1. Ki moun ki ban nou abilité-a pou palé?

  JÉHOVA ban nou abilité-a pou palé. Konsa, lè Jéhova kwiyé Adanm, Adanm sèvi mo pawòl pou konminiké épi’y. Adanm sèvi mo pawòl nèf épi sa édé’y an ansayman’y pou lonmen tout sé zannimo-a. (Jen. 2:19) Épi i té byen èksité lè’y palé épi an lòt moun pou pwèmyé fwa-a. Sa sété madanm li Èv, ki té byen bèl!​—Jen. 2:22, 23.

2. Ki mannyè moun ja mal sèvi pawòl an tan pasé épi an tan jòdi?

² I pa té pwan tèlman tan pou mal sèvi kado sala. Satan Denmou-a manti bay Èv, èvèk mansonj sala mennen tout lézòm anba péché. (Jen. 3:1-4) Adanm mal sèvi pawòl li lè’y blanmé Èv. Épi i jis blanmé Jéhova pou lèwè’y menm. (Jen. 3:12) Osi, Kén manti bay Jéhova apwé i tjwé fwè’y Abèl. (Jen. 4:9) Èvèk pli ta, Lanmèk, an désandan Kén, ékwi yon poèm ki té ka wéflèkté kalité vyolans-lan ki té an tan sala. (Jen. 4:23, 24) Konsa, kisa ki sitiwasyon-an an tan nou jòdi? Ében nou ka wè politisyen ka sèvi pawòl sal ében vyé pawòl an piblik. Èvèk i difisil pou wè on pòtwé ki pa ni vyé mo pawòl sal. Osi, an lékòl èk koté moun ka twavay ni on chay vyé mo pawòl sal. Maléwèzman, vyé langaj sala ka moutwé kalité latè-a nou ka viv adan.

3. Ki danjé nou ni pou pòté pokosyon épi, èk kisa nou kay diskité an atik sala?

³ Si nou pa pwan pokosyon, nou pé vini abitwé épi vyé langaj sal, épi nou menm sa koumansé sèvi’y. Mé, kon Kwityen, nou vlé plè Jéhova, konsa, nou pa vlé sèvi vyé mo pawòl sal. Nou vlé sèvi bèl kado sala nou ni pou palé adan an mannyè ki pòzitif, pou bay Dyé nou lonnè. An atik sala nou kay konsidiwé ki mannyè nou sa fè sa: (1) an minis-la, (2) an kongwigasyon-an, èk (3) an pawòl nou touléjou. Mé pwèmyéman, annou konsidiwé pouki pawòl nou enpòtan pou Jéhova.

4. Silon Malakay 3:16, pouki pawòl nou enpòtan pou Jéhova?

⁴ Li Malakay 3:16. Lévanjil-la di, Jéhova ni non moun ki ni kwentif pou li, èk ki ka mèdité asou non’y ékwi an ‘liv li’. Ès ou sa ba yon wézon pouki? Ében, pawòl nou ka wévélé sa ki an tjè nou. Jézi di: “Bouch-la ka palé bagay ki ka sòti an tjè-a.” (Maf. 12:34) Konsa, sa nou chwazi pou palé konsèné, ka wiflèkté asou kantité lanmityé-a nou ni pou Jéhova. Épi Jéhova vlé moun ki enmen’y enjwi lavi pou tout tan asou latè nèf-la.

5. (a) Kisa adowasyon nou ni pou fè épi sa nou di? (b) Kon nou wè an pòtwé-a, ki pokosyon nou ni pou pwan lè’y vini pou pawòl nou?

⁵ Pawòl nou kay ditèminé si Jéhova kay aksèpté adowasyon nou. (Jémz 1:26) An chay moun ki pa enmen Jéhova ka palé adan an mannyè ki pa janti épi adan an mannyè ki ni lògèy. (2 Tim. 3:1-5) Vwéman, nou pa vlé kon yo. Konsa, nou vlé pwésé pou plè Jéhova épi pawòl nou. Alò, ès Jéhova plè épi nou si nou ka sèvi pawòl ki nèt an minis-la épi an mitin-lan, mé an pwivé nou ka palé adan an mannyè ki pa janti èk san wèspé pou manm fanmi nou?​—1 Pita 3:7.

6. Ki bèl bagay ki fèt lè Kimberly sèvi pawòl ki nèt?

⁶ Lè nou sèvi kado sala èk nou palé byen, nou ka idantifyé kò nou kon adowatè Jéhova. I ka édé moun wè a klè, la ni on diféwans ‘ant yon moun ki ka sèvi Bondyé èk yonn ki pa ka sèvi’y’.  (Mala. 3:18) Annou konsidiwé ègzanp yon sè, non’y sé Kimberly. * I té ni pou twavay épi yon jan lékòl li asou on pwojé. Padan yo té ka twavay ansanm, jan lékòl-la obzòvé mannyè Kimberly té diféwan épi sé lòt manmay-la. I pa té ka kwititjé moun, ében palé dèyè do yo, épi i té ka palé adan an mannyè ki pòzitif èk i pa té ka sèvi vyé mo pawòl sal. Moun-lan ki té ka twavay ansanm épi Kimberly té apwésyé’y, èk Kimberly koumansé an létid épi’y. I ka plè Jéhova lè nou ka palé épi moun adan mannyè ki ka ankouwajé moun pou apwann konsèné’y!

7. Kisa ou vlé fè épi bèl kado sala Bondyé ba’w?

⁷ Nou tout vlé palé adan an mannyè ki kay onnowé Dyé nou Jéhova, épi ki kay fè nou vansé pli pwé fwè èk sè nou. Konsa annou konsidiwé mannyè nou sa “on bon ègzanp. . . an mannyè [nou] ka palé”.

8. Ki bon ègzanp Jézi ban nou lè’y vini pou pawòl li an minis-la?

⁸ Palé épi jantiyès èk wèspé lè moun pwovoké’w. Lè Jézi té asou latè-a yo akizé’y. Yo di i té ka bwè twòp, i té ka manjé twòp, i té on zélèv Satan, i pa té ka tjenn Sabaf-la, épi yo jis di i pa té ni wèspé pou Bondyé. (Maf. 11:19; 26:65; Louk 11:15; Jan 9:16) Kanmenm, Jézi pa té wéponn yo épi vyé pawòl. Konsa, menm kon Jézi, nou pa sipozé sèvi vyé pawòl si yon moun akizé nou. (1 Pita 2:21-23) Mé kon nou sav, i pa toujou ézé pou kontwolé kon nou. (Jémz 3:2) Alò, kisa ki kay édé nou?

9. Kisa ki kay édé nou kontwolé pawòl nou lè nou an minis-la?

⁹ Pa gaspiyé tan asou pyès vyé pawòl jan kay-la di. Yon fwè non’y sé Sanm di: “Mwen ka katjilé asou mannyè moun sala bizwen konnèt lavéwité-a konsèné Bondyé, èk mwen ka chonjé moun sala bizwen fè chanjman an lavi’y.” Délè jan kay-la pé vini byen faché, paski nou vini on vyé lè. Kanmenm, lè nou ni sitiwasyon kon sa, nou pa sipozé vini faché, mé nou sa fè menm kon on sè non’y sé Lucia. Nou sa di an ti lapwiyè byen vit, nou sa mandé Jéhova pou édé nou wèsté dous, épi pa di jan kay-la anyen ki déwèspèktab.

10. Silon 1 Timòfi 4:13, ki dézi nou sipozé ni?

¹⁰ Vini yon pli mèyè titja. Timòfi sété on Kwityen ki té ni èspéyans, mé i té ni pou kontiné vini on pli mèyè titja. (Li 1 Timòfi 4:13.) Ki mannyè nou sa vini on pli mèyè titja an minis-la? Ében, nou sa pwépawé byen. Nou kontan nou ni an chay diféwan zouti pou édé nou vini pli mèyè titja. Nou ni zouti kon, ti liv-la Fè Éfò Pou Apwann Li Èk Enstwi Pli Byen èk sèksyon-an “Apwann Enstwi Pli Byen” an Ti Liv Mitin Nou. Konsa, ès ou ka byen sèvi sé zouti sala? Kanmenm, lè nou pwépawé byen nou ka mwens antjèt, èvèk nou ka palé épi pli konfyans.

11. Ki mannyè an chay Kwityen ja vini pli mèyè titja?

¹¹ Nou osi sa vini pli mèyè titja lè nou obzòvé lézòt an kongwigasyon-an èk apwann hòd yo. Sam, nou té mansyonnen pli bonnè-a, mandé kò’y, ‘kisa ki ka fè adan kwityen bon titja?’ Konsa, i étidyé mannyè yo ka enstwi, èk i imité yo. Yon sè, non’y sé Talia, té ka éséyé péyé bon atansyon pou mannyè sé fwè-a té ka dévlopé diskou piblik. Paski i té ka fè sa, i apwann mannyè pou palé konsèné diféwan sijé moun ka palé asou an minis-la byen souvan.

12. Ki tjalinj adan fwè épi sè ka èspéyansé?

¹² Nou tout sa patisipé an sé mitin-lan lè nou ka chanté èk fè pwen ki ka enkouwajé yonn a lòt. (Sam 22:22) Mé an chay fwè èk sè ka twouvé’y difisil pou chanté ében pou fè on pwen an piblik. Ès sa sé sitiwasyon’w? Si sé sa, ou kay kontan pou sav kisa ki ja édé lézòt fwè èk sè.

13. Kisa ki kay édé’w pou chanté épi tout tjè’w an sé mitin-lan?

¹³ Chanté épi tout tjè’w. Lè nou ka chanté sé chanson nou-an, nou sipozé ka fiksé asou dézi nou pou bay Jéhova lonnè. Yon sè non’y sé Sara, pa té ka konsidiwé kò’y kon on moun ki sa chanté byen. Mé, i té vlé bay Jéhova lonnè lè’y ka chanté. Konsa, i té ka pwépawé pou sé chanson-an menm kon i té ka pwépawé pou sé diféwan pa-a pou sé mitin-lan. I té ka pwatiké sé chanson-an, épi i té ka mèdité asou sé mo pawòl-la. Sara di: “Sa édé’y pou mèdité asou sé mo pawòl-la èk pa asou abilité’y pou chanté byen.”

14. Si’w koutja, kisa ki kay édé’w pou fè pwen’w an sé mitin-lan?

¹⁴ Éséyé wéponn kwèsyon lè’w alé mitin. Nou sav i pa ézé pou adan fwè èk sè wéponn kwèsyon. Talia nou té mansyonnen pli bonnè-a di: “I difisil pou mwen fè pwen mwen an piblik, mé mwen ka wèsté dous épi an chay moun pa ka obzòvé sa.” Talia pa ka tjenbé dèyè pou wéponn kwèsyon an sé mitin-lan. Kon’y ka pwépawé pou sé mitin-lan, i ka tjenn an sèvèl li ki, pwèmyé wépons-lan asou sijé-a sipozé kout, èvèk diwèk wépons-lan pou kwèsyon-an. I di: “Sa bon si wépons mwen kout épi senp, èk sa sé kalité wépons-lan fwè-a ki ka kondwi mitin-lan ka gadé pou.”

15. Kisa nou ni pou chonjé lè nou ka wéponn kwèsyon an sé mitin-lan?

¹⁵ La ni kwityen ki pa koutja, ki ka twouvé’y difisil pou wéponn kwèsyon. Pouki? Yon sésé non’y sé Juliet di: “Délè mwen ka fè dèyè pou wéponn kwèsyon, paski mwen kwè sé wépons mwen-an kay twò kout épi yo pa kay bon asé.” Chonjé, Jéhova vlé nou ba pli mèyè wépons nou lè nou sa. * I ka vwéman apwésyé détèminasyon nou pou ba li lonnè an sé kongwigasyon-an, épi pou pa kité pèwèz nou tjenn nou dèyè.

16. Ki kalité vyé pawòl nou pa ni pou sèvi?

¹⁶ Pa sèvi vyé mo pawòl. (Èfés. 4:31) Kon nou té mansyonnen pli bonnè-a, yon kwityen pa sipozé sèvi mo pawòl sal. Mé délè, la ni pawòl nou ni pou pwan pokosyon kont. Nou ni pou pwan pokosyon lè nou ka palé konsèné moun ki ni diféwan kilti, diféwan lafanmi, ében moun ki sòti an lòt péyi. Plis toujou, nou pa vlé sèvi pawòl ki kay ofwansé moun. Yon fwè di: “Délè, mwen té ka di vyé pawòl mwen kwè ki té blag, mé, sa té ka ofwansé lézòt. Mé madanm mwen édé mwen pou mwen pwan pwokosyon épi pawòl mwen.”

17. Silon Èfésòs 4:29, ki mannyè nou sa ankouwajé yonn a lòt?

¹⁷ Annou palé adan an mannyè ki kay enkouwajé yonn a lòt. Sé pou nou pwésé pou konplimanté lézòt pito nou kwititjé. (Li Èfésòs 4:29.) Nasyon Izwayèl té ni an chay bagay pou wimèsyé Jéhova pou, mé byen souvan yo té ka bougonnen. Lè yon moun ka bougonnen sa sa fè lézòt bougonnen osi. Pou ègzanp, ou ka chonjé sé dis èspiyon-an ki enflouwansé “tout nasyon Izwayèl . . . pou bougonnen kont Moziz”. (Lim. 13:31–14:4) Okontwè, le nou konplimanté moun sa ka ba yo tjè kontan. Pou ègzanp, fi Jèfta té wisivwè konpliman, èk sa té enkouwajé’y pou wété an ansayman’y. (Jij 11:40) Sè Sara nou té mansyonnen pli bonnè-a di: “Lè nou konplimanté lézòt, sa ka fè yo santi Jéhova kontan yo, épi yo ni on plas an ògannizasyon’y.” Konsa, fwè épi sè, gadé pou òpòtunité pou konplimanté lézòt adan an mannyè ki sensè.

18. Silon Sam 15:1, 2, pouki nou ni pou palé lavéwité, épi kisa nou pa vlé fè?

¹⁸ Palé lavéwité-a a tout lè. Nou pa sa plè Jéhova si nou ka di mansonj. Jéhova hayi tout mansonj. (Pwov. 6:16, 17) Kanmenm, la ni an chay moun jòdi ki ka konsidiwé mansonj kon bagay ki natiwèl an pawòl yo. Kon sèvant Jéhova nou pa ka manti, paski Jéhova ka kondanné mansonj. (Li Sam 15:1, 2.) Konsa, nou pa kay manti, mé osi, nou pa kay di anyen pa èspwé pou kwennen moun.

19. Ki lòt bagay nou pa vlé fè?

¹⁹ Nou pa vlé mal palé moun. (Pwov. 25:23; 2 Tèsa. 3:11) Sè Juliet nou té mansyonnen pli bonnè-a èspliké mannyè vyé pawòl négativ afèkté’y. I di: “Lè mwen té ka kouté vyé pawòl négativ sa dékouwajé mwen, épi sa fè mwen pèd konfyans an moun-lan ki té ka di sé pawòl négativ sala. Ki asiwans mwen ni menm moun sala pa kay mal palé mwen ba yon lòt moun?” Si nou anpami moun ki ka palé négativ, éséyé pou chanjé konmézasyon-an, pou yonn ki pòzitif.​—Kòl. 4:6.

20. Kisa ki détèminasyon nou lè nou ka palé?

²⁰ Nou ka viv adan an latè koté vyé pawòl tout oliwon nou. Kanmenm, nou ni pou twavay wèd pou pawòl nou plè Jéhova. Chonjé, abilité-a pou palé, sé yon kado Jéhova ban nou. Èvèk i konsèné épi mannyè nou ka sèvi kado sala. Jéhova kay benni éfò nou, si nou sèvi pawòl nou an minis-la, lè nou atandé mitin, épi lè nou ka palé touléjou. Toutalè mové enflouwans latè sala kay bout, èk a lè sala i kay pli alèz pou nou onnowé Jéhova épi pawòl nou. (Joud 15) Konsa apwézan, nou ni pou détèminé pou plè Jéhova épi “pawòl ki ka sòti an bouch [nou].”​—Sam 19:14.