SIJÉ POU LÉTID 39
Ès Nonʼw Ékwi “An Liv Lavi Étonnèl-la”?
‘Jéhova fè yo ékwi non sé moun-lan ki ni kwentif pouʼy . . . adan yon liv pouʼy sa chonjé yo.ʼ—MALA. 3:16.
CHANSON 61 Annʼ Alé Douvan!
SA NOU KAY DISKITÉ AN ATIK SALA a
Dépi an tan Ébèl pou jis jòdi Jéhova ka kontiné ékwi non an “liv lavi étonnèl-la.” (Gadé pawagwaf 1-2)
1. Silon Malakay 3:16, an ki liv Jéhova ka ékwi, èk kisa i ka ékwi adanʼy?
POU plizyè mil lanné, Jéhova ni an liv spésyal i ka ékwi adan. Liv sala ni non moun ki fidèl pou li, koumansé épi Ébèl. b (Louk 11:50, 51) Dépi tan sala, Jéhova ka ékwi pli non an liv-la. Èk apwézan, la ni plizyè milyon non ékwi adanʼy. Bib-la ka kwiyé liv sala, ‘yon liv [pou fè Jéhova] chonjé,ʼ èk “liv lavi étonnèl-la.” Mé an atik sala nou kay kwiyéʼy “liv lavi étonnèl-la.”—Li Malakay 3:16; Wév. 3:5; 17:8.
2. Non ki moun ki ékwi an liv lavi étonnèl-la, èk kisa nou sa fè pou Jéhova ékwi non nou an liv sala?
2 Liv lavi étonnèl-la ni non tout moun ki ka adowé Jéhova épi gwan wèspé, èk lanmityé pou nonʼy. Sé moun sala kay ni an chans pou wisouvwè lavi étonnèl. Jòdi, si nou vlé Jéhova ékwi non nou an liv lavi étonnèl-la, nou ni pou ni an bon wilasyon épiʼy, bazé asou wanson Gasonʼy Jézi Kwi. (Jan 3:16, 36) Ki nou ni èspwa pou viv an syèl ében pou viv asou latè-a, nou tout vlé non nou ékwi an liv sala.
3-4. (a) Si non nou an liv lavi étonnèl-la apwézan, ès sa vlé di nou kay viv pou tout tan? Èspliké. (b) Kisa nou kay diskité an atik sala épi an lòt-la?
3 Mé ès sa vlé di, tout moun ki ni non yo ékwi an liv sala ni asiwans-lan yo kay wisouvwè lavi étonnèl? Nou ka twapé wépons-lan an sa Jéhova té di Moziz an Ègzodòs 32:33. Jéhova di Moziz: “Sé non moun-lan ki péché kont mwen, mwen kay tiwé an liv mwen.” Konsa, Jéhova sa éfasi sé non-an i ékwi an liv li-a, konmsi i té ékwi yo an kwéyon. (Wév. 3:5) Nou ni pou fè asiwé non nou wèsté ékwi an liv sala jistan Jéhova ékwiʼy an ‘lank.ʼ
4 Mé, pitèt yonndé kwèsyon ka vini an lidé nou. Pou ègzanp, kisa Bib-la di konsèné sé non-an ki ékwi an liv lavi étonnèl-la, èk sé non-an ki pa ékwi adanʼy? Sé moun-lan ki ni non yo ékwi an liv sala, a ki lè yo kay twapé lavi étonnèl? Osi, kisa ki kay wivé moun ki mò avan yo té ni an chans pou konnèt Jéhova? Ès i posib pou non yo ékwi an liv sala? Nou kay wéponn sé kwèsyon sala an atik sala épi an lòt-la.
NON KI MOUN KI ÉKWI AN LIV-LA?
5-6. (a) Silon Filipay 4:3, non ki moun ki anpanmi sé non-an ki ékwi an liv lavi étonnèl-a? (b) Ki lè non yo kay ékwi pou tout tan an liv lavi étonnèl-la?
5 Non ki moun ki ékwi an liv lavi étonnèl-la? Pou wéponn kwèsyon sala, nou kay konsidiwé senk (5) diféwan gwoup moun. Adan di yo ni non yo ékwi an liv lavi étonnèl-la mé lézòt, non yo pa la.
6 Pwèmyé gwoup-la sé moun ki kay kondwi épi Jézi an syèl. Ès non yo ékwi an liv lavi étonnèl-la apwézan? Wi. Silon sa zapòt Pòl té di sé fwè èk sè-a an Filipay, non sé moun-lan ki ni èspwa pou kondwi épi Jézi an syèl ékwi an liv lavi étonnèl-la. (Li Filipay 4:3.) Mé, pou non yo wèsté an liv lavi étonnèl-la, yo ni pou wèsté fidèl pou Jéhova. Lè Jéhova ba yo dènyé stanp-lan, i kay ékwi non yo an liv lavi étonnèl-la pou tout tan. Sa kay fèt swé avan yo mò, ében avan gwan twibilasyon-an koumansé.—Wévé. 7:3.
7. Ki mannyè Wévélasyon 7:16, 17 ka édé nou konpwann a ki lè gwan latilyé lòt mouton-an kay ni non yo ékwi pou tout tan an liv lavi étonnèl-la?
7 Dézyenm gwoup-la sé gwan latilyé lòt mouton-an. Ès non yo ékwi an liv lavi étonnèl-la apwézan? Wi. Ès non yo kay wèsté ékwi an liv sala apwé Anmagèdonn? Wi. (Wév. 7:14) Jézi té di, sé moun sala ki dwèt “kay wisivwè” lavi étonnèl.” (Maf. 25:46) Mé yo pa kay wisivwè lavi étonnèl la menm. Sé konmsi non yo ékwi an liv lavi étonnèl-la an kwéyon. Diwan mil (1000) lanné-a, Jézi “kay gadé yo menm kon on gadyenn ka gadé moutonʼy. I kay mennen yo an sous dlo-a ki ka bay lavi-a.” Si yo swiv diwèksyon Jézi, Jéhova kay gadé yo kon moun ki fidèl èk i kay ékwi non yo an liv lavi étonnèl-la pou tout tan.—Li Wévélasyon 7:16, 17.
8. Non ki konpanni moun ki pa ékwi an liv lavi étonnèl-la, épi kisa ki kay wivé yo?
8 Twazyenm gwoup-la sé, sé kabwit-la ki kay détwi an Anmagèdonn. Non yo pa ékwi an liv lavi étonnèl-la. Jézi di “Bondyé kay voyé yo anba pinisyon pou tout tan.” (Maf. 25:46) Anba diwèksyon lisentèspwi, zapòt Pòl osi di, “Bondyé kay pini sé moun sala pou tout tan.” (2 Tèsa. 1:9; 2 Pita 2:9) Osi, moun ki péché pa èspwé kont lisentèspwi Bondyé kay jwenn détwi. Yo pa kay twapé lavi étonnèl. Konsa Jéhova pa kay wésisité yo. (Maf. 12:32; Mak 3:28, 29; Hib. 6:4-6) Apwézan, annou ègzanminé dé gwoup moun-lan ki kay wésisité asou latè-a.
SÉ MOUN-LAN KI KAY WÉSISITÉ
9. Silon Twav. 24:15, ki dé gwoup moun ki kay wésisité asou latè-a? Èk ki diféwans la ni ant sé dé diféwan gwoup sala?
9 Bib-la mansyonnen dé gwoup moun ki kay wésisité épi ni chans-lan pou viv asou latè-a pou tout tan. Dé gwoup sala sé, moun ki “bon” èk, moun ki “mové.” (Li Twavay 24:15.) Sé “bon” moun-lan sé sa ki té wèsté fidèl pou Jéhova lè yo té vivan. Èk sé “mové” moun-lan pa té sèvi Jéhova lè yo té vivan. Anfen, plizyé an sé moun sala pa té ni bon kondwit pyès. Bon, ès nou sa di, paski sé dé gwoup sala kay wésisité non yo an liv lavi étonnèl-la? Pou wéponn kwèsyon sala, annou konsidiwé yo, yonn (1) pa yonn (1).
10. Pouki sé “bon” moun-lan kay wésisité, èk ki pwivilaj adan di yo kay ni? (Gadé atik-la “Kwèsyon Moun Ka Mandé” an Gad sala ki ka palé konsèné wézéwèksyon-an asou latè.)
10 Sé “bon” moun-lan, sé katyenm gwoup-la. Avan yo mò, non yo té ékwi an liv lavi étonnèl-la. Ès Jéhova té tiwé non yo an liv-la lè yo mò? Non, paski yo vivan an menmwaʼy. Jézi té di, Jéhova ‘pa Dyé moun ki mò, mé i sé Dyé moun ki vivan, paski yo tout vivan pou li.ʼ (Louk 20:38 NWT) Sa vlé di, lè moun ki bon wésisité, non yo kay la an liv lavi étonnèl-la, magwé i pòkò la pou tout tan. (Louk 14:14) San dout, adan sé bon moun-lan ki wésisité kay ni pwivilaj-la pou wann sèvis kon pwens an “tout latè-a.”—Sam 45:16.
11. Kisa sé “mové” moun-lan kay bizwen apwann avan non yo ékwi an liv lavi étonnèl-la?
11 Finalman, annou konsidiwé senkyenm gwoup-la, sé “mové” moun-lan. Pitèt yo pa té fè sa ki bon paski, yo pa té konnèt lwa Jéhova. Konsa non yo pa té ékwi an liv lavi étonnèl-la. Mé Jéhova kay wésisité yo èk yo kay ni chans-lan pou ni non yo ékwi an liv lavi étonnèl-la. Sé “mové” moun sala kay bizwen an chay èd. Lè yo té vivan, adan di yo fè bagay ki té byen mové. Konsa yo kay ni pou apwann mannyè pou viv an ling épi pwensip Jéhova. Pou édé yo fè sa, wéyòm Bondyé kay diwèkté pli gwo twavay pwèchman-an ki kay janmen fèt.
12. (a) Ki moun ki kay enstwi sé mové moun-lan? (b) Kisa ki kay wivé moun ki wifizé mété an pwatik sa yo apwann?
12 Ki moun ki kay enstwi sé mové moun-lan? Gwan latilyé-a, épi sé bon moun-lan ki wésisité-a kay enstwi yo. Pou sé mové moun-lan ni non yo ékwi an liv lavi étonnèl-la, yo kay ni pou dévlopé an bon wilasyon épi Jéhova, èk dèdiké lavi yo pou li. Jézi épi sé annonté-a ki an syèl kay gadé mannyè sé mové moun-lan ka apliké sa yo ka apwann. (Wévé. 20:4) Népòt moun ki pa vlé aksèpté èd sala kay jwenn détwi menm si yo ni yon san (100) lanné. (Izay. 65:20) Jéhova épi Jézi sa wè sa ki an tjè moun konsa yo pa kay kité pyèsonn détwi latè nèf-la.—Izay. 11:9; 60:18; 65:25; Jan 2:25.
WÉZÉWÈKSYON POU LAVI ÈK WÉZÉWÈKSYON POU JIJMAN
13-14. (a) An tan pasé, kisa nou té ka kwè pawòl Jézi an Jan 5:29 té ka di? (b) Kisa nou ni pou chonjé konsèné sé pawòl sala?
13 Jézi osi palé konsèné moun ki kay wésisité èk wèsté asou latè-a. Pou ègzanp i di: ‘Zòt pa bizwen sipwi, paski lè-a ka vini lè tout moun an toum-lan [ki an menmwa Jéhova] kay tann vwaʼy èk yo kay sòti. Sa ki té fè bon kay wésisité èk yo kay ni lavi étonnèl. Èk sa ki té pwatiké movèsté kay wésisité èk jwenn jijman.ʼ (Jan 5:28, 29 NWT) Mé kisa Jézi té ka di?
14 An tan pasé, nou té ka kwè Jézi té ka palé konsèné sé bagay-la sé moun-lan té kay fè apwé yo wésisité. Sa vlé di, adan sé moun-lan ki wésisité-a té kay fè sa ki bon, èk lézòt té kay fè sa ki pa bon. Kanmenm, Jézi pa té di, moun ki sòti an toum-lan té kay fè sa ki bon, ében yo té kay pwatiké sa ki mové. I palé konsèné moun ‘ki té fèʼ sa ki bon, épi moun ‘ki té pwatikéʼ sa ki mové. Konsa, sa sé bagay yo té fè avan yo mò. Èk sa ka fè sans, paski Jéhova pa kay pèwmité pyèsonn pou pwatiké sa ki mové an latè nèf-la. Sé mové moun-lan té pwatiké sé bagay sala avan yo mò. Mé lè Jézi palé konsèné an wézéwèksyon pou ‘laviʼ èk an wézéwèksyon pou ‘jijman,ʼ kisa sa vlé di?
15. Ki moun ki kay wisivwè an wézéwèksyon pou ‘lavi,ʼ èk pouki?
15 Sé bon moun-lan té fè sa ki ka plè Jéhova avan yo mò. Konsa yo kay wésisité pou ‘laviʼ paski non yo té ja ékwi an liv lavi étonnèl-la. Sa vlé di, wézéwèksyon sé “bon” moun-lan ki mansyonnen an Jan 5:29, sé menm sé “ bon” moun-lan ki mansyonnen an Twav. 24:15. Èsplikasyon sala ka dakò épi sa nou li an Ronm 6:7 koté i di: “Péché pa sa kondwi an moun ki ja mò ankò.” Konsa lè sé bon moun sala mò Jéhova pawdonnen péché yo. Mé i kay chonjé tout sé bon bagay-la yo té fè lè yo té vivan. (Hib. 6:10) Kanmenm, pou non yo wèsté an liv lavi étonnèl-la, yo bizwen wèsté fidèl pou Jéhova apwé yo wésisité.
16. Kisa wézéwèksyon-an pou ‘jijmanʼ vlé di?
16 Kisa nou sa di konsèné sé moun-lan ki pwatiké mové bagay avan yo mò? Magwé Jéhova pawdonnen péché yo lè yo mò, yo pa té sèvi Jéhova paditan yo té vivan. Konsa non yo pa ékwi an liv lavi étonnèl-la. Wézéwèksyon sé mové moun-lan ki pwatiké mové bagay, sé menm wézéwèksyon sé ‘movéʼ moun-lan nou li konsèné an Twav. 24:15. Yo kay wisivwè an wézéwèksyon pou ‘jijman.ʼ c Sa vlé di, Jézi kay ègzanminé mannyè yo ka kondwi kò yo, èk apwé an lè i kay désidé si non yo sipozé an liv lavi étonnèl-la. (Louk 22:30) Sèl mannyè éhova kay ékwi non yo an liv lavi étonnèl-la, sé si yo doubout fè sé mové bagay-la yo té ka fè-a, èk dèdiké lavi yo pou Jéhova.
17-18. Kisa tout moun ki wésisité asou latè-a ni pou fè? Èk asou ki ‘bagayʼ yo kay jijé yo? (Wévélasyon 20:12, 13)
17 Ki yo té bon ki yo té mové, tout moun ki wésisité kay ni pou apwann lwa Jéhova an sé liv nèf-la ki kay ouvè diwan mil (1,000) lanné-a. Zapòt Jan di sa i té wè adan an vizyon. I di: “Mwen wè sé moun-an ki té ja mò-a, piti kon gwan, yo té doubout douvan gwan chèz wa-a. La té ni tibwen liv ki té ouvè. La té ni an lòt liv ki té ouvè, liv-la ki té ni non sé moun-an ki ni lavi étonnèl-la. Épi moun-an ki asid asou gwan chèz blan-an jijé tout sé moun-an ki té ja mò-a asou sé bagay-la yo té ja fè-a, sé bagay-la ki té ékwi an sé liv-la.”—Wévé. 20:12, 13.
18 Asou ki ‘bagayʼ yo kay jijé sé moun-lan ki wésisité-a? Ès sé asou sé bagay-la yo fè-a avan yo mò? Non! Chonjé, lè yo mò Jéhova pawdonnen tout péché yo. Konsa, sé ‘bagayʼ sala sé pa bagay yo fè avan yo mò. Pito, sa sé bagay yo fè apwé Jéhova enstwi yo an latè nèf-la. Si nonm ki té fidèl tèl kon Nowa, Sanmyèl, David, épi Dannyèl ni pou apwann konsèné Jézi Kwi èk mété lafwa an sakwifis li, jijéwè moun ki té mové!
19. Kisa ki kay wivé moun ki pa aksèpté bèl òpòtunité sala?
19 Kisa ki kay wivé moun ki pa aksèpté bèl òpòtunité sala? Wévélasyon 20:15 di nou: “Népòt moun ki pa ni nonʼy ékwi an liv lavi étonnèl-la, yo pwanʼy èk yo jétéʼy an létan difé-a.” Sa vlé di, Jéhova kay détwi yo pou tout tan. Konsa i byen enpòtan pou nou fè asiwé non nou ékwi an liv lavi étonnèl-la èk i wèsté la!
An fwè ka pwan pa an pli gwo twavay-la ki kay fèt diwan mil (1000) lanné-a pou enstwi moun an mannyè Jéhova. (Gadé paragraf 20)
20. Ki twavay èstòdinè ki kay fèt diwan mil (1,000) lanné-a? (Gadé pòtwé-a ki asou kouvèti-a.)
20 Pa dé bèl bagay kay bèl diwan mil (1,000) lanné-a! A lè sala, pèp Bondyé kay fè pli gwo twavay-la yo janmen fè asou latè-a pou enstwi moun an mannyè Jéhova. Osi, a lè sala, Jézi kay ègzanminé aksyon ni moun ki bon ni moun ki mové. (Izay. 26:9; Twav. 17:31) Sa kay an twavay èstòdinè. Mé ki mannyè twavay èstòdinè sala pou enstwi moun an mannyè Jéhova kay fèt? Lòt atik-la kay édé nou konpwann épi apwésyé bèl pwovizyon sala.
CHANSON 147 Bondyé Pwonmèt Nou Lavi Étonnèl
a Atik sala kay édé nou konpwann pli mèyè sa Jézi té di an Jan 5:28, 29 konsèné sa ki kay wésisité èk ni ‘laviʼ étonnèl èk sa ki kay wésisité èk jwenn ‘jijman.ʼ Nou kay apwann konsèné sé dé wézèwèksyon sala, èk ki moun ki kay wésisité an chak di yo.
b Yo koumansé ékwi liv sala “dépi an koumansman latè-a.” Latè sala vlé di, tout moun ki té kay twapé délivwans anba péché gwanmèsi sakwifis Jézi. (Maf. 25:34; Wév. 17:8) Ébèl sété an nonm ki té fè sa ki bon. I sanm sé nonʼy pwèmyé ki ékwi an liv lavi étonnèl-la.
c An tan pasé nou té ka di, mo pawòl-la ‘jijmanʼ té ni pou fè épi kondannasyon. Èk vwéman, délè ‘jijmanʼ ni pou fè épi kondannasyon. Mé, lè nou konsidiwé sa Jézi té ka diskité, i sanm Jézi té sèvi mo pawòl-la ‘jijmanʼ adan an diféwan sans. Mannyè-a i té sèviʼy té ni pou fè épi an òbzòvasyon. Ében kon yon diksyonnè langaj Grik di, ‘pou ègzanminé kondwit an moun.ʼ