1. Ki mannyè nou sipozé gadé pwivilaj-la nou ni pou pwédyé bay Jéhova?

 NOU NI an pwivilaj ki byen spésyal. Nou sa apwoché Kwéyatè nou an lapwiyè. Katjilé asou sa: Nou sa pwédyé hòd tjè nou bay Jéhova an népòt lè èk an népòt langaj. Épi nou pa ni pou fè an apwentman pou palé épiʼy. Menm si nou kouché asou an kabann lopital, ében nou an pwizon nou ni konfyans-lan ki, Papa nou kay kouté lapwiyè nou. Lapwiyè sé an pwivilaj nou ka apwésyé an chay.

2. Ki mannyè Wa David té moutwé i té ka apwésyé pwivilaj-la i té ni pou pwédyé?

² Wa David té ka apwésyé pwivilaj-la i té ni pou pwédyé. I di Jéhova: ‘Sé pou lapwiyè mwen vini menm kon lansan ki byen pwépawé douvanʼw.ʼ (Sm 141:1, 2) An tan David, yo té ni pou pwan bon pokosyon lè yo té ka pwépawé lansan-an sé pwèt-la té ka sèvi an adowasyon Jéhova. (Ègz. 30:34, 35) Konsa, lè David di i té vlé lapwiyèʼy pawèt douvan Jéhova menm kon lansan, sa vlé di, i té vlé katjilé byen asou sa i té kay di Jéhova an lapwiyè. Nou vlé fè menm kon David, paski nou vlé lapwiyè nou plè Jéhova.

3. Kisa ki sipozé atitid nou lè nou ka pwédyé bay Jéhova, èk pouki?

³ Nou ni pou moutwé wèspé lè nou ka pwédyé bay Jéhova. Katjilé asou sé vizyon èstòdinè-a pwofèt Izaya, Izikèl, Dannyèl, épi zapòt Jan té wisouvwè. Chak vizyon té diféwan, mé la ni yon bagay yo té ni an konmen. Yo tout moutwé Jéhova kon an Wa ki èstòdinè. Izaya té wè Jéhova ‘asid asou an gwo twòn ki byen ho.ʼ (Izay. 6:1-3) Izikèl té wè Jéhova asid asou an kawòs, èk la té ni ‘an klèté ki té bwiyan tout oliwonʼy menm kon an lakansyèl.ʼ (Izik. 1:26-28) Dannyèl té wè ‘Moun-lan Ki Té La Dépi Tan Lontanʼ abiyé an had blan, épi flanm difé té ka sòti an twòn li. (Dann. 7:9,10) Épi zapòt Jan té wè Jéhova asid asou twòn li. La té ni an lakansyèl ki té ka kléwé menm koulè épi yon èmral, tout oliwonʼy. (Wév. 4:2-4) Konsa i a klè, pyèsonn pa ni laglwa-a Jéhova ni. Kon nou wéfléchi asou sa, i ka fè nou apwésyé bèl pwivilaj-la nou ni pwédyé bay Jéhova. Mé konsèné kisa nou sa pwédyé?

4. Kisa nou apwann an pwèmyé pa-a an lapwiyè-a ki an Mafyou 6:9, 10?

⁴ Li Mafyou 6:9, 10. An diskou-a Jézi té bay asou montany-lan, i té enstwi sé disip li-a pou pwédyé adan an mannyè ki té kay plè Bondyé. Apwé i di, “mi kalité lapwiyè-a pouʼw pwédyé”, Jézi mansyonnen sé bagay-la ki pli enpòtan pwèmyé. I di yo pou pwédyé pou (1) tout moun onnowé non Bondyé, (2) pou tout moun vini anba kondwit Jéhova, ében Wéyòm li ki kay détwi tout lèlmi Bondyé, èk (3) pou Bondyé fè tout sé bèl bagay-la i pwonmèt pou fè bay lézòm, épi latè-a. Lè nou pwédyé pou sé bagay sala, nou ka moutwé divwa Bondyé byen enpòtan pou nou.

5. Ès i bon pou nou pwédyé pou sa nou bizwen? Poutji ou ka di sa?

⁵ An lòt pa-a an lapwiyè-a, Jézi moutwé i bon pou pwédyé pou sa nou bizwen. Nou sa mandé Jéhova pou ban nou sa nou bizwen pou manjé pou jounen-an. Èk nou sa mandéʼy pou pawdonnen péché nou, pou pa kité nou tonbé anba tantasyon, épi pou délivwé nou anba lanmen Denmou-an. (Maf. 6:11-13) Lè nou mandé Jéhova pou sé bagay sala, nou ka moutwé nou ka dépan asouʼy pou èd, èk nou osi ka moutwé nou vlé ni favèʼy.

6. Apa di sé bagay-la Jézi mansyonnen-an, ès la ni lòt bagay nou sa pwédyé pou? Èspliké wépons ou.

⁶ Jézi pa té vlé sé disip li-a wépété lapwiyè sala, mo pou mo chak fwa yo ka pwédyé. An lòt lokazyon lè Jézi té ka pwédyé, i té palé konsèné lòt bagay ki té enpòtan pou li an lè-a. (Maf. 26:39, 42; Jan 17:1-26) An menm mannyè-a, nou sa pwédyé konsèné népòt bagay ki ka afèkté nou. Pou ègzanp, si nou ni an disizyon pou fè, nou sa pwédyé pou Jéhova pou ban nou lasajès épi lakonpwann. (Sam 119:33, 34) Ében si nou ni an asaynman pou fè ki difisil, nou sa pwédyé pou Jéhova édé nou konpwann mannyè pou fèʼy. (Pwov. 2:6) Pawan sa pwédyé pou ich yo, ich sa pwédyé pou pawan yo. Èk nou tout sipozé pwédyé pou étidyan Bib nou, épi pou sé moun-lan nou ka patajé Bon Nouvèl-la épi. Mé kanmenm, lè nou ka pwédyé nou pa sipozé sèlman mandé Jéhova pou bagay.

7. Pouki nou sipozé glowifyé Jéhova an lapwiyè nou?

⁷ Nou sipozé chonjé pou glowifyé Jéhova an lapwiyè nou. La pa ni pyèsonn ki méwité laglwa pli pasé Dyé nou, Jéhova. Paski i ‘bon, èk i pawé pou pawdonnen.ʼ Osi i ‘ni mizéwikòd èk konpasyon.ʼ Èvèk, i ‘pa ka faché vit, épi i ni an chay lanmityé èk i fidèl.ʼ (Sam 86:5, 15) Wi, nou vwéman ni an chay bon wézon pou glowifyé Jéhova pou kalité Moun-lan i yé épi pou sa i ka fè.

8. Pou ki diféwan bagay nou sa wimèsyé Jéhova? (Sam 104:12-15, 24)

⁸ Bon, nou ni pou glowifyé Jéhova, mé nou osi ni pou wimèsyéʼy pou tout sé bèl bagay-la i ka potjiwé ban nou. Pou ègzanp, nou sa wimèsyé Jéhova pou tout sé bèl koulè-a nou ka wè an flè. Nou sa wimèsyéʼy pou tout sé diféwan kalité bon manjé-a nou ni, èk pou sé bon jan-an nou ni. Sé Jéhova ki ka ban nou tout sé bèl bagay sala, èk i ka ban nou pli bagay ankò pou ban nou tjè kontan. (Li Sam 104:12-15, 24.) Mé sa ki pli enpòtan sé sa: Jéhova ka ban nou an chay manjé spiwityouwèl pou édé nou tjenn wilasyon nou épiʼy fò èk i ka ban nou an bèl èspwa pou tan ki ka vini.

9. Kisa ki sa édé nou pou chonjé pou wimèsyé Jéhova? (1 Tèsalonnika 5:17, 18)

⁹ I byen ézé pou nou oblijé di Jéhova mèsi pou tout sa i ka fè ban nou. Kisa ki sa édéʼw pou chonjé pou di Jéhova mèsi? Lèʼw mandé Jéhova pou an bagay ében pou édéʼw, matjéʼy asou an papyé. Èk tanzantan gadé saʼw ékwi pouʼw sa wè sé diféwan mannyè-a Jéhova wéponn lapwiyèʼw. Lèʼw wè mannyè Jéhova wéponn lapwiyèʼw, di an ti lapwiyè pou wimèsyéʼy pou èd li. (Li 1 Tèsalonnika 5:17, 18.) Katjilé asou sa: Nou ka tèlman kontan lè moun wimèsyé nou èk moutwé apwésiasyon pou nou. An menm mannyè-a, Jéhova ka byen kontan lè nou chonjé pou diʼy mèsi lèʼy wéponn lapwiyè nou. (Kòl. 3:15) Mé, ki lòt bon wézon nou ni pou wimèsyé Dyé nou?

10. Silon 1 Pita 2:21 pouki nou sipozé wimèsyé Jéhova?

¹⁰ Li 1 Pita 2:21. Nou sipozé wimèsyé Jéhova paski i voyé Gasonʼy asou latè-a pou enstwi nou. Lè nou étidyé lavi Jézi, nou ka apwann an chay bagay konsèné Jéhova, èk nou ka apwann mannyè nou sa plè Jéhova. Èvèk, si nou moutwé nou ni lafwa an sakwifis Jézi, nou sa ni an bon wilasyon épi Dyé Jéhova èk nou sa enjwi lapé épiʼy.—Ronm 5:1.

11. Pouki nou sipozé pwédyé an non Jézi?

¹¹ Nou ka wimèsyé Jéhova paski nou sa pwédyé an non Gasonʼy. Jéhova ka sèvi Jézi pou ban nou sa nou mandéʼy. Èk i ka kouté lapwiyè nou lè nou pwédyé an non Jézi. Anfen, Jézi té di: “Népòt bagay zòt mandé an non mwen, mwen kay fèʼy pou zòt sa wè pouvwa Papa-a an Gason-an.”—Jan 14:13, 14.

12. Ki lòt wézon nou ni pou wimèsyé Jéhova pou Gasonʼy?

¹² Gwanmèsi sakwifis lanmò Jézi, Jéhova ka pawdonnen péché nou. Anfen, lévanjil-la di nou Jézi sé “pli ho chèf [pwèt-la èk] i asid asou lanmen dwèt Bondyé an syèl.” (Hib. 8:1) Osi, sé li “ki ka plédé épi Papa-a ban nou.” (1 Jan 2:1) Alò nou ka wimèsyé Jéhova an chay, paski i ban nou an Chèf Pwèt ki ni an chay mizéwikòd, èk ki ka konpwann fèblès nou, épi i “ka plédé ban nou”! (Ronm 8:34; Hib. 4:15) Paski nou pa pawfé, nou pa té kay sa apwoché Jéhova an lapwiyè si sé pa té pou sakwifis Jézi. San dout ou kay dakò, nou pa sa janmen fini wimèsyé Jéhova pou kado spésyal sala i ban nou, Gasonʼy Jézi Kwi!

13. Swè-a avan i mò, ki mannyè Jézi té moutwé i enmen sé disip li-a?

¹³ Swé-a avan i mo, Jézi té pasé an chay tan an lapwiyè pou sé disip li-a. I té mandé Papaʼy “pou pwotèkté yo kont pouvwa Satan, nonm méchan-an.” (Jan 17:15) Magwé i té sav i menm té kay èspéyansé an chay soufwans, i té antjèt pou sé zapòt li-a. Sa ka moutwé Jézi té vwéman enmen yo.

14. Ki mannyè nou sa moutwé nou enmen sé fwè èk sè nou-an?

¹⁴ Menm kon Jézi, nou pa ka fiksé sèlman asou sa nou bizwen. Okontwè, nou ka toujou pwédyé pou sé fwè èk sè nou-an. Lè nou fè sa, nou ka obéyi koumandman-an Jézi té bay pou nou enmen yonn a lòt, èk nou ka moutwé Jéhova mizi enmen nou enmen sé fwè èk sè-a. (Jan 13:34) Lè nou ka pwédyé pou sé fwè èk sè nou-an, sé pa tan nou ka gaspiyé paski Pawòl Bondyé di nou: “Lapwiyè an nonm ki ka viv dwèt douvan Bondyé ni an pil pouvwa.”—Jémz 5:16.

15. Pouki sé fwè èk sè nou-an bizwen lapwiyè nou?

¹⁵ Sé fwè èk sè nou-an bizwen lapwiyè nou paski, yo ni pou aji épi an chay difikilté. Pou ègzanp yo ni pou aji épi maladi, dézas natiwèl, ladjè, pèsikasyon, èk lòt difikilté. Konsa nou sa mandé Jéhova pou édé yo andiwé. Osi, nou sa pwédyé pou sé fwè èk sè-a ki ka twavay wèd pou édé sa ki ni labizwen. Pitèt ou konnèt fwè èk sè ki ka èspéyansé difikilté kon sa nou mansyonnen-an. I bon pouʼw lonmen non yo an lapwiyèʼw. Lè nou mandé Jéhova pou édé yo andiwé, nou ka moutwé nou vwéman enmen yo.

16. Pouki nou sipozé pwédyé pou sé fwè-a ki ka pwan douvan an kongwigasyon-an?

¹⁶ Sé fwè-a ki ka pwan douvan an kongwigasyon-an ka apwésyéʼy lè nou pwédyé pou yo, èk sé lapwiyè sala ka édé yo anpil. Zapòt Pòl té wéyalizé i té bizwen lapwiyè sé fwè-a. I di: “Pwédyé ban mwen osi, kon sa lè mwen koumansé palé, Bondyé kay moutwé mwen ki sa pou mwen di, épi pou mwen sa asé bwav lè mwen ka fè moun konnèt sé bagay-la pyèsonn pa té konnèt avan-an konsèné Bon Nouvèl-la.” (Èfés. 6:19) Jòdi osi, nou ni an chay fwè ki ka pwan douvan an sé kongwigasyon-an èk yo ka twavay wèd. Lè nou mandé Jéhova pou benni twavay yo, nou ka moutwé nou enmen yo.

17-18. Asou ki lokazyon nou pé ni pou pwédyé pou lézòt moun? Èk kisa nou sipozé chonjé?

¹⁷ Délè nou pé ni pou pwédyé pou lézòt moun. Pou ègzanp, a sè ki ka kondwi an létid Bib, pé mandé lòt sè-a ki épiʼy asou létid-la pou pwédyé. Pitèt sè sala pa konnèt étidyan-an byen. Konsa pitèt i kay simyé pwédyé an finisman létid-la paski a lè sa-a, i kay pli ézé pouʼy konnèt sa pou di lèʼy ka pwédyé pou étidyan-an.

¹⁸ Osi, an fwè pé ni pou pwédyé adan an mitin pou kongwigasyon-an, ében an mitin pou minis-la. Sé fwè-a ki ni pwivilaj sala ni pou chonjé objèktiv mitin-lan. Yo pa sipozé sèvi lokazyon-an pou bay lézòt konsèy, ében pou fè an anonsman. Nòmalman, nou ka ni senk (5) minit pou chanson-an èk lapwiyè-a an sé mitin-lan. Konsa, fwè-a ki ka pwédyé pa sipozé “pwédyé lonng”, sitou lèʼy ka pwédyé an koumansman mitin-lan.—Maf. 6:7.

19. Kisa ki kay édé nou pawé pou jou jijman Jéhova?

¹⁹ Kon jou jijman Jéhova ka vini pli pwé, nou bizwen fè lapwiyè an bagay ki byen enpòtan an lavi nou. Sé pou wézon sala Jézi té di: “Pwan gad épi pwédyé konstan pou ou sa ni fòs pou ou sa sipòté tout sa ki kay fèt-la.” (Louk 21:36) Wi, si nou ka toujou pwédyé, lafwa nou kay vini fò, èk nou kay byen pawé lè jou jijman Jéhova wivé.

20. Ki mannyè lapwiyè nou sa menm kon lansan ki ka santi dou?

²⁰ Nou ni an chay apwésiasyon pou pwivilaj-la nou ni pou apwoché Jéhova an lapwiyè. Èk an atik sala nou ja diskité sa nou ni pou fè pou lapwiyè nou vini menm kon lansan ki byen pwépawé douvan Jéhova. Nou té diskité, lè nou ka pwédyé, sé bagay-la ki pli enpòtan pou nou sé, bagay ki ni pou fè épi divwa Jéhova. Osi, nou wè nou ni pou wimèsyé Jéhova pou Gasonʼy épi pou Wéyòm-lan. Èk nou ni pou pwédyé pou sé fwè-a èk sé sè nou-an. Apa di sa, nou apwann ki, Jéhova vlé nou pwédyé pou sa nou bizwen pou viv épi pou tjenn lafwa nou fò. Lè nou katjilé byen asou sa nou ka di an lapwiyè nou, sa ka moutwé Jéhova, nou ka vwéman apwésyé bèl pwivilaj-la nou ni pou palé épiʼy an lapwiyè. Lè sala, lapwiyè nou kay menm kon lansan ki ka santi dou douvan Jéhova.—Pwov. 15:8.