè konmisyon ba yo. Osi, nou sa sèvi kouway nou pou nétwayé èk tjenn Sal Wéyòm-lan an bon kondisyon. Wi, lè nou sèvi kouway nou an sé mannyè sala, nou ka fè bon bay lézòt menm kon Jéhova.

10. Ki mannyè nou sa sèvi pawòl nou pou ankouwajé lézòt?

¹⁰ Pa janmen obliyé nou sa ankouwajé lézòt épi pawòl nou. Konsa, ès la ni an moun ou sa ankouwajé si ou di’y ou apwésyé sa i ka fè? Ében, ès ou konnèt on moun ki bizwen soulajman? Bon, si an moun vini an lidé’w, fè moun-lan konnèt ou mélé épi’y èk ou enmen’y. Pitèt ou sa vizité’y, ében ou sa kwiyé’y asou téléfòn-an. Pitèt ou sa ékwi’y an lèt, voyé’y an imél, ében ou sa tèks li. Mé pa twakasé kò’w twòp konsèné sa ou kay di. Yonndé mo pawòl ki senp ki sòti ofon tjè’w, sa édé fwè-a ében sè-a wèsté fidèl pou Jéhova, èk pou santi pli mèyè.—Pwov. 12:25; Èfés. 4:29.

11. Pouki nou sav Jéhova vwéman vlé ban nou lasajès?

¹¹ Jéhova ka ban nou lasajès. Disip-la Jémz ékwi: “Si pyès an zòt pa ka konpwann sé bagay sala, sé pouʼy mandé Bondyé lasajès, èk Bondyé kay ba liʼy paski Bondyé enmen bay tout moun san miziwé.” (Jémz 1:5) Sa Jémz di ka moutwé, Jéhova pa ka tjenn lasajès li pou kò’y tousèl, mé i ka bay moun lasajès san miziwé. Osi, Jéhova pa ka janmen fè nou santi koupab lè’y ni pou ban nou lasajès èben diwèksyon. Anfen, Jéhova vlé nou mandé’y pou lasajès.​—Pwov. 2:1-6.

12. Ki òpòtyounité nou ni pou sépawé sa nou konnèt épi lézòt?

¹² Bon. Ki mannyè nou sa swiv ègzanp Jéhova, èk sépawé sa nou konnèt épi lézòt? (Sam 32:8) Pèp Jéhova ni plizyè òpòtyounité pou sépawé sa yo konnèt épi lézòt. Pou ègzanp, byen souvan nou ka entwennen pwoklanmatè nèf an minis-la. Osi, sé ansyen-an ka édé sé sèvant ministiriyal-la, èk lòt fwè ki batizé apwann mannyè pou fè ansayman yo an kongwigasyon-an. An plis di sa, la ni fwè èk sè ki ka entwennen lézòt an twavay konstwiksyon, èk an mannyè-a pou tjenn plas adowasyon nou an bon kondisyon.

13. Ki mannyè nou sa swiv ègzanp Jéhova lè nou ka entwennen lézòt?

¹³ Nou vlé swiv ègzanp Jéhova lè nou ka entwennen lézòt. Chonjé, Jéhova toujou pawé èk i toujou ni tjè kontan pou sépawé lasajès li épi lézòt. Konsa, menm kon Jéhova, nou vlé ni tjè kontan lè nou ka sépawé sa nou konnèt épi lézòt. Èk nou pa vlé fè kòlonng pou entwennen lézòt paski nou pè yo kay pwan ansayman nou. Osi, nou pa janmen vlé di: ‘Pyèsonn pa té entwennen mwen! Konsa kité’y apwann pa kò’y.’ Non, sé pa kon sa pèp Jéhova sipozé katjilé. Pito, nou vlé sépawé tout sa nou konnèt épi lézòt. (1 Tèsa. 2:8) Èk nou vlé fè tout sa nou pé pou entwennen yo, pou yo sa ni abilité-a pou byen entwennen lézòt osi. (2 Tim. 2:1, 2) Wi, si nou swiv ègzanp Jéhova èk nou sépawé sa nou konnèt épi lézòt, ni nou ni yo, kay vini pli savan èk nou kay ni pli lakontantman.

LÈ’Y KA SANM MOUN PA KA APWÉSYÉ SA NOU KA FÈ

14. Kisa pwèskè tout moun ka fè lè nou fè kéchòy ba yo?

¹⁴ Lè nou fè bon bay lézòt, èspwèsman sé fwè èk sè nou-an, byen souvan yo ka moutwé apwésiyasyon. Yo pé ékwi nou an kat, ében di mèsi adan an lòt mannyè. (Kòl. 3:15) Èk lè yo wimèsyé nou, nou ka ni pli djèwté nou té fè an bagay ba yo.

15. Lè moun pa moutwé apwésiyasyon pou sa nou fè ba yo, kisa nou vlé chonjé?

¹⁵ Délè moun pa ka moutwé apwésiyasyon lè nou fè bon ba yo. I pé sanm yo pa menm mélé épi tout éfò-a nou fè pou édé yo. Tan-an i té pwan, kouway-la, èk lajan-an nou té dépansé pou édé yo. Si sa janmen wivé’w, kisa ki kay anpéché’w pèd lajwa’w? Ében, i bon pou chonjé lévanjil-la atik sala bazé asou, Twavay 20:35. Wi, lè nou fè bon bay lézòt, i bon pou nou chonjé lakontantman nou pa ka dépan asou si yo moutwé apwésiyasyon opa. Anfen, nou sa kontiné bay épi tjè kontan menm si moun pa moutwé apwésiyasyon. Mé, kisa i kay édé nou pou fè sa? Annou konsidiwé yonndé mannyè.

16. Kisa nou sa fè pou nou kontiné bay épi tjè kontan?

¹⁶ Swiv ègzanp Jéhova. Nou vlé toujou chonjé, lè nou fè bon bay lézòt nou ka swiv ègzanp Jéhova. Jéhova ka fè bon ba moun ki yo moutwé apwésiyasyon opa. (Maf. 5:43-48) Èk Jéhova pwonmèt nou ki, si nou bay “san èspéyé anyen viwé,” nou kay “ni an gwan péyiman”. (Louk 6:35) Alò, pa vin dékouwajé si moun pa moutwé apwésiyasyon pou sa ou fè ba yo. Chonjé sé Jéhova ki kay wékonpansé’w, paski ou ka fè bon bay lézòt èk ou ka bay épi tout tjè’w.—Pwov. 19:17; 2 Kòr. 9:7.

17. Lè nou ka fè bon bay lézòt, an ki lòt mannyè nou sa swiv ègzanp Jéhova? (Louk 14:12-14)

¹⁷ An lòt bagay nou sa fè pou nou swiv ègzanp Jéhova lè nou ka fè bon bay moun, sé pou fè sa Jézi di an Louk 14:12-14. (Li’y.) Bon, sa pa vlé di nou pa sa fè bon bay moun ki sa fè menm bagay-la ban nou. Kanmenm si nou wéyalizé nou ka fè bon bay moun paski nou vlé kéchòy déviwé, i kay bon pou nou fè sa Jézi di. Wi, nou vlé fè bon bay moun ki pa sa ban nou anyen déviwé. Èk a lè sala nou kay ni tjè kontan paski nou ka swiv ègzanp Jéhova. Osi, paski nou pa ka èspéyé anyen déviwé lè nou fè bon bay lézòt, nou kay toujou ni tjè kontan ki yo moutwé apwésiyasyon opa.

18. Kisa nou pa vlé fè èk pouki?

¹⁸ Pa di moun engwa. (1 Kòr. 13:7) Lè nou fè bon bay lézòt èk yo pa moutwé apwésiyasyon, nou sa mandé kon nou: ‘Ès moun-lan vwéman engwa, ében ès i annèk obliyé pou moutwé mwen apwésiyasyon?’ Pitèt la ni lòt wézon pouki yo pa té moutwé apwésiyasyon mannyè-a nou té ka èspéyé. Pou ègzanp, la ni moun ki ka vwéman apwésyé sa nou fè ba yo, mé i pa ézé pou yo moutwé’y. Pitèt yo ka santi hont paski yo twapé èd, èspwèsman si sété yo ki té ka édé moun an tan pasé. Mé si nou vwéman enmen sé fwè èk sè nou-an nou pa kay kwè yo engwa. Anfen, nou kay kontiné fè bon ba yo épi tjè kontan.​—Èfés. 4:2.

19-20. Poutji pasyans ka édé nou kontiné fè bon bay lézòt? (Gadé pòtwé-a osi.)

¹⁹ Sé pou ou ni pasyans. An Ékléziyastis 11:1 Wa Sòlomonn ékwi: ‘Voyé pen’w asou glo paski apwé plizyè jou ou kay twapé’y ankò.’ Sé vèwsé sala ka moutwé nou ki, la ni moun ki kay moutwé apwésiyasyon yo pou bon-an nou fè ba yo apwé an chay tan ha pasé. Mi yon ègzanp ki ka moutwé sa a klè.

²⁰ Plizyè lanné pasé, madanm yon ansyen pou sékyout-la ékwi an sésé ki té djòs batizé an bèl lèt. Èk i ankouwajé’y pou wèsté fidèl pou Jéhova. Apipwé ywit lanné apwé sa, madanm ansyen-an pou sékyout-la wisivwè an lèt hòd sésé-a. An lèt-la sésé-a di: “Sésé mwen ou pa konnèt sa, mé mwen vlé’w sav mannyè ou ha édé mwen tout sé lanné sala. Ou té ékwi mwen an bèl lèt, mé sa mwen té vwéman apwésyé sé lévanjil-la ou té mansyonnen an lèt-la. I touché tjè mwen.” a Èk apwé sésé-a èspliké yonndé difikilté i té èspéyansé, sésé-a di: “Délè mwen té vlé kité lavéwité-a. Bagay té si tèlman wèd, mé lévanjil-la ban mwen kouway-la pou wèsté fidèl èk pou tjenbé fò. Diwan tout sé ywit lanné sala anyen pa té ankouwajé mwen kon lèt ou èk lévanjil-la.” Bon. Ès ou sa imajiné lakontantman-an madanm ansyen-an pou sékyout-la té ni lè i li lèt sala apwé ‘plizyè jou’? An menm mannyè-a moun pé moutwé apwésiyasyon pou bon-an nou fè ba yo apwé plizyè lanné.

21. Pouki ou détèminé pou swiv ègzanp Jéhova èk moutwé ou donnan?

²¹ Kon nou ha wè, Jéhova fè nou adan an mannyè ki byen spésyal. I fè nou pou ni pli lakontantman lè nou bay pasé lè nou wisouvwè. Wi, nou ka santi bon lè nou sa édé sé fwè èk sè nou-an, èk nou ka kontan lè yo moutwé apwésiyasyon. Mé, menm si yo moutwé apwésiyasyon opa, nou ka kontan lè nou édé yo. Konsa népòt sa ou bay, toujou chonjé Jéhova sa ba’w otan plis pasé sa ou bay. (2 Kw. 25:9) Anfen, nou pa sa janmen bay plis pasé Jéhova. Èk lè Jéhova wékonpansé nou, anyen pa sa bat sa! Alò annou fè’y détèminasyon nou pou kontiné swiv ègzanp Papa nou an syèl ki donnan.