1. Kisa ki volonté Bondyé jòdi jou?

 JÒDI JOU i sé volonté Bondyé pou bon nouvèl-la konsèné Wéyòm-lan pwéché toupatou an latè-a. (Mak 13:10; 1 Tim. 2:3, 4) Twavay sala sé twavay Bondyé, èk paski twavay sala si tèlman enpòtan, Bondyé ja chwazi Gasonʼy Jézi Kwi pou diwèkté twavay sala. Konsa, kon sé Jézi ki ka diwèkté twavay sala, i kay fèt menm kon Bondyé vléʼy fèt avan bout-la wivé.—Maf. 24:14.

2. Kisa nou kay diskité an atik sala?

² An atik sala, nou kay wè mannyè Jézi ka sèvi “sèvant-lan ki ni lèspwi épi ki obéyisan-an” pou fè dé (2) bagay ki enpòtan. Yonn (1) pou potjiwé sé disip li-a épi enstwiksyon ki bazé asou Bib-la. Èk dé (2) pou ògannizé sé disip li-a pou fè pli gwo twavay pwèchman-an ki janmen fèt asou latè-a. (Maf. 24:45) Nou kay osi wè sa nou chak sa fè pou sipòté Jézi èk sèvant-lan ki ni lèspwi.

3. Ki lotowité Bondyé ja bay Jézi?

³ Jòdi jou Jézi Kwi ka diwèkté twavay pwèchman-an. Ki mannyè nou sav sa? Nou sav sa paski avan Jézi té alé an syèl, i té jwenn épi adan sé disip li-a asou an montany an Galili. A lè sala i té di yo: “Bondyé ja ban mwen tout pouvwa asou tout sa ki an syèl épi sa ki asou latè-a.” Èk apwé sa i di yo: “Kon sa alé toupatou épi pwéché bay sé moun-an pou yo sa vini disip mwen.” (Maf. 28:18, 19) Alò, sa ka moutwé nou Bondyé ja bay Jézi lotowité-a pou diwèkté twavay pwèchman-an.

4. Poutji nou sa asiwé Jézi ka diwèkté twavay pwèchman-an jòdi jou?

⁴ Jézi té di sé disip li-a té kay pwéché bon nouvèl-la èk fè disip “toupatou an latè-a”. Èk osi, i té pwonmèt yo i té kay ‘toujou la épi yo jis an bout latè-a.ʼ (Maf. 28:20) Pawòl Jézi té ka moutwé nou a klè i té kay kontiné diwèkté twavay pwèchman-an pou wivé jis an tan nou.

5. Ki mannyè nou ka akonpli pwofèsi-a an Sam 110:3?

⁵ Jézi té asiwé diwan tan nou la té kay ni asé moun pou fè twavay pwèchman-an. Ou wè, Jézi té byen konnèt lévanjil-la an Sam 110:3 koté i di: “Jou-a ou kay goumen èk sé lèlmiʼw-lan, tout sé moun ou-an kay vin édéʼw.” (Sam 110:3) Alò, si ou ka patisipé an twavay pwèchman-an, ou ka sipòté Jézi èk sèvant obéyisan-an. Èk osi, ou ka édé akonpli pwofèsi. Wi, anba diwèksyon Jézi twavay pwèchman-an ka fè an chay pwogwé. Kanmenm, la ni tjalinj.

6. Mansyonnen yonn an sé difikilté-a pwoklanmatè Wéyòm-lan ka èspéyansé jòdi jou?

⁶ Yonn an sé difikilté-a pwoklanmatè Wéyòm-lan ka èspéyansé jòdi sé òpozisyon. Òpozisyon sala sa vini hòd apòsta, chèf wilizyon ében politisyen. Sé moun sala ka simen an chay mansonj konsèné nou èk twavay nou. Alò si fanmi nou, moun nou ka twavay épi ében lòt moun nou konnèt kwè sé mansonj sala, yo pé ban nou chalè pou fè nou doubout pwéché èk sèvi Jéhova. La ni péyi koté sé lèlmi nou-an ka mennasé sé fè èk sè nou-an. Yo ka ataké yo, awété yo, èk yo ka jis mété adan di yo an pwizon. Kanmenm i pa ka sipwi nou lè moun twété nou kon sa, paski Jézi té ja di nou an Mafyou 24:9: “Tout nasyon kay hayiʼw pou lapéti mwen.” Anfen lè nou èspéyansé twètman kon sa, sa sé pwèv ki ka moutwé nou ka plè Bondyé. (Maf. 5:11, 12) Moun-lan ki dèyè òpozisyon sala sé Satan. Kanmenm, Jézi twòp pli fò pasé Denmou-an! Konsa Denmou-an pa sa janmen anpéché twavay-la fèt. Épi sipò Jézi moun owon latè-a ka tann bon nouvèl-la jòdi jou. Annʼ konsidiwé èvidans-lan ki ka sipòté sa.

7. Kisa ou ka wè ki ka moutwé Wévélasyon 14:6, 7 ka akonpli jòdi jou?

⁷ An lòt difikilté nou ka twapé lè nou ka pwéché sé lè nou jwenn épi moun ki ka palé an diféwan langaj. Kanmenm, an wévélasyon-an Jézi Kwi té bay zapòt Jan, i té moutwéʼy sa pa té kay anpéché nou pwéché bon nouvèl-la. (Li Wévélasyon 14:6, 7.) Mé ki mannyè nou ka fè sa? Nou ka bay an chay moun chans-lan pou aksèpté konmisyon Wéyòm-lan. Pou ègzanp, jòdi, wèbsayt nou jw.org ni enfòmasyon an pli pasé yon mil (1,000) langaj! Alò moun oliwon latè-a sa li ében kouté piblikasyon ki bazé asou Bib-la adan an langaj yo sa konpwann. Apa di sa, Pwensipal Konmité-a ja diwèkté ògannizasyon-an pou twadwi liv-la Ou Sa Ni On Bon Lavi Pou Tout Tan! an plis pasé sèt san (700) langaj! Liv sala sé pwensipal zouti-a nou ka sèvi pou fè disip. Osi nou ni enfòmasyon ki bazé asou Bib-la asou òdiyo pou moun ki soud. Èk nou ni enfòmasyon an braille pou moun ki avèg. Kon sa san dout, nou ka wè pwofèsi Bib ka akonpli jòdi, paski moun ki ka palé ‘tout diféwan langaj an sé nasyon-anʼ ka apwann pou palé ‘langaj pi-aʼ. Sa vlé di yo ka apwann lavéwité-a ki an Bib-la. (Zèk. 8:23; Zèf. 3:9) Èk tout sa ka fèt anba diwèksyon gadyenn nou Jézi Kwi.

8. Ki bon wézilta nou ka wè a kòz di twavay pwèchman-an?

⁸ Jòdi jou, la ni plis pasé ywit milyon (8,000,000) moun an ògannizasyon Jéhova an dé san kawant (240) péyi asou latè-a. Èk chak lanné, plizyè mil di moun ka batizé! Mé sé pa kantité moun-lan ki an ògannizasyon-an ki enpòtan. Sa ki pli enpòtan sé bèl kawaktè Kwityen-an sé moun sala ka dévlopé. Anfen, adan di yo ja fè tèlman gwo chanjman, sé konmsi yo koumansé viv “an lavi ki nèf.” (Kòl. 3:8-10) Pou ègzanp, an chay di yo té ka kouwi vyé lavi, yo té vyolan, yo té ka moutwé pwéjidis, èk yo té kwè nasyon yo té pli mèyè pasé tout lòt nasyon. Mé yo doubout fè tout sé bagay sala. Èk menm kon pwofèsi-a an Izaya 2:4 té di; ‘yo pa ka apwann fè ladjè ankò.ʼ Èk paski nou ka twavay tèlman wèd pou viv an lavi ki nèf, sa ka anmennen moun pou ògannizasyon Bondyé. Èk osi nou ka moutwé nou ka swiv diwèksyon gadyenn nou Jézi Kwi. (Jan 13:35; 1 Pita 2:12) Poutji nou ka èspéyansé tout sé bon wézilta sala? Sé paski Jézi ka ban nou èd-la nou bizwen pou nou éwisi.

9. Silon Mafyou 24:45-47, kisa Jézi di ki té kay fèt an dènyé tan-an?

⁹ Li Mafyou 24:45-47. Jézi té di i té kay apwenté an sèvant “ki ni lèspwi épi ki obéyisan” diwan dènyé tan-an. Wézon-an i té kay fè sa sété pou sèvant sala potjiwé sé disip li-a épi lésisyon ki bazé asou Bib-la. Alò sèvant sala sipozé ka twavay byen wèd pou potjiwé manjé sala an tan nou. Èk sé sa ki ka fèt pou vwé. Gadyenn nou Jézi Kwi ja apwenté an ti gwoup nonm ki annonté pou bay pèp li èk lòt moun ki antéwésé manjé spiwitwèl “lè i lè manjé.” Mé, sé nonm sala pa ka kwè yo sé mèt sé disip-la. (2 Kòr. 1:24) Pito sa, yo sav sé Jézi Kwi ki mèt, èk sé li ki ka djidé pèp li.—Izay. 55:4.

10. Kilès an sé piblikasyon sala ki té édéʼw pou koumansé sèvi Jéhova? Gadé pòtwé-a

¹⁰ Dépi lanné mil nèf san diznèf (1919), sèvant-lan ki obéyisan-an ja pwépawé an chay piblikasyon pou bay moun ki antéwésé chans-lan pou apwann lavéwité-a ki an Bib-la. Pou ègzanp an lanné mil nèf san ventenyen (1921), sèvant-lan pwépawé liv-la The Harp of God pou édé moun ki antéwésé pou apwann lésisyon ki an Bib-la. Mé kon sé lanné-a té ka pasé, yo pwépawé pli piblikasyon. Kilès an sé piblikasyon sala ki té édéʼw vini konnèt èvèk enmen Papa nou ki an syèl-la? Ès sété “Let God Be True,” The Truth That Leads to Eternal Life, You Can Live Forever in Paradise on Earth, Knowledge That Leads to Everlasting Life, What Does the Bible Really Teach?, What Can the Bible Teach Us?, ében piblikasyon nèf nou-an Ou Sa Ni On Bon Lavi Pou Tout Tan!? Yo té pwépawé tout sé piblikasyon sala pou édé nou fè disip. Èk chak sé piblikasyon sala sété sa nou té bizwen a lè-a nou wisivwè yo.

11. Pouki i enpòtan pou nou tout apwann plis konsèné Jéhova èk Bib-la?

¹¹ Sé pa étidyan Bib tousèl ki ni pou vini konnèt Jéhova èk Pawòl li byen. Nou tout ni pou fè sa. Anfen tann sa zapòt Pòl té di asou sa. An liv Hibrou 5:14 i di: “Moun ki matwité an lafwa-a sa manjé gwo manjé.” Zapòt Pòl osi di lè nou mété an pwatik sa nou apwann an Bib-la, sa kay édé nou “apwann diféwans ant bon èk mové”. Jòdi jou nou ka viv adan an latè koté moun pa ka swiv pwensip Bondyé pyès! Èk sa pé fèʼy difisil pou nou swiv wèg Bondyé. Kanmenm Jézi ka wédé nou, paski i ka fè asiwé nou ni enfòmasyon ki bazé asou Bib-la pou tjenn lafwa nou fò. Konsa, Jézi ka sèvi sèvant-lan ki obéyisan pou pwépawé èk sépawé tout sé bèl manjé sala.

12. Menm kon Jézi, ki mannyè nou ka onnowé non Bondyé?

¹² Menm kon Jézi, nou ka onnowé non Bondyé, Jéhova. (Jan 17:6, 26) Pou ègzanp an lanné mil nèf san twantenyen (1931), nou koumansé kwiyé kò nou Témwen Jéhova. Nou té fè sa paski non Bondyé enpòtan pou nou, èk nou té vlé moun idantifyé nou épi non Papa nou ki an syèl. (Izay. 43:10-12) Èk dépi Òktòb menm lanné sala, non Bondyé toujou ka pawèt asou kouvèti Gad-la. Èk osi, an Bib-la New World Translation of the Holy Scriptures, ou kay wè non Bondyé an tout sé plas-la i sipozé yé. Mé sa sé an gwo diféwans épi sé lézòt wilizyon-an ki di yo sé Kwityen, paski sé wilizyon sala ja tiwé non Bondyé an Bib-la!

13. Pou ki wézon ou asiwé Jézi ka sèvi “sèvant-lan ki ni lèspwi épi ki obéyisan” jòdi jou? (Jan 6:68)

¹³ Jézi ja sèvi “sèvant-lan ki ni lèspwi épi ki obéyisan” pou fè an bagay ki wimakab. I sèvi yo pou ògannizé an ògannizasyon asou latè-a ki ka pwomoté adowasyon ki pi. Ki mannyè ou ka santi konsèné ògannizasyon sala? Pitèt ou ka santi menm kon zapòt Pita, lè i té di Jézi: “Senyè, kilès nou kay alé jwenn? Sé ou ki ni pawòl-la ki ka bay moun lavi étonnèl-la.” (Jan 6:68) Èk sa vwé! Ki koté nou té kay yé si i pa té pou ògannizasyon Jéhova? Anfen, sé ògannizasyon sala Jézi ka sèvi pou ban nou tout sa nou bizwen pou nou sa wèsté fidèl pou Bondyé. I ka ban nou étwennman pou nou sa pwéché byen, èk pou nou sa fè minis nou adan an mannyè pou touché tjè moun. Èk osi Jézi ka édé nou pou “mété an kawaktè ki nèf,” pou nou sa kontiné plè Papa nou Jéhova.—Èfés. 4:24.

14. Diwan tan COVID-la ki bennéfis ou twapé paski ou an ògannizasyon Jéhova?

¹⁴ Jézi ka osi ban nou bon diwèksyon an tan ki difisil. Pou ègzanp diwan tan COVID-la, moun an latè-a pa té sav sa pou fè. Kanmenm, Jézi sèvi ògannizasyon-an pou ban nou bon diwèksyon pou nou sa wèsté sòv. Ògannizasyon-an té ankouwajé nou pou mété mas lè nou an piblik, èk pou tjenn distans nou lè nou anpami moun. Sé ansyen-an té jwenn ankouwajman pou kwiyé sé fwè èk sè-a an kongwigasyon yo souvan. Alò an mannyè sala, sé ansyen-an té kay sav sa sé fwè èk sè-a té bizwen pou yo wèsté sòv, an bon santé, èk pou yo wèsté pwé Jéhova. (Izay. 32:1, 2) Osi, nou wisivwè bon diwèksyon èk bon ankouwajman hòd sé wapò Pwensipal Konmité-a.

15. Diwan tan COVID-la ki diwèksyon nou té twapé konsèné mannyè pou tjenn sé mitin nou-an, èk fè twavay pwèchman-an? Èk kisa ki té wézilta-a?

¹⁵ Diwan tan COVID-la, nou wisivwè bon diwèksyon konsèné mannyè pou tjenn sé mitin nou-an, èk mannyè pou fè twavay pwèchman-an. Konsa, vitman nou koumansé atandé mitin, asanblé, èk konvansyon asou intannèt-la. Èk osi, nou jis koumansé ékwi lèt, èk sèvi téléfòn-lan pou pwéché bay moun. Ès Jéhova té benni éfò nou? Absoliman! Paski an chay ofis bwanch ja di, diwan tan COVID-la plizyè moun koumansé pwéché kon pwoklanmatè. Anfen, an chay Témwen Jéhova té ni bèl èspéyans an minis-la diwan tan sala.—Gadé bwèt-la “ Jéhova Ka Benni Twavay Pwèchman Nou.”

16. Ki konfyans nou sa ni?

¹⁶ Diwan tan COVID-la, adan moun té kwè ògannizasyon-an té ka pwan twòp pwokosyon. Mé èvidans-lan ka moutwé, tout sé diwèksyon-an ògannizasyon-an té ka ban nou té apwopwiyab. (Maf. 11:19) Èk tout sa ka moutwé Jézi ka diwèkté pèp li. Alò lè nou mèdité asou sa, sa ka bati konfyans nou ki, népòt difikilté nou pé èspéyansé an tan pou vini, Jéhova èk Gasonʼy kay toujou épi nou.—Li Hibrou 13:5, 6.

17. Ki mannyè ou santi pou ni Jézi kon gadyenn ou?

¹⁷ Nou ni an chay bennédiksyon paski nou ni Jézi kon gadyenn nou! Pou ègzanp, nou adan yon ògannizasyon ki ni lilyon magwé nou ni diféwan kilti, nou sòti adan diféwan nasyon, èk nou ka palé diféwan langaj. Nou tout ka jwenn an chay bon enstwiksyon ki bazé asou Pawòl Bondyé èk étwennman pou nou sa pwéché byen. An plis di sa, nou chak ka twapé èd pou mété kawaktè nèf-la èk osi nou ka apwann mannyè pou enmen yonn a lòt. Alò kon pèp Bondyé, nou ni an chay wézon pou sipòté gadyenn nou Jézi Kwi!